Tebthida

Wednesday, January 25, 2017

ពលករខ្មែរធ្វើការខុសច្បាប់នៅថៃជិត៥ម៉ឺននាក់ត្រូវបានចាប់បញ្ជូនមកកម្ពុជានៅឆ្នាំ២០១៦

របាយការណ៍នគរបាលជាតិ ឲ្យដឹងថា កាលពីឆ្នាំ២០១៦ ពលករខ្មែរធ្វើការខុសច្បាប់នៅប្រទេសថៃ ចំនួនជិត ៥ម៉ឺននាក់ ត្រូវបានអាជ្ញាធរថៃ ចាប់បញ្ជូនត្រឡប់មកកម្ពុជា វិញ។

របាយការណ៍ដែលដកស្រង់តួលេខរបស់អាជ្ញាធរខេត្តបន្ទាយមានជ័យ នៅក្នុងកិច្ចប្រជុំបូកសរុបការងារប្រចាំឆ្នាំ២០១៦ បញ្ជាក់ថា មានពលករខ្មែរចំនួនជាង ៥ម៉ឺននាក់ ក្នុងនោះជាង ១ម៉ឺន ៦ពាន់នាក់ជាស្ត្រី និងជាង ៤.២០០នាក់ជាកុមារ ត្រូវបានអាជ្ញាធរថៃ ចាប់បញ្ជូនត្រឡប់មកប្រទេសកម្ពុជា វិញតាមរថយន្តវ៉ែន កាត់តាមច្រកព្រំដែនអន្តរជាតិប៉ោយប៉ែត។

អភិបាលខេត្តបន្ទាយមានជ័យ លោក សួន បវរ ត្រូវបានសារព័ត៌មានក្នុងស្រុកដកស្រង់ប្រសាសន៍ថា កន្លងមក មន្ត្រីរបស់លោកបានព្យាយាមកាត់បន្ថយការធ្វើចំណាកស្រុកខុសច្បាប់ តាមរយៈការត្រួតពិនិត្យយ៉ាងហ្មត់ចត់នៅតាមច្រកព្រំដែននានាក្នុងខេត្តបន្ទាយមានជ័យ ប៉ុន្តែលោកថា ការធ្វើចំណាកស្រុកដើម្បីស្វែងរកការងារធ្វើនៅក្រៅប្រទេស គឺជារឿងធម្មតា និងជាសេរីភាពរបស់ពលរដ្ឋ។

ជំរឿនរបស់រដ្ឋាភិបាលថៃ កាលពីឆ្នាំ២០១៥ រកឃើញថា ពលរដ្ឋកម្ពុជា ជាង ៤សែន ៥ម៉ឺននាក់ កំពុងរស់នៅ និងធ្វើការខុសច្បាប់ក្នុងប្រទេសថៃ៕

Passport complaint pays

Cambodian workers at the Poipet border return from Thailand in 2014. Vireak Mai

Cambodia's Ministry of Labour is preparing passports for 500 Thailand-based workers who last week complained they had still not received documents they allegedly paid for more than two years ago, the ministry said on Tuesday.

The 500 migrants had sent a letter of complaint to a Thai police chief claiming they still did not have their legal documentation despite paying the necessary fees in 2014.

Ministry of Labour representatives originally said the workers had outstanding fees to pay in order to receive the documents, something workers denied. In a statement released on Tuesday, the ministry said that, fearing unscrupulous brokers had cheated the workers, they were now granting them their passports.

Cambodian migrant worker Bun Hour welcomed the news yesterday, saying it would help workers who are routinely arrested by Thai authorities for their lack of documentation.

In the ministry’s statement, spokesman Heng Sour said they are currently in the process of preparing 231,626 passports for Cambodian workers in Thailand. But he warned that workers should pay no more than $27 to the ministry and about $14 to Thai immigration officials. The statement asked workers to contact the ministry if they encounter brokers who ask migrants to pay more.

According to a 2016 Banteay Meanchey police report, Thai officials repatriated 49,987 Cambodians via the Poipet border crossing last year. Poipet police chief Sin Namyong said yesterday that Thailand is deporting workers back to Cambodia “almost every day” for lack of adequate documentation.

