Tebthida

Saturday, November 26, 2016

នាយករដ្ឋមន្ត្រីជំរុញស្ថាប័នពាក់ព័ន្ធឲ្យផ្ដល់អាទិភាពនិងសិទ្ធិអំណាចដល់ជនពិការ

ក្រុមតន្ត្រីមូលនិធិជនពិការប្រគំតន្ត្រីនៅចំណុចស្តុបអាងទឹកអូឡាំពិក នៅថ្ងៃទី៣០ ខែមិថុនា ឆ្នាំ២០១៦។ RFA/Um Raingsy

លោកនាយករដ្ឋមន្ត្រី ហ៊ុន សែន ជំរុញស្ថាប័នពាក់ព័ន្ធឲ្យផ្ដល់អាទិភាព និងសិទ្ធិអំណាចដល់ជនពិការ ដើម្បីបង្ហាញពីការយកចិត្តទុកដាក់ និងលើកកម្ពស់សិទ្ធិជនពិការកម្ពុជា។ ការលើកឡើងរបស់លោក ហ៊ុន សែន នៅមុនការប្រារព្ធទិវាជនពិការអន្តរជាតិ នៅថ្ងៃទី៣ ខែធ្នូ ខាងមុខ។

ប្រមុខរដ្ឋាភិបាលលោកនាយករដ្ឋមន្ត្រី ហ៊ុន សែន អះអាងថា ទិវាជនពិការអន្តរជាតិ និងខួបលើកទី១៨ ទិវាជនពិការកម្ពុជា សម្រាប់ឆ្នាំ២០១៦ នេះ ប្រារព្ធឡើងក្រោមប្រធានបទ «ផ្ដល់អាទិភាពនិងសិទ្ធិអំណាចដល់ជនពិការក្នុងគ្រប់វិស័យដើម្បីសង្គមមួយគ្មានពិការភាព»។

ការលើកឡើងរបស់លោកនាយករដ្ឋមន្ត្រី ហ៊ុន សែន នៅពេលនេះ ធ្វើឡើងនៅក្នុងសារាចរណែនាំស្ដីពីការចាត់តាំងខួបលើកទី៣៤ ទិវាជនពិការអន្តរជាតិ និងខួបលើកទី១៨ ទិវាជនពិការកម្ពុជា ដែលចេញផ្សាយនៅថ្ងៃទី២៥ ខែវិច្ឆិកា។

លោកនាយករដ្ឋមន្ត្រី ហ៊ុន សែន មានប្រសាសន៍តាមសារាចរណែនាំនេះថា កម្ពុជានឹងប្រារព្ធទិវាជនពិការនេះឡើង ដើម្បីរំលឹកដល់ការអនុវត្តច្បាប់ស្ដីពីកិច្ចការពារ និងលើកកម្ពស់ជនពិការ និងបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាលលើវិស័យពិការភាព ជាពិសេសសុខុមាលភាពរបស់ជនពិការកម្ពុជា ស្របតាមអនុសញ្ញាស្ដីពីសិទ្ធិជនពិការទសវត្សជនពិការប្រចាំតំបន់អាស៊ី និងប៉ាស៊ីហ្វិក និងយុទ្ធសាស្ត្រជាតិស្ដីពីពិការភាពឆ្នាំ២០១៤-២០១៨។

នៅក្នុងសារាចរណែនាំដដែល លោកនាយករដ្ឋមន្ត្រី ហ៊ុន សែន បានណែនាំទៅកាន់ក្រសួងពាក់ព័ន្ធឲ្យប្រារព្ធកម្មពិធីអបអរទិវានេះ ព្រមទាំងផ្សព្វផ្សាយ និងសរសេរពាក្យស្លោក ធ្វើយ៉ាងណាផ្ដល់អាទិភាព និងសិទ្ធិអំណាចដល់ជនពិការក្នុងគ្រប់វិស័យ ដើម្បីសង្គមមួយគ្មានពិការភាព ពិសេសកាត់បន្ថយភាពក្រីក្ររបស់ជនពិការតាមរយៈការផ្ដល់ឱកាសការងារស្មើគ្នា។

ទាក់ទិននឹងការជំរុញរបស់លោកនាយករដ្ឋមន្ត្រី ហ៊ុន សែន ជំរុញលើកកម្ពស់សិទ្ធិជនពិការនៅពេលនេះ ត្រូវបាននាយកអង្គការជនពិការកម្ពុជា លោក ងិន សៅរ័ត្ន បង្ហាញការគាំទ្រចំពោះការលើកឡើងនេះ ប៉ុន្តែលោកថា សព្វថ្ងៃនេះជនពិការកម្ពុជា នៅតែមិនទាន់មានសិទ្ធិដូចពលរដ្ឋដទៃទៀតទេ។ លោកថា ស្ថានភាពរស់នៅរបស់ជនពិការកម្ពុជា មានភាពក្រខ្សត់ និងទុរភិក្ស។

លោក ងិន សៅរ័ត្ន បានជំរុញឲ្យរដ្ឋាភិបាល និងស្ថាប័នពាក់ព័ន្ធឲ្យបន្តជួយគិតគូរពីជីវភាពរស់នៅ និងសិទ្ធិជនពិការឲ្យបានច្រើនថែមទៀត៖ «»។

