 |
| ក្មេងៗកំពុងលេងទឹកនៅចំណុចភូមិកោះត្នោត ស្រុកសំបូរ ខេត្តក្រចេះ ជាទីដែលស្ថិតក្នុងគម្រោងសាងសង់វារីអគ្គិសនីសំបូរ កាលពីថ្ងៃទី៣ ខែកញ្ញា ឆ្នាំ២០១៦។ រូបថតសមាគមនិស្សិតបញ្ញវន្តខ្មែរ |
ក្រុមយុវជននឹងរៀបចំវេទិកាពិភាក្សាអំពីការសាងសង់ទំនប់វារីអគ្គិសនីលើដងទន្លេមេគង្គ នៅថ្ងៃទី២២ ខែមករា។
កិច្ចពិភាក្សានេះ ធ្វើឡើងដើម្បីលើកកម្ពស់ការយល់ដឹងរបស់យុវជនអំពីការគ្រប់គ្រងទឹក និងបញ្ហាប្រឈមនៃការសាងសង់ទំនប់វារីអគ្គិសនីនៅលើដងទន្លេ តាមរយៈការជជែកដេញដោលគ្នារបស់ក្រុមយុវជនដែលបានចុះកម្មសិក្សានៅតំបន់ទំនប់វារីអគ្គិសនីកាលពីពេលកន្លងទៅ។
ប្រធានបណ្តាញយុវជនកម្ពុជា លោក ទឹម ម៉ាឡៃ ឱ្យអាស៊ីសេរី ដឹងនៅរសៀលថ្ងៃទី២០ ខែមករា ថា ក្រុមយុវជននឹងជជែកគ្នាជុំវិញអ្វីដែលពួកគេបានសិក្សា និងសង្កេតឃើញ ដើម្បីថ្លឹងថ្លែងអំពីផលប្រយោជន៍ និងផលប៉ះពាល់នៃការសាងសង់ទំនប់វារីអគ្គិសនីលើដងទន្លេមេគង្គ។
ប្រធានបណ្តាញយុវជនកម្ពុជា លោក ទឹម ម៉ាឡៃ ឱ្យដឹងទៀតថា បន្ទាប់ពីកិច្ចពិភាក្សានេះ ក្រុមយុវជននឹងយកក្តីកង្វល់ពាក់ព័ន្ធនឹងផលប៉ះពាល់ដែលយុវជនបានរកឃើញនៅក្នុងកិច្ចពិភាក្សានេះទៅដាក់ជូនក្រសួង ឬស្ថាប័នពាក់ព័ន្ធដែលកំពុងធ្វើការលើគម្រោងសាងសង់ទំនប់វារីអគ្គិសនីនេះដើម្បីយកទៅពិចារណា។
ប្រធានអង្គការរូបនេះបញ្ជាក់ថា បច្ចុប្បន្នលោកបារម្ភខ្លាំងចំពោះការសាងសង់ទំនប់វារីអគ្គិសនីដនសាហុង (Don Sahong) របស់ប្រទេសឡាវ និងមួយទៀតគឺទំនប់វារីអគ្គិសនីសំបូរ ខេត្តក្រចេះ៕