Tuesday, January 24, 2017

ពលរដ្ឋជាង៦០នាក់តវ៉ាមុខសាលាខេត្តមណ្ឌលគិរីសុំឲ្យអាជ្ញាធរគោរពកិច្ចសន្យា

ប្រជាពលរដ្ឋភូមិអន្ទ្រងសាមគ្គីមានជ័យ ឃុំពូជ្រៃ ស្រុកពេជ្រាដា ខេត្តមណ្ឌលគិរី ប្រមូលផ្តុំគ្នានៅមុខសាលាខេត្ត និងសាលាដំបូងខេត្ត ដើម្បីតវ៉ាដីកាតុលាការកោះហៅតំណាងពួកគាត់ ថ្ងៃទី២៤ ខែមករា ឆ្នាំ២០១៧។ Photo ADHOC

ប្រជាពលរដ្ឋរស់នៅភូមិអន្ទ្រងសាមគ្គីមានជ័យ ក្នុងឃុំពូជ្រៃ ស្រុកពេជ្រាដា ខេត្តមណ្ឌលគិរី ជាង ៦០នាក់ នាំគ្នាមកសាលាខេត្តតវ៉ាឲ្យអាជ្ញាធរគោរពកិច្ចសន្យាដែលបានធ្វើជាមួយពលរដ្ឋ ពាក់ព័ន្ធបណ្ដឹងចោទប្រកាន់តំណាងប្រជាពលរដ្ឋ ៣នាក់ ដែលតវ៉ាប្រឆាំងក្រុមហ៊ុនសម្បទានសេដ្ឋកិច្ចឈ្មោះ ដាយណាម (Day Nam) ឈូសឆាយប៉ះពាល់ដីព្រៃអារក្សប្រជាពលរដ្ឋ។

មន្ត្រីអាជ្ញាធរខេត្តមណ្ឌលគិរី បានសម្របសម្រួលឲ្យប្រជាពលរដ្ឋបីនាក់រស់នៅភូមិអន្ទ្រងសាមគ្គីមានជ័យ ក្នុងឃុំពូជ្រៃ ចូលខ្លួនទៅឆ្លើយបំភ្លឺតាមដីកាកោះរបស់តុលាការ ដើម្បីឆ្លើយបំភ្លឺជុំវិញបទចោទប៉ុនប៉ងឃាតកម្ម។

ការសម្របសម្រួលនេះ ធ្វើឡើងខណៈប្រជាពលរដ្ឋរស់នៅភូមិអន្ទ្រងសាមគ្គីមានជ័យ ក្នុងឃុំពូជ្រៃ ជាង ៦០នាក់ នាំគ្នាប្រមូលផ្តុំនៅមុខសាលាខេត្ត ដើម្បីសុំកិច្ចអន្តរាគមន៍ពីអាជ្ញាធរខេត្ត ដោយសារតែអ្នកភូមិភ័យខ្លាចតុលាការ ចាប់ខ្លួនតំណាងពួកគាត់ដែលបានតវ៉ារឿងក្រុមហ៊ុនចិន ឈូសឆាយប៉ះពាល់ព្រៃអភិរក្សអ្នកភូមិ។

កាលពីឆ្នាំ២០១៤ ប្រជាពលរដ្ឋភូមិអន្ទ្រងសាមគ្គីមានជ័យ រាប់រយនាក់ បានចាប់ឃាត់គ្រឿងចក្រឈូសដីមួយគ្រឿងរបស់ក្រុមហ៊ុនចិន ឈ្មោះ ដាយណាម ដែលកំពុងឈូសឆាយដីសម្បទានរំលោភចូលព្រៃគោរពបូជារបស់អ្នកភូមិ។ ក្រោយពីអ្នកភូមិឃាត់គ្រឿងចក្រនេះ តុលាការបានចេញដីកាកោះហៅតំណាងអ្នកភូមិពីរនាក់ និងមេភូមិ ពីបទលួច និងប្រើអំពើហិង្សា ប៉ុន្តែអ្នកភូមិរាប់រយនាក់ បាននាំគ្នាមកតវ៉ានៅសាលាខេត្ត ទើបអាជ្ញាធរខេត្តសម្របសម្រួលឲ្យអ្នកភូមិបញ្ចប់ការតវ៉ា ដោយសន្យាថានឹងបញ្ចប់រឿងចោទប្រកាន់អ្នកភូមិនេះ។
តំណាងអ្នកភូមិ លោក សុខ តឿ បញ្ជាក់ថា រហូតមកទល់នឹងខែមករា ឆ្នាំ២០១៧ តុលាការចេញដីកាកោះហៅតំណាងប្រជាពលរដ្ឋ និងមេភូមិជាថ្មី ឲ្យចូលខ្លួនឲ្យចៅក្រមស៊ើបសួរពីបទប៉ុនប៉ងឃាតកម្ម។ ហេតុនេះ ទើបប្រជាពលរដ្ឋនាំគ្នាទៅសាលាខេត្តជាថ្មី ដើម្បីសុំឲ្យអាជ្ញាធរអនុវត្តតាមការសន្យាដែលបានធ្វើជាមួយពលរដ្ឋ។ លោកថា អាជ្ញាធរខេត្តបានអនុញ្ញាតឲ្យអ្នកភូមិចូលជួបពិភាក្សាគ្នា និងសម្របសម្រួលឲ្យអ្នកភូមិអនុវត្តតាមនីតិវិធីនៃការកោះហៅ និងសន្យាមិនមានការចាប់ខ្លួនអ្នកភូមិនោះទេ៖ «ចោទហ្នឹងដើម្បីដាក់ឃុំខ្លួនពួកខ្ញុំហ្នឹងណា! ដល់ចុងក្រោយ គេសម្រួលគ្នាទៅគេមិនឲ្យឃុំខ្លួនទេ គេឲ្យចូលខ្លួនទៅបំពេញបែបបទ គេធ្វើបែបបទបញ្ចប់ឲ្យ»។