ទោះជាយ៉ាងណា សង្គមស៊ីវិល និងតំណាងជនពិការនៅតែយល់ថា ទោះជាសិទ្ធិជនពិការមានចែងនៅក្នុងមាត្រា១ នៃសេចក្ដីប្រកាសជាសកលឆ្នាំ១៩៤៨ របស់អង្គការសហប្រជាជាតិ ស្ដីពីសិទ្ធិមនុស្ស ហើយប្រមុខរដ្ឋាភិបាល លោក ហ៊ុន សែន តែងជំរុញឲ្យលើកកម្ពស់សិទ្ធិជនពិការក្តី ផ្ទុយទៅវិញ ជនពិការកម្ពុជា នៅតែមិនទាន់ទទួលបានសិទ្ធិឱកាសស្មើគ្នាដូចមនុស្សទូទៅនៅឡើយ។

បន្ថែមលើនេះ សង្គមស៊ីវិល និងជនពិការ ក៏ស្នើឲ្យរដ្ឋាភិបាលបន្តអនុវត្តច្បាប់ជនពិការ និងអនុសញ្ញាសិទ្ធិជនពិការ ដើម្បីធានានូវសិទ្ធិ និងការរស់នៅរបស់ជនពិការឲ្យមានសេចក្ដីថ្លៃថ្នូរ និងស្មើភាពគ្នាក្នុងសង្គម៕

អាជ្ញាធរចុះពិនិត្យទីតាំងកែច្នៃវល្លិរមៀតមួយកន្លែងនៅខេត្តកោះកុង

ទីតាំងកែច្នៃវល្លិរមៀតមួយកន្លែង នៅឃុំឫស្សីជ្រំ ស្រុកថ្មបាំង ខេត្តកោះកុង។ រូបថតថ្ងៃទី២៥ វិច្ឆិកា ឆ្នាំ២០១៦. RFA/Ou Banung

អាជ្ញាធរពាក់ព័ន្ធពីក្រសួងបរិស្ថាន និងក្រសួងកសិកម្ម រួមនឹងអាជ្ញាធរមូលដ្ឋាននៅរសៀលថ្ងៃទី២៥ ខែវិច្ឆិកា ចុះពិនិត្យទីតាំងកែច្នៃវល្លិរមៀតមួយកន្លែងនៅឃុំឫស្សីជ្រំ ស្រុកថ្មបាំង ខេត្តកោះកុង។ ការចុះពិនិត្យនេះ ក្រោយពីក្រសួងបរិស្ថាន កាលល្ងាចពីថ្ងៃទី២៤ ខែវិច្ឆិកា បានបញ្ជាឲ្យផ្អាកទីតាំងកែច្នៃនោះជាបន្ទាន់។

ទោះយ៉ាងណាក៏ដោយ មន្ត្រីអាជ្ញាធរដែលចុះទៅទីតាំងនោះផ្ទាល់ ពុំបានឆ្លើយសំណួររបស់អាស៊ីសេរី ថាតើអាជ្ញាធរមានវិធានការយ៉ាងណាចំពោះជនជាតិចិន មួយក្រុមដែលជាម្ចាស់ទីតាំងកែច្នៃវល្លិរមៀត ស្ថិតនៅក្រោយសាលាស្រុកថ្មបាំង នេះនៅឡើយ។

លិខិតរបស់ក្រសួងបរិស្ថានបញ្ជាក់ថា ក្រសួងបានរកឃើញការសាងសង់ទីតាំងកែច្នៃ និងគម្រោងប្រមូលវល្លិរមៀត នៅក្នុងតំបន់ការពារធម្មជាតិ ក្នុងភូមិសាស្ត្រខេត្តនេះ ដោយក្រុមហ៊ុនចំនួន២ គឺក្រុមហ៊ុន ជីនយ័ន ហ្វីងលាន ត្រេដីង (Jinyian Huanglian Trading) និងក្រុមហ៊ុន ឆៃ ជីងហ៊ង គ្រុប (Chhay Ching Heang Group)។

ប្រជាពលរដ្ឋដែលរស់នៅទីតាំងនោះ សុទ្ធតែបានដឹងពីការរៀបចំទីតាំងផលិត និងកែច្នៃវល្លិរមៀតនេះ។ ពលរដ្ឋទាំងនោះ ហាក់មិនហ៊ានបញ្ចេញព័ត៌មានទាក់ទិនអាជីវកម្មនោះទេ ដោយគ្រាន់តែអោយអាស៊ីសេរី ដឹងថា ទីតាំងដែលអាជ្ញាធរទើបចុះទៅពិនិត្យនេះជារបស់ក្រុមហ៊ុនចិន ដែលទើបនឹងរៀបចំបង្កើតថ្មីៗ ប្រមាណជាង ១ខែប៉ុណ្ណោះ។

ពលរដ្ឋមួយរូបថ្លែងក្នុងលក្ខខណ្ឌសុំមិនបញ្ចេញអត្តសញ្ញាណបានអោយអាស៊ីសេរី ដឹងថា អាជ្ញាធរស្រុក ពិតជាបានដឹងពីការរៀបចំទីតាំង ត្រៀមនឹងផលិត និងកែច្នៃវល្លិរមៀតនេះមែន។ ប៉ុន្តែពលរដ្ឋនោះមិនបានដឹងថា ទីតាំងនោះបើកស្របច្បាប់ ឬយ៉ាងណានោះទេ ព្រោះគាត់មិនដែលបានចូលទៅទីតាំងនោះឡើយ ដោយទីតាំងនោះមានអ្នកយាម និងមិនអនុញ្ញាតអោយនរណាចូលឡើយ។

