អាជ្ញាធរគ្រោងជម្លៀសអ្នកភូមិជាច្រើនពាន់នាក់ពីស្រុករមាសហែក ខេត្តស្វាយរៀង ទៅទីកន្លែងមានសុវត្ថិភាព បន្ទាប់ពីអាជ្ញាធររកឃើញគ្រាប់បែកអាមេរិកប្រភេទធុងឧស្ម័នបង្ហៀរទឹកភ្នែកចំនួនពីរធុងធំៗទម្ងន់ ២០០គីឡូក្រាម នៅជិតសាលាបឋមសិក្សាមួយកន្លែង។
នាយកមជ្ឈមណ្ឌលកម្ចាត់មីនកម្ពុជា (CMAC) លោក ហេង រតនា ប្រាប់ទីភ្នាក់ងារសារព័ត៌មានបារាំង AFP ថា អាជ្ញាធរត្រូវជម្លៀសអ្នកភូមិទាំងនោះចេញពីភូមិ ដើម្បីឲ្យក្រុមសម្អាតមីនចុះទៅពិនិត្យគ្រាប់បែកនោះ។ គាត់ជឿថា គ្រាប់បែកនេះត្រូវយន្តហោះចម្បាំងអាមេរិកទម្លាក់នៅក្នុងខែកុម្ភៈ ឆ្នាំ១៩៧០ ដើម្បីបណ្ដេញទាហានកុម្មុយនីស្តនៅប៉ែកអាគ្នេយ៍នៃប្រទេសកម្ពុជា នៅជាប់ព្រំដែនវៀតណាម។ គ្រាប់បែកនេះមានផ្ទុកឧស្ម័នបង្ហៀរទឹកភ្នែកដែលកងទ័ពអាមេរិកប្រើយ៉ាងច្រើនសន្ធឹកសន្ធាប់ ដើម្បីបណ្ដេញកងទ័ពបច្ចាមិត្តឲ្យចេញពីក្នុងព្រៃ។
នៅចុងទសវត្សរ៍ឆ្នាំ១៩៦០ និងដើមទសវត្សរ៍ឆ្នាំ១៩៧០ សហរដ្ឋអាមេរិក បានទម្លាក់គ្រាប់បែកជាង ២លាន ៧សែនតោននៅលើទឹកដីប្រទេសកម្ពុជា ក្នុងគោលបំណងកាត់ផ្តាច់ផ្លូវដឹកជញ្ជូនគ្រឿងផ្គត់ផ្គង់ទៅកាន់កងទ័ពវៀតណាមខាងជើង។ ចាប់តាំងពីឆ្នាំ១៩៧៩ មានប្រជាពលរដ្ឋខ្មែរជិត ២ម៉ឺននាក់ បានរងគ្រោះដោយសារគ្រាប់បែកមិនទាន់ផ្ទុះ។
លោកនាយករដ្ឋមន្ត្រី ហ៊ុន សែន កាលពីពេលចូលរួមកិច្ចប្រជុំវេទិកាសេដ្ឋកិច្ចពិភពលោកនៅទីក្រុងដាវូស (Davos) ប្រទេសស្វីស (Switzerland) កាលពីពេលថ្មីៗនេះ បានស្នើជាថ្មីឲ្យរដ្ឋាភិបាលសហរដ្ឋអាមេរិក លុបបំណុលដល់កម្ពុជា ដែលអាមេរិក ផ្តល់ឲ្យរដ្ឋាភិបាលលោកសេនាប្រមុខ លន់ នល់ ចន្លោះពីឆ្នាំ១៩៧០ ដល់ឆ្នាំ១៩៧៥។ ប្រមុខរដ្ឋាភិបាលចាត់ទុកថា ប្រាក់បំណុលទាំងនេះ គឺកើតឡើងពីការទិញគ្រាប់បែកមកទម្លាក់សម្លាប់ប្រជាជនខ្មែរ៕
