Tebthida

Monday, December 26, 2016

អង្គការអាល្លឺម៉ង់ផ្សព្វផ្សាយសៀវភៅស្តីពីរដ្ឋធម្មនុញ្ញដើម្បីបង្កើនការយល់ដឹង

សៀវភៅស្តីពីរដ្ឋធម្មនុញ្ញកម្ពុជា ដែលទើបតែផ្សព្វផ្សាយដោយមូលនិធិខុនរ៉ាត ត្រូវបានគេលើកឡើងថាជាសៀវភៅដែលជួយឲ្យការបកស្រាយរដ្ឋធម្មនុញ្ញនៅកម្ពុជាមានភាពប្រសើរឡើង នៅរាជធានីភ្នំពេញ កាលពីថ្ងៃទី២២ ខែធ្នូ ឆ្នាំ២០១៦។ (កាន់ វិច្ឆិកា/VOA)

ក្រោមការជួយឧបត្ថម្ភដោយមូលនិធិអាល្លឺម៉ងខុនរ៉ាត សៀវភៅនេះត្រូវបានតាក់តែងឡើងក្នុងបំណងជួយដល់សិស្ស និស្សិត អ្នកច្បាប់ និងអ្នកស្រាវជ្រាវនានា ឲ្យងាយយល់ពីរដ្ឋធម្មនុញ្ញរបស់កម្ពុជា។

ភ្នំពេញ — សៀវភៅស្តីពីរដ្ឋធម្មនុញ្ញកម្ពុជា ដែលហៅជាភាសាអង់គ្លេសថា Cambodian Constitutional Law ត្រូវបានចងក្រងដើម្បីជាឯកសារជំនួយដល់អ្នកស្រាវជ្រាវនានាដែលចាប់អារម្មណ៍ចំពោះរដ្ឋធម្មនុញ្ញកម្ពុជា។ សៀវភៅនេះត្រូវបានផ្សព្វផ្សាយជាលើកដំបូងកាលពីសប្តាហ៍មុននៅរាជធានីភ្នំពេញ។

ក្រោមការជួយឧបត្ថម្ភដោយមូលនិធិអាល្លឺម៉ងខុនរ៉ាត សៀវភៅនេះត្រូវបានតាក់តែងឡើងក្នុងបំណងជួយដល់សិស្ស និស្សិត អ្នកច្បាប់ និងអ្នកស្រាវជ្រាវនានា ឲ្យងាយយល់ពីរដ្ឋធម្មនុញ្ញរបស់កម្ពុជា។ នេះបើតាមការឲ្យដឹងពីប្រធានមូលនិធិខុនរ៉ាតអាឌិនណៅអ៊ែរ ហៅកាត់ថាខុនរ៉ាត ដែលជាអ្នកឧបត្ថម្ភក្នុងការបង្កើតសៀវភៅនេះឡើង។

Rene Gradwohl ប្រធានមូលនិធិខុនរ៉ាត អាឌិនណៅអ៊ែរ (KAS) ប្រចាំកម្ពុជា ប្រាប់ VOA ក្នុងពិធីផ្សព្វផ្សាយសៀវភៅស្តីពីរដ្ឋធម្មនុញ្ញ នៅរាជធានីភ្នំពេញ កាលពីថ្ងៃទី២២ ខែធ្នូ ឆ្នាំ២០១៦។ (កាន់ វិច្ឆិកា/VOA)

រដ្ឋធម្មនុញ្ញឆ្នាំ១៩៩៣ ជាច្បាប់គោល ឬជាច្បាប់កំពូលរបស់កម្ពុជា។ រាល់ច្បាប់ ឬលិខិតបទដ្ឋានគតិយុត្តិទាំងអស់ត្រូវស្របតាមរដ្ឋធម្មនុញ្ញនេះ។ សម្រាប់សៀវភៅស្តីពីរដ្ឋធម្មនុញ្ញកម្ពុជា ដែលទើបតែផ្សព្វផ្សាយដោយមូលនិធិខុនរ៉ាត ដែលជាមូលនិធិគាំទ្រលើផ្នែកច្បាប់នៅកម្ពុជា គឺជាការពន្យល់ ប្រៀបធៀប ឆ្លុះបញ្ចាំងពីរដ្ឋធម្មនុញ្ញមុនៗ មករដ្ឋធម្មនុញ្ញកម្ពុជាឆ្នាំ១៩៩៣ ដែលកំពុងត្រូវបានប្រើប្រាស់នាពេលសព្វថ្ងៃនេះ ដើម្បីឲ្យប្រជាពលរដ្ឋ និងអ្នកសិក្សាងាយស្រួលយល់ក្នុងការអនុវត្ត និងស្រាវជ្រាវបន្ថែម ពាក់ព័ន្ធនឹងអត្ថបទច្បាប់ផ្សេងៗ។

ទាំងអ្នកសរសេរច្បាប់ និងអ្នកអនុវត្តច្បាប់តែងបកស្រាយរដ្ឋធម្មនុញ្ញកម្ពុជាខុសៗពីគ្នា។ ជារឿយៗ ការបកស្រាយមាត្រាមួយចំនួនក្នុងរដ្ឋធម្មនុញ្ញហាក់នៅមានភាពមិនជ្រះស្រឡះ ជាពិសេសពាក់ព័ន្ធនឹងការឃាត់ ការចាប់ឃុំខ្លួនតំណាងរាស្រ្តទាំងមិនទាន់ដកអភ័យឯកសិទ្ធិ និងការកំណត់ពីសិទ្ធិសេរីភាពបញ្ចេញមតិរបស់ប្រជាពលរដ្ឋ ដែលត្រូវបានអ្នកការពារសិទ្ធិមនុស្សយល់ថា ជាការរឹតត្បិតដែលផ្ទុយពីរដ្ឋធម្មនុញ្ញជាដើម។

ថ្លែងក្នុងពិធីផ្សព្វផ្សាយសៀវភៅស្តីពីរដ្ឋធម្មនុញ្ញកម្ពុជា ដែលត្រូវបានសរសេរជាភាសាអង់គ្លេស កាលពីថ្ងៃទី២២ ខែធ្នូនេះ លោក Rene Gradwohl ប្រធានមូលនិធិ Konrad Adenauer Stiftung (KAS) ប្រចាំកម្ពុជាលើកឡើងថា សៀវភៅស្តីពីរដ្ឋធម្មនុញ្ញកម្ពុជានេះនឹងជួយពង្រឹងការអនុវត្តច្បាប់ឲ្យស្របទៅតាមរដ្ឋធម្មនុញ្ញ។ លោកបន្ថែមថា បើទោះបីជាការយល់ដឹងពីរដ្ឋធម្មនុញ្ញកម្ពុជាមានការវិវត្តទៅមុខប្រសើរជាងមុនក្តី កម្ពុជាក៏នៅមានបញ្ហាប្រឈមធំៗ ដោយសារកម្ពុជានៅមានភាពលំបាកផ្នែកនយោបាយនៅឡើយ។
លោកមានប្រសាសន៍ថា៖