យោងតាមលិខិតសុំផ្អាករបស់ក្រសួងបរិស្ថានបញ្ជាក់ថា ការកែច្នៃវល្លិរមៀតជាអំពើផ្ទុយនឹងច្បាប់ស្ដីពីតំបន់ការពារធម្មជាតិ ហើយការប្រមូល និងកែច្នៃវល្លិរមៀត និងបង្កឲ្យមានផលប៉ះពាល់ធ្ងន់ធ្ងរដល់បរិស្ថាន សង្គម ធនធានជីវចម្រុះ និងប្រព័ន្ធអេកូឡូស៊ី។

ទាក់ទងនឹងវល្លិរមៀតនេះដែរ កាលពីចុងខែមេសា ឆ្នាំ២០១២ ប្រធានអង្គការការពារធនធានធម្មជាតិ លោក ឈុត វុទ្ធី ត្រូវបានប៉េអឹមស៊ីឈ្នួលយាមក្រុមហ៊ុន ធីមប៊ឺ ហ្គ្រីន (Timber Green) បាញ់សម្លាប់នៅស្រុកថ្មបាំង ខេត្តកោះកុង នៅពេលដែលលោក និងអ្នកកាសែតពីរនាក់ ចុះទៅថតគំនរវល្លិរមៀតក្នុងបរិវេណក្រុមហ៊ុន។ ក្រុមហ៊ុន ធីមប៊ី ហ្គ្រីន នោះ ជារបស់ឧកញ៉ា ទ្រី ភាព ដែលជាមនុស្សស្និទ្ធនឹងលោក ហ៊ុន សែន និងជាអ្នកទទួលសិទ្ធិកាប់ព្រៃសម្អាតអាងទំនប់វារីអគ្គិសនីតាតៃ។

តាមព័ត៌មានស៊ើបអង្កេតមួយ ផលិតដោយម្ចាស់ជំនួយរបស់អង្គការការពារធនធានធម្មជាតិ បង្ហាញថា វល្លិរមៀតមានសារធាតុម្យ៉ាងដែលអាចផ្សំជាថ្នាំអំហ្វេតាមីន (Amphetamine) ឬថ្នាំញៀន។ព័ត៌មាននោះសន្និដ្ឋានថា លោក ឈុត វុទ្ធី ត្រូវបានសម្លាប់ ដោយសារតែលោកបើកកកាយបទល្មើសចម្រាញ់វល្លិរមៀត ឬប៉ះពាល់ដល់មូលដ្ឋានផលិត និងឈ្មួញអំហ្វេតាមីន នៅកម្ពុជា។ ដើម្បីចម្រាញ់វល្លិរមៀតបាន អ្នកចម្រាញ់ចាំបាច់ត្រូវមានឧបករណ៍ទំនើបៗ និងគ្រឿងផ្សំសំខាន់ៗមួយចំនួនទៀតរួមមាន អាស៊ីដ អំបិល និងថ្នាំគីមី ជាដើម៕

ប្រធានសភាកម្ពុជា-ឡាវពិភាក្សាពីការជំរុញកិច្ចសហការនិងបោះបង្គោលព្រំដែន

លោក ហេង សំរិន ប្រធានរដ្ឋសភា ថ្លែងក្នុងសិក្ខាសាលាស្ដីពីសេចក្ដីព្រាងច្បាប់សហជីព នាវិមានរដ្ឋសភា នៅថ្ងៃទី៩ ខែមីនា ឆ្នាំ២០១៦។ RFA/Brach Chev

ប្រធានរដ្ឋសភាកម្ពុជា និងឡាវ ពិភាក្សាគ្នាក្នុងការជំរុញអោយរដ្ឋាភិបាលពង្រឹងកិច្ចសហការតាមព្រំដែន និងការបោះបង្គោលព្រំដែនរវាងប្រទេសទាំង២។

សេចក្ដីប្រកាសពីលទ្ធផលជំនួបរវាងប្រធានរដ្ឋសភាកម្ពុជា លោក ហេង សំរិន និងប្រធានរដ្ឋសភាឡាវ អ្នកស្រី ប៉ានី យ៉ាថរទូ (PanyYathotou) នៅថ្ងៃទី២៦ ខែវិច្ឆិកា នេះ អោយដឹងថា ភាគីទាំង២បានពិភាក្សាការងារមួយចំនួនចាប់តាំងពីកិច្ចសហការរវាងសភានៃប្រទេសទាំង២ ការពង្រឹងទំនាក់ទំនង បង្កើនសមត្ថភាពសមាជិកសភា ការអនុវត្តកិច្ចព្រមព្រៀងរវាងប្រទេសទាំង២ រហូតដល់ទំនាក់ទំនងព្រំដែន។

ប្រធានសភាឡាវ អ្នកស្រី ប៉ានី យ៉ាថរទូ បានសំណូមពរដល់រដ្ឋសភាកម្ពុជា អោយលើកកម្ពស់ទំនាក់ទំនងរវាងអាជ្ញាធរ និងប្រជាពលរដ្ឋជាប់ព្រំដែនអោយមានកិច្ចសហប្រតិបត្តិការគ្នាល្អបន្ថែមទៀតក្នុងវិស័យសេដ្ឋកិច្ច ទេសចរណ៍ និងវប្បធម៌។

