ទេសចរជិត៩ម៉ឺននាក់ទៅទស្សនាខេត្តព្រះសីហនុក្នុងអំឡុងពេលបុណ្យអុំទូក
អភិបាលខេត្តព្រះសីហនុ បានឲ្យដឹងថា ចំនួនទេសចរជាតិ-អន្តរជាតិ ដែលចូលមកទស្សនាខេត្តព្រះសីហនុ រយៈពេល ៣ថ្ងៃនៃព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុកឆ្នាំនេះ មានចំនួនជិត ៩ម៉ឺននាក់។ នគរបាលជំនាញអះអាងថា ក្នុងអំឡុងពេលពិធីបុណ្យនេះក៏មិនមានបញ្ហាអសន្តិសុខកើតឡើងនាំឲ្យមានការភ័យខ្លាចដល់ទេសចរនោះដែរ។
អភិបាលខេត្តព្រះសីហនុ លោក យន្ត មីន មានប្រសាសន៍ថា ចាប់ពីថ្ងៃទី១៣ ដល់ថ្ងៃទី១៥ ខែវិច្ឆិកា ដែលជាថ្ងៃបុណ្យអុំទូក ប្រពៃណីជាតិឆ្នាំនេះ គឺមានទេសចរចម្រុះជាតិសាសន៍ ពិសេសភ្ញៀវជាតិ បានចូលមកទស្សនាខេត្តនេះប្រហាក់ប្រហែលគ្នាឆ្នាំមុនដែរ។ លោកឲ្យដឹងថា ទេសចរមួយចំនួនបានធ្វើដំណើរតាមទូកទេសចរណ៍ចេញទៅកម្សាន្តតាមកោះនានា មានកោះរ៉ុងសន្លឹម និងកោះរ៉ុង ជាដើម។
លោក យន្ត មីន បានវាយតម្លៃថា បញ្ហាសន្តិសុខ និងការធ្វើដំណើរកម្សាន្តរបស់ទេសចររយៈពេល ៣ថ្ងៃ នៃពិធីបុណ្យអុំទូកឆ្នាំនេះ ទាំងកម្សាន្តនៅតាមឆ្នេរលើដីគោក និងកម្សាន្តនៅលើដីកោះ គឺមានសន្តិសុខ និងសុវត្ថិភាពល្អ។
ប្រធានក្រុមហ៊ុន ជី.ធី.វី.ស៊ី ស្ពីដ បូត កម្ពុជា (GTVC Speed Boat) លោកឧកញ៉ា ទៀ វិចិត្រ ស្ថិតក្នុងចំណោមក្រុមហ៊ុនទូកទេសចរណ៍ផ្សេងទៀត ក៏បានកត់សម្គាល់ថា ពិធីបុណ្យអុំទូក ៣ថ្ងៃ សង្កេតឃើញមានភ្ញៀវចូលមកទស្សនាខេត្តនេះបានច្រើនឡើងវិញ បន្ទាប់ពីចំនួនទេសចរបានធ្លាក់ចុះកាលពីពិធីបុណ្យភ្ជុំបិណ្ឌ ដែលទើបកន្លងផុតទៅថ្មីៗនេះ។
លោក ទៀ វិចិត្រ បង្ហាញការព្រួយបារម្ភនៅគ្រាចំនួនទេសចរចូលមកទស្សនាខេត្តព្រះសីហនុ បានថយចុះរយៈពេល ៣ថ្ងៃនៃបុណ្យភ្ជុំបិណ្ឌឆ្នាំនេះ ជាហេតុនាំឲ្យក្រុមហ៊ុនទូកដឹកទេសចរចេញទៅកម្សាន្តតាមកោះរបស់លោក បានសម្រេចបញ្ចុះតម្លៃលក់សំបុត្រធ្វើដំណើរចេញពីដីគោក ទៅដីកោះនានា មានកោះរ៉ុងសន្លឹម និងកោះរ៉ុង ជាដើម ដែលតម្លៃសំបុត្រទៅមក ១សន្លឹក មានតម្លៃ ២០ដុល្លារសហរដ្ឋអាមេរិក ត្រូវបានបញ្ចុះមកតម្លៃត្រឹម ១២ដុល្លារវិញ។