«យើងកំពុងតែស្ថិតនៅក្នុងស្ថានភាពនយោបាយមួយដែលពិបាកជាមួយនឹងការបោះឆ្នោតកាន់តែជិតមកដល់។ រដ្ឋធម្មនុញ្ញនឹងរងការវាយតម្លៃ ដោយសារតែរដ្ឋធម្មនុញ្ញធានានូវសិទ្ធិបោះឆ្នោតដោយសេរី និងយុត្តិធម៌សម្រាប់ប្រជាពលរដ្ឋគ្រប់រូប។ ហើយរដ្ឋធម្មនុញ្ញក៏ទាមទារឲ្យមានការគោរព និងទទួលស្គាល់លទ្ធផលនៃការបោះឆ្នោតដោយសេរី និងយុត្តិធម៌ផងដែរ។ ដូចនេះ ខ្ញុំគិតថា វានឹងជាការសាកល្បងដ៏គួរឲ្យចាប់អារម្មណ៍សម្រាប់ប្រទេសកម្ពុជាផ្ទាល់ ដោយសារតែវាជាពេលវេលាដ៏លំបាកមួយ។ ប៉ុន្តែខ្ញុំមានក្តីសង្ឃឹមថា ដោយឃើញនូវអ្វីៗដែលបានកើតឡើងក្នុងរយៈពេលប៉ុន្មានសប្តាហ៍កន្លងមកនេះ កម្ពុជានឹងឆ្លងកាត់ដំណើរការបោះឆ្នោតនេះដោយរលូន»។

លោក Rene បន្ថែមថា រដ្ឋធម្មនុញ្ញកម្ពុជាជារដ្ឋធម្មនុញ្ញស្របតាមបទដ្ឋានអន្តរជាតិ ប៉ុន្តែលោកថា អ្វីដែលសំខាន់គឺការបកស្រាយរដ្ឋធម្មនុញ្ញ។ លោកសម្គាល់ឃើញថា នៅក្នុងតុលាការ មេធាវីមួយចំនូនមិនបានផ្អែកមូលដ្ឋានលើរដ្ឋធម្មនុញ្ញក្នុងការការពារក្តីនោះទេ។

សម្តេច នរោត្តម សិរិវុឌ្ឍ សមាជិកក្រុមប្រឹក្សាធម្មនុញ្ញ មានព្រះបន្ទូលប្រាប់ VOA ក្នុងពិធីផ្សព្វផ្សាយសៀវភៅស្តីពីរដ្ឋធម្មនុញ្ញ នៅរាជធានីភ្នំពេញ កាលពីថ្ងៃទី២២ ខែធ្នូ ឆ្នាំ២០១៦។ (កាន់ វិច្ឆិកា/VOA)

សម្តេចនរោត្តម សិរិវុឌ្ឍ សមាជិកក្រុមប្រឹក្សាធម្មនុញ្ញ មានព្រះបន្ទូលប្រាប់ VOA ថា ការយល់ដឹងអំពីរដ្ឋធម្មនុញ្ញ និងធម្មនុញ្ញភាពជាចំណុចសំខាន់សម្រាប់ប្រជាពលរដ្ឋ ជាពិសេសអ្នកអនុវត្តច្បាប់នានា ដើម្បីឲ្យមានការអនុវត្តរដ្ឋធម្មនុញ្ញបានត្រឹមត្រូវ។

ព្រះអង្គបញ្ជាក់ថា៖

«ការរៀបចំរដ្ឋ រចនាសម្ព័ន្ធរដ្ឋមិនអាចធ្វើទៅបានដោយគ្មានរដ្ឋធម្មនុញ្ញទេ។ ដូច្នេះរដ្ឋធម្មនុញ្ញអាចមានការផ្លាស់ប្តូរ មានការវិវត្តទៅតម្រូវឈរលើមូលដ្ឋានសិទ្ធិមនុស្ស ប្រជាធិបតេយ្យ តុល្យភាព ដូច្នេះហើយយើងខ្ញុំជឿថា បើគ្មានរដ្ឋធម្មនុញ្ញ ហើយបើប្រជាពលរដ្ឋយើងខ្វះការចេះដឹង មិនយល់រដ្ឋធម្មនុញ្ញ នោះអនាគតរបស់ប្រទេសហ្នឹងមិនសូវល្អទេ»។

ព្រះអង្គពន្យល់ពីភាពខុសគ្នារវាងរដ្ឋធម្មនុញ្ញ និងសៀវភៅស្តីពីរដ្ឋធម្មនុញ្ញយ៉ាងដូច្នេះ៖

«មួយច្បាប់រដ្ឋធម្មនុញ្ញ។ នេះជាសៀវភៅ អ្វីៗដែលមានអត្ថបទ និងការវិភាគរបស់រដ្ឋធម្មនុញ្ញមួយចំនួន ឧទាហរណ៍តាំងពីមុនមក ឬការប្រៀបធៀប ឬការឲ្យយោបល់ទៅលើរដ្ឋធម្មនុញ្ញ។ ដូច្នេះមួយជាច្បាប់ បានន័យថា យើងមិនអាចប៉ះពាល់បានទេ ទាល់តែធ្វើវិសោធនកម្ម។ នេះមានអ្នកស្រាវជ្រាវមួយចំនួនដែលគេសរសេរពីការយល់ឃើញរបស់គេទៅលើរដ្ឋធម្មនុញ្ញបច្ចុប្បន្ននេះ និងអាចប្រៀបធៀបទៅហ្នឹងរដ្ឋធម្មនុញ្ញពីមុនមក។ អានេះខុសគ្នា ជាសៀវភៅមួយលើសពីច្បាប់រដ្ឋធម្មនុញ្ញ»។

បើតាមលោក Rene សៀវភៅស្តីពីរដ្ឋធម្មនុញ្ញជាភាសាអង់គ្លេសនេះត្រូវបានរៀបចំអស់រយៈពេល២ឆ្នាំ។ សៀវភៅនេះត្រូវបានបោះពុម្ពចំនួន១៥០០ក្បាល ហើយត្រូវបានផ្តល់ដោយឥតគិតថ្លៃពីមូលនិធិនេះ ដើម្បីដាក់តាមមហាវិទ្យាល័យមួយចំនួននៅកម្ពុជា ដើម្បីការសិក្សា និងការស្រាវជ្រាវក្នុងការអភិវឌ្ឍវិស័យច្បាប់នៅកម្ពុជា។ អ្នកចូលរួមក្នុងពិធីផ្សព្វផ្សាយនោះរំពឹងថា សៀវភៅស្តីពីរដ្ឋធម្មនុញ្ញកម្ពុជានេះនឹងមានប្រែសម្រួលជាភាសាខ្មែរឆាប់ៗ ដើម្បីឲ្យសិស្ស និស្សិត ដែលមិនងចេះភាសាអង់គ្លេសអាចយល់ដឹងបានទាំងអស់គ្នា៕

Harvests destroyed in fire

Villagers attempt to extinguish a fire in a rice field in Banteay Meanchey province on Sunday. Authorities estimate that 17 hectares of rice fields were accidentally set on fire. Photo supplied

Seventeen hectares of rice fields were consumed by a blaze in Banteay Meanchey province’s O’Chrou district early on Sunday morning, leaving four families without their harvest, officials said.