ចំណែកប្រធានរដ្ឋសភាកម្ពុជា លោក ហេង សំរិន បានតបវិញពីសារសំខាន់នៃការលើកកម្ពស់ជីវភាពប្រជាជនតាមបណ្ដោយព្រំដែន និងកិច្ចសហប្រតិបត្តិការផ្នែកសន្តិសុខ។

លោក ហេង សំរិន បន្ថែមថា រដ្ឋសភាប្រទេសទាំងពីរគួរជំរុញរដ្ឋាភិបាលរៀងៗខ្លួន ពិភាក្សាដោះស្រាយបញ្ហាដែលនៅសេសសល់ ឈានទៅបញ្ចប់ការបោះបង្គោលព្រំដែនឲ្យបានឆាប់ ដើម្បីប្រែក្លាយព្រំដែននៃប្រទេសទំាងពីរជាព្រំដែនមិត្តភាព សន្តិភាព កិច្ចសហប្រតិបត្តិការ និងការអភិវឌ្ឍ។

ប្រធានរដ្ឋសភាឡាវ អ្នកស្រី ប៉ានី យ៉ាថរទូ បានដឹកនាំប្រតិភូមកទស្សនកិច្ចកម្ពុជា ពីថ្ងៃទី២៥ ហើយនឹងត្រូវបញ្ចប់នៅថ្ងៃទី២៧ ខែវិច្ឆិកា៕

លោក ហ៊ុន សែន ថាការកែប្រែខ្នាតផែនទីដើម្បីងាយស្រួលបោះបង្គោលព្រំដែន

នាយករដ្ឋមន្ត្រីវៀតណាម លោក ង្វៀង តាន់យុង (Nguyen Tan Dung) [ឆ្វេង] និងនាយករដ្ឋមន្ត្រីកម្ពុជា លោក ហ៊ុន សែន សម្ពោធបង្គោលព្រំដែនលេខ៣០ និងកំណត់ផ្លូវជាតិ ក្បែរច្រកទ្វារព្រំដែនក្នុងខេត្តរតនគិរី និងខេត្តយ៉ាឡាយ ប្រទេសវៀតណាម កាលពីព្រឹកថ្ងៃទី២៦ ខែធ្នូ ឆ្នាំ២០១៥។ RFA/Ratha Visal

ប្រមុខដឹកនាំគណបក្សប្រជាជនកម្ពុជា បញ្ជាក់ថា ការកែប្រែខ្នាតផែនទីបោន (Bonne) ១/១០០.០០០ (មួយលើមួយរយពាន់) មកជាខ្នាតផែនទី យូ.ធី.អឹម (UTM) ១/៥០.០០០ (មួយលើហាសិបពាន់) វិញ គឺដើម្បីងាយស្រួលក្នុងការកំណត់ទីតាំងបោះបង្គោលព្រំដែន។

ឆ្លើយតបទៅនឹងសំណួររបស់អ្នកសួរតាមបណ្ដាញទំនាក់ទំនងសង្គមហ្វេសប៊ុក (Facebook) ឈ្មោះ Seangmeng Chhe លោក ហ៊ុន សែន ឲ្យដឹងនៅថ្ងៃទី២៦ ខែវិច្ឆិកា ថា មូលហេតុដែលរដ្ឋាភិបាលត្រូវការបម្លែងខ្នាតផែនទីឲ្យបានកាន់តែធំនេះ គឺដើម្បីកុំឲ្យពិបាកក្នុងការកំណត់បោះបង្គោលព្រំដែនរវាងកម្ពុជា និងវៀតណាម។

លោកនាយករដ្ឋមន្ត្រីបង្ហោះនៅក្នុងបណ្ដាញទំនាក់ទំនងសង្គមរបស់លោកថា ខ្នាតផែនទី ១លើ ១០០ពាន់ គឺលំបាករកចំណុចដើម្បីបោះបង្គោលព្រំដែន ព្រោះវាតូចពេក។ ដូចនេះត្រូវផ្ទេរមកផែនទី យូ.ធី.អឹម ខ្នាត ១លើ ៥០ពាន់វិញ ទើបងាយស្រួលវាស់វែង និងរកចំណុចដើម្បីបោះបង្គោលព្រំដែន។ លោកបញ្ជាក់ថា ដើម្បីធានាភាពត្រឹមត្រូវទើបភាគីកម្ពុជា និងវៀតណាម ឯកភាពសរសេរលិខិតរួមគ្នាសុំជំនាញការរបស់បារាំង មកជួយផ្ទេរខ្នាតផែនទីនេះ។

ប្រធានគណបក្សប្រជាជនកម្ពុជា រូបនេះបញ្ជាក់ថា រដ្ឋាភិបាលបារាំង បានយល់ព្រមតាមសំណើសុំរបស់លោកហើយ ប៉ុន្តែត្រូវរង់ចាំការឆ្លើយតបជាផ្លូវការប៉ុណ្ណោះ។ លើសពីនេះទៀត លោក ហ៊ុន សែន បានពន្យល់យ៉ាងពិស្ដារនៅលើហ្វេសប៊ុករបស់លោកពីរបៀបនៃការបង្រួញខ្នាតផែនទីដែលគេអាចផ្ទេរខ្នាតផែនទីនេះ រហូតដល់ ១ លើ ១០ពាន់ក៏មានដែរ។ ការពង្រីកផែនទីឲ្យកាន់តែធំនេះ គឺដើម្បីងាយស្រួលក្នុងការកំណត់ទីតាំងបោះបង្គោលព្រំដែន។

