Tebthida

Monday, December 19, 2016

ក្រុមជនពិការថាពុំមានឱកាសចូលរួមកិច្ចការសង្គមទោះបីជាពួកគាត់មានសមត្ថភាពក្ដី

សិក្ខាសាលាស្ដីពី ការដាក់បញ្ចូលពិការភាពក្នុងការងារកាត់បន្ថយហានិភ័យគ្រោះមហន្តរាយ នៅថ្ងៃទី១៩ ខែធ្នូ ឆ្នាំ២០១៦។ RFA/Rach Vingur

ក្រុមជនពិការអះអាងថា ពួកគាត់មិនត្រឹមតែមានសមត្ថភាពដើម្បីការពារខ្លួនឯងពីគ្រោះមហន្តរាយទេ តែក៏អាចជួយជនពិការដូចគ្នា និងអ្នកមានអវយវៈគ្រប់គ្រាន់ ឲ្យគេចផុតពីគ្រោះមហន្តរាយដែរ។ ការលើកឡើងនេះ នៅក្នុងកម្មវិធីដាក់បញ្ចូលពិការភាពក្នុងការងារកាត់បន្ថយហានិភ័យគ្រោះមហន្តរាយ។ ក្រុមជនពិការក៏អះអាងថា ថ្វីត្បិតតែពួកគាត់មានសមត្ថភាពក្ដី នៅតែមិនមានឱកាស ព្រោះការងារនៅក្នុងសង្គមខ្លះនៅតែមានការរើសអើង។

ក្រុមជនពិការអះអាងថា បើសិនពុំមានការរើសអើង ហើយបែរជាផ្ដល់ឱកាសដល់ពួកគាត់ដូចជាជនមានអវយវៈធម្មតា ក្នុងការបំពេញកិច្ចការងារសង្គមផ្សេងៗ ពួកគាត់ក៏មានសមត្ថភាពគ្រប់គ្រាន់ចូលរួមអភិវឌ្ឍប្រទេសជាតិ និងជួយសង្គ្រោះជនរងគ្រោះដទៃទៀតដែរ។

បុគ្គលិកអង្គការមូលនិធិកុមារពិការ កញ្ញា ហ៊ុន ស្រីណាក់ លើកឡើងថា ប្រសិនបើជនពិការត្រូវបានគេផ្ដល់ឱកាសឲ្យបានពេញលេញក្នុងកិច្ចការងារផ្សេងៗ ឬផ្ដល់តួនាទីខ្ពស់ក្នុងជួររដ្ឋាភិបាលឲ្យបានច្រើន ពេលនោះគឺអាចលុបបំបាត់ការរើសអើងចំពោះជនពិការ ហើយក៏ជាការផ្ដល់ក្ដីសង្ឃឹមដល់ជនពិការផ្សេងទៀត ឲ្យមានកម្លាំងចិត្ត និងចេះពុះពារក្នុងឆាកជីវិតដែរ៖ «ជួនកាលការទទួលបានអាហារូបករណ៍ទៅសិក្សានៅក្រៅប្រទេសមួយចំនួន គឺនៅមានការរើសអើងពិការភាព»។

ការលើកឡើងនេះ នៅក្នុងសិក្ខាសាលាស្ដីពីការដាក់បញ្ចូលពិការភាពក្នុងការងារកាត់បន្ថយហានិភ័យគ្រោះមហន្តរាយ ដែលរៀបចំឡើងដោយអង្គការជនពិការកម្ពុជា នៅភោជនីយដ្ឋានទន្លេបាសាក់២ រាជធានីភ្នំពេញ នៅថ្ងៃទី១៩ ធ្នូ។ កម្មវិធីដែលមានអ្នកចូលរួមភាគច្រើនជាជនពិការប្រហែល ៥០នាក់ មានបំណងចង់ផ្សព្វផ្សាយពីគម្រោង ឬការជំរុញឲ្យមានការគិតគូរដាក់បញ្ចូលពិការភាពនៅក្នុងផែនការ ឬការងារគ្រប់គ្រងគ្រោះមហន្តរាយរបស់ក្រសួងស្ថាប័នពាក់ព័ន្ធ។

កញ្ញា ហ៊ុន ស្រីណាក់ បន្តថា បើសិនមានការផ្ដល់ឱកាសដល់ជនពិការលើកឡើងអំពីទុក្ខលំបាកផ្សេងៗរបស់ពួកគាត់ ទៅពិភាក្សាជាមួយមន្ត្រីថ្នាក់ភូមិ-ឃុំ នឹងអាចមានដំណោះស្រាយទាន់ពេលវេលាសម្រាប់ជនពិការ គេចពីផុតពីគ្រោះមហន្តរាយ និងជួយផ្សព្វផ្សាយបន្តប្រាប់ទៅដល់អ្នកដទៃទៀត។

ទោះបីជាយ៉ាងណាក្ដី ក្រុមជនពិការលើកឡើងថា ពួកគាត់នៅតែជួបប្រទះការខ្វះទីជម្រកអំឡុងពេលមានគ្រោះមហន្តរាយ រស់នៅក្នុងភាពក្រីក្រ និងពឹងពាក់ការឧបត្ថម្ភពីគ្រួសារ ខ្វះឧបករណ៍ជំនួយ ដូចជារទេះរុញ ឈើច្រត់ និងដៃជើងសិប្បនិមិត្ត ខ្វះមជ្ឈមណ្ឌល ឬសាលារៀនផ្ដល់វិជ្ជាជីវៈដល់ជនពិការ និងខ្វះលទ្ធភាពទទួលបានសេវាសុខភាព ជាដើម។

នាយកប្រតិបត្តិអង្គការជនពិការកម្ពុជា លោក ងិន សៅរ័ត្ន បញ្ជាក់ថា មូលហេតុដែលទាមទារឲ្យមានការដាក់បញ្ចូលពិការភាពក្នុងការងារកាត់បន្ថយហានិភ័យគ្រោះមហន្តរាយ ព្រោះដោយសាររយៈពេលកន្លងទៅ ការសាងសង់ទីទួលមានសុវត្ថិភាព និងជម្រកសម្រាប់គេចពីគ្រោះពីធម្មជាតិ មិនបានធ្វើឡើងស្របតាមតម្រូវការជនពិការឡើយ ហើយអាជ្ញាធរខ្លះនៅតែមិនទាន់អាចបែងចែកថា មនុស្សប្រភេទណាខ្លះជាអ្នកពិការ និងត្រូវយកចិត្តទុកដាក់ជាអាទិភាពនៅពេលកើតមានគ្រោះមហន្តរាយម្ដងៗ៖ «អាជ្ញាធរខ្លះនៅមិនទាន់ដឹងថា អ្នកដែល គ ថ្លង់ និងងងឹតភ្នែកជាដើម ជាជនពិការទេ ទាល់តែអ្នកនោះដាច់ដៃដាច់ជើង ទើបហៅជនពិការ»។

