 |
| គ្រឿងចក្រឈូសឆាយដីនៅតំបន់ភ្នំដោះក្រមុំ ដែលអាជ្ញាធរកាត់ទុកសម្រាប់សាងសង់វិទ្យាស្ថានស្រាវជ្រាវរ៉ែ ថាមពល និងប្រេងកាត ឋិតក្នុងភូមិស្វាយចេក សង្កាត់សុខដុម ក្រុងសែនមនោរម្យ ខេត្តមណ្ឌលគិរី នៅថ្ងៃទី១៥ ខែកក្កដា ឆ្នាំ២០១៦។ RFA/Ratha Visal |
សហគមន៍ជនជាតិដើមភាគតិចព្នងនៅក្រុង និងស្រុកចំនួន៥ នៅខេត្តមណ្ឌលគិរី រួមទាំងអាជ្ញាធរខេត្ត និងមន្ទីរក្រសួងពាក់ព័ន្ធបានឯកភាពគ្នាដោះស្រាយបញ្ចប់ជម្លោះដីតំបន់ភ្នំដោះក្រមុំ ដើម្បីអភិរក្សភ្នំនេះទុកជាតំបន់បូជនីយដ្ឋានវប្បធម៌របស់ជនជាតិដើមភាគតិច និងជាសម្បត្តិវប្បធម៌នៅខេត្តប៉ែកឦសានប្រទេស។
លក្ខខណ្ឌទាំង ៦ចំណុច ដែលជាការព្រមព្រៀងគ្នារវាងសហគមន៍ អាជ្ញាធរខេត្តមណ្ឌលគិរី និងភាគីពាក់ព័ន្ធរួមមានដីតំបន់ដោះក្រមុំ ត្រូវសុំចុះបញ្ជីជាដីកម្មសិទ្ធិរបស់រដ្ឋ និងជាទុកជាតំបន់បូជនីយដ្ឋានវប្បធម៌របស់ជនជាតិដើមភាគតិច។ ការធ្វើផ្លូវ និងរបងហ៊ុមព័ទ្ធបរិវេណតំបន់បូជនីយដ្ឋាន។ រាល់ការអភិវឌ្ឍនានា នៅតំបន់នេះត្រូវមានការចូលរួមសម្រេចពីសហគមន៍។ រៀបចំបង្កើតគណៈកម្មការសហគមន៍ថ្មីឡើងវិញ និងបើកទីស្នាក់ការសហគមន៍ព្នង ខេត្តមណ្ឌលគិរី។
តំណាងសហគមន៍ព្នងប្រចាំស្រុក និងក្រុងសរុប៥ នៅខេត្តមណ្ឌលគិរី លោក ក្រើង តុលា បញ្ជាក់នៅថ្ងៃទី១៧ ខែធ្នូ ថា សហគមន៍យល់ព្រមកាត់ចេញដីប្រមាណ ៨០អារ ប្រគល់ទៅឲ្យមន្ទីរចំនួន៤ ប្រើប្រាស់ជាកម្មសិទ្ធិរដ្ឋចំណែកអាជ្ញាធរបានសម្រេចកាត់ចេញដីដែលប្រជាពលរដ្ឋ ១១គ្រួសារ និងដីមួយផ្នែករបស់មន្ត្រីប៉ូលិសដែលបានធ្វើរបងចូលបរិវេណដីភ្នំដាក់បញ្ជូនជាដីតំបន់ភ្នំដោះក្រមុំវិញ។
លោកថា ការព្រមព្រៀងគ្នានេះតំណាងសហគមន៍បីនាក់ បានចុះហត្ថលេខាជាមួយអាជ្ញាធរខេត្តក្នុងកិច្ចប្រជុំសម្របសម្រួលនៅសាលាខេត្តមណ្ឌលគិរី កាលពីថ្ងៃទី១២ ខែធ្នូ៖ «អ្វីដែលយើងបានជជែក យើងត្រូវបញ្ចប់បញ្ហាទាំងអស់ដើម្បីឈានដល់ការអភិវឌ្ឍចាប់ដៃជាមួយអាជ្ញាធរ និងប្រជាពលរដ្ឋដើម្បីលទ្ធិប្រជាធិបតេយ្យបានប្រសើរ»។
ភ្នំដោះក្រមុំ មានទីតាំងនៅកណ្ដាលក្រុងសែនមនោរម្យ ឋិតក្នុងភូមិស្វាយចេក សង្កាត់សុខដុម ខេត្តមណ្ឌលគិរី។ កាលពីឆ្នាំ២០០៤ ទីស្ដីការគណៈរដ្ឋមន្ត្រីបានសម្រេចចាត់ទុកតំបន់ភ្នំនេះជាមជ្ឈមណ្ឌលវប្បធម៌ជនជាតិដើមភាគតិចមានទំហំដីជាង ១០២ហិកតារ។
