 |
សហគមន៍ជនជាតិដើមភាគតិចព្នង ឃុំប៊ូស្រា ស្រុកពេជ្រាដា ខេត្តមណ្ឌលគិរី ចុះពិនិត្យកន្លែងកាប់រានព្រៃឈើក្នុងដែនជម្រកសត្វព្រៃណាំលៀ លើកទីពីរ ថ្ងៃទី២៧ ខែធ្នូ ឆ្នាំ២០១៦។ RFA/Ratha Visal
|
សហគមន៍ជនជាតិដើមភាគតិចព្នង ឃុំប៊ូស្រា ស្រុកពេជ្រាដា ខេត្តមណ្ឌលគិរី ប្រមាណ ៣០នាក់ បានចុះទៅពិនិត្យកន្លែងកាប់រានព្រៃឈើក្នុងដែនជម្រកសត្វព្រៃណាំលៀ ជាលើកទីពីរដើម្បីកំណត់ពីទំហំផលប៉ះពាល់ស្ដីពីការកាប់រានព្រៃឈើនេះ។
មន្ត្រីអនុរក្សដែនជម្រកសត្វព្រៃ មន្ត្រីមូលដ្ឋាន មន្ត្រីសិទ្ធិមនុស្សអាដហុក (ADHOC) ខេត្តមណ្ឌលគិរី និងអ្នកសារព័ត៌មានក៏បានចុះទៅពិនិត្យមើលទីតាំងនោះដែរ។
សហគមន៍ជនជាតិដើមភាគតិចព្នងឃុំប៊ូស្រា ស្រុកពេជ្រាដា មន្ត្រីសមាគមអាដហុក និងមន្ត្រីជំនាញដែនជម្រកសត្វព្រៃ សុទ្ធសឹងតែទទួលស្គាល់ថា ពិតជាមានការកាប់រានព្រៃឈើនៅក្នុងដែនជម្រកសត្វព្រៃភ្នំណាំលៀ ប្រាកដមែន។
កាលពីថ្ងៃទី២៧ ខែធ្នូ ក្រុមល្បាតសហគមន៍ប្រមាណ ៣០នាក់ រួមដំណើរដោយមន្ត្រីសិទ្ធិមនុស្សអាដហុក បានធ្វើដំណើរជាលើកទីពីរ ទៅកាន់តំបន់កាប់រានព្រៃយកដីនៅចន្លោះប៉ុស្តិ៍ការពារព្រំដែនលេខ៧ និងប៉ុស្តិ៍តម្រួតការពារព្រំដែនទួលស្វាយ ឬប៉ុស្តិ៍លេខ៨ ក្នុងខេត្តមណ្ឌលគិរី។
តំណាងសហគមន៍ លោក ថ្លាង ថូ កត់សំគាល់ថា រោងប្រក់សំពត់កៅស៊ូចំនួនពីរកន្លែងនៅក្បែរតំបន់កាប់រានព្រៃដែលសហគមន៍ប្រទះឃើញកាលពីថ្ងៃទី២១ ខែធ្នូ ត្រូវបានរុះរើមិនមានសមត្ថកិច្ចស្នាក់នៅទីនោះទៀតឡើយ។ លោកបន្តថា ក្រុមសមត្ថកិច្ចដែលចាកចេញពីរោងនេះបន្ទាប់ពីសហគមន៍រកឃើញទីតាំងកាប់រានព្រៃយកដីចំណែកក្រុមប៉ូលិសឈរជើងនៅរោងនោះសហគមន៍សង្ស័យថា ជាអ្នកយាមការពារសកម្មភាពកាប់រានព្រៃនេះ៖ «គេរុះមួយសប្ដាហ៍ហ្នឹងបែករឿងពេលយើងដាក់ពាក្យប្ដឹង។ ប៉ូលិសទាហាន ៦នាក់គេដាក់ចាំអ្នកកាប់ផងចាំយួនដឹកឈើផង»។
ដំណើរល្បាតព្រៃលើកទីពីរនេះ សហគមន៍បានរកឃើញកន្លែងកាប់រានព្រៃឈើថ្មីៗទៀត នៅចំណុចជាច្រើនក្នុងដែនជម្រកសត្វព្រៃភ្នំណាំលៀ ចន្លោះព្រំប្រទល់ស្រុកពេជ្រាដា និងស្រុកអូររាំង ជិតតំបន់ភូមិជនជាតិចាម តាំងលំនៅឋាន។