នាយកប្រតិបត្តិអង្គការជនពិការកម្ពុជា ក៏បង្ហាញថា នៅកម្ពុជា គឺមានជនពិការប្រហែល ១ម៉ឺន ៧ពាន់នាក់ ដែលទាមទារការលើកទឹកចិត្ត និងផ្ដល់តម្លៃចំពោះសមត្ថភាពរបស់ពួកគាត់។

ពាក់ព័ន្ធនឹងបញ្ហានេះ ប្រធាននាយកដ្ឋានត្រៀមទុក និងបណ្ដុះបណ្ដាល និងជាទីប្រឹក្សានៃគណៈកម្មាធិការជាតិគ្រប់គ្រងគ្រោះមហន្តរាយ លោក ឃុន សុខា អះអាងថា នៅក្នុងច្បាប់ស្ដីពីការគ្រប់គ្រងគ្រោះមហន្តរាយបានចែងថា អ្នកដែលងាយរងគ្រោះពីគ្រោះមហន្តរាយជាងគេ គឺជាជនពិការ ចាស់ជរា ស្ត្រីមេម៉ាយ កុមារ និងអ្នកក្រីក្រជាដើម នឹងត្រូវតែទទួលបានការយកចិត្តទុកដាក់ពីសំណាក់អាជ្ញាធរមូលដ្ឋានជាអាទិភាព៖ «ការប្រឈមដ៏ធ្ងន់ធ្ងរ និងដ៏លំបាករបស់ជនពិការដែលបង្កពីគ្រោះមហន្តរាយកន្លងទៅ គឺត្រូវគិតគូរឲ្យបានជាអាទិភាព»។

ក្រុមជនពិការរំពឹងថា នឹងមានការដាក់បញ្ចូលពិការភាពក្នុងការងារកាត់បន្ថយហានិភ័យគ្រោះមហន្តរាយ នៅពេលពួកគាត់បន្តស្វែងរកមតិគាំទ្រជាមួយអ្នកតាក់តែងច្បាប់ ជាមួយភាគីពាក់ព័ន្ធផ្សេងៗ ជាពិសេសជាមួយគណៈកម្មាធិការជាតិគ្រប់គ្រងគ្រោះមហន្តរាយ ព្រមទាំងការផ្សព្វផ្សាយការយល់ដឹងពីពិការភាព និងគ្រោះមហន្តរាយតាមរយៈវិទ្យុសំឡេងជនពិការ និងកិច្ចសហប្រតិបត្តិការបន្តជាមួយអង្គការដៃគូធ្វើលើការងារអភិបាលកិច្ចទឹក និងគ្រោះមហន្តរាយ ជាដើម៕

ពលរដ្ឋស្រុកឯកភ្នំបារម្ភខ្លាចអាជ្ញាធរសង់ទំនប់ស្ទឹងសង្កែមិនផ្ដល់សំណងផលប៉ះពាល់

ប្រជាពលរដ្ឋពិភាក្សាគ្នាពីផលប៉ះពាល់ដីលំនៅឋានរបស់ពួកគាត់នៅមាត់ផ្លូវ ទីតាំងដែលអាជ្ញាធរត្រៀមធ្វើទំនប់បិទស្ទឹងសង្កែ នៅភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដំបង ថ្ងៃទី១៨ ខែធ្នូ ឆ្នាំ២០១៦។ RFA/Hum Chamroeun

ប្រជាពលរដ្ឋរាប់រយគ្រួសារនៅស្រុកឯកភ្នំ ខេត្តបាត់ដំបង កំពុងព្រួយបារម្ភខ្លាចក្រែងអាជ្ញាធរខេត្តនេះ សង់ទំនប់ទឹកស្ទឹងសង្កែ ប៉ះពាល់ដី និងផ្ទះសម្បែងរបស់ពួកគាត់ ហើយផ្ដល់សំណងមិនសមស្របទៅតាមតម្លៃដីពិតប្រាកដ។ អាជ្ញាធរ និងមន្ត្រីជំនាញពាក់ព័ន្ធនៅខេត្តបាត់ដំបង ចាប់ផ្ដើមចុះវាស់វែងដីត្រៀមជីកប្រឡាយពង្វាងទឹក ដើម្បីបិទស្ទឹងសង្កែធ្វើទំនប់ទឹកនៅស្រុកឯកភ្នំ ក្នុងពេលឆាប់ៗ។ ពលរដ្ឋមួយចំនួន បានប្រតិកម្មនឹងការចុះវាស់វែងដីធ្វើទំនប់នេះ ថាអាជ្ញាធរមិនទាន់ជូនដំណឹងអំពីសំណងប៉ះពាល់ដល់ពួកគាត់នៅឡើយ។

ប្រជាពលរដ្ឋនៅស្រុកឯកភ្នំ ប្រមាណ ៤០នាក់ កាលពីព្រឹកថ្ងៃទី១៨ ធ្នូ ជួបជុំពិភាក្សាគ្នាអំពីផលប៉ះពាល់ដែលអាជ្ញាធរវាស់វែងដីធ្លីត្រៀមធ្វើប្រឡាយពង្វាងទឹកចំផ្ទះ និងផលដំណាំរបស់ពួកគាត់នៅមុខផ្ទះ ជាប់មាត់ស្ទឹងសង្កែត្រើយខាងលិចនៃភូមិព្រែកតាច្រែង ឃុំព្រែកនរិន្ទ ស្រុកឯកភ្នំ។

អ្នកភូមិភាគច្រើនលើកឡើងថា ពួកគាត់នឹងមិនអនុញ្ញាតឲ្យអាជ្ញាធរជីកប្រឡាយពង្វាងទឹកនៅលើដីរបស់ពួកគាត់នោះឡើយ ប្រសិនបើអាជ្ញាធរពាក់ព័ន្ធមិនផ្ដល់សំណងជូនពួកគាត់ឲ្យបានសមរម្យនោះ។