តំណាងអ្នកភូមិដែលតុលាការកោះហៅរួមមាន ឈ្មោះ សុខ តឿ និង យ៉ែម ថា ឲ្យចូលខ្លួនទៅការិយាល័យចៅក្រមស៊ើបសួរនៅថ្ងៃទី២៤ ខែមករា។ ចំណែកប្រធានភូមិឈ្មោះ គ្រឿន ប៊ុនធឿន ឲ្យចូលខ្លួននៅថ្ងៃទី២៥ ក៏ប៉ុន្តែប្រធានភូមិបានស្លាប់កាលពីឆ្នាំ២០១៥ បាត់ទៅហើយ។

អភិបាលរងខេត្តមណ្ឌលគិរី លោក ចឹង សុចន្ថា មានប្រសាសន៍បញ្ជាក់ថា រឿងក្តីនេះជារឿងចាស់ ដែលក្រុមហ៊ុនបានប្ដឹងប្រជាពលរដ្ឋ ប៉ុន្តែអាជ្ញាធរខេត្តបានសម្របសម្រួលឲ្យក្រុមហ៊ុនបញ្ចប់រឿងនេះតាំងពីឆ្នាំ២០១៤។ លោកថា ដោយសាររាជរដ្ឋាភិបាលបានបញ្ចប់អាជ្ញាប័ណ្ណក្រុមហ៊ុនសម្បទាននេះកាលពីឆ្នាំ២០១៥ ទើបក្រុមហ៊ុនចាកចេញដោយមិនបានដកពាក្យបណ្ដឹងប្រជាពលរដ្ឋ ទើបចៅក្រមតុលាការកោះហៅមកសាកសួរ ដើម្បីបំពេញនីតិវិធីតែប៉ុណ្ណោះ៖ «ឥឡូវខ្ញុំបានជម្រាបគាត់ហើយថា គេហៅដើម្បីសួរយើងទេ បើយើងមិនធ្វើខុស ខ្លាចចូលទៅ បង្ហាញខ្លួនទៅ ខ្លាចស្អី? វាចប់ហើយ»។

នៅរសៀលម៉ោង ២ ថ្ងៃទី២៤ ខែមករា តំណាងអ្នកភូមិទាំងពីរនាក់ បានចូលខ្លួនទៅកាន់ការិយាល័យចៅក្រមស៊ើបសួរតាមការសម្របសម្រួលរបស់អាជ្ញាធរខេត្ត។ ដោយឡែកប្រជាពលរដ្ឋដែលអមដំណើរតំណាងរបស់គេ បានរង់ចាំនៅមុខសាលាដំបូង ឃ្លាំមើលការសាកសួរនេះ។

អ្នកនាំពាក្យ និងជាប្រធានលេខាធិការដ្ឋានរដ្ឋបាលសាលាដំបូងខេត្តមណ្ឌលគិរី លោក មាស ប្រុស ថ្លែងបញ្ជាក់ថា នេះជាការអនុវត្តនីតិវិធីរបស់ចៅក្រមស៊ើបសួរ ខណៈរឿងក្តីនេះកំពុងឋិតក្នុងចំណាត់ការចៅក្រមស៊ើបសួរ។ លោកថា ការចូលខ្លួនបំភ្លឺរបស់ពលរដ្ឋ គឺជាការចូលរួមអនុវត្តច្បាប់ទាំងអស់គ្នា ហើយការសម្រេចយ៉ាងណា ឋិតលើចៅក្រមស៊ើបសួរដែលកាន់សំណុំរឿងក្តីប្រជាពលរដ្ឋនេះ៖ «គាត់នៅឆ្លើយបំភ្លឺនៅបន្ទប់ចៅក្រមខាងលើ ទើបឆ្លើយបានម្នាក់ហ្នឹងតាមដីកាកោះហៅហ្នឹង។ គាត់ចេះតែមកខ្លាចគ្នាគាត់ ប៉ុន្តែចៅក្រមមិនទាន់សម្រេចអ្វីទេ កំពុងស៊ើបសួរ»។

ក្រុមហ៊ុន ដាយណាម កាលពីឆ្នាំ២០១៤ បានដាក់ពាក្យប្ដឹងប្រជាពលរដ្ឋភូមិអន្ទ្រងសាមគ្គីមានជ័យ ពីបទលួច និងប្រើអំពើហិង្សាចាប់យកគ្រឿងចក្រក្រុមហ៊ុនដែលកំពុងឈូសឆាយដីសម្បទាន។