មន្ត្រីសម្របសម្រួលសមាគមអាដហុក លោក សុក រដ្ឋា កត់សំគាល់ដែរថា កន្លែងសកម្មភាពកាប់រានព្រៃដែលក្រុមល្បាតប្រទះឃើញមានច្រើនកន្លែង និងមានទំហំខ្លះពីរហិកតារ និងខ្លះទៀតពី ៥ ទៅ ១០ហិកតារ ព្រៃឈើខ្លះត្រូវគេកាប់រានថ្មីៗនៅឡើយ។ តាមការប៉ាន់ប្រមាណព្រៃឈើដែលរងការខូចខាតពីការកាប់រាននេះមានទំហំប្រមាណ ១ពាន់ហិកតារ។
លោកថ្លែងថា ក្រុមមន្ត្រីអនុរក្សគួរសហការជាមួយសហគមន៍ឲ្យបានជិតស្និទ្ធដើម្បីរួមគ្នាអភិរក្សធនធានធម្មជាតិនៅតំបន់នោះឡើងវិញ៖ «សកម្មភាពកាប់រានហ្នឹងគឺជាបទល្មើសឧក្រិដ្ឋមិនត្រូវមានការលើកលែងជនប្រព្រឹត្ត ហើយនិងអ្នកពាក់ព័ន្ធ ហើយអ្នកបានដឹងរឿងហ្នឹងហើយមិនបានប្ដឹងបរិហារសុទ្ធសឹងតែអ្នកទទួលខុសត្រូវ។ ប្រជាពលរដ្ឋជាកម្លាំងស្នូលមួយចូលរួមការពារ និងអភិរក្សធនធានធម្មជាតិជាមួយមន្ត្រីសាធារណៈរបស់រដ្ឋ ដើម្បីការពារទ្រព្យសម្បត្តិរដ្ឋបានគង់វង្សទៅថ្ងៃអនាគត»។
របាយការណ៍របស់មន្ត្រីមូលដ្ឋានឲ្យដឹងថា ចាប់ពីឆ្នាំ២០០៨ រហូតបច្ចុប្បន្ន ជនជាតិចាមចំណាកស្រុកបានចូលមកកាប់ឆ្ការព្រៃសង់លំនៅឋានប្រកបរបរកសិកម្មកើនឡើងជិត ២០០គ្រួសារ និងបង្កើតជារដ្ឋបាលភូមិនៅក្នុងដែនជម្រកសត្វព្រៃភ្នំណាំលៀ ក្បែរប៉ុស្តិ៍ការពារព្រំដែនលេខ៨ ចម្ងាយប្រមាណ ៥គីឡូម៉ែត្រពីព្រំដែនវៀតណាម។
ប្រធានដែនជម្រកសត្វព្រៃភ្នំណាំលៀ ស្ដីទី លោក ហាន ខន ដែលដឹកនាំក្រុមអនុរក្សត្រួតពិនិត្យបញ្ហានេះទទួលស្គាល់ថា ពិតជាមានការកាប់រានព្រៃ ក៏ប៉ុន្តែការកាប់រានព្រៃនេះមានទ្រង់ទ្រាយតូចៗ ដែលមន្ត្រីអនុរក្សមិនទាន់ប្រមូលទិន្នន័យជាក់លាក់នៅឡើយ។ លោកថា ការតាំងលំនៅរបស់ប្រជាពលរដ្ឋចំណាកស្រុក គឺជាហេតុផលនាំឲ្យមានការកាប់រានព្រៃជាបន្តបន្ទាប់៖ «យើងមិនអាចសន្និដ្ឋានបានទេ ព្រោះយើងមិនមានលទ្ធភាពដោះស្រាយយើងមានតែរបាយការណ៍ទៅថ្នាក់លើតែប៉ុណ្ណឹង»។
ប្រជាពលរដ្ឋចំណាកស្រុកម្នាក់មានទីលំនៅឋិតក្នុងតំបន់រដ្ឋបាលភូមិចាម ឈ្មោះ ម៉ាត់ បដិសេធថា មិនបានដឹងពីអត្តសញ្ញាណអ្នកកាប់រានព្រៃទាំងនោះទេ។