Changha commune deputy chief Hoeung Yok said local residents initially spotted smoke coming from a rice field that had been harvested in Sisophon town’s M’kak commune at about 8am.

Two hours later, they noticed that the flames had spread to another rice field that had not yet been harvested in Changha, which borders M’kak, he said.

“Luckily, there was a huge canal [near] the fire, so the fire did not spread. Otherwise, thousands of hectares of rice plantations that had not been harvested could have been burnt into ash,” Yok said.

Banteay Meanchy provincial police chief Ath Khem said fire engines were not able to enter the area because it was too muddy, but that firefighters had extinguished the blaze within two hours of it starting.

Khem said authorities will now investigate the cause of the fire. The 17 hectares that burned had belonged to four separate families. Yorn Yet, a 38-year-old whose family lost 10 of the 17 hectares, said he was renting six of those and now was left with nothing.

“Last year, we had a drought and I had much hope for this year, but now it’s another loss,” Yet said. “At the moment, I want to cry, but I have no tears. What I can do is call for support from authorities and donors.”

Seang Vanseth, the director of the provincial department of agriculture, said officials would visit the affected families to deliver food today.

Sunday, December 25, 2016

ក្រសួងមហាផ្ទៃបើកការស៊ើបអង្កេតករណីអ្នកប្រើហ្វេសប៊ុកកាត់តរូបប្រមាថព្រះមហាក្សត្រ

ព្រះមហាក្សត្រ ព្រះបាទសម្ដេចព្រះបរមនាថ នរោត្ដម សីហមុនី ក្នុងពេលព្រះអង្គយាងចូលរួមទិវាបុណ្យឯករាជ្យជាតិ ៩ វិច្ឆិកា ឆ្នាំ២០១៦ នាវិមានឯករាជ្យ។ RFA/Brach Chev

ករណីអ្នកប្រើប្រាស់ហ្វេសប៊ុក (Facebook) កាត់តរូបភាពដែលជាការប្រមាថដល់អង្គព្រះមហាក្សត្រ កំពុងស្ថិតក្នុងដៃសមត្ថកិច្ចជំនាញក្រសួងមហាផ្ទៃ ស៊ើបអង្កេតហើយ។ ចំណែកអ្នកវិភាគ និងសង្គមស៊ីវិល គាំទ្រការប្រកាសចំណាត់ការរបស់សមត្ថកិច្ចនៅពេលនេះ។

អ្នកនាំពាក្យក្រសួងមហាផ្ទៃ លោក ខៀវ សុភ័គ ប្រាប់ឲ្យដឹងថា ពេលនេះក្រុមជំនាញផ្នែកនាយកដ្ឋានព័ត៌មានវិទ្យា នៃក្រសួងមហាផ្ទៃ ស្រាវជ្រាវរកម្ចាស់គណនីហ្វេសប៊ុក ដើម្បីចាត់ការតាមផ្លូវច្បាប់។ ប៉ុន្តែលោកមិនទាន់ឲ្យដឹងពីតម្រុយនៃការស្រាវជ្រាវនេះនៅឡើយទេ ដោយលោកបញ្ជាក់ថា នៅពេលចាប់បានជនប្រព្រឹត្ត សមត្ថកិច្ចនឹងបញ្ជាក់លំអិតលើករណីនេះ៖ «ជាទស្សនៈខ្ញុំនោះ ខ្ញុំនៅមានភាពមន្ទិលច្រើនចំពោះការអនុវត្តការងាររបស់សមត្ថកិច្ច ដោយសារតែកន្លងមករដ្ឋាភិបាលច្រើនតែចាត់ការរឿងដែលពាក់ព័ន្ធនយោបាយ ជាជាងការការពារស្ថាប័ន និងការការពារមុខមាត់របស់កម្ពុជា»។

កាលពីពេលថ្មីៗនេះ អ្នកប្រើប្រាស់ហ្វេសប៊ុក ម្នាក់ ដែលមានគណនីសរសេរឈ្មោះជាអក្សរថៃ បានបង្ហោះរូបកាត់តមួយសន្លឹកដាក់រូបព្រះភក្ត្ររបស់ព្រះបាទ នរោត្តម សីហមុនី ដែលជារូបភាពអាក្រាតព្រះកាយ។

ចំណែកអ្នកវិភាគនយោបាយ លោក សូ ចន្ថា បង្ហាញការសង្ស័យថា ការអនុវត្តការងាររបស់សមត្ថកិច្ចអាចពុំសូវមានប្រសិទ្ធភាព ព្រោះតាមការសង្កេតរបស់លោកកន្លងមក ក្នុងករណីមានការប្រមាថស្ថាប័នរបស់រដ្ឋ ឬការគំរាមមន្ត្រីបក្សប្រឆាំង ការអនុវត្តការងាររបស់សមត្ថកិច្ចដើម្បីស្រាវជ្រាវរឿងនោះពុំសូវមានប្រសិទ្ធភាពទេ ប៉ុន្តែបើមានការប្រមាថដល់អ្នកនយោបាយមកពីសំណាក់បក្សកាន់អំណាច គឺសមត្ថកិច្ចចាត់ការបានលឿន ហើយមានប្រសិទ្ធភាពថែមទៀងផង៖ «ឃើញថា មានឆកល្វែងដែរចំពោះច្បាប់ ព្រោះថា ច្បាប់ចែងថា ព្រះមហាក្សត្រមិនអាចប៉ះពាល់បាន ប៉ុន្តែអត់មានចែងអំពីបទល្មើសអីណាមួយក្នុងរំលោភបំពាន ឬប៉ះពាល់ដល់ស្ថាប័នព្រះមហាក្សត្រ»។

មាត្រា៧ នៃរដ្ឋធម្មនុញ្ញចែងថា អង្គព្រះមហាក្សត្រ មិនអាចនរណារំលោភបំពានបានឡើយ។ ប៉ុន្តែច្បាប់កំពូលមួយនេះ មិនបានចែងពីការដាក់ទោសទណ្ឌនរណាដែលរំលោភបំពានអង្គព្រះមហាក្សត្រឡើយ សូម្បីតែក្រមព្រហ្មទណ្ឌក៏គ្មានមាត្រាណាមួយចែងដាក់ទោសលើបុគ្គលដែលរំលោភបំពានព្រះអង្គនោះដែរ។