មន្ត្រីឃ្លាំមើលសិទ្ធិមនុស្សអង្គការអាដហុក (ADHOC) ខេត្តមណ្ឌលគិរី លោក សុក រដ្ឋា បញ្ជាក់ថា ការសម្របសម្រួលរបស់អាជ្ញាធរខេត្តឲ្យប្រជាពលរដ្ឋចូលខ្លួនទៅបំភ្លឺតាមការកោះហៅរបស់តុលាការ គឺជារឿងត្រឹមត្រូវតាមនីតិវិធីតុលាការ។ លោកថា ចៅក្រមស៊ើបសួរនឹងសម្រេចថា តើប្រជាពលរដ្ឋមានកំហុស ឬយ៉ាងណានោះ អាស្រ័យលើលទ្ធផលស៊ើបអង្កេតរបស់ចៅក្រមស៊ើបសួរ ចំណែកមន្ត្រីអាដហុក នឹងបន្តឃ្លាំមើលបញ្ហានេះ៖ «ករណីនេះចៅក្រមលោកមានតួនាទីក្នុងការស៊ើបសួរភាគីពាក់ព័ន្ធ បើសិនរកឃើញ គាត់មានសិទ្ធិបន្តនីតិវិធី ប្រសិនរកមិនឃើញ អាស្រ័យលើឆន្ទានុសិទ្ធិចៅក្រមដោយផ្អែកលើវិធានច្បាប់»។

រហូតមកទល់នឹងម៉ោង ៥រសៀលថ្ងៃដដែល ចៅក្រមស៊ើបសួរបានបញ្ចប់ការសាកសួរ និងអនុញ្ញាតឲ្យតំណាងប្រជាពលរដ្ឋទាំងពីរនាក់វិលទៅលំនៅឋានវិញ៕

ប្រធានសហជីពដែលថៅកែកាស៊ីណូនៅប៉ោយប៉ែតបញ្ឈប់ពីការងារស្វែងរកអន្តរាគមន៍

ប្រធានសហព័ន្ធសហជីពកម្មករនិយោជកវិស័យទេសចរណ៍ និងសេវាកម្មកម្ពុជា ប្រចាំនៅកាស៊ីណូ ហ្គ្រែន ដាយម៉ុន ស៊ីធី (Grand Diamond City Casino) ក្រុងប៉ោយប៉ែត ដែលត្រូវបានថៅកែកាស៊ីណូ បញ្ឈប់ពីការងារ កាលពីខែវិច្ឆិកា ឆ្នាំ២០១៦ ទទូចជាថ្មីសុំឲ្យប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តបន្ទាយមានជ័យ ជួយអន្តរាគមន៍ដើម្បីផ្ដល់យុត្តិធម៌ដល់រូបគេបានចូលធ្វើការវិញឲ្យបានឆាប់។ ការស្នើសុំនេះ ធ្វើឡើងបន្ទាប់ពីមន្ត្រីសហជីពរូបនេះ ទន្ទឹងរង់ចាំឲ្យភាគីកាស៊ីណូដោះស្រាយអត្ថប្រយោជន៍ការងារដល់រូបគេអស់ជាច្រើនខែមកហើយ តែពុំទទួលបានលទ្ធផល។

ប្រធានសហព័ន្ធសហជីពកម្មករនិយោជកវិស័យទេសចរណ៍ និងសេវាកម្មកម្ពុជា ប្រចាំនៅកាស៊ីណូ ហ្គ្រែន ដាយម៉ុន ស៊ីធី ក្រុងប៉ោយប៉ែត លើកឡើងថា ថៅកែកាស៊ីណូមួយនេះ បណ្ដេញរូបគាត់ចេញពីការងារដោយគ្មានកំហុសឡើយ។

អតីតបុគ្គលិកកាស៊ីណូ ហ្គ្រែន ដាយម៉ុន ស៊ីធី ក្រុងប៉ោយប៉ែត លោក ប៊ុន សុធី ឲ្យដឹងនៅថ្ងៃទី២៤ ខែមករា ថា ចាប់តាំងពីថៅកែក្រុមហ៊ុនកាស៊ីណូមួយនេះ បញ្ឈប់រូបលោកពីការងារកាលពីថ្ងៃទី១៩ ខែវិច្ឆិកា ឆ្នាំ២០១៦ មក គឺខាងក្រុមហ៊ុនមិនបានផ្ដល់ប្រាក់អត្ថប្រយោជន៍ការងារដល់រូបគេមួយរៀលនៅឡើយ។ លោកអះអាងថា ក្រុមហ៊ុននេះបញ្ឈប់លោកដោយសារមិនពេញចិត្តរូបគាត់ធ្វើជាប្រធានសហជីពនៅក្នុងកាស៊ីណូមួយនេះ ដែលជាឆ្អឹងទទឹងក ធ្វើឲ្យពិបាកក្នុងការគាបសង្កត់បុគ្គលិក៖ «»។