ពលរដ្ឋម្នាក់រស់នៅភូមិព្រែកតាច្រែង លោក យិន វុទ្ធី ផ្ដល់សម្ភាសឲ្យអាស៊ីសេរី នៅមាត់ស្ទឹងសង្កែតំបន់ដីដែលអាជ្ញាធរត្រៀមសង់ទំនប់ទឹក នៅស្រុកឯកភ្នំ ថា អាជ្ញាធរវាស់វែងដីជីកប្រឡាយពង្វាងទឹកដើម្បីសង់ទំនប់ទឹកស្ទឹងសង្កែ ចំផ្ទះ និងផលដំណាំរបស់ខ្លួនប្រមាណ ៤៥ភាគរយ នៃចំនួនផ្ទៃដីទទឹងជាង ៤០ម៉ែត្រ និងបណ្ដោយ ៨០ម៉ែត្រនោះ។ លោកអះអាងថា អាជ្ញាធរខេត្តបាត់ដំបង ពុំទាន់បញ្ជាក់អំពីសំណងជូនពួកគាត់នៅឡើយទេ៖ «ចង់ឲ្យគាត់សងឲ្យមានចំនួនសមរម្យ ព្រោះដំណាំមានក្រូចឆ្មារ ដែលផ្ដល់ផលអាចចិញ្ចឹមជីវិតខ្ញុំបាន ហើយមានដើមគគីរដល់ទៅ ១០០ដើមឯណោះ។ មានដើមនាងនួន ដើមបេង និងដំណាំហូបផ្លែជាច្រើនទៀត»។

ប្រជាពលរដ្ឋទាមទារឲ្យអាជ្ញាធរផ្ដល់សំណងទៅតាមតម្លៃដីទីផ្សារ និងតាមភាពជាក់ស្ដែងនៃផលដំណាំងដែលមាននៅលើដីរបស់ខ្លួន។

ស្ទឹងសង្កែ បាត់ដំបង ២០១៦ ៨៥៥ទីតាំងដែលអាជ្ញាធរត្រៀមធ្វើទំនប់បិទស្ទឹងសង្កែ នៅភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដំបង។ រូបថតថ្ងៃទី១៨ ខែធ្នូ ឆ្នាំ២០១៦ RFA/Hum Chamroeun

ស្រដៀងគ្នានេះដែរ ពលរដ្ឋម្នាក់ទៀត គឺលោកស្រី ប៊ូយ សាអែម ប្រាប់អាស៊ីសេរីនៅខាងមុខផ្ទះជាប់មាត់ស្ទឹងសង្កែ តំបន់ដីដែលត្រៀមសង់ទំនប់ទឹកនោះថា អាជ្ញាធរវាស់វែងដីចំផ្ទះរបស់លោកស្រីទាំងមូលតែម្ដង ហើយនឹងត្រូវរុះរើផ្ទះក្នុងពេលឆាប់ៗនៅពេលដែលអាជ្ញាធរចាប់ផ្ដើមសង់ប្រឡាយពង្វាងទឹកនោះ។ លោកស្រីព្រួយបារម្ភខ្លាចគ្មានទីជម្រកស្នាក់នៅ ពីព្រោះជីវភាពក្រីក្រ និងមានកូនច្រើនរស់នៅក្នុងបន្ទុកគ្រួសារ។ លោកស្រីស្នើឲ្យអាជ្ញាធរដោះស្រាយសំណងទៅតាមតម្លៃដីទីផ្សារ និងឲ្យបានឆាប់រហ័ស ដើម្បីយកប្រាក់ទៅសង់លំនៅឋានថ្មី៖ «ខ្ញុំគ្មានដីនៅផ្សេងពីនោះទេ មានតែដីនេះឯង ណាមួយខ្ញុំចង់រស់នៅទីកន្លែងដើមនេះឯង។ ខ្ញុំមិនចង់រុះរើទៅណាទេ»។

អាស៊ីសេរី ពុំអាចទាក់ទងប្រធានមន្ទីរធនធានទឹក និងឧតុនិយមខេត្តបាត់ដំបង ដើម្បីសុំអត្ថាធិប្បាយជុំវិញបញ្ហានេះបានទេនៅថ្ងៃទី១៨ ធ្នូ។

អភិបាលស្រុកឯកភ្នំ លោក ឡុង សុភឺន មានប្រសាសន៍ថា អាជ្ញាធរខេត្តបាត់ដំបង បានត្រៀមរួចជាស្រេចហើយដើម្បីដោះស្រាយសំណងជូនពលរដ្ឋនោះ។ លោកអះអាងថា ពលរដ្ឋដែលរងផលប៉ះពាល់ខ្លាំង គឺប៉ះចំទាំងផ្ទះ និងដីផលដំណាំ រួមមានដើមដូង ស្វាយ ល្មុត និងក្រូច ជាដើម ពីការសង់ទំនប់ស្ទឹងសង្កែនេះប្រមាណជាង ១០០គ្រួសារ គឺមានគណៈកម្មការវាយតម្លៃផលប៉ះពាល់ ដើម្បីដោះស្រាយដែលអាចទទួលយកបាន។ លោកបន្ថែមថា នៅពេលសង់ទំនប់ទឹកនោះរួច គឺប្រជាពលរដ្ឋនឹងទទួលបានផលប្រយោជន៍សំខាន់ ៣យ៉ាងរួមមាន ជួយសម្រួលដល់ការធ្វើដំណើរឆ្លងកាត់ស្ទឹងសង្កែរបស់ពលរដ្ឋក្នុងតំបន់ មានទឹកសម្រាប់ធ្វើកសិកម្មដល់ប្រជាកសិករនៅស្រុកថ្មគោល ស្រុកបវេល និងស្រុកបាណន់ ជាដើម និងជាទីកន្លែងទាក់ទាញភ្ញៀវទេសចរមកលេងកម្សាន្តនៅតំបន់នោះ៖ «យើងមានគោលការណ៍ដោះស្រាយតាមនីតិវិធីរបស់ក្រុមការងារអន្តរក្រសួង ដែលមានក្រសួងសេដ្ឋកិច្ច និងហិរញ្ញវត្ថុ ចុះមក និងមានក្រុមការងារដល់ទៅបីសម្រាប់វាយតម្លៃ។ ចុងក្រោយ យើងមានក្រុមការងារឯករាជ្យដែលមិនមែនរដ្ឋាភិបាល គឺចុះសិក្សាវាយតម្លៃជាក់ស្ដែងម្ដងទៀត បានយើងចេញចំណងជូនប្រជាពលរដ្ឋតាមគោលការណ៍របស់រាជរដ្ឋាភិបាល»។