មន្ត្រីជាន់ខ្ពស់នៃអង្គការការពារសិទ្ធិមនុស្សអង្គការលីកាដូ (LICADHO) លោក អំ សំអាត ស្វាគមន៍ចំណាត់ការរបស់សមត្ថកិច្ចនៅពេលនេះ ព្រោះការធ្វើបែបនេះលើសពីសេរីភាពបញ្ចេញមតិដែលធ្វើឲ្យប៉ះពាល់ដល់ព្រះមហាក្សត្រ ខណៈច្បាប់ហាម។ ប៉ុន្តែលោកយល់ថា សមត្ថកិច្ចពិបាកនឹងធ្វើការចោទប្រកាន់ ឬដាក់ទោសទណ្ឌជនប្រព្រឹត្តព្រោះគ្មានច្បាប់ណាមួយចែងដាក់ទោសជនដែលរំលោភបំពានអង្គព្រះមហាក្សត្រ៖ «»។

ការកាត់តរូបភាពដែលប្រមាថដល់អង្គព្រះមហាក្សត្រនៅពេលនេះ មិនមែនជាលើកទីមួយនោះទេ។ កាលពីពេលមុនៗ ក៏មានអ្នកប្រើហ្វេសប៊ុក ខ្លះ កាត់តរូបភាពប្រមាថព្រះអង្គដែរ ប៉ុន្តែគេមិនឃើញក្រុមសមត្ថកិច្ចចេញវិធានការឡើយ។ ប៉ុន្តែបើមានអ្នកណាសរសេរផ្ដួលរំលំរដ្ឋាភិបាល ឬប្រមាថលោកនាយករដ្ឋមន្ត្រី ហ៊ុន សែន មិនយូរឡើយ សមត្ថកិច្ចនឹងចាប់បានជនប្រព្រឹត្ត៕

យុទ្ធនាការចុះល្បាតព្រៃឡង់ទ្រង់ទ្រាយធំរបស់សហគមន៍ទាំងបួនខេត្ត

សហគមន៍ការពារព្រៃឡង់ទាំងបួនខេត្ត មានខេត្តក្រចេះ ស្ទឹងត្រែង កំពង់ធំ និងខេត្តព្រះវិហារ ចុះល្បាតព្រៃឡង់នៅថ្ងៃទី២៣ ខែធ្នូ ឆ្នាំ២០១៦។ RFA/Men Sothyr

គិតមកដល់ថ្ងៃទី២៤ ធ្នូ យុទ្ធនាការចុះល្បាតព្រៃឡង់ទ្រង់ទ្រាយធំរបស់សហគមន៍ការពារព្រៃឡង់ទាំងបួនខេត្ត មានខេត្តក្រចេះ ស្ទឹងត្រែង កំពង់ធំ និងខេត្តព្រះវិហារ មានរយៈពេល ៣យប់ ៤ថ្ងៃហើយ។

យុទ្ធនាការនេះផ្ដោតសំខាន់លើការចុះបង្ក្រាប និងទប់ស្កាត់បទល្មើសព្រៃឈើ និងទប់ស្កាត់ការបរបាញ់សត្វព្រៃក្នុងតំបន់ព្រៃឡង់ ដែលមានការចូលរួមពីបណ្ដាញព្រះសង្ឃឯករាជ្យដើម្បីយុត្តិធម៌សង្គម យុវជន និងមន្ត្រីបរិស្ថាន។

មូលហេតុនៃការជូនអំណោយនិងកាដូក្នុងឱកាសបុណ្យគ្រីស្ទម៉ាស

អ្នកមានជំនឿលើព្រះយេស៊ូវ ប្រារព្ធពិធីបុណ្យគ្រីស្ទម៉ាស ឬបុណ្យណូអែល នៅព្រះវិហារជីវិតថ្មីភ្នំពេញ ថ្ងៃទី២៥ ខែធ្នូ ឆ្នាំ២០១៦។ RFA/Kher Sonorng

ឱកាសមួយខែពេញនៅអំឡុងខែធ្នូ ជារដូវបុណ្យគ្រីស្ទម៉ាស (Christmas) ឬបុណ្យណូអែល សម្រាប់ប្រទេសអឺរ៉ុប គេតែងឈប់សម្រាកពីការងារ ដែលគេហៅថាវ៉ាកង ឬហៅជាភាសាអង់គ្លេសថា ហូលីដេ (Holiday)។ វេលាឈប់សម្រាកនេះហើយ ដែលអាចឲ្យពួកគេជួបជុំក្រុមគ្រួសារញាតិមិត្តជិតឆ្ងាយ ទទួលទានអាហាររួមគ្នា និងជូនវត្ថុអនុស្សាវរីយ៍ដល់គ្នាទៅវិញទៅមក។

សម្រាប់គ្រីស្ទាន (Christian) ឬអ្នកមានជំនឿលើព្រះយេស៊ូវវិញ ការជូនកាដូគ្នានេះមានអាថ៌កំបាំងមួយ ដែលមានអត្ថន័យសម្រាប់ពិធីបុណ្យនេះ។

ហេតុអ្វីបានជាគេជូនកាដូ និងអំណោយឲ្យគ្នានៅក្នុងឱកាសនេះ?

អំណោយស្ករសូកូឡា កាដូ និងវត្ថុអនុស្សាវរីយ៍ដ៏ច្រើន ត្រូវបានហាងទំនិញដាក់លក់យ៉ាងព្រោងព្រាត និងហាងទំនិញមួយចំនួនដាក់លក់បញ្ចុះតម្លៃក្នុងឱកាសខែធ្នូ ដែលជារដូវបុណ្យគ្រីស្ទម៉ាស ឬបុណ្យណូអែលចូលមកដល់។