អាស៊ីសេរី ពុំអាចទាក់ទងតំណាងក្រុមហ៊ុន ហ្គ្រែន ដាយម៉ុន ស៊ីធី ក្រុងប៉ោយប៉ែត ដើម្បីសុំអត្ថាធិប្បាយជុំវិញបញ្ហានេះបានទេ នៅថ្ងៃទី២៤ ខែមករា។

ចំណែកអនុប្រធានមន្ទីរការងារ និងបណ្ដុះបណ្ដាលវិជ្ជាជីវៈ ខេត្តបន្ទាយមានជ័យ លោក ហុង ប្រកប មានប្រសាសន៍ថា លោកបានបញ្ជូនសំណុំរឿងនេះទៅក្រុមប្រឹក្សាអាជ្ញាកណ្ដាលដើម្បីដោះស្រាយបន្តហើយ បន្ទាប់ពីលោកហៅភាគីទាំងសង្ខាងទៅសម្រុះសម្រួល ក៏ប៉ុន្តែពុំទទួលបានលទ្ធផល៖ «»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា បញ្ហានេះប្រសិនបើខាងក្រុមហ៊ុននៅតែប្រកាន់ជំហរបញ្ឈប់មន្ត្រីសហជីព គឺត្រូវផ្ដល់អត្ថប្រយោជន៍ការងារដល់លោក ប៊ុន សុធី តាមផ្លូវច្បាប់ការងារ៖ «»។

កាស៊ីណូ ហ្គ្រែន ដាយម៉ុន ស៊ីធី ប៉ោយប៉ែត ចាប់ផ្ដើមដំណើរការនៅឆ្នាំ២០០២ និងមានបុគ្គលិកបម្រើការងារប្រហែលជិត ៣ពាន់នាក់។

លោក ប៊ុន សុធី អះអាងថា ប្រសិនបើខាងក្រុមហ៊ុនបនល្បែងមួយនេះ និងមន្ត្រីពាក់ព័ន្ធមិនអាចដោះស្រាយឲ្យលោកចូលធ្វើការវិញ ឬផ្ដល់សំណងសមរម្យទៅតាមផ្លូវច្បាប់ទេ បុគ្គលិកកាស៊ីណូប្រមាណ ១ពាន់នាក់ នឹងធ្វើកូដកម្មនៅដើមខែកុម្ភៈ ខាងមុខដើម្បីជួយលោកក្នុងការស្វែងរកយុត្តិធម៌៕

អ្នកបឹងកក់ហៅការកោះហៅពួកគាត់ចូលតុលាការបន្តបន្ទាប់ជាការគំរាមកំហែង

ចាប់តាំងពីមានយុទ្ធនាការថ្ងៃច័ន្ទពណ៌ខ្មៅ ដែលទាមទារឲ្យដោះលែងមន្ត្រីសិទ្ធិមនុស្ស និងមន្ត្រី គ.ជ.ប ក្រុមស្ត្រីបឹងកក់ជាច្រើននាក់ដែលនាំគ្នាធ្វើយុទ្ធនាការនេះ ត្រូវបានតុលាការក្រុងភ្នំពេញកោះហៅជាបន្តបន្ទាប់។ អ្នកបឹងកក់ថា ការសើរើសំណុំរឿងពួកគាត់ខ្លះកាលពីជាង ២ ឬ ៤ឆ្នាំមុនឡើងវិញ គឺជាការគំរាមកំហែងលើពួកគាត់។

សកម្មជនដីធ្លីនៅតំបន់បឹងកក់ លោកស្រី ង៉ែត ឃុន ហៅយាយម៉ាំម៉ី យល់ថា ចំណាត់ការរបស់តុលាការនៅពេលនេះ គឺជាការដាក់គំនាបមកលើពួកគាត់ មិនឲ្យធ្វើសកម្មភាពតវ៉ានានាក្នុងសង្គម និងខាតបង់ពេលវេលាប្រកបរបរចិញ្ចឹមជីវិត។

លោកស្រី ង៉ែត ឃុន អះអាងថា ខ្លួនមិនត្រឹមតែជាអ្នករងគ្រោះពីអំពើហិង្សាបង្កដោយលោកស្រី តល់ ស្រីពៅ ប៉ុណ្ណោះទេ តែថែមទាំងរងបណ្ដឹងបកវិញថា បង្កហិង្សាដោយចេតនាលើលោកស្រី តល់ ស្រីពៅ បន្ថែមទៀត។ ស្ត្រីវ័យចំណាស់រូបនេះថាវាជារឿងអយុត្តិធម៌សម្រាប់រូបលោកស្រី៖ «»។