ទាក់ទងនឹងរឿងនេះដែរ មេដឹកនាំបក្សប្រឆាំង លោក សម រង្ស៊ី កាលពីថ្ងៃទី២៥ ខែវិច្ឆិកា បានថ្លែងគាំទ្រគំនិតរបស់លោកនាយករដ្ឋមន្ត្រី ហ៊ុន សែន ដែលចង់ផ្លាស់ប្ដូរខ្នាតផែនទីនេះ។ លោកថា អ្វីដែលលោក ហ៊ុន សែន លើកឡើង គឺជាបំណងប្រាថ្នាដែលលោកតែងតែគិតចង់បានដែរ៕

Friday, November 25, 2016

មន្ត្រីក្រសួងរ៉ែថានឹងសហការដើម្បីទប់ស្កាត់ការលួចបូមខ្សាច់នាំចេញ

រដ្ឋលេខាធិការ និងជាអ្នកនាំពាក្យក្រសួងរ៉ែ និងថាមពល លោក ម៉េង សក្តិធារ៉ា (ឆ្វេង) ថ្លែងក្នុងកិច្ចប្រជុំនៅថ្ងៃទី២៥ ខែវិច្ឆិកា ឆ្នាំ២០១៦។ RFA/Kher Sonorng

នៅក្នុងកិច្ចប្រជុំរវាងសង្គមស៊ីវិល អ្នកធ្វើការក្នុងវិស័យឧស្សាហកម្ម និស្សារណកម្ម និងសកម្មជនបរិស្ថាន នៅអគ្គនាយកដ្ឋានប្រេងកាត នៃក្រសួងរ៉ែ និងថាមពល នៅថ្ងៃទី២៥ ខែវិច្ឆិកា មន្ត្រីជាន់ខ្ពស់ក្រសួងនេះ បានស្នើឲ្យមានពលរដ្ឋក្នុងសហគមន៍នៃខេត្តកោះកុង និងសកម្មជនបរិស្ថាន ស្ម័គ្រចិត្តធ្វើភ្នាក់ងាររបស់ខ្លួន ដើម្បីទប់ស្កាត់បទល្មើសបូមខ្សាច់។ ការអះអាងនេះ នៅពេលដែលសកម្មជនបរិស្ថានឆ្លើយតបថា នៅតែមានសាឡង់បូមខ្សាច់បន្តបូមនៅលើដែនសមុទ្ទនៃខេត្តនេះដដែល។

ក្រសួងរ៉ែ និងថាមពល កំពុងធ្វើកំណែទម្រង់អភិបាលកិច្ចក្នុងវិស័យនិស្សារណកម្ម ដោយស្នើឲ្យមានការចូលរួមពីសហគមន៍ សង្គមស៊ីវិល និងភាគីពាក់ព័ន្ធ។

រដ្ឋលេខាធិការ និងជាអ្នកនាំពាក្យក្រសួងរ៉ែ និងថាមពល លោក ម៉េង សក្តិធារ៉ា មានប្រសាសន៍នៅថ្ងៃទី២៥ ខែវិច្ឆិកា ថា ការចងក្រងឲ្យមានជំនួបនេះ ព្រោះការធ្វើអាជីវកម្មបូមខ្សាច់នាំចេញនៅខេត្តកោះកុង ជាករណីសិក្សាមួយធំ ដែលតម្រូវឲ្យភាគីពាក់ព័ន្ធលើកមកពិភាក្សាបន្ទាប់ពីក្រសួងមានចំណាត់ការផ្អាកការនាំចេញទៅក្រៅប្រទេស។

លោកថា បន្ទាប់ពីផ្អាកការនាំចេញ បានធ្វើឲ្យសកម្មភាពបូមខ្សាច់នៅផ្នែកខាងក្រោមនៃដែនសមុទ្ទត្រូវផ្អាកទាំងស្រុង ហើយនៅសល់តែអាជីវកម្មតូចៗ មួយចំនួននៅផ្នែកខាងលើនៃតំបន់ស្ទឹងអូរប៉ុណ្ណោះ ដែលនៅបន្តសកម្មភាពបូមសម្រាប់ផ្គត់ផ្គង់វិស័យសំណង់ក្នុងស្រុក៖ «ភារកិច្ចរបស់យើងឥឡូវនេះត្រូវតាមដានមើលសិន ថាតើវាផ្អាកពិតប្រាកដ ឬអត់ ព្រោះបារម្ភខ្លាចក្រុមហ៊ុនមួយចំនួននៅលួចធ្វើសកម្មភាពបូម។ យើងជជែកគ្នាបង្កើតយន្តការដើម្បីតាមដានជាមួយគ្នា ការពារកុំឲ្យលួចប្រព្រឹត្តបទល្មើសហ្នឹង»។
ថ្វីត្បិតតែមានការអះអាងពីមន្ត្រីក្រសួងរ៉ែថា ផ្អាកការនាំចេញក្ដី សកម្មជនចលនាមាតាធម្មជាតិ លោក សន ចាន់ដារ៉ា ថ្លែងថា សហគមន៍និងពួកគេចុះល្បាតនៅតែឃើញសកម្មភាពបូមខ្សាច់ ដែលមាននៅចំណុចកោះស្មាច់ ក្បែរភ្នំត្រងោល ក្នុងភូមិសាស្ត្រ ឃុំតាតៃក្រោម ស្រុកកោះកុង និងចំណុចខសក្រហម ក្បែរកោះស្រឡៅ ឃុំកោះកាពិ ស្រុកកោះកុង ជាដើម។

