អង្គការសិទ្ធិមនុស្សលីកាដូ (LICADHO) ទទូចឲ្យរដ្ឋាភិបាលចាត់វិធានការផ្លូវច្បាប់ឲ្យបានម៉ឺងម៉ាត់ ចំពោះករណីរំលោភសេពសន្ថវៈលើស្ត្រី និងកុមារ ដើម្បីផ្តល់យុត្តិធម៌ដល់ជនរងគ្រោះ។ ការអំពាវនាវនេះ ធ្វើឡើងតាមរយៈរបាយការណ៍បច្ចុប្បន្នភាពឆ្នាំ២០១៦ ស្តីអំពីការរួចខ្លួនពីបទល្មើសរំលោភសេពសន្ថវៈនៅកម្ពុជា ចេញផ្សាយកាលពីថ្ងៃទី២៨ វិច្ឆិកា។
មន្ត្រីជាន់ខ្ពស់ផ្នែកឃ្លាំមើលការរំលោភសិទ្ធិស្ត្រី និងកុមារ នៃអង្គការលីកាដូ កញ្ញា ណាប់ សុម៉ាលី បញ្ជាក់ថា ការផ្ដន្ទាទោសលើសំណុំរឿងរំលោភសេពសន្ថវៈមានកំហុសឆ្គងធ្ងន់ធ្ងរជាលក្ខណៈប្រព័ន្ធ ហើយដែលបញ្ហានេះនៅមិនទាន់ត្រូវបានដោះស្រាយនៅឡើយ។ អ្នកស្រីបញ្ជាក់ថា នេះបណ្ដាលមកពីមូលហេតុមួយចំនួន ដូចជាការប្រើប្រាស់ប្រាក់សំណងដើម្បីដោះស្រាយបញ្ចប់រឿងក្តី ការរីករាលដាលនៃអំពើពុករលួយនៅក្នុងស្ថាប័ននគរបាល និងតុលាការ ចៅក្រមនៅខ្វះការយល់ដឹងអំពីការអនុវត្តច្បាប់ និងអាកប្បកិរិយារើសអើងចំពោះស្ត្រីភេទ។
កញ្ញា ណាប់ សុម៉ាលី បន្តថា៖ «ជាង ៥០ភាគរយ គឺកុមារអាយុចន្លោះពី ១២ឆ្នាំទៅ ១៧ឆ្នាំ ដែលងាយរងគ្រោះដោយសារការរំលោភសេពសន្ថវៈនៅការិយាល័យដែលលីកាដូទទួលបាន។ បើសិនជាការរំលោភសេពសន្ថវៈនៅតែកើតមានឡើង ហើយអាជ្ញាធរ និងរដ្ឋាភិបាលមិនយកចិត្តទុកដាក់ទេ ខ្ញុំយល់ថាវានឹងក្លាយជាហានិភ័យមួយ ដោយសារតែស្ត្រី និងកុមារនៅកម្ពុជា ស្ថិតនៅក្នុងនិទ្ទណ្ឌភាពមួយដោយសារតែជនល្មើសអាចប្រើប្រាស់លុយ ដើម្បីរួចផុតពីការទទួលខុសត្រូវផ្នែកព្រហ្មទណ្ឌ និងការប្រើប្រាស់លុយដើម្បីគេចពីសំណាញ់ច្បាប់ដែរ»។
អាស៊ីសេរី នៅមិនទាន់អាចទាក់ទងមន្ត្រីនាំពាក្យក្រសួងមហាផ្ទៃ និងក្រសួងយុត្តិធម៌ បាននៅឡើយកាលពីថ្ងៃទី២៨ ខែវិច្ឆិកា ដើម្បីសុំការឆ្លើយតបជុំវិញរឿងនេះ។
កាលពីឆ្នាំ២០១៥ អង្គការលីកាដូ បានធ្វើការស៊ើបអង្កេតលើសំណុំរឿងរំលោភសេពសន្ថវៈ និងប៉ុនប៉ងរំលោភសេពសន្ថវៈចំនួនជិត ៣០០ករណី (២៨២ករណី) ដែលក្នុងនោះមាន ១២៥ករណី ត្រូវបានបិទបញ្ចប់ និង ១៥៧ករណីផ្សេងទៀតនៅបើកបន្ត។ ក្នុងចំណោមសំណុំរឿងដែលនៅបើកបន្តមានជិត ៤០ករណី (៣៨ករណី) ត្រូវបានចុះកាលបរិច្ឆេទតាំងពីត្រីមាសទី១ នៃឆ្នាំ២០១៥ ដែលនេះមានន័យថា សំណុំរឿងទាំងនោះនៅតែមិនទាន់ត្រូវបានដោះស្រាយនៅឡើយរយៈពេលជិត ២ឆ្នាំកន្លងទៅនេះ។
អង្គការលីកាដូ ចាត់ទុកការមិនអើពើដោះស្រាយបញ្ហានេះ ថាជាការរួមចំណែក និងលើកទឹកចិត្តឲ្យមានការរំលោភសេពសន្ថវៈជាបន្តទៀត ហើយថាវប្បធម៌និទ្ទណ្ឌភាពចំពោះជនប្រព្រឹត្តិបទល្មើសបែបនេះ នឹងបង្កជាការគំរាមកំហែងយ៉ាងធ្ងន់ធ្ងរចំពោះសុវត្ថិភាពស្ត្រី និងកុមារ៕