លោកស្រី គង់ ចន្ថា ដែលជាសាក្សីម្នាក់ក្នុងសំណុំរឿងលោកស្រី ង៉ែត ឃុន ឲ្យដឹងថា ពាក្យបណ្ដឹងរបស់លោកស្រី ង៉ែត ឃុន ដែលដាក់ប្ដឹងកាលពីឆ្នាំ២០១៤ នោះ តុលាការក្រុងភ្នំពេញមិនមានចំណាត់ការទេ បែរជាធ្វើការលើបណ្ដឹងបកលោកស្រី ង៉ែត ឃុន ពីលោកស្រី តល់ ស្រីពៅ ទៅវិញ។
លោកស្រីយល់ថា ការប្ដឹងផ្ដល់រវាងអ្នកបឹងកក់នេះ មិនមែនកើតចេញពីអ្នកបឹងកក់នោះទេ គឺមានអាជ្ញាធរនៅពីក្រោយ ដើម្បីធ្វើឲ្យសហគមន៍បែកបាក់សាមគ្គីគ្នារឿងតវ៉ាទាមទារដីធ្លីពីក្រុមហ៊ុនស៊ូកាគូ (Shukaku)៖ «»។

អាស៊ីសេរី មិនអាចសុំការបំភ្លឺរឿងនេះពីអតីតតំណាងអ្នកបឹងកក់ លោកស្រី តល់ ស្រីពៅ បានទេ នៅថ្ងៃទី២៤ ខែមករា។

ចំណែកអ្នកស្រី ទេព វន្នី ដែលកំពុងជាប់ឃុំនៅគុកព្រៃស ត្រូវបានគេនាំមកតុលាការក្រុងភ្នំពេញនៅព្រឹកថ្ងៃទី២៤ មករា ដើម្បីឆ្លើយបំភ្លឺនៅមុខចៅក្រមស៊ើបសួរ លោក អ៊ី ថាវរៈ ក្នុងនាមជាសាក្សីឲ្យលោកស្រី ង៉ែត ឃុន ដែលរងបណ្ដឹងពីអតីតតំណាងអ្នកបឹងកក់ លោកស្រី តល់ ស្រីពៅ ដែលប្ដឹងថា លោកស្រី ង៉ែត ឃុន ប្រើហិង្សាដោយចេតនាលើខ្លួនកាលពីឆ្នាំ២០១៤ នៅតំបន់បឹងកក់។

បើទោះជាគ្មានជំនឿលើប្រព័ន្ធតុលាការពេលបច្ចុប្បន្ននេះក្ដី អ្នកបឹងកក់នៅតែមានសង្ឃឹមថា យុត្តិធម៌ពិតប្រាកដនឹងមាននៅថ្ងៃណាមួយជាមិនខានចំពោះពួកគាត់ បើសិនមានការផ្លាស់ប្ដូរសង្គមជាតិមួយតាមបែបលទ្ធិប្រជាធិបតេយ្យពិតប្រាកដនោះ។ អ្នកបឹងកក់យល់ថា តុលាការមិនគួរលើកយករឿងរ៉ាវកន្លងផុតជាច្រើនឆ្នាំ ដើម្បីដាក់សម្ពាធពួកគេមិនឲ្យធ្វើយុទ្ធនាការថ្ងៃច័ន្ទពណ៌ខ្មៅនោះទេ។ ពួកគេនៅតែបន្តយុទ្ធនាការនោះដដែល លុះត្រាតែមានការដោះលែងអ្នកស្រី ទេព វន្នី មន្ត្រីសិទ្ធិមនុស្ស និងមន្ត្រី គ.ជ.ប។

លោកស្រី ង៉ែត ឃុន ដែលត្រូវជាចុងចម្លើយក្នុងសំណុំរឿង នឹងចូលបំភ្លឺនៅតុលាការក្រុងភ្នំពេញនៅព្រឹកថ្ងៃទី២៥ ខែមករា៕

ABC វាយប្រហារអាស៊ីសេរី

ឡានរបស់វិទ្យុ ABC ដែលសរសេរពាក្យប្រឆាំងវិទ្យុអាស៊ីសេរី។ រូបថត ហ្វេសប៊ុក

ភ្នំពេញៈ ក្រុមការងារវិទ្យុ ABC ពីម្សិលមិញបានអំពាវនាវពលរដ្ឋឲ្យចូលរួមប្រឆាំងវិទ្យុអាស៊ីសេរីយ៉ាងហោច ២ លើកដោយចោទវិទ្យុនេះថាមានចេតនាទប់ស្កាត់អាមេរិកមិនឲ្យលុបបំណុលដែលកម្ពុជាជំពាក់ជាង ៣០០ លានដុល្លារក្នុងជំនាន់ លន់ នល់។

កាលពីថ្ងៃទី ២១ ខែមករា វិទ្យុអាស៊ីសេរីបានផ្សាយពត៌មានមានចំណងជើងថា «លោក ហ៊ុន សែន អះអាងជាថ្មីថា នឹងស្នើឲ្យប្រធានាធិបតីអាមេរិកថ្មីលុបបំណុលចាស់ចោល»។

