តុលាការខេត្តសៀមរាបដោះលែងនាយសង្កាត់រដ្ឋបាលព្រៃឈើបើកឡានបុកមនុស្សស្លាប់
តំណាងអយ្យការសាលាដំបូងខេត្តសៀមរាប ដែលកាន់សំណុំរឿងក្ដីគ្រោះថ្នាក់ចរាចរណ៍មួយបានសម្រេចដោះលែង លោក យ៉ាន់ ស៊ីវ៉ាត់ ដែលជានាយសង្កាត់រដ្ឋបាលព្រៃឈើស្វាយលើ ឱ្យស្ថិតនៅក្រៅឃុំជាបណ្ដោះអាសន្ន។
ការដោះលែងបានធ្វើឡើង ១ថ្ងៃ ក្រោយពីនាយសង្កាត់រដ្ឋបាលព្រៃឈើ រូបនោះ ត្រូវបានសមត្ថកិច្ចចាប់ខ្លួនពីបទបើករថយន្តម៉ាកលិចស៊ីស (Lexus RX330) ១គ្រឿង បុកប្រជាការពារភូមិម្នាក់ស្លាប់នៅលើដងផ្លូវមក។
អ្នកនាំពាក្យសាលាដំបូងខេត្តសៀមរាប គឺលោក យិន ស្រាង។ លោកមានប្រសាសន៍កាលពីព្រឹកថ្ងៃទី៧ ខែកញ្ញា ថា ករណីរបស់នាយសង្កាត់រដ្ឋបាលព្រៃឈើស្វាយលើនោះ គឺស្ថិតក្នុងដំណាក់កាលព្រះរាជអាជ្ញាសាកសួរនៅឡើយ។
លោក យិន ស្រាង បញ្ជាក់ថា នាយសង្កាត់រដ្ឋបាលព្រៃឈើរូបនោះ ត្រូវតំណាងអយ្យការសម្រេចឱ្យនៅក្រៅឃុំបណ្ដោះអាសន្ន ដោយយោងទៅលើមូលហេតុមួយចំនួន ដូចជាគាត់បានចេញសំណងដល់គ្រួសារជនរងគ្រោះ គាត់មានទីលំនៅច្បាស់លាស់ ព្រមទាំងមានការងារត្រឹមត្រូវ ប៉ុន្តែគាត់ត្រូវរង់ចាំចំណាត់ការទាក់ទងនឹងរឿងព្រហ្មទណ្ឌនៅឡើយ៖ «ខ្ញុំគ្រាន់តែដឹងថា ដំណាក់កាលព្រះរាជអាជ្ញា គេឱ្យគាត់នៅក្រៅឃុំសិន ពីព្រោះគាត់បានសងសំណងដល់គ្រួសារអ្នករងគ្រោះរួចហើយ»។
លោក យ៉ាន់ ស៊ីវ៉ាត់ បានបើករថយន្តបុកបុរសម្នាក់ឈ្មោះ ឈួន ចាន់រស្មី អាយុជាង ៤០ឆ្នាំ ដែលជាប្រជាការពារភូមិជ្រៃ ឃុំកណ្ដែក នៃស្រុកប្រាសាទបាគង បណ្ដាលឱ្យស្លាប់នៅនឹងកន្លែងកាលពីរាត្រីថ្ងៃទី៤ ខែកញ្ញា កន្លងទៅ ព្រមទាំងបើករថយន្តរត់គេចខ្លួនបានចម្ងាយជាង ១០គីឡូម៉ែត្រ ពីកន្លែងកើតហេតុផង៕