គ្រូគង្វាលជំនួយនៃព្រះវិហារបេសកកម្មដំណឹងល្អ លោក រ័ត្ន ប៊ុនសំ បានឲ្យដឹងថា អាថ៌កំបាំងមួយនៃការជូនអំណោយ និងជូនកាដូគ្នាទៅវិញទៅមកនៅរដូវបុណ្យគ្រីស្ទម៉ាសនោះ គឺបានផ្សារភ្ជាប់នឹងទំនាក់ទំនងនៃជំនឿលើព្រះយេស៊ូវគ្រីស្ទ។ លោកថា ដើមចមនៃការប្រារព្ធពិធីបុណ្យគ្រីស្ទម៉ាស គឺជាការរំឭកពីកំណើតរបស់ព្រះ ដែលបានយាងមកប្រសូតលើផែនដី ដែលជាកាដូសង្គ្រោះមនុស្សកាលពីជាង ២ពាន់ឆ្នាំមុន៖ «ទាក់ទងនឹងអំណោយ គឺគេបង្ហាញអំពីការយាងមករបស់ព្រះយេស៊ូវគ្រីស្ទហ្នឹង គឺជាអំណោយដែលព្រះបានប្រទានមកដល់មនុស្សនូវសេចក្ដីសង្គ្រោះ ដែលជាអំណោយមួយដ៏ធំ តាមអង្គព្រះយេស៊ូវគ្រីស្ទហ្នឹង។ ដូច្នេះហើយ បានជារាល់ពេលបុណ្យណូអែល គឺគេជូនអំណោយដល់គ្នាទៅវិញទៅមក រំឭកអំពីការឲ្យដែលព្រះបានឲ្យអំណោយដ៏ធំធេងសម្រាប់មនុស្សជាតិទាំងមូល»។

ដើម្បីចូលរួមអបអរសាទរពិធីបុណ្យគ្រីស្ទម៉ាសនេះ នៅប្រទេសកម្ពុជា មិនថាតែអ្នកជឿលើព្រះយេស៊ូវ ដែលគេធ្វើនៅតាមព្រះវិហារប៉ុណ្ណោះទេ សូម្បីតែនៅតាមក្រុមហ៊ុន ផ្សារទំនើប និងហាងលក់ដូរនានា ក៏ត្រូវបានគេតុបតែងដើមឈើស្រល់យ៉ាងធំតាំងលំអ និងមានដាក់តាំងកាដូជាច្រើន និងខ្លះមានចាក់បទចម្រៀងចាក់ភ្លេងលាន់ឮរំពង ដើម្បីទាក់ទាញភ្ញៀវ និងលក់បញ្ចុះតម្លៃទៀតផង។ ចំណែកនៅតាមសាលារៀនមួយចំនួន ពិសេសសាលាអន្តរជាតិ ឬសាលាឯកជនវិញ គេតែងចូលរួមប្រារព្ធពិធីបុណ្យនេះដែរ ដោយមានកម្មវិធីពិសេសមួយ គឺលេងចាប់កាដូ លេងប្ដូរកាដូគ្នាទៅវិញទៅមក។

ក្រុមជំនុំនៃព្រះវិហារជីវិតថ្មីភ្នំពេញ អ្នកស្រី ស៊ឹម មុន្នីសោភា ថ្លែងថា ឲ្យតែដល់រដូវបុណ្យនេះម្ដងៗ អ្នកស្រីមិនដែលភ្លេចឡើយនូវការផ្ដល់អំណោយជូនមនុស្សជាទីស្រឡាញ់របស់អ្នកស្រី ក្នុងថ្ងៃបុណ្យណូអែល ដែលគាត់យល់ថាជាថ្ងៃពិសេស៖ «ទិញឲ្យកូនទាំងពីរនាក់ ហើយនិងប្ដី [សើច] ដោយសារក្នុងឱកាសបុណ្យណូអែលនេះ គឺជាថ្ងៃបុណ្យកំណើតព្រះយេស៊ូវគ្រីស្ទ ដែលជាថ្ងៃបុណ្យរំឭកពីសេចក្ដីស្រឡាញ់របស់ព្រះយេស៊ូវគ្រីស្ទ ដែលយាងមកផែនដី ដើម្បីប្រសូតជាមនុស្សលោក ហើយសុគតលើឈើឆ្កាង ដើម្បីសងថ្លៃអំពើបាបដែលបញ្ជាក់ថា ជាថ្ងៃនៃសេចក្ដីស្រឡាញ់មួយដ៏ធំសម្រាប់មនុស្ស។ ដូច្នេះ ទិញកាដូឲ្យកូនវាមានអំណរ កាលណាគឺគាត់បានទទួលកាដូចឹង ខ្ញុំតែងទិញកាដូជូនគាត់ក្នុងឱកាសនេះ គឺគាត់មានអំណរជាងគេ»។

នៅក្នុងព្រះគម្ពីរបរិសុទ្ធ បានកត់ត្រាថា មានប្រព្រឹត្តិការណ៍នៅភូមិបេថ្លេហ៊ឹម ក្នុងស្រុកយូដា ប្រទេសអ៊ីស្រាអែល ដោយទេព្ដាបានលេចមកប្រាប់ដល់អ្នកគង្វាលហ្វូងចៀមនៅពេលរាត្រីត្រជាក់ថា នឹងមានអង្គរាជបុត្រាមួយអង្គព្រះនាម ព្រះយេស៊ូវគ្រីស្ទ យាងមកប្រសូតលើផែនដីនេះ សម្រាប់ជួយមនុស្សឲ្យរួចពីអំពើបាបដែលជាអំណោយរបស់ព្រះសម្រាប់មនុស្ស។

«ចម្រៀង Oh holy night»

ទំនាយជាង ៣០០ទំនាយ ដែលបានទាយទុកដោយហោរាបានសម្រេចលើរូបអង្គព្រះយេស៊ូវគ្រីស្ទ ដែលយាងមកប្រសូតជាមនុស្សនៅលើផែនដី គឺមានចម្លើយតែមួយគត់ ឲ្យមនុស្សទទួលបាននូវជីវិតរួចពីអំពើបាប គឺជាជីវិតអស់កល្បជានិច្ច។

«ចម្រៀង Oh holy night»

នៅតាមព្រះវិហារគ្រិស្តបរិស័ទ គេបានប្រារព្ធពិធីបុណ្យគ្រីស្ទម៉ាស ឬបុណ្យណូអែល។

ក្រុមជំនុំព្រះវិហារជីវិតថ្មីភ្នំពេញ បានប្រារព្ធកាលពីថ្ងៃទី២៤ និងថ្ងៃទី២៥ ខែធ្នូ នៅក្នុងព្រះវិហារជីវិតថ្មី នៅរាជធានីភ្នំពេញ។

«សំឡេងច្រៀង ហេភី ប៊ឺសដេ Happy birth day Jesus...!»