លោកថា ក្រសួងមិនទាន់មានចំណាត់ការជាក់លាក់ណាមួយក្នុងការចាត់ការបទល្មើសជួញដូរខ្សាច់នេះទេ៖ «យើងនៅតែបន្តគោលជំហរមួយគឺ យើងអត់យល់ព្រម អត់ពេញចិត្តក្នុងការបន្តអាជ្ញាប័ណ្ណទៅក្រុមហ៊ុនមួយចំនួន ដែលធ្វើអាជីវកម្មខ្សាច់នៅក្នុងខេត្តនេះទេ ព្រោះទំហំនៃផលប៉ះពាល់សហគមន៍គឺវាធំធេងណាស់ ប៉ុន្តែនៅពេលប្រជុំពីរលើកនេះ ក្រសួងដូចជាការពារក្រុមហ៊ុនជាជាងផ្ដល់ផលប្រយោជន៍ដល់សហគមន៍មូលដ្ឋាន»។

ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ ក៏បានចូលរួមក្នុងកិច្ចប្រជុំនេះដែរ។ លោកមានប្រសាសន៍ថា សង្គមស៊ីវិលមិនអំពាវនាវឲ្យមានការផ្អាកការបូមខ្សាច់ទូទាំងប្រទេសនោះទេ គឺផ្ដោតតែលើការបូមខ្សាច់សមុទ្ទដែលជាកម្មវត្ថុនៃការនាំចេញ។ លោកថា ឱកាសនៃការកែទម្រង់នេះ សុំឲ្យសហគមន៍និងសង្គមស៊ីវិលចូលរួម ដើម្បីធានាការបូមនេះមិនមានផលប៉ះពាល់ដល់សហគមន៍ដូចពេលកន្លងទៅ។

លោក សន ជ័យ៖ «ការគាំទ្រ និងការចូលរួមពីសហគមន៍គឺសំខាន់ណាស់ ព្រោះប្រជាពលរដ្ឋអ្នកដែលនៅមូលដ្ឋានផ្ទាល់តែម្ដង អ៊ីចឹងគាត់អាច គាត់អាចដឹង គាត់អាចរាយការណ៍មកក្រសួង មកសង្គមស៊ីវិលដែលធ្វើការផ្នែកហ្នឹង។ ក្រសួងរ៉ែ និងថាមពលបានបើកឱកាសឲ្យមានការចូលរួមពីសហគមន៍នេះជាចំណុចវិជ្ជមានមួយ ជាជំហានមួយល្អ ដែលអាចសហគមន៍ និងរដ្ឋាភិបាលដើរជាមួយគ្នាសម្របសម្រួលដោយសង្គមស៊ីវិល»។

កាលពីថ្ងៃទី២៨ ខែតុលា រដ្ឋមន្ត្រីក្រសួងរ៉ែ និងថាមពល លោក ស៊ុយ សែម បានជូនដំណឹងទៅប្រធានអាជីវកម្មខ្សាច់ និងខ្សាច់ល្បាយភក់នៅតំបន់សមុទ្ទ ពីការផ្អាកបណ្ដោះអាសន្ននូវការផ្ដល់អាជ្ញាប័ណ្ណថ្មី និងការនាំចេញខ្សាច់នៅតំបន់សមុទ្ទ។ នៅថ្ងៃទី១ វិច្ឆិកា ក្រសួងដដែលបានស្នើឲ្យអគ្គនាយកដ្ឋានគយ និងរដ្ឋាករ និងអគ្គនាយកដ្ឋានកាំសាប ចាត់វិធានការផ្អាកការនាំចេញខ្សាច់ និងផ្អាកកប៉ាល់ចូលដឹកខ្សាច់នៅតំបន់សមុទ្ទ។

យ៉ាងនេះក្ដី អ្នកនាំពាក្យក្រសួងរ៉ែ បន្តអះអាងថា ស្របពេលផ្អាកការបូមខ្សាច់នាំចេញនេះ ក្រសួងក៏ស្ថិតនៅក្នុងការសិក្សាវាយតម្លៃអំពីតម្រូវការចាំបាច់ចំពោះការស្ដារព្រែក ស្ទឹង និងស្ដារប្រព័ន្ធផ្លូវទឹក ក្នុងគោលដៅថែរក្សាស្ទឹងទន្លេដែរ ដោយយកឱកាសនេះធ្វើពាណិជ្ជកម្មដើម្បីជាផលប្រយោជន៍ជាតិផង៕

ដីសម្បទាន ស្ទើរមិនផ្តល់ផលសោះដល់ពលរដ្ឋ

តំបន់ដីសម្បទានសេដ្ឋកិច្ចមួយកន្លែងក្នុងខេត្តក្រចេះដែលកើតមានជម្លោះដីធ្លីកាលពីពេលកន្លងមក។ រូបថត សហការី