សហគមន៍ព្នង ឃុំប៊ូស្រា មានប្រជាពលរដ្ឋ ៧ភូមិ កំពុងរៀបចំឯកសារចុះបញ្ជីបង្កើតសហគមន៍ផ្លូវការដើម្បីសុំចុះបញ្ជីដីធ្លីសហគមន៍ជាកម្មសិទ្ធិសមូហភាព។
ចាស់ទុំភូមិពូលុ លោក ស្រង ជ្រឿន បញ្ជាក់ថា ការកាប់រានព្រៃឈើយកដីថ្មីនេះ ប៉ះពាល់តំបន់ព្រៃអារក្ស ព្រៃកប់សព ដែលសហគមន៍ត្រៀមបម្រុងសុំចុះបញ្ជីដីនេះ។ លោកអំពាវនាវឲ្យសមត្ថកិច្ចពាក់ព័ន្ធបញ្ឈប់ការកាប់រានព្រៃនេះ ដើម្បីរក្សាធនធានធម្មជាតិសម្រាប់សហគមន៍ប្រើប្រាស់ និងអាស្រ័យផលតាមទំនៀមទម្លាប់ជនជាតិដើមភាគតិច៖ «ព្រៃហ្នឹងសហគមន៍ទុកជាព្រៃបម្រុងទុក ឥឡូវគេកាប់ទន្ទ្រានអស់។ ឲ្យរាជរដ្ឋាភិបាលយើងគាំទ្រអន្តរាគមន៍ការពារព្រៃឈើនេះ»។
តំបន់ព្រៃអភិរក្សភ្នំណាំលៀ គឺជាដែនជម្រកសត្វព្រៃឋិតក្រោមការគ្រប់គ្រងរបស់ក្រសួងបរិស្ថាន។ ប៉ុន្មានឆ្នាំកន្លងទៅនេះ ឈើប្រណិត និងឈើមានតម្លៃ ត្រូវគេកាប់យកបែបអនាធិបតេយ្យ។ មានករណីខ្លះទៀត ជនជាតិវៀតណាម ជាក្រុមបាននាំគ្រឿងចក្រមានត្រាក់ទ័រ ម៉ាស៊ីនកាត់ឈើ និងអាវុធចូលអារំលំឈើមូល ហើយជ្រៀតជាឈើជ្រុងដឹកជញ្ជូនឆ្លងដែនទៅប្រទេសវៀតណាម ទៀតផង។
ប្រធានមន្ទីរបរិស្ថានខេត្តមណ្ឌលគិរី លោក កែវ សុភ័គ បញ្ជាក់ថា រាជរដ្ឋាភិបាលបានសម្រេចកាត់ចេញដីដែលពលរដ្ឋចំណាកស្រុកកាប់រានព្រៃតាំងលំនៅក្នុងដែនជម្រកសត្វព្រៃភ្នំណាំលៀ នោះហើយ។ លោកថា មន្ទីរបរិស្ថាននឹងរៀបចំកសាងសំណុំរឿងកាន់រានព្រៃថ្មីនេះតាមផ្លូវច្បាប់ បើទោះបីរកឃើញ ឬមិនឃើញអត្តសញ្ញាណជនពាក់ព័ន្ធក៏ដោយ៖ «ខ្ញុំធ្វើរបាយការណ៍ហើយយកទីតាំងនោះផ្ទៀងផ្ទាត់មើលអស់ទំហំប៉ុន្មាន។ បើគ្មានអ្នកទទួលខុសត្រូវ ក៏យើងចងក្រងសំណុំរឿងចោលដើម្បីការពារថ្ងៃក្រោយ»។
ទោះបីជាយ៉ាងនេះក៏ដោយ តំណាងសហគមន៍ឃុំប៊ូស្រា លោក ថ្លាង ថូ បញ្ជាក់ថា ប្រជាពលរដ្ឋទាំង ៧ភូមិក្នុងសហគមន៍ នឹងប្រមូលស្នាមមេដៃធ្វើពាក្យប្ដឹងបរិហារមន្ត្រីអភិរក្សព្រៃឈើដែនជម្រកសត្វព្រៃភ្នំណាំលៀ និងមន្ត្រីមូលដ្ឋានទាក់ទិនការកាប់រានព្រៃថ្មីនេះ៕