ខ្លឹមសារនៃព័ត៌មាននេះគឺ «លោកនាយករដ្ឋមន្ត្រី ហ៊ុន សែន អះអាងជាថ្មីថាលោកនឹងស្នើឱ្យលោក ដូណាល់ ត្រាំ ដែលទើបស្បថចូលកាន់តំណែងជាប្រធានាធិបតីអាមេរិកថ្មីលុបចោលបំណុលដែលកម្ពុជាជំពាក់ក្នុងសម័យលោក លន់ នល់។ ប៉ុន្តែ អ្នកវិភាគយល់ថា ដរាបណាអាមេរិកនៅតែចាត់ទុករបបប្រជាធិបតេយ្យនៅកម្ពុជាដើរថយក្រោយ និងការរំលោភសិទ្ធិមនុស្សនៅតែមានដរាបនោះអាមេរិកនឹងមិនសម្រេចលុបចោលបំណុលនោះឡើយ»។

ដោយលើកពីចំណុចនេះក្រុមការងារ ABC ដែលពេលព្រឹកធ្វើយុទ្ធនាការនៅមុខវត្តចាក់អង្រែក្រោម និងពេលរសៀលនៅផ្លូវវេងស្រេងបានចោទវិទ្យុអាស៊ីសេរី និងអ្នកវិភាគថាមិនចង់ឲ្យអាមេរិកលុបបំណុលនេះក្នុងសម័យលោកនាយករដ្ឋមន្ត្រី ហ៊ុន សែន តែចាំឲ្យលុបពេលលោក សម រង្ស៊ី ឡើងកាន់អំណាចវិញ។

ទាក់ទងនឹងយុទ្ធនាការនេះនាយកវិទ្យាស្ថានកម្ពុជាសម្រាប់ការសិក្សាផ្នែកសារព័ត៌មានលោក មឿន ឈានណារិទ្ធិ មើលឃើញថា នេះជារលកវាយប្រហារគ្នាជាថ្មីរវាងស្ថាប័នសារព័ត៌មានដូចគ្នាដែលឥរិយាបថបែបនេះធ្លាប់កើតច្រើនមកហើយក្នុងទសវត្សរ៍ទី ៩០។

លោកថាការធ្វើបែបនេះប៉ះពាល់ដល់វិជ្ជាជីវៈអ្នកសារព័ត៌មាន និងធ្វើឲ្យស្ថាប័ន ABC ខ្លួនឯងចុះទន់ខ្យោយទៅវិញទេ។

លោកថា៖ «តាមពិតទៅនេះជាចំណុចខ្សោយមួយរបស់វិទ្យុ ABC ទេគ្រប់ស្ថាប័នព័ត៌មានទាំងអស់អះអាងថាឯករាជ្យ អព្យាក្រឹត និងដើរតួនាទីមួយជូនព័ត៌មានដល់ពលរដ្ឋហើយការធ្វើនេះវាមិនមែនជាតួនាទីអ្នកសារព័ត៌មានវិជ្ជាជីវៈទេ»៕

កម្មកររោងចក្រក្បាលកោះតវ៉ាទាមទារប្រាក់ឈ្នួលសម្រាប់ខែធ្នូ

កម្មកររោងចក្រក្បាលកោះ ស្ថិតនៅខណ្ឌច្បារអំពៅ រាជធានីភ្នំពេញ ជិត ៣០០នាក់ នៅថ្ងៃទី២៤ ខែមករា លើកគ្នាមកខុទ្ទកាល័យលោកនាយករដ្ឋមន្ត្រី ហ៊ុន សែន ដើម្បីរកអន្តរាគមន៍បើកប្រាក់ឈ្នួលដែលពួកគាត់មិនបានទទួលសម្រាប់ខែធ្នូ។ ប៉ុន្តែមន្ត្រីខុទ្ទកាល័យនាយករដ្ឋមន្ត្រីបញ្ជូនករណីនេះទៅដោះស្រាយក្រសួងការងារវិញ។

នៅពេលដែលមន្ត្រីខុទ្ទកាល័យលោកនាយករដ្ឋមន្ត្រីប្រាប់កម្មករឲ្យទៅដោះស្រាយនៅក្រសួងការងារនោះ តំណាងកម្មកររោងចក្រក្បាលកោះ អ្នកស្រី អុល វណ្ណា មានប្រសាសន៍ថា អ្នកស្រីអស់សង្ឃឹមពេលស្វែងរកអន្តរាគមន៍រយៈពេលជាង ១០ថ្ងៃមកនេះ ក្រុមកម្មករនៅតែមិនទាន់ទទួលបានដំណោះស្រាយ៖ «»។