នៅក្នុងឱកាសប្រារព្ធពិធីបុណ្យគ្រីស្ទម៉ាសនេះ គេតែងតែជូនពរគ្នាទៅវិញទៅមក ដោយភ្ជាប់ទៅឆ្នាំថ្មី នៃគ្រិស្តសករាជ ដែលមនុស្សនៅលើពិភពលោកបានប្រើប្រាស់ ដែលនឹងខិតជិតចូលមកដល់នៅសល់តែប៉ុន្មានថ្ងៃទៀតប៉ុណ្ណោះ។

«ចម្រៀងបុណ្យគ្រីស្ទម៉ាស and Happy New year»

នាងខ្ញុំសូមជូនពរឲ្យលោកអ្នកស្ដាប់វិទ្យុអាស៊ីសេរី ទាំងអស់ ទាំងក្នុង និងក្រៅប្រទេស ឲ្យជួបប្រទះតែនឹងសេចក្ដីសុខសាន្ត សុភមង្គលក្នុងក្រុមគ្រួសារ និងជោគជ័យគ្រប់ភារកិច្ចការងារកុំបីឃ្លៀងឃ្លាតឡើយ៕

សហគមន៍ដីធ្លីនឹងមិនធ្វើយុទ្ធនាការថ្ងៃច័ន្ទពណ៌ខ្មៅទេនៅថ្ងៃទី២៦ធ្នូ

សហគមន៍ដីធ្លីនៅតំបន់បឹងកក់ ធ្វើយុទ្ធនាការថ្ងៃច័ន្ទពណ៌ខ្មៅ នៅថ្ងៃច័ន្ទ ទី១៩ ខែធ្នូ ឆ្នាំ២០១៦។ RFA/Rann Samnang

ស្ត្រីតំណាងសហគមន៍ដីធ្លីបឹងកក់ និងបុរីកីឡា នឹងមិនធ្វើយុទ្ធនាការ «ថ្ងៃច័ន្ទពណ៌ខ្មៅ» ទេ នៅថ្ងៃទី២៦ ធ្នូ ដែលជាសប្ដាហ៍ចុងក្រោយនៃខែធ្នូ។ ស្ត្រីទាំងនេះនិយាយថា យុទ្ធនាការនេះនឹងអាចចាប់ផ្ដើមធ្វើឡើងវិញនៅដើមខែមករា ឆ្នាំក្រោយ។

តំណាងសហគមន៍មានជម្លោះដីធ្លីនៅបឹងកក់ រាជធានីភ្នំពេញ លោកស្រី បូវ សោភា ឲ្យដឹងនៅថ្ងៃទី២៥ ធ្នូ ថា សហគមន៍ដែលមានជម្លោះដីធ្លីនៅបឹងកក់ និងសហគមន៍បុរីកីឡា នឹងបន្តផ្អាកការធ្វើយុទ្ធនាការ «ថ្ងៃច័ន្ទពណ៌ខ្មៅ» មួយសប្ដាហ៍ទៀតសម្រាប់ថ្ងៃច័ន្ទ ទី២៦ ធ្នូ៖ «កម្មវិធីហ្នឹងចាប់ផ្ដើមពីខែមួយទៅវិញទៀត បើគេមិនលែង។ តែខ្ញុំសង្ឃឹមថា គេនឹងលែង បើសិនជាគេហៅទៅតុលាការឲ្យមានការកាត់ទោសត្រឹមថ្ងៃ២ ថ្ងៃ៣ អី សឹមយើងធ្វើ»។

ទន្ទឹមគ្នានេះ តំណាងសហគមន៍បុរីកីឡា លោកស្រី សរ ស៊ន បញ្ជាក់បន្ថែមថា ការផ្អាកនេះ គឺជាការដកឃ្លាមួយរយៈ ដើម្បីរង់ចាំមើលលទ្ធផលនៃពាក្យលេចឮថា តើមន្ត្រីអង្គការសង្គមស៊ីវិល និងមន្ត្រី គ.ជ.ប ដែលកំពុងជាប់មន្ទីរឃុំឃាំងនោះ នឹងត្រូវដោះលែងនៅដំណាច់ខែធ្នូ នេះ៖ «យើងផ្អាកចាំមើលខាងរដ្ឋាភិបាល ហើយនិងខាងតុលាការហ្នឹង គាត់ដោះស្រាយដោះលែងអ្នកសង្គមស៊ីវិល និងអ្នកស្រី ទេព វន្នី ហ្នឹងឬក៏អត់? ចាំមើលតែសប្ដាហ៍ហ្នឹងទៀតទេ ឲ្យដាច់ខែហ្នឹង ចូលខែ១ ថ្ងៃច័ន្ទ បន្តទៀត ធ្វើសកម្មភាពធំ។ យើងប្រមូលគ្នាគ្រប់សហគមន៍ដាក់ញត្តិដាក់អី»។

ដោយឡែកតែតំណាងក្រុមអតីតអ្នកបឹងកក់ គឺកញ្ញា អ៊ឹម ស្រីទូច ថ្លែងថា ក្រុមរបស់កញ្ញា នឹងនៅនាំគ្នាបន្តធ្វើយុទ្ធនាការថ្ងៃច័ន្ទពណ៌ខ្មៅនេះ នៅថ្ងៃច័ន្ទ ទី២៦ ធ្នូ ហើយនឹងលើកគ្នាទៅក្រសួងរៀបចំដែនដី នគរូបនីយកម្ម និងសំណង់ ដែរ៖ «ទីមួយ យើងត្រូវរួមយុទ្ធនាការថ្ងៃច័ន្ទពណ៌ខ្មៅហ្នឹង ដែលអត់ទាន់មានការដោះលែងអង្គការសង្គមស៊ីវិល មន្ត្រី គ.ជ.ប និងសកម្មជនដីធ្លី។ ទីពីរ ខ្ញុំទៅជំរុញឲ្យអាជ្ញាធរក្រសួងដែនដី ដោះស្រាយបញ្ហាជម្លោះដីធ្លីពួកខ្ញុំអ្នកបឹងកក់ហ្នឹង ដោយសារក្រសួងដែនដីហ្នឹងបានជំរុញឲ្យពួកខ្ញុំទៅជួបក្រុង តែពេលពួកខ្ញុំទៅជួបក្រុងហ្នឹង ក្រុងអត់បានមកជួបពួកខ្ញុំទេ មានតែប្រើហិង្សារុញច្រានពួកខ្ញុំឲ្យរបួសគ្រប់គ្នា»។

យុទ្ធនាការ «ថ្ងៃច័ន្ទពណ៌ខ្មៅ» ឬហៅថា Black Monday ត្រូវចាប់ផ្ដើមធ្វើឡើងដោយក្រុមពលរដ្ឋសហគមន៍ដែលមានបញ្ហាដីធ្លី ដូចជានៅតំបន់បឹងកក់ និងអ្នកបុរីកីឡា ជាដើម។ យុទ្ធនាការនេះ គឺតែងភ្ជាប់ទៅនឹងគោលបំណងទាមទារឲ្យរាជរដ្ឋាភិបាល និងតុលាការដោះលែងមន្ត្រីអង្គការសិទ្ធិមនុស្សអាដហុក (ADHOC) ៤រូប មន្ត្រី គ.ជ.ប ដែលជាអតីតមន្ត្រីអង្គការអាដហុក ១រូប និងអ្នកស្រី ទេព វន្នី ជាសកម្មជនដីធ្លីនៅបឹងកក់។