ទោះបីជាយ៉ាងនេះក្ដី មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបាត់ដំបង លោក យិន ម៉េងលី មានប្រសាសន៍ថា អាជ្ញាធរគួរតែដោះស្រាយសំណងជូនប្រជាពលរដ្ឋឲ្យបានមុនពេលសាងសង់ ហើយមិនត្រូវផ្អាប់រឿងមិនប្រាប់ដំណឹងដល់ពួកគាត់នោះទេ។ លោកបន្ថែមថា នៅពេលសង់ទំនប់ទឹកនេះរួច នឹងប៉ះពាល់ដល់ការរស់នៅរបស់ប្រជាពលរដ្ឋនៅប៉ែកខាងក្រោមទំនប់ទឹកនោះ គឺធ្វើឲ្យពុំមានទឹកប្រើប្រាស់គ្រប់គ្រាន់ដូចពេលមុនៗ៖ «អ៊ីចឹងប្រជាពលរដ្ឋគាត់អត់បានយល់ពីច្បាប់នេះជាកង្វល់ ដូច្នេះអាជ្ញាធរត្រូវមានតួនាទីធ្វើការពន្យល់ដល់ពលរដ្ឋឲ្យបានយល់ច្បាស់ ដើម្បីកុំឲ្យពួកគាត់មានកង្វល់ ដែលក្នុងនាមតំណាងឲ្យអាណាព្យាបាលរបស់ពួកគាត់នោះ មិនអាចឆ្លើយថាមិនដឹង ហើយនាំគ្នាលាក់បាំងបញ្ហានេះ គឺខុសហើយ»។

ចំណែកមន្ត្រីសម្របសម្រួលអង្គការសម្ព័ន្ធភាព ដើម្បីអភិរក្សធនធានជលផលជុំវិញបឹងទន្លេសាប អ្នកស្រី នូ សារឹម អះអាងថា នៅពេលសង់ទំនប់ស្ទឹងសង្កែនោះរួច ធ្វើឲ្យផលត្រីនៅបឹងទន្លេសាប ជាពិសេសនៅតាមដងស្ទឹងសង្កែថយចុះ ដោយសារគ្មានទឹកគ្រប់គ្រាន់ឲ្យត្រីធ្វើចរាចរ ហើយប៉ះពាល់ដល់របរធ្វើនេសាទរបស់ប្រជាពលរដ្ឋរស់នៅតំបន់ព្រៃលិចទឹក ស្រុកឯកភ្នំ រាប់ពាន់គ្រួសារបាត់បង់ប្រាក់ចំណូលប្រចាំថ្ងៃ៖ «ខ្ញុំគិតថាបើសិនធ្វើទំនប់ទឹកនោះ គួរតែគិតដល់អ្នកនៅខាងក្រោម ជាពិសេសអ្នករស់នៅតំបន់បឹងទន្លេសាប គួរតែគិតថារយៈពេល បើបិទប៉ុន្មានថ្ងៃ គឺត្រូវបើកទឹកធ្វើយ៉ាងណាឲ្យពួកគាត់បានរស់នៅស្រួលផង ព្រោះពួកគាត់អត់មានដីស្រែចម្ការទេ»។

អាជ្ញាធរស្រុកឯកភ្នំ ឲ្យដឹងថា ទំនប់នេះចាប់ផ្ដើមសាងសង់បណ្ដើរៗហើយ ក្នុងនោះជំហានដំបូងសង់ប្រឡាយបង្ហូរទឹកតាមដងស្ទឹងសង្កែនៅតំបន់នោះ ដើម្បីឲ្យប្រជាពលរដ្ឋបានទឹកប្រើប្រាស់នៅពេលធ្វើទំនប់ទឹក។ ជំហានបន្ទាប់ សង់ទំនប់ទឹកស្ទឹងសង្កែ ដោយមានទ្វារបង្ហូរទឹកចំនួន ៦កន្លែង និងមានផ្លូវសម្រាប់ត្រីធ្វើចរាចរទាំងរដូវប្រាំង និងរដូវវស្សា។ លោកបន្ថែមថា ថវិកាសម្រាប់សាងសង់ទំនប់នេះ ជារបស់រាជរដ្ឋាភិបាលកម្ពុជា ចំណាយអស់ជាង ៣០លានដុល្លារអាមេរិក ហើយនឹងត្រូវបញ្ចប់នៅដំណាច់ឆ្នាំ២០១៩៕

អ្នកបឹងកក់និងបុរីកីឡាប្រកាសផ្អាកយុទ្ធនាការថ្ងៃច័ន្ទពណ៌ខ្មៅមួយរយៈពេល

សហគមន៍ដីធ្លីនៅតំបន់បឹងកក់ ធ្វើយុទ្ធនាការថ្ងៃច័ន្ទពណ៌ខ្មៅ នៅថ្ងៃច័ន្ទ ទី១៩ ខែធ្នូ ឆ្នាំ២០១៦។ RFA/Rann Samnang

សហគមន៍ដីធ្លីនៅតំបន់បឹងកក់ និងអ្នកបុរីកីឡា ប្រកាសជំហរថា ពួកគេនឹងផ្អាកធ្វើយុទ្ធនាការថ្ងៃច័ន្ទពណ៌ខ្មៅ (Black Monday) ចាប់ពីថ្ងៃច័ន្ទ ទី១៩ រហូតដល់ដំណាច់ខែធ្នូ។ ការប្រកាសជំហរនេះ ធ្វើឡើងបន្ទាប់ពីក្រុមស្ត្រីបឹងកក់ និងអ្នកបុរីកីឡា នាំគ្នាដោះអាវខ្មៅទុកមួយរយៈពេលសិន ដោយរង់ចាំមើលថា តើមន្ត្រីសិទ្ធិមនុស្សអាដហុក (ADHOC) ៤រូប មន្ត្រី គ.ជ.ប ១រូប និងអ្នកស្រី ទេព វន្នី ត្រូវបានគេដោះលែងឲ្យមានសេរីភាពវិញក្នុងកំឡុងខែធ្នូ នេះឬទេ?