រតនគិរីៈ ការសិក្សាមួយ ដែលបានសម្លឹងមើលទៅសម្បទានដីសេដ្ឋកិច្ច នៅក្នុងខេត្តរតនគិរីបានរកឃើញថា ក្រុមហ៊ុនដីសម្បទានទាំងនោះស្ទើរតែមិនបានផ្តល់ផលប្រយោជន៍អ្វីសោះ ដល់សហគមន៍មូលដ្ឋាន។

ថ្លែងនៅក្នុងពិធីសម្ពោធមួយ សម្រាប់ការសិក្សានេះ កាលពីថ្ងៃពុធ អ្នកស្រាវជ្រាវម្នាក់នៅក្នុងការសិក្សានេះ គឺលោកបណ្ឌិតនេត បរមី បាននិយាយថា សូម្បីតែការងារដែលបានបង្កើតឡើងដោយការមកដល់នៃដីសម្បទានសេដ្ឋកិច្ទនេះ ក៏មិនបានគ្រប់គ្រាន់ដែរ។

លោកបរមីថ្លែងថា៖« ៦០ភាគរយ [នៃអ្នកឆ្លើយសំណួរ] បាននិយាយថា ខណៈដែលដីសម្បទានសេដ្ឋកិច្ច បាននាំមកនូវការងារឲ្យពួកគេធ្វើ ប៉ុន្តែប្រាក់ចំណូលគឺមិនគ្រប់គ្រាន់ដើម្បីទ្រទ្រង់ដល់ជីវភាពគ្រួសាររបស់ពួកគេនោះទេ»។

លោកបន្តថា៖«ការងារភាគច្រើនបំផុត ពីដីសម្បទានសេដ្ឋកិច្ទ គឺការងារពិបាកៗ ធ្វើការច្រើនម៉ោងប្រាក់ខែទាបប្រឈមគ្រោះថ្នាក់ ហើយវាផ្ទុយទៅនឹងផ្នត់គំនិតរបស់ជនជាតិដើមភាគតិច ដែលស្រឡាញ់សេរីភាព»។ ការសិក្សានេះក៏បានរកឃើញផងដែរថា មានគ្រួសារចំនួន ៣០ ភាគរយបានជំពាក់បំណុលគេ។
លោក ទេព ប៊ុននី នាយកប្រតិបត្តិអង្គការសង្គ្រោះសត្វព្រៃកម្ពុជា (SCW) បាននិយាយថា វាមានដំណើរការយឺតយ៉ាវ ក្នុងការចេញប័ណ្ណកម្មសិទ្ធិដីធ្លីសមូហភាព។

លោកបណ្ឌិត ងិន ចន្ទរិទ្ធិ ជាអ្នកស្រាវជ្រាវបានឱ្យដឹងថា លោក និងសហការីរបស់លោកព្រួយបារម្ភថាវាចំណាយពេលរាប់ខែរហូតដល់ រាប់ឆ្នាំ នៅក្នុងដំណើរការចេញប័ណ្ណកម្មសិទ្ធិដីសមូហភាព ដែលបានជំរុញឲ្យមនុស្សមួយចំនួនដាក់ពាក្យសុំប័ណ្ណកម្មសិទ្ធិដីឯកជន។

នាយកអង្គការសង្គ្រោះសត្វព្រៃ SCW លោកប៊ុន នី បានឱ្យដឹងថា ប័ណ្ណកម្មសិទ្ធិដីឯកជន ដែលផ្តល់ឲ្យជនជាតិដើមភាគតិច គឺជាវត្ថុបញ្ចាំសម្រាប់ខ្ទីប្រាក់ពីមីក្រូហិរញ្ញវត្ថុ ដែលពួកគេមិនអាចរកលុយសងវិញបានឡើយ។

ប៉ុន្តែខណៈដែលការសិក្សានេះ បានបង្ហាញរូបភាពខ្មៅងងឹត ស្តីពីផលប៉ះពាល់នៃដីសម្បទានសេដ្ឋកិច្ទនេះ ប្រតិភូក្រសួងបរិស្ថាន នាយកតំបន់ការពារខាងកើត នៃដងទន្លេមេគង្គ លោកជូ សុភ័ក្រ្តកាលពីថ្ងៃពុធបានឱ្យដឹងថា លោកជឿជាក់ថាក្នុងរយៈពេលវែងពួកគេនឹងទទួលបានផលប្រយោជន៍។

លោកសុភ័ក្ត្រថ្លែងថា៖ «ខ្ញុំមិនមែនជាអ្នកសេដ្ឋកិច្ទទេប៉ុន្តែខ្ញុំគិតថា ក្រៅពីប្រាក់ចំណូលបានមកពី[ការជួលដី] គឺផលិតផលរបស់ពួកគេ ដែលផលិតបាន វានឹងផ្តល់ប្រយោជន៍ដល់ប្រទេសកម្ពុជា»។ «នៅក្នុងពេលអនាគតប្រសិនបើគេផលិត ផលិតផលក្នុងស្រុកហើយនាំចេញ នោះយើងអាចយកពន្ធលើផលិតផលនោះបាន»។

លោកសុភ័ក្ត្រ ក៏បានបញ្ជាក់ផងដែរថា ការផ្ទេរការទទួលខុសត្រូវកាលពីដើមឆ្នាំនេះ សម្រាប់ដីសម្បទានសេដ្ឋកិច្ច ពីក្រសួងបរិស្ថាន ទៅក្រសួងកសិកម្ម មានន័យថា ក្រសួងរបស់លោក ខ្វះយុត្តាធិការដើម្បីតាមដានកម្មវិធីទទួលខុសត្រូវសង្គម របស់ក្រុមហ៊ុនកាន់កាប់ដីសម្បទានទាំងនោះ។