ប្រធានមន្ទីរវប្បធម៌ខេត្តមណ្ឌលគិរី លោក ស្រី ទូច បញ្ជាក់ដែរថា ក្រសួងវប្បធម៌ និងធ្វើរបាយការណ៍ស្ដីពីកិច្ចព្រមព្រៀងជាមួយសហគមន៍នេះជូនទៅលោកនាយករដ្ឋមន្ត្រីសុំការសម្រេចមុននឹងធ្វើការអភិវឌ្ឍនៅតំបន់នេះ។ លោកបន្តថា ភ្នំដោះក្រមុំ នឹងត្រូវរៀបចំអភិវឌ្ឍន៍ជាសារមន្ទីរជាតិពន្ធុវិទ្យាដើម្បីរក្សានូវស្នាដៃសិល្បៈសិប្បកម្ម និងវត្ថុបូរាណរបស់ជនជាតិដើមភាគតិចរួមទាំងកសាងផ្ទះស្នាក់នៅគំរូ ជនជាតិដើមភាគតិចបង្ហាញពីអត្តសញ្ញាណជនជាតិដើមភាគតិច៖ «លទ្ធផលដែលបានឯកភាពគ្នាដាក់ជូនទៅថ្នាក់លើដើម្បីស្នើសុំកាត់ដីទៅនាយករដ្ឋមន្ត្រី ពីព្រោះអាហ្នឹងទាក់ទង ស.ជ.ណ។ បើសិននាយករដ្ឋមន្ត្រីគាត់ឯកភាពទៅលើការស្នើសុំរបស់រដ្ឋមន្ត្រីបានលទ្ធផល ហើយបានយើងចុះវាស់វែងឡើងវិញ»។
អាជ្ញាធរខេត្តមណ្ឌលគិរី សម្រេចលុបចោលគម្រោងអភិវឌ្ឍន៍នានា នៅតំបន់ភ្នំដោះក្រមុំ បន្ទាប់ពីសហគមន៍កាលពីខែសីហា នាំគ្នាតវ៉ាទៅនឹងការឈូសឆាយដីតំបន់ភ្នំដើម្បីរៀបចំគម្រោងសាងសង់វិទ្យាស្ថានបណ្ដុះបណ្ដាលវិជ្ជាជីវៈស្រាវជ្រាវរ៉ែ និងថាមពល និងប្រេងកាតលើកដំបូងនៅក្នុងខេត្តដាច់ស្រយាលមួយនេះ។
មន្ត្រីឃ្លាំមើលសិទ្ធិមនុស្សសមាគមអាដហុក (ADHOC) ខេត្តមណ្ឌលគិរី លោក សុក រដ្ឋា សាទរចំពោះកិច្ចព្រមព្រៀងរវាងសហគមន៍ និងអាជ្ញាធរថា ជាកិច្ចសហការល្អដើម្បីបញ្ចប់ជម្លោះនៅតំបន់ភ្នំនេះ។ លោកកត់សំគាល់ថា ភ្នំដោះក្រមុំ ដោះក្រមុំក្រៅពីជាតំបន់បូជនីយកិច្ចរបស់ជនជាតិដើមភាគតិចភ្នំនេះ ក៏ជាតំបន់ទេសចរណ៍មានប្រជាប្រិយភាពហេតុនេះសហគមន៍ និងមន្ទីរវប្បធម៌ត្រូវរួមគ្នារៀបចំតំបន់នេះឡើងវិញសម្រាប់ទាក់ទាញភ្ញៀវទេសចរមកកម្សាន្ត៖ «ដែលគាត់ថា ទុកដីភ្នំដោះក្រមុំ ទុកជាដីសាធារណៈរបស់រដ្ឋជាទីសក្ការៈបូជាដែលហៅថា សម្រាប់រមណីយដ្ឋានទេសចរណ៍មិនយកទៅលក់ដូរមិនយកទៅជាកម្មសិទ្ធិឯកជន យើងគាំទ្រចំពោះការដកហូតដីមកទុកវិញ»។
តួលេខប៉ាន់ប្រមាណរបស់សហគមន៍បច្ចុប្បន្នផ្ទៃដីភ្នំដោះក្រមុំ នៅសល់ជាង ៧០ហិកតារតែប៉ុណ្ណោះ បន្ទាប់ពីប្រជាពលរដ្ឋរាប់សិបគ្រួសារ អង្គភាពទឹកស្អាត មន្ទីរមុខងារសាធារណៈ មន្ទីររ៉ែ និងថាមពល រួមទាំងស្ថានីយទូរទស្សន៍ឯកជនបាយ័ន ចូលទៅតាំងលំនៅ និងបោះទីតាំងនៅទីនោះ៕
