បុរស២នាក់ត្រូវសមត្ថកិច្ចឃុំខ្លួនទាក់ទងនឹងការក្លែងហ្វេសប៊ុកនាយករដ្ឋមន្ត្រី
ជនសង្ស័យ ២នាក់ ដែលជាប់ពាក់ព័ន្ធនឹងការក្លែងហ្វេសប៊ុក (Facebook) របស់លោកនាយករដ្ឋមន្ត្រី ហ៊ុន សែន ត្រូវសមត្ថកិច្ចសម្រេចឃុំខ្លួនបណ្ដោះអាសន្ន។ នៅក្នុងសន្និសីទកាសែតនៅរសៀលថ្ងៃទី១០ ខែវិច្ឆិកា បុរសទាំង ២នាក់នេះ ត្រូវបានតុលាការចោទប្រកាន់ថា បានក្លែងឯកសារសាធារណៈ ដូចមានចែងក្នុងក្រមព្រហ្មទណ្ឌ និងធ្វើឲ្យប៉ះពាល់យ៉ាងធ្ងន់ធ្ងរដល់កិត្តិយសរបស់លោក ហ៊ុន សែន។
ជនសង្ស័យទាំង ២នាក់នេះ ត្រូវបានបញ្ជូនខ្លួនទៅឃុំភ្លាមៗ ក្រោយពីបញ្ចប់សន្និសីទកាសែតដែលរៀបចំនៅអគ្គស្នងការនគរបាលជាតិ។
សន្និសីទកាសែតដែលប្រើពេលមិនបាន ១ម៉ោងស្រួលបួលផងនោះ អ្នកទាំងពីរត្រូវជាប់ចោទពីក្លែងឯកសារសាធារណៈ ហើយបើតុលាការរកឃើញថា ពិតជាមានបទល្មើសដូចការចោទប្រកាន់នេះមែន អ្នកទាំងពីរត្រូវជាប់ពន្ធនាគារចន្លោះពី ៥ឆ្នាំ ទៅ ១០ឆ្នាំ។
លោក អ៊ី សុខឃី ប្រធាននាយដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែននៃអគ្គស្នងការនគរបាលជាតិ ឲ្យដឹងថា ជនសង្ស័យទាំង ២នាក់នេះ គឺខាងសមត្ថកិច្ចមានភស្តុតាងគ្រប់គ្រាន់ក្នុងចាប់ខ្លួន និងចោទប្រកាន់តាមផ្លូវច្បាប់។ លោកបន្តថា ការលួចបន្លំបែបនេះ មិនត្រឹមតែធ្វើប៉ះពាល់ដល់មុខមាត់របស់លោក ហ៊ុន សែន ទេ តែថែមទាំងបង្កការវឹកវរដល់សង្គម ជាពិសេសនាំឲ្យមានការយល់ច្រឡំកាន់តែធ្ងន់ធ្ងរចំពោះលោកនាយករដ្ឋមន្ត្រីក្នុងផ្លូវមិនល្អទៀតផង៖ «»។
លោក អ៊ី សុខឃី ឲ្យដឹងថា មកដល់ពេលនេះ ជនសង្ស័យទាំង ២នាក់ ត្រូវឃុំខ្លួនបណ្ដោះអាសន្ននៅស្នងការនគរបាលជាតិសិន មុននឹងត្រូវបញ្ជូនខ្លួនទៅតុលាការ ព្រោះនៅមានការស៊ើបអង្កេតបន្ថែមទៀត។
បុរសទាំង ២នាក់នេះ ត្រូវបានសមត្ថកិច្ចចាប់ខ្លួនក្នុងពេលដាច់ដោយឡែកពីគ្នា។ លោក ឈួន សារុន ដែលមានមុខរបរជាបុគ្គលិកហិរញ្ញវត្ថុរបស់គ្រឹះស្ថានឯកជនមួយកន្លែង ក្នុងទីក្រុងភ្នំពេញ ត្រូវចាប់ខ្លួនកាលពីថ្ងៃទី៩ ខែវិច្ឆិកា។ ១ថ្ងៃបន្ទាប់ គឺនៅថ្ងៃទី១០ ក្នុងសំណុំរឿងជាមួយគ្នានេះ បានបើកផ្លូវឲ្យសមត្ថកិច្ចឈានទៅចាប់ខ្លួនឈ្មោះ សួន ចាន់រតនា ដែលមានមុខរបរជាជាងជួសជុលទូរស័ព្ទដៃម្នាក់ថែមទៀត។