តំណាងអ្នកបឹងកក់ អ្នកស្រី បូវ សោភា សង្ឃឹមថា រដ្ឋមន្ត្រីក្រសួងមហាផ្ទៃ លោក ស ខេង នឹងគោរពនូវពាក្យសម្ដីរបស់ខ្លួន ដែលនិយាយជាមួយអ្នកសារព័ត៌មាននៅរដ្ឋសភាកន្លងទៅ ថាមន្ត្រីសិទ្ធិមនុស្ស មន្ត្រី គ.ជ.ប និងតំណាងអ្នកបឹងកក់ នឹងត្រូវបានដោះលែង៖ «»។

សហគមន៍បឹងកក់បញ្ជាក់ថា ប្រសិនបើអ្នកទាំង ៦រូបដែលកំពុងជាប់ឃុំមិនត្រូវបានគេដោះលែងក្នុងអំឡុងខែធ្នូ នេះទេ នោះពួកគេនឹងធ្វើយុទ្ធនាការថ្ងៃច័ន្ទពណ៌ខ្មៅឡើងវិញ នៅដើមខែមករា ឆ្នាំ២០១៧ និងដើរដាក់ញត្តិតាមស្ថានទូតមហាអំណាច និងស្ថាប័នរដ្ឋសំខាន់ៗមួយចំនួន។

គិតមកត្រឹមថ្ងៃទី១៩ ធ្នូ នេះ អគ្គលេខាធិការរង គ.ជ.ប លោក នី ចិរយា មន្ត្រីអាដហុក ៤រូប មានលោក នី សុខា លោក យី សុខសាន្ត លោក ណៃ វ៉ង់ដា និងអ្នកស្រី លឹម មុន្នី ត្រូវបានតុលាការក្រុងភ្នំពេញដាក់ពន្ធនាគារជិត ៨ខែហើយពីបទផ្សំគំនិត និងសូកប៉ាន់សាក្សីក្នុងរឿងអាស្រូវស្នេហារវាងលោក កឹម សុខា និងនាង ខុម ចាន់តារាទី ហៅស្រីមុំ។

ចំណែកអ្នកស្រី ទេព វន្នី ត្រូវបានតុលាការឃុំខ្លួនជាង ៤ខែហើយ ដោយសារអ្នកស្រីដឹកនាំយុទ្ធនាការថ្ងៃច័ន្ទពណ៌ខ្មៅ និងរឿងរ៉ាវពីរករណីទៀតកើតឡើងកាលពីជាង ៤ឆ្នាំមុន ដែលតុលាការក្រុងភ្នំពេញសើរើឡើងវិញ៕

លោក ហ៊ុន សែន ព្រមានវាយខ្នោះអ្នកកាសែតដែលដាក់ប៉ុស្តិ៍ត្រួតពិនិត្យខុសច្បាប់

លោកនាយករដ្ឋមន្ត្រី ហ៊ុន សែន និងជាប្រធានគណបក្សប្រជាជនកម្ពុជា ថ្លែងក្នុងពិធីខួបលើកទី៦៥ (១៩៥១-២០១៦) នៃការបង្កើតបក្សរបស់ខ្លួន នាទីស្នាក់ការកណ្ដាលបក្ស ខណ្ឌចំការមន រាជធានីភ្នំពេញ នៅព្រឹកថ្ងៃទី២៨ ខែមិថុនា ឆ្នាំ២០១៦។ RFA/Brach Chev

អ្នកជំនាញខាងកាសែតថា អ្នកកាសែតដាក់ប៉ុស្តិ៍ត្រួតពិនិត្យដើម្បីយកព័ត៌មាន វាមិនខុសទាស់ទេ បើសិនជាអាជ្ញាធរលាក់លៀមព័ត៌មានពីការជួញដូរឈើប្រណិត ឬជួញដូរសត្វព្រៃជាដើម។ ការលើកឡើងបែបនេះ នៅក្រោយពេលលោកនាយករដ្ឋមន្ត្រី ហ៊ុន សែន ព្រមានឲ្យអាជ្ញាធរវាយខ្នោះភ្លាមៗ ចំពោះអ្នកកាសែតណាប្រព្រឹត្តិខុស ដោយដាក់ប៉ុស្តិ៍ត្រួតពិនិត្យ។

បទបញ្ជា និងការព្រមានរបស់ប្រមុខរដ្ឋាភិបាល ឃើញមានជាហូរហែមិនថាលើអ្នកកាសែត មន្ត្រីក្រោយឱវាទ ឬឈ្មួញប្រព្រឹត្តិបទល្មើសនោះទេ។ ប៉ុន្តែការព្រមាន និងបទបញ្ជាខ្លះរបស់លោក ហ៊ុន សែន មិនមែនសុទ្ធតែត្រូវអនុវត្តខ្ជាប់ខ្ជួននោះឡើយ។

ជាក់ស្ដែងការព្រមានរបស់លោក ចំពោះការដាក់កុងត្រូលជជុះយកលុយតាមដងផ្លូវ ពីរថយន្តដឹកអ្នកដំណើរជាដើម ឃើញនៅតែបន្តកើតមានជាហូរហែ។

រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានស្រង់សម្ដីរបស់លោក ហ៊ុន សែន ដែលថ្លែងក្នុងសន្និបាតគណៈកម្មាធិការកណ្ដាលគណបក្សប្រជាជនកម្ពុជា កាលពីថ្ងៃទី១៨ ធ្នូ មកសរសេរលើហ្វេសប៊ុក (Facebook) របស់លោកថា បើអ្នកកាសែតណាប្រព្រឹត្តិខុស ដោយដាក់ប៉ុស្តិ៍ត្រួតពិនិត្យ គឺអាជ្ញាធរត្រូវវាយខ្មោះភ្លាម មិនមែនអំពាវនាវទៅក្រសួងព័ត៌មានទេ។

អ្នកជំនាញខាងកាសែតថា ពួកគេគាំទ្រវិធានការនេះ បើអ្នកកាសែតណាដែលប្រព្រឹត្តិខុសច្បាប់ដូចការលើកឡើង។

ប្រធានក្លឹបអ្នកកាសែតកម្ពុជា លោក ប៉ែន បូណា ថា វិធានការនេះលោកគាំទ្រ ព្រោះវាជាការអនុវត្តច្បាប់របស់អាជ្ញាធរចំពោះអ្នកកាសែតដែលធ្វើខុសច្បាប់។ ប៉ុន្តែលោកអំពាវនាវដល់អាជ្ញាធរជួយសម្រួល ដល់អ្នកកាសែតដែលប្រកាន់ក្រមសីលធម៌ និងវិជ្ជាជីវៈត្រឹមត្រូវ ឲ្យពួកគេបានបំពេញការងារប្រមូលព័ត៌មានមកផ្សាយឲ្យទូលំទូលាយ៖ «ប៉ុន្តែយើងត្រូវបែងចែកមួយទៀត គឺក្រុមអ្នកកាសែតមួយចំនួនតូច ឬអ្នកខ្លះទៀតហាក់ដូចជា មិនមែនអ្នកកាសែតក៏បាន ដែលគ្រាន់តែគាត់មានកាន់កាតអ្នកកាសែត ក៏បានប្រព្រឹត្តអំពើខុសឆ្គងជាហូរហែកន្លងមកដែលយើងឃើញដែរ។ ដូច្នេះករណីនឹង កាលណាយើងទៅយកព័ត៌មានហើយប្ដូរទៅនឹងលុយកាក់ដើម្បីជាការមិនចុះផ្សាយឬមួយអីនឹង គឺជារឿងខុសច្បាប់ ហើយបើទៅជំរិតគេអីទៀត ដូចជាការដាក់កុងត្រូលដូចសម្ដេចនាយករដ្ឋមន្ត្រីលើក ឬក៏យើងធ្លាប់ឮជាហូរហែមក គឺជារឿងខុសច្បាប់ហើយអានឹង»។