ទោះជាយ៉ាងណា លោកបានសន្យាថា ក្រសួងបរិស្ថាននឹងពិនិត្យតាមដានឲ្យបានហ្មត់ចត់ លើការវាយតម្លៃផលប៉ះពាល់បរិស្ថាន ដែលនឹងគិតពីផលប្រយោជន៍សហគមន៍មូលដ្ឋានជាចម្បង។

ទន្ទឹមនឹងនេះដែរក្រសួងបរិស្ថាន បានធ្វើសិក្ខាសាលាមួយ នៅរាជធានីភ្នំពេញ កាលពីថ្ងៃពុធដើម្បីពិគ្រោះយោបល់ជាមួយសង្គមស៊ីវិល លើសេចក្តីព្រាងចុងក្រោយបំផុតនៃក្រមបរិស្ថាន។

តំណាងរបស់ក្រសួងបានបដិសេធធ្វើអត្ថាធិប្បាយលើកិច្ចប្រជុំនេះប៉ុន្តែលោកតឹក វណ្ណារ៉ា នាយកអង្គការ NGO Forum ថ្លែងថា ៥០ភាគរយ នៃអនុសាសន៍របស់អង្គការលោក រួមទាំងឃ្លាបន្ថែមលើបញ្ហាសិទិ្ធមនុស្ស និងការទទួលខុសត្រូវសង្គមរបស់ក្រុមហ៊ុន ត្រូវបានគេលើកយកមកពិភាក្សា។

អង្គការសង្គមស៊ីវិលលើកឡើងជាយូរមកហើយថាដីសម្បទានសេដ្ឋកិច្ចក្រៅពីធ្វើឲ្យអន្តរាយដល់ព្រៃឈើក៏ជាប្រភពនៃជម្លោះដីធ្លីផងដែរ៕

មេធាវីការពារក្ដីឲ្យនាយករដ្ឋមន្ត្រីមួយរូបទទួលមរណភាព

មេធាវីការពារក្ដីឲ្យលោកនាយករដ្ឋមន្ត្រី ហ៊ុន សែន និងមន្ត្រីជាន់ខ្ពស់របស់ស្ថាប័នជាតិជាច្រើនទៀត គឺលោក ការ សាវុត្ថ ទទួលមរណភាព នៅថ្ងៃទី២៥ វិច្ឆិកា ដោយរោគាពាធ ក្នុងអាយុ៧០ឆ្នាំ។

លោក ការ សាវុត្ថ ជាសមាជិកគណៈមេធាវីនៃព្រះរាជាណាចក្រកម្ពុជា ដែលចូលបម្រើការងារជាមេធាវីតាំងពីឆ្នាំ១៩៩៥។

ក្រៅពីតែការពារក្ដីដល់មន្ត្រីធំៗរបស់រដ្ឋាភិបាល លោក ការ សាវុត្ថ ក៏ធ្លាប់ធ្វើជាមេធាវីការពារក្ដីឲ្យអតីតប្រធានមន្ទីរសន្តិសុខ ស២១ ឬគុកទួលស្លែង លោក កាំង ហ្កេកអ៊ាវ ហៅ ឌុច ក្នុងសាលាក្ដីខ្មែរក្រហមផងដែរ៕

Tebthida

Saturday, November 26, 2016

នាយករដ្ឋមន្ត្រីជំរុញស្ថាប័នពាក់ព័ន្ធឲ្យផ្ដល់អាទិភាពនិងសិទ្ធិអំណាចដល់ជនពិការ

អាជ្ញាធរចុះពិនិត្យទីតាំងកែច្នៃវល្លិរមៀតមួយកន្លែងនៅខេត្តកោះកុង

ប្រធានសភាកម្ពុជា-ឡាវពិភាក្សាពីការជំរុញកិច្ចសហការនិងបោះបង្គោលព្រំដែន

លោក ហ៊ុន សែន ថាការកែប្រែខ្នាតផែនទីដើម្បីងាយស្រួលបោះបង្គោលព្រំដែន

Friday, November 25, 2016

មន្ត្រីក្រសួងរ៉ែថានឹងសហការដើម្បីទប់ស្កាត់ការលួចបូមខ្សាច់នាំចេញ

មន្ត្រីក្រសួងរ៉ែថានឹងសហការដើម្បីទប់ស្កាត់ការលួចបូមខ្សាច់នាំចេញ

ដីសម្បទាន ស្ទើរមិនផ្តល់ផលសោះដល់ពលរដ្ឋ

មេធាវីការពារក្ដីឲ្យនាយករដ្ឋមន្ត្រីមួយរូបទទួលមរណភាព

Advertisement

About Me

Saturday, November 26, 2016

Friday, November 25, 2016

មន្ត្រី​ក្រសួង​រ៉ែ​ថា​នឹង​សហការ​ដើម្បី​ទប់ស្កាត់​ការ​លួច​បូម​ខ្សាច់​នាំ​ចេញ

មន្ត្រីក្រសួងរ៉ែថានឹងសហការដើម្បីទប់ស្កាត់ការលួចបូមខ្សាច់នាំចេញ