លោក ទៀ វិចិត្រ បញ្ជាក់ថា មូលហេតុដែលក្រុមហ៊ុន ជី.ធី.វី.ស៊ី ស្ពីដ បូត កម្ពុជា សម្រេចបញ្ចុះតម្លៃលក់សំបុត្រជូនទេសចរពេលនេះ ប្រយោជន៍ដើម្បីចូលរួមកៀរគរទេសចរជាតិ អន្តរជាតិ ឲ្យចូលមកទស្សនាខេត្តនេះឲ្យច្រើនឡើងវិញ៖ «ភ្ញៀវចេញទៅកម្សាន្តតាមកោះរយៈពេល ៣ថ្ងៃ គឺមានចំនួនច្រើនណាស់។ សម្រាប់អូប័ររបស់ក្រុមហ៊ុនខ្ញុំដែលមានចំណុះ ៥០កៅអី គឺដាក់មនុស្សពេញទាំង ៥០កន្លែង យើងអត់ដាក់ឲ្យលើសពីហ្នឹងទេ ហើយក្រុមហ៊ុនមានបំពាក់អាវពោងគ្រប់ចំនួនមនុស្សជិះទាំង ៥០នាក់ ដើម្បីការពារសុវត្ថិភាព។ ក្នុងនោះកុមារដែលមានអាយុក្រោម ៥ឆ្នាំ ក្រុមហ៊ុនមិនយកលុយទេ»។
បញ្ហានេះដែរ លោក ជួន ណារិន្ទ ស្នងការនគរបាលខេត្តព្រះសីហនុ អះអាងថា បុណ្យអុំទូករយៈពេល ៣ថ្ងៃ សមត្ថកិច្ចជំនាញស្ថាប័នពាក់ព័ន្ធមានកម្លាំងនគរបាលជាដើម បានសហការរក្សាការពារសន្តិសុខជូនទេសចរទាំងនៅលើដីគោក និងនៅលើដីកោះ មានសុវត្ថិភាពល្អ។ លោកថា បុណ្យអុំទូក ៣ថ្ងៃនៅខេត្តព្រះសីហនុ កើតមានគ្រោះថ្នាក់ចរាចរណ៍ចំនួន ២លើក ប៉ុន្តែមិនមានគ្រោះថ្នាក់ដល់អាយុជីវិតនោះទេ។ ក្នុងនោះក៏មានក្មេងៗស្ទាវ ២ក្រុមផ្សេងគ្នា បានបង្កជម្លោះមួយករណីដែរ ប៉ុន្តែមិនរំខាន ឬប៉ះពាល់ដល់អារម្មណ៍របស់ទេសចរ ដែលចូលទៅកម្សាន្តតាមឆ្នេរនានានោះទេ៖ «សុវត្ថិភាពសន្តិសុខ គឺកម្លាំងយើងបានការពារសុវត្ថិភាពជូនទេសចរបានល្អ និងមិនមានបទល្មើសព្រហ្មទណ្ឌកើតឡើងទេ គឺមានតែគ្រោះថ្នាក់ចរាចរណ៍បន្តិចបន្តួចកើតឡើងតែប៉ុណ្ណោះនៅក្នុងរយៈពេល ៣ថ្ងៃ នៃពិធីបុណ្យអុំទូកឆ្នាំនេះ»។
របាយការណ៍គ្រោះថ្នាក់ចរាចរណ៍រយៈពេល ៣ថ្ងៃ នៃពិធីបុណ្យអុំទូកឆ្នាំនេះរបស់ស្នងការដ្ឋាននគរបាលខេត្តព្រះសីហនុ បង្ហាញថា ខេត្តនេះមានគ្រោះថ្នាក់ចរាចរណ៍បង្កដោយរថយន្ត និងម៉ូតូកើតមានចំនួន ២លើក។ គ្រោះថ្នាក់នេះ បានបណ្ដាលឲ្យមានមនុស្សរងរបួសធ្ងន់ស្រាលចំនួន ៤នាក់ និងខូចខាតយានយន្តចំនួន ៤គ្រឿង ហើយមូលហេតុនាំឲ្យកើតមានគ្រោះថ្នាក់នេះ គឺបណ្ដាលមកពីអ្នកបើកបរជែងគ្នាក្នុងល្បឿនលឿន នៅលើទីតាំងផ្លូវមានស្ថានភាពគ្រោះថ្នាក់៕