ចំណែកនាយកវិទ្យាស្ថានកម្ពុជាសម្រាប់ការសិក្សាសារព័ត៌មាន លោក មឿនឈាន ណារិទ្ធ ទទួលស្គាល់ថា ការដាក់ប៉ុស្តិ៍ត្រួតពិនិត្យរបស់អ្នកកាសែតនៅតាមបណ្ដាខេត្តមួយចំនួន ដូចប៉ុស្តិ៍ត្រួតពិនិត្យរបស់រដ្ឋបាលព្រៃឈើ និងកងរាជអាវុធហត្ថជាដើម ពិតជាមានមែន ប៉ុន្តែលោកថា មិនដឹងជាការដាក់ប៉ុស្តិ៍នេះដើម្បីស្កាត់រាយការណ៍ព័ត៌មានសុចរិតឬយ៉ាងណាទេ។ លោកបន្តថា បើអ្នកកាសែតដាក់ប៉ុស្តិ៍ត្រួតពិនិត្យដើម្បីយកព័ត៌មានវាមិនខុសទាស់ទេ បើសិនជាអាជ្ញាធរលាក់លៀមព័ត៌មានពីការជួញដូរឈើប្រណិត ឬជួញដូរសត្វព្រៃជាដើម៖ «សំខាន់ត្រង់ថាតើគាត់(អ្នកកាសែត) ដាក់ប៉ុស្តិ៍នេះ គាត់ធ្វើដោយច្បាប់យ៉ាងម៉េច? តាមច្បាប់សារព័ត៌មាន ឬច្បាប់ដទៃទៀត មិនបានហាមអ្នកសារព័ត៌មានដាក់ប៉ុស្តិ៍អ៊ីចឹងទេ។ អ៊ីចឹងការដាក់ប៉ុស្តិ៍ត្រួតពិនិត្យនេះអាចទុកទាក់ថា ជារូបភាពមួយបែបស៊ើបអង្កេត។ ព្រោះការយកព័ត៌មានបែបស៊ើបអង្កេត យើង(អ្នកកាសែត) អាចធ្វើតាមរយៈការបន្លំខ្លួនតាមគ្រប់រូបភាព ដើម្បីប្រមូលព័ត៌មានពិត»។

លោក មឿនឈាន ណារិទ្ធ បន្តថា វិធានការនេះអាជ្ញាធរគួរអនុវត្តចំពោះមន្ត្រីរបស់ខ្លួន ដែលដាក់ប៉ុស្តិ៍ត្រួតពិនិត្យទារប្រាក់ពីឈ្មួញកាប់ព្រៃដើម្បីប្រយោជន៍ផ្ទាល់ខ្លួនឲ្យបានម៉ឺងម៉ាត់ ដោយលោកប្រដូចអាជ្ញាធរដែលកាក់ស៊ី ពីឈ្មួញខុសច្បាប់ ជាខ្លាស៊ីគោ ហើយរួចទោស ប៉ុន្តែបែរជាអ្នកកាសែតដែលយកប្រាក់តិចតួចពីអាជ្ញាធរនោះ ជាថ្នូរលាក់រឿងនេះ ប្រៀបដូចជាឆ្មាលួចត្រីអាំងត្រូវទទួលទោស៕

ជនដៃដល់សម្លាប់ប្រពន្ធនិងកូនត្រូវបានឃុំខ្លួននៅស្នងការដ្ឋាននគរបាលខេត្តកំពត

ខេត្តកំពត។ RFA/Rann Samnang

ស្នងការនគរបាលខេត្តកំពត ឧត្តមសេនីយ៍ទោ ម៉ៅ ច័ន្ទមធុរិទ្ធិ ឲ្យអាស៊ីសេរីដឹងនៅល្ងាចថ្ងៃទី១៩ ធ្នូ ថា ឈ្មោះ អ៊ុ រស្មី ដែលជាជនដៃដល់ក្នុងករណីឃាតកម្មវាយសម្លាប់ប្រពន្ធ និងកូនតូចរបស់ខ្លួនអាយុ ២ឆ្នាំ ត្រូវបានបញ្ជូនមកដល់ស្នងការដ្ឋាននគរបាលខេត្តកំពត ហើយ នៅម៉ោងប្រមាណ ៦ល្ងាចថ្ងៃទី១៩ ខែធ្នូ នេះ។

លោកបញ្ជាក់ថា សមត្ថកិច្ចកំពុងសួរចម្លើយ និងកសាងសំណុំរឿង បញ្ជូនជននោះទៅតុលាការខេត្តកំពត។

កាលពីម៉ោង ២ទៀបភ្លឺថ្ងៃទី១៩ ខែធ្នូ មានករណីឃាតកម្មមួយបានកើតឡើងនៅភូមិទ្វីខាងជើង សង្កាត់អណ្ដូងខ្មែរ ក្រុងកំពត បង្កឡើងដោយបុរសម្នាក់ឈ្មោះ អ៊ុ រស្មី ដែលជាស្មៀនឃុំកោះតូច ស្រុកទឹកឈូ ខេត្តកំពត ដោយបុរសរូបនេះបានវាយប្រពន្ធ និងកូនតូចអាយុ ២ឆ្នាំម្នាក់នឹងចបកាប់ បណ្ដាលឲ្យស្លាប់ភ្លាមៗនៅនឹងកន្លែង។