អ្នកស្រីថ្លែងថា អ្នកស្រី និងកម្មករផ្សេងទៀត កំពុងជួបការលំបាកខ្វះលុយចំណាយសម្រាប់កូនទៅរៀន និងការចំណាយសម្រាប់ជីវភាពប្រចាំថ្ងៃ ពេលដែលមិនបានទទួលប្រាក់ឈ្នួលនេះ។

តំណាងកម្មករ កម្មការិនីមួយរូបទៀត គឺកញ្ញា នៀង សោភា បន្ទរថា កម្មករខ្លះមិនមានប្រាក់នៅសល់សម្រាប់ទិញបាយទេ៖ «ពួកខ្ញុំពិបាក គឺពិបាកសព្វផ្លូវ ទាំងថ្លៃផ្ទះជួល សូម្បីតែថ្លៃឡាន ថ្លៃរ៉ឺម៉កម៉ូតូ ដែលគាត់ឌុបមកធ្វើការរាល់ថ្ងៃ ក៏គាត់ទារលុយ ហើយពួកខ្ញុំត្រូវការចំណាយញ៉ាំរាល់ថ្ងៃ ដឹងស្រាប់ហើយ ផ្ទះជួល ហើយពិសេសជាងគេបងប្អូនកម្មករភាគច្រើន គឺគាត់ជំពាក់ធនាគារ»។

កម្មករកម្មការិនីទាំងជិត ៣០០នាក់នេះ មកពីរោងចក្រក្បាលកោះ ផាដា (Pada) និងថប់វើល (Top World) ដែលមានថៅកែតែមួយ។ រោងចក្រនេះស្ថិតនៅតាមផ្លូវជាតិលេខ១ ភូមិជ្រោយអម្ពិល២ សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ។

កម្មការិនីផ្នែកដេរនៃរោងចក្រថប់វើល (Top World Garment) មួយរូប គឺកញ្ញា ចំរើន នួន ដែលធ្វើការចាប់តាំងពីឆ្នាំ២០០៣ មក ថ្លែងថា រោងចក្រនេះចាប់ផ្ដើមមានបញ្ហាតាំងពីដើមឆ្នាំ២០១៦ មក ដែលថៅកែរោងចក្របើកប្រាក់ឈ្នួលម្ដងបន្តិចៗ ឲ្យកម្មករ៖ «មួយឆ្នាំជាងហើយ គាត់ផ្ដល់ប្រាក់ឈ្នួលឲ្យខ្ញុំហ្នឹង មួយខែបើកបួនប្រាំដង ២០រៀល ១០រៀល ៣០រៀល ៥០អ៊ីចឹងទៅ តាមតែគាត់ស្នើសុំឲ្យកម្មករទទួលយក។ កម្មករទទួលយករហូត តែដល់ពេលប្រាក់ខែ ១២ នេះ គាត់អត់បានបើកឲ្យតែម្ដង»។

កម្មករ កម្មការិនីចាប់ផ្ដើមការតវ៉ា និងដាក់ញត្តិរកអន្តរាគមន៍តាមស្ថាប័នផ្សេងៗ នៅថ្ងៃទី១១ មករា គឺមួយថ្ងៃក្រោយពេលរង់ចាំថៅកែបើកប្រាក់ឈ្នួលឲ្យ ហើយថៅកែរោងចក្រនេះមិនបើកឲ្យ។ កម្មករអះអាងថា ថៅកែជំរុញឲ្យកម្មករតវ៉ាតាមផ្លូវច្បាប់។

ប័ណ្ណប៉ាតង់ចេញដោយអគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ បង្ហាញថា ថៅកែរោងចក្រនេះឈ្មោះ ជឹង ជុនហ្វាត (Cheung Chun Fat)។ ប៉ុន្តែអាស៊ីសេរី មិនអាចស្វែងរកការបញ្ជាក់ពីខាងថៅកែរោងចក្របានទេ នៅថ្ងៃដដែលនេះ។

អ្នកស្រី អុល វណ្ណា ឲ្យដឹងថា កិច្ចប្រជុំដោះស្រាយនៅក្រសួងការងារ និងបណ្ដុះបណ្ដាលវិជ្ជាជីវៈ រយៈពេល ៣ម៉ោង នៅល្ងាចថ្ងៃទី២៤ មករា មិនមានដំណោះស្រាយទេ ព្រោះភាគីតំណាងកម្មករ និងសហជីព មិនចរចាជាមួយមេធាវី ដែលអះអាងថា បានទទួលសិទ្ធិពីថៅកែរោងចក្រ។ ការមិនទទួលស្គាល់មេធាវីនោះ ព្រោះមេធាវីមិនបង្ហាញលិខិតផ្ទេរសិទ្ធិពីថៅកែ។

ក្រុមកម្មករនាំគ្នាត្រឡប់ទៅរោងចក្រវិញ ហើយសន្យាថា នឹងពិភាក្សាគ្នារកមធ្យោបាយស្វែងរកកិច្ចអន្តរាគមន៍បន្តទៀត៕