ក្រុមស្ត្រីសកម្មជនដីធ្លីបឹងកក់ និងអ្នកបុរីកីឡា បានប្រកាសផ្អាកធ្វើយុទ្ធនាការ «ថ្ងៃច័ន្ទពណ៌ខ្មៅ» ចាប់តាំងពីថ្ងៃទីច័ន្ទ ទី១៩ សប្ដាហ៍មុន។ នៅថ្ងៃច័ន្ទ ទី២៦ ធ្នូ គឺជាសប្ដាហ៍ទី២ ដែលស្ត្រីទាំងនេះរក្សាជំហរផ្អាកយុទ្ធនាការរហូតដល់ដំណាច់ខែធ្នូ។ គម្រោងដើរដាក់ញត្តិតាមស្ថាប័នសំខាន់ៗនានានៅថ្ងៃច័ន្ទ ទី២ ខែមករា នឹងអាចជាការចាប់ផ្ដើមយុទ្ធនាការដំបូងរបស់ក្រុមស្ត្រីសកម្មជនដីធ្លី សម្រាប់ឆ្នាំ២០១៧៕

គ្រោះថ្នាក់ចរាចរណ៍កំពុងក្លាយជាការព្រួយបារម្ភកាន់តែខ្លាំងចំពោះកម្មករ

រថយន្តដឹកកម្មករនៅតាមបណ្ដោយផ្លូវជាតិលេខ៣ ស្ថិតក្នុងស្រុកគងពិសី ខេត្តកំពង់ស្ពឺ កាលពីថ្ងៃទី១៨ ខែតុលា ឆ្នាំ២០១៦។ RFA/Morm Moniroth

អ្នកស្លាប់ និងអ្នករបួសដោយសារគ្រោះថ្នាក់ចរាចរណ៍ នៅតែមានតួលេខខ្ពស់ បើទោះជាអត្រាស្លាប់ និងរបួសធ្លាក់ចុះជាងមុន។ បច្ចុប្បន្ននេះ តួលេខគ្រោះថ្នាក់ចរាចរណ៍កើតច្រើនចំពោះក្រុមកម្មកររោងចក្រកាត់ដេរ ដែលបង្កការព្រួយបារម្ភកាន់តែខ្លាំង។

ប្រធានសម្ព័ន្ធសហជីពចលនាកម្មករ លោក ប៉ាវ ស៊ីណា ថ្លែងនៅរសៀលថ្ងៃទី២៤ ធ្នូ ថា ស្ថានភាពគ្រោះថ្នាក់ចរាចរណ៍ដែលកើតឡើងចំពោះកម្មករជាប់ៗគ្នានៅក្នុងបច្ចុប្បន្ននេះ ក្លាយជាកង្វល់ខ្លាំងចំពោះសុវត្ថិភាពកម្មករ។

ការថ្លែងរបស់លោក ប៉ាវ ស៊ីណា គឺភ្ជាប់ទៅនឹងគ្រោះថ្នាក់ក្រឡាប់រថយន្តមួយនៅខេត្តស្វាយរៀង កាលពីថ្ងៃទី២៣ ធ្នូ ដែលបណ្ដាលឲ្យមានមនុស្សរងរបួស ៤៤នាក់៖ «ឃើញថារយៈពេលចុងក្រោយហ្នឹង វាហាក់ដូចកើតឡើងសឹងរៀងរាល់ថ្ងៃ ហើយរឿងដែលកើតឡើងនោះ ធ្វើឲ្យកម្មករកម្មការិនីរន្ធត់ចិត្ត។ គាត់ហាក់ដូចជាស្មារតីគាត់នៅតែដក់ជាប់ហេតុការណ៍ គាត់តែងតែឃើញញឹកញាប់ ហើយអ្វីដែលសំខាន់ ខ្ញុំឃើញថា វិធានការទប់ស្កាត់របស់ក្រសួងពាក់ព័ន្ធហ្នឹង ហាក់ដូចជាអត់សូវមានប្រសិទ្ធភាពទេ»។

លោក ប៉ាវ ស៊ីណា បន្តទៀតថា រដ្ឋគួរតែបង្កើតគោលនយោបាយថ្មីៗថែមទៀត ដើម្បីបង្កើនសុវត្ថិភាពចំពោះកម្មករ៖ «ដូចជាការឲ្យនិយោជកគាត់ធានារ៉ាប់រងដឹកជញ្ជូនកម្មករដោយផ្ទាល់ ឬធ្វើជាកន្លែងស្នាក់នៅដល់បងប្អូនកម្មករ ដើម្បីឲ្យពួកគាត់មានលទ្ធភាព។ ឧទាហរណ៍ថា បើក្រុមហ៊ុនចេញថ្លៃដឹកជញ្ជូនឲ្យ ឬផ្ដល់ការដឹកជញ្ជូន មានន័យថា ឡានដែលគាត់ជិះ គឺវាអាចមានសុវត្ថិភាពជាង ហើយទីពីរ គាត់មិនជំរុញចិត្តបង្ខំឲ្យម្ចាស់ឡានគាត់បើកបរលឿន ដើម្បីបានទៅដល់ទាន់ម៉ោងធ្វើការ កុំឲ្យកាត់លុយកាត់កាក់អីពួកគាត់។ ទីពីរ ប្រសិនបើសង់ជាផ្ទះឲ្យពួកគាត់ស្នាក់នៅ គឺវាកាន់តែល្អប្រសើរទៀត»។

ទាក់ទងបញ្ហានេះ ត្រូវបានលោក ជាវ ប៊ុនរិទ្ធ ប្រធានការិយាល័យគោលនយោបាយនៃបេឡាជាតិរបបសន្តិសុខសង្គម (ប.ស.ស) នៃក្រសួងការងារ និងបណ្ដុះបណ្ដាលវិជ្ជាជីវៈ មានប្រសាសន៍បញ្ជាក់ថា សម្រាប់វិធានការពង្រឹងសុវត្ថិភាពចំពោះកម្មករបច្ចុប្បន្ននេះ ខាងក្រសួងលោកកំពុងពង្រឹងសុវត្ថិភាពចរាចរណ៍ជាមួយអ្នកបើកបរដឹកជញ្ជូនកម្មករជាញឹកញាប់ តាមរយៈក្រុមការងារឈ្មោះថា ក្រុមការងារសុវត្ថិភាពចរាចរណ៍លើមធ្យោបាយដឹកជញ្ជូនកម្មករ៖ «យើងបានចុះទៅផ្សព្វផ្សាយអប់រំអំពីច្បាប់ស្ដីពីចរាចរណ៍ផ្លូវគោក ក៏ដូចជាសុវត្ថិភាពចរាចរណ៍លើមធ្យោបាយដឹកជញ្ជូន ក៏ដូចជាបច្ចេកទេសថែទាំយានយន្ត ចុះទៅបណ្ដុះបណ្ដាលផ្ដល់ប័ណ្ណបើកបរ ដោយសហការជាមួយក្រសួងសាធារណការ និងដឹកជញ្ជូន។ ពាក់ព័ន្ធទៅនឹងបងប្អូនដឹកជញ្ជូនកម្មករនេះ ឃើញថា កន្លងមក មិនមែនតែគ្រោះថ្នាក់ដោយសារខ្លួនគាត់ទេ ដោយសាររថយន្តបង្កមួយចំនួនដែរ។ មានន័យថា គាត់អាចបង្កគ្រោះថ្នាក់ខ្លួនឯង ហើយរថយន្តដទៃក៏បង្កគ្រោះថ្នាក់មកដល់រថយន្តដឹកកម្មករដែរ»។