ក្រោយកើតហេតុ ជននោះបានបើករថយន្តរត់គេចខ្លួន ប៉ុន្តែត្រូវកម្លាំងអន្តរាគមន៍នៃស្នងការដ្ឋាននគរបាលខេត្តព្រះសីហនុ ចាប់ខ្លួនបាននៅចំណុចផ្លូវឆ្ពោះទៅកាន់ឆ្នេរអូរឈើទាល នៅម៉ោងប្រមាណ ១១ព្រឹក។ ជនដៃដល់បានឆ្លើយនៅចំពោះមុខសមត្ថកិច្ចខេត្តព្រះសីហនុ ថា មូលហេតុនៃការសម្លាប់ប្រពន្ធ និងកូននេះ គឺបណ្ដាលមកពីខ្លួនស្រវឹងស្រា។

ក្រោយការសាកសួរ សមត្ថកិច្ចខេត្តព្រះសីហនុ បានបញ្ជូនជននោះទៅកាន់ស្នងការដ្ឋាននគរបាលខេត្តកំពត។ ស្នងការខេត្តកំពត លោក ម៉ៅ ច័ន្ទមធុរិទ្ធិ មិនទាន់អាចបញ្ជាក់បានពីមូលហេតុនៃអំពើឃាតកម្មនេះនៅឡើយ ដោយលោកបញ្ជាក់ថា កំពុងសួរចម្លើយជននោះ។ លោក ម៉ៅ ច័ន្ទមធុរិទ្ធិ បញ្ជាក់ថា ជនដៃដល់ អ៊ុ រស្មី ត្រូវបានឃុំខ្លួនបណ្ដោះអាសន្ននៅស្នងការដ្ឋាននគរបាលខេត្តកំពត៕

Sunday, December 18, 2016

Teen ‘smuggler’ dead

A car carrying timber in Mondulkiri was involved in a crash during a timber raid late on Friday. The crash killed one man. Photo supplied

An alleged teenaged timber smuggler died and another was seriously injured after their pursuit by Forestry Administration and Environment Ministry officials ended in a car crash in Mondulkiri during the early hours of Saturday morning.

A police report identified Yorn Nhanh, 24, as the driver of a car transporting 13 pieces of luxury timber that crashed into the back of an Environment Ministry vehicle that had been chasing him through Keo Seima district, resulting in the death of his assistant, 19-year-old Chey Reaksmey.

The report added that Nhanh claimed to have paid two officials 200,000 riel (about $50) at the scene of the crash.

A complaint filed with the district police by Reaksmey’s father, Chey Seth, on Saturday accuses the Environment Ministry officials of having “unintentionally murdered” his son and calls for their arrest.

However, deputy provincial police chief Ngim Sophoeun said an investigation into the cause of the crash was ongoing and that he was waiting for a report from Keo Seima district police before drawing any conclusions.

“There were 13 pieces of wood in the car . . . The preliminary report concluded that the wood hit them in the backs and [Reaksmey] died on the scene,” Sophoeun said, adding that the authorities had yet to interview the two Environment Ministry officials.

Meanwhile, a string of seizures of luxury timber were made across the country over the weekend.

In Kampong Chhnang province 111 logs of first grade timber were seized by provincial economic crimes police officers from a truck on Thursday night, although both the driver and his assistant escaped before being arrested.

“The timber was from Pursat, be we don’t know where it was going because we had no information about it when the driver and his assistant escaped into the dark,” provincial economic crimes police chief Chin Sophat said, adding that truck and timber had been impounded by the provincial Forestry Administration office while the authorities attempt to identify their owners.

The same night, military police in Pursat’s Krakor district arrested Kampong Speu native Seng Leng, 28, after stopping his Hyundai truck loaded with 28 cubic metres of timber, according to the military police’s Facebook page.

Provincial military police commander Uk Samon declined to comment further on the case yesterday. However, Chea Hean, director of the National Resource and Wildlife Preservation Organization said the timber had been heading to Kampot for sale in Vietnam before it was intercepted

ក្រុមហ៊ុនសាទរការបង្កើតនាយកដ្ឋានគ្រប់គ្រងសន្តិសុខឯកជនតែបារម្ភត្រូវបង់ប្រាក់ច្រើន

ក្រសួងមហាផ្ទៃ RFA/Rann Samnang

អ្នកច្បាប់ និងប្រធានក្រុមហ៊ុនសន្តិសុខឯកជនជាច្រើន សាទរចំពោះការបង្កើតនាយកដ្ឋានគ្រប់គ្រងសន្តិសុខឯកជន។ ប្រធានក្រុមហ៊ុនសន្តិសុខឯកជន បារម្ភដែរថា នាយកដ្ឋានថ្មីនេះអាចនឹងតម្រូវឲ្យពួកគេបង់កម្រៃសេវាច្រើន។ អ្នកនាំពាក្យរបស់ក្រសួងមហាផ្ទៃ បញ្ជាក់ថា គ្មានការយកកម្រៃសេវាពីក្រុមហ៊ុនឯកជនទាំងនោះឡើយ។

ក្តីកង្វល់របស់ម្ចាស់អាជីវកម្មផ្តល់សេវាសន្តិសុខឯកជននេះ ខណៈរាជរដ្ឋាភិបាលនៅពេលថ្មីៗនេះ បានចេញអនុក្រឹត្យមួយស្ដីពីការបង្កើតនាយកដ្ឋានគ្រប់គ្រងសន្តិសុខឯកជន ចុះថ្ងៃទី២៨ ខែវិច្ឆិកា ឆ្នាំ២០១៦។

នាយកដ្ឋានគ្រប់គ្រងសន្តិសុខឯកជននេះ ជាសេនាធិការរបស់នាយកដ្ឋានកណ្ដាលសន្តិសុខអគ្គស្នងការនគរបាលជាតិ និងក្រសួងមហាផ្ទៃ ហើយនាយកដ្ឋាននេះបង្កើតឡើងដើម្បីគ្រប់គ្រង និងត្រួតពិនិត្យសកម្មភាពរបស់បណ្ដាក្រុមហ៊ុនផ្តល់សេវាសន្តិសុខឯកជន សហគ្រាស គ្រឹះស្ថានសន្តិសុខឯកជន ជាដើម។

ប្រធានក្រុមហ៊ុនសន្តិសុខឯកជន ស៊ី.យូ.អេស (CUS) មួយនៅរាជធានីភ្នំពេញ លោក ឆែ ចំរើន ថ្លែងថា លោកគាំទ្រចំពោះការបង្កើតនាយកដ្ឋានថ្មីនេះ។ លោកបន្តថា បច្ចុប្បន្នមានក្រុមហ៊ុនសន្តិសុខមិនស្របច្បាប់ជាច្រើន ត្រូវបានបង្កើតដើម្បីធ្វើអាជីវកម្មដោយមិនបានបំពេញទៅតាមវិជ្ជាជីវៈ និងគ្មានការបណ្តុះបណ្តាលច្បាស់លាស់។