សមត្ថកិច្ចបញ្ជាក់នៅក្នុងសន្និសីទកាសែតថា កាលពីថ្ងៃទី៨ ខែវិច្ឆិកា ជនសង្ស័យទាំង ២នាក់នេះ ត្រូវបានសមត្ថកិច្ចរកឃើញថា បានលួចក្លែងបន្លំគណនេយ្យហ្វេសប៊ុករបស់លោក ហ៊ុន សែន។ មិនតែប៉ុណ្ណោះ ជនសង្ស័យទាំងនេះ បានប្រើប្រាស់ត្រា និងឯកសារក្លែងថា ជាទីប្រឹក្សានៃរដ្ឋលេខាធិការទីស្ដីការគណៈរដ្ឋមន្ត្រីថែមទៀតផង។
តំណាងអយ្យការនៃតុលាការក្រុងភ្នំពេញ លោក សៀង សុខ ដែលកាន់សំណុំរឿងនេះ ឲ្យដឹងថា តុលាការកំពុងពិនិត្យលើករណីនេះ និងឈានទៅចោទប្រកាន់ជាផ្លូវការ ក្រោយបិទការស៊ើបអង្កេតរួច។ លើសពីនេះទៀត ព្រះរាជអាជ្ញារងរូបនេះបញ្ជាក់ថា ផ្អែកលើភស្តុតាងដាក់បន្ទុក តុលាការរកឃើញថា ជនសង្ស័យទាំង ២នាក់នេះ ពិតជាបានប្រព្រឹត្តបទល្មើសដូចការចោទប្រកាន់ក្នុងដំណាក់កាលនៃការស៊ើបអង្កេតបឋមមែន៖ «»។
ផ្ទុយពីការយល់ឃើញនេះ អង្គការមិនមែនរដ្ឋាភិបាលផ្នែកសិទ្ធិមនុស្សរិះគន់ថា ការអនុវត្តប្រព័ន្ធយុត្តិធម៌នៅកម្ពុជា នៅតែប្រើប្រាស់ស្តង់ដារពី បើទោះជាសហគមន៍អន្តរជាតិស្នើឲ្យមានការកែទម្រង់ហើយក៏ដោយចុះ។
អ្នកនាំពាក្យសមាគមការពារសិទ្ធិមនុស្សអាដហុក (ADHOC) លោក សំ ច័ន្ទគា សាទរចំពោះការប្រយុទ្ធប្រឆាំងរាល់ការប្រព្រឹត្តបទល្មើស ប៉ុន្តែលោកយល់ឃើញថា ការអនុវត្តច្បាប់របស់សមត្ថកិច្ច និងតុលាការនៅតែរកឃើញថា ធ្វើដោយមិនស្មើភាពគ្នានៅឡើយ៖ «»។
បើទោះជាបែបណា ជនសង្ស័យទាំងពីរនាក់នេះ មិនបានផ្ដល់បទសម្ភាសន៍នៅក្នុងសន្និសីទកាសែតឡើយ។ ក្រោយបញ្ចប់សន្និសីទកាសែតភ្លាម ពួកគេត្រូវបញ្ជូនចូលរថយន្តភ្លាមៗ ទៅឃុំខ្លួនបណ្ដោះអាសន្ននៅស្នងការនគរបាលក្រុងភ្នំពេញ។
ជុំវិញចំណាត់ការរបស់សមត្ថកិច្ចនេះ ត្រូវរងការរិះគន់ពីអង្គការមិនមែនរដ្ឋាភិបាលថា ហាក់ធ្វើឡើងដោយប្រញាប់ប្រញាល់ និងចាត់វិធានការបានយ៉ាងងាយ ជាពិសេសសំណុំរឿងដែលប៉ះពាល់ដល់មេដឹកនាំរបស់រដ្ឋាភិបាល។ ផ្ទុយទៅវិញ មានករណីជាច្រើនដែលជាប់ទាក់ទងសង្គមស៊ីវិល អ្នកការពារសិទ្ធិមនុស្ស បក្សប្រឆាំង និងចុងក្រោយករណីឃាតកម្មលើលោកបណ្ឌិត កែម ឡី ការតាមដាននៅទ្រឹង និងនៅតែអះអាងថា សំណុំរឿងទាំងនោះ ដាក់ឲ្យស្ថិតក្រោមការស៊ើបអង្កេតនៅឡើយ៕