ប្រធានសម្ព័ន្ធសហជីពចលនាកម្មករ លោក ប៉ាវ ស៊ីណា ផ្ដល់អនុសាសន៍ថា រដ្ឋាភិបាលខ្លួនឯង ឬសហការជាមួយក្រុមហ៊ុន គួរតែវិនិយោគលើមធ្យោបាយដឹកកម្មករ ឬសង់កន្លែងស្នាក់នៅសម្រាប់កម្មករ ដើម្បីកាត់បន្ថយគ្រោះថ្នាក់។ ចំណុចនេះ លោក ជាវ ប៊ុនរិទ្ធ ឆ្លើយតបថា រដ្ឋាភិបាលបានជំរុញហើយ ហើយក្រុមហ៊ុនខ្លះមានមធ្យោបាយដឹកជញ្ជូនខ្លួនឯងដែរ៖ «ដូចជានៅខាងខេត្តកោះកុង ក៏គេបានរៀបចំឲ្យដឹកជញ្ជូនកម្មករឲ្យមានសុវត្ថិភាព ហើយជាបន្តបន្ទាប់ក៏មានក្រុមហ៊ុនមួយចំនួនទៀត ក៏គេបាន និងកំពុងរៀបចំវិនិយោគទៅលើឡាន ដើម្បីដឹកបងប្អូនកម្មករកម្មការិនីយើងឲ្យមានសុវត្ថិភាព ហើយពាក់ព័ន្ធទៅនឹងរឿងចរាចរណ៍លើមធ្យោបាយដឹកជញ្ជូននេះ ឃើញថា គណៈកម្មការជាតិសុវត្ថិភាពចរាចរណ៍ផ្លូវគោក លោកបានចេញសេចក្ដីណែនាំ ក៏ដូចជាសេចក្ដីជូនដំណឹង ដើម្បីឲ្យបងប្អូនបើកបរទាំងអស់មានការប្រុងប្រយ័ត្នខ្ពស់ក្នុងការបើកបរ ហើយជំរុញឲ្យគាត់ប្ដូររថយន្តមួយចំនួន ទៅរករថយន្តមានសុវត្ថិភាពក្នុងការដឹកជញ្ជូនបងប្អូនកម្មករយើង»។

លោកបញ្ជាក់បន្ថែមថា នៅក្នុងកម្មវិធីធានារ៉ាប់រងបច្ចុប្បន្ន កម្មករដែលទទួលរងគ្រោះថ្នាក់ដូចនៅក្នុងពេលថ្មីៗនេះ ជាបន្ទុកគាំពាររបស់របបសន្តិសុខសង្គមក្រសួងការងារ៖ «គឺគាត់គ្រោះថ្នាក់ពេលធ្វើដំណើរពីផ្ទះគាត់ទៅកន្លែងធ្វើការនៅរោងចក្រ ហើយពីរោងចក្រទៅផ្ទះគាត់វិញ។ អ៊ីចឹងគ្រោះថ្នាក់នេះ ត្រូវបានទទួលធានារ៉ាប់រងពី ប.ស.ស ដូចជាការផ្ដល់ការព្យាបាលរហូតដល់ជាសះស្បើយ និងផ្ដល់អត្ថប្រយោជន៍ជាច្រើនទៀត ដែលមានចែងនៅក្នុងគោលនយោបាយរបបសន្តិសុខសង្គម ដែលរាជរដ្ឋាភិបាលបានកំណត់»។

គ្រោះថ្នាក់ចរាចរណ៍ដែលកើតឡើងចំពោះកម្មករមានចំនួនច្រើនៗក្នុងមួយករណី បានកើតឡើងផ្ទួនៗជាបន្តបន្ទាប់ក្នុងខែធ្នូ នេះ។ កាលពីថ្ងៃទី១៦ ធ្នូ ឡានដឹកឧសបុកឡានដឹកកម្មករកម្មការិនីនៅខេត្តកំពង់ឆ្នាំង បណ្ដាលឲ្យកម្មករកម្មការិនីចំនួន ៣២នាក់រងរបួស។ នៅព្រឹកថ្ងៃទី២៣ ធ្នូ រថយន្តដឹកកម្មកររោងចក្រកាត់ដេរមួយគ្រឿង បានដាច់កាឡេក្រឡាប់នៅលើផ្លូវជាតិលេខ១ ត្រង់ចំណុចភូមិត្រពាំងផ្លុង សង្កាត់បាទី ក្រុងបាវិត ហើយបណ្ដាលឲ្យអ្នករបួសចំនួន ៤៤នាក់ ក្នុងនោះអ្នករបួសធ្ងន់មានចំនួន ១៥នាក់។

របាយការណ៍របស់នាយកដ្ឋានសណ្ដាប់ធ្នាប់នៃអគ្គស្នងការនគរបាលជាតិ បង្ហាញតួលេខថា គ្រាន់តែនៅថ្ងៃទី២៣ ធ្នូ គឺមានគ្រោះថ្នាក់ចរាចរណ៍ចំនួន ១០លើក មនុស្សរបួស ៦១នាក់ និងស្លាប់ ៤នាក់។ តួលេខពីថ្ងៃទី១ ដល់ថ្ងៃទី២៣ ធ្នូ មានគ្រោះថ្នាក់ចរាចរណ៍កើតឡើង ២៧៥លើក ធ្វើឲ្យមនុស្សស្លាប់ ១០៨នាក់ រងរបួសចំនួន ៥០៣នាក់។ នៅកម្ពុជា បច្ចុប្បន្ននេះ អ្នកស្លាប់ដោយសារគ្រោះថ្នាក់ចរាចរណ៍ មានចំនួនច្រើនជាងអ្នកស្លាប់ដោយសារជំងឺគ្រុនចាញ់ គ្រុនឈាម និងគ្រាប់មីនបូកបញ្ចូលគ្នាទៅទៀត៕