ស្រដៀងគ្នានេះដែរ ប្រធានក្រុមហ៊ុនផ្តល់សេវាសន្តិសុខឯកជន អិល.អេស.អេស (LSS) គឺលោក ស សារិទ្ធ យល់ថាជារឿងល្អ ដែលមាននាយកដ្ឋានមួយសម្រាប់គ្រប់គ្រង និងត្រួតពិនិត្យក្រុមហ៊ុនសន្តិសុខទូទាំងប្រទេស ព្រោះអាចទប់ស្កាត់ក្រុមហ៊ុនដែលបើកអាជីវកម្មដោយមិនស្របច្បាប់ខុសនឹងនីតិវិធី និងមិនមានការបណ្តុះបណ្តាលត្រឹមត្រូវតាមលក្ខណៈបច្ចេកទេស ក៏ប៉ុន្តែលោកបារម្ភថា នាយកដ្ឋានថ្មីនេះទាមទារការបង់កម្រៃសេវាច្រើនលើសពីការរំពឹងទុក៖ «ខ្ញុំគិតថាធ្វើអ៊ីចឹងល្អម្យ៉ាងដែរ ព្រោះគ្រប់ក្រុមហ៊ុនសន្តិសុខដែលបើកនៅក្នុងព្រះរាជាណាចក្រយើង គឺស្របច្បាប់ទាំងអស់ ទើបអាចដំណើរការបាន។ កុំឲ្យតែគាត់គាបពីលើយើងថាត្រូវផ្តល់ឲ្យគាត់លើសពីការរំពឹងទុករបស់យើង។ កាលណាខ្ពស់ពេក យើងពិបាក Charge (ទូទាត់) ពីអតិថិជន ព្រោះអតិថិជនមួយចំនួនគាត់ចង់ចំណាយថវិកាតិចជួលសេវាកម្មរបស់យើង ក៏ប៉ុន្តែគាត់ចង់បានសេវាកម្មល្អ»។

ឆ្លើយតបនឹងកង្វល់របស់ម្ចាស់ក្រុមហ៊ុនសន្តិសុខឯកជន អ្នកនាំពាក្យរបស់ក្រសួងមហាផ្ទៃ លោក ខៀវ សុភ័គ អះអាងថា មិនមានប្រការណាមួយដែលតម្រូវឲ្យម្ចាស់ក្រុមហ៊ុនសន្តិសុខបង់ថ្លៃសេវាទៅឲ្យនាយកដ្ឋានគ្រប់គ្រងសន្តិសុខឯកជននោះឡើយ៖ «គ្មានប្រការណាមួយដែលចែងថា នាយកដ្ឋានត្រូវយកកម្រៃពីក្រុមហ៊ុន ដូចគ្មាន បាទ! ក្នុងសេចក្តីសម្រេចរបស់រដ្ឋាភិបាលគ្មាន ឬក៏របស់ក្រសួងក៏គ្មានដែរបាទ»។

លោក ខៀវ សុភ័គ នៅមិនទាន់អាចបញ្ជាក់អំពីពេលវេលាជាក់លាក់ណាមួយ ដែលនាយកដ្ឋាននេះបង្កើតចេញជារូបរាង និងសមាសភាពប្រធាន និងអនុប្រធានរបស់នាយកដ្ឋានថ្មីនេះបាននៅឡើយទេ នៅរសៀលថ្ងៃទី១៧ ខែធ្នូ ឆ្នាំ២០១៦។

នាយកដ្ឋានគ្រប់គ្រងសន្តិសុខឯកជន ដែលទើបប្រកាសឲ្យបង្កើតឡើងនេះ ក្រៅពីគ្រប់គ្រង និងពិនិត្យលើការអនុវត្តរបស់បណ្ដាក្រុមហ៊ុន ក៏នៅមានផ្តល់ការហ្វឹកហ្វឺនជំនាញឯកទេសដល់កងកម្លាំងភ្នាក់ងារសន្តិសុខឯកជនទាំងនោះដោយផ្ទាល់ផង ហើយនាយកដ្ឋានក៏មានកាតព្វកិច្ចជំរុញ និងលើកកម្ពស់ឲ្យវិស័យសន្តិសុខឯកជន មកការពារសន្តិសុខ និងថែរក្សាសណ្ដាប់ធ្នាប់សាធារណៈផង។

ប្រធានការិយាល័យមេធាវីក្រុមអ្នកច្បាប់អមរិន្ទ្រ លោកមេធាវី សុក សំអឿន ស្នើឲ្យមានការកំណត់តួនាទីរបស់ក្រុមសន្តិសុខឯកជនឲ្យបានច្បាស់លាស់ ដើម្បីចៀសវាងការប្រើប្រាស់ក្រុមសន្តិសុខឯកជនទាំងនេះមកបម្រើការងារបង្ក្រាបកុប្បកម្ម ឬបាតុកម្ម៖ «ខ្ញុំគិតថាគេអាចប្រើលាយឡំ។ ចឹងហើយបានជាខ្ញុំនិយាយថា ជាការប្រសើរ គួរតែកំណត់តួនាទីឲ្យបានច្បាស់លាស់ហ្នឹងណា!»។

ទាក់ទងនឹងការតម្រូវឲ្យនាយកដ្ឋានគ្រប់គ្រងសន្តិសុខឯកជន ជំរុញ និងលើកកម្ពស់ឲ្យវិស័យសន្តិសុខឯកជន មកការពារសន្តិសុខ និងថែរក្សាសណ្ដាប់ធ្នាប់សាធារណៈនេះ លោក ខៀវ សុភ័គ បញ្ជាក់ថាមិនមានការស្នើឲ្យក្រុមសន្តិសុខឯកជន មកធ្វើអ្វីផ្ទុយទៅនឹងការងាររបស់ក្រុមហ៊ុនដែលកំពុងតែធ្វើនោះទេ។ លោកបន្ថែមថា អ្វីដែលនាយកដ្ឋានត្រូវធ្វើនោះ គឺណែនាំឲ្យក្រុមហ៊ុនទាំងនោះចេះគ្រប់គ្រងលិខិតបទដ្ឋាន របៀបរបបការពារឲ្យត្រឹមត្រូវទៅតាមច្បាប់ ហើយជាពិសេស គឺមិនអនុញ្ញាតឲ្យមានបំពាក់អាវុធឡើយ៕