ថ្ងៃរំឭកបុណ្យឯករាជជាតិមិនមានការថ្លែងសុន្ទរកថា
ភ្នំពេញៈ នៅក្នុងទិវារំឭកខួបលើកទី ៦៣ នៃបុណ្យឯករាជជាតិ ៩ វិច្ឆិកាពីម្សិលមិញពុំមានការថ្លែងសុន្ទរកថាពីព្រះមហាក្សត្រ ឬថ្នាក់ដឹកនាំណាមួយទេប៉ុន្តែប្រមុខបក្សជាប់ឆ្នោតទាំងពីរបានបង្ហោះសាររៀងខ្លួនលើទំព័រហ្វេសប៊ុកដើម្បីអបអរពិធីនេះខណៈបក្សមួយផ្សេងមើលឃើញកម្ពុជាបច្ចុប្បន្នថាពុំទាន់មានឯករាជ្យពិតប្រាកដ។
ថ្ងៃទី ៩ ខែវិច្ឆិកា ឆ្នាំ ១៩៥៣ ត្រូវបានគេកំណត់យកជាថ្ងៃដែលកម្ពុជាបានទទួលឯករាជ្យពីអាណានិគមបារាំងដែលបានត្រួតត្រាពីឆ្នាំ ១៨៦៣ ដល់ឆ្នាំ ១៩៥៣។
នៅព្រឹកព្រលឹមថ្ងៃម្សិលមិញសិស្សានុសិស្ស គ្រូបង្រៀន រួមជាមួយអ្នកមុខអ្នកការជាច្រើនពាន់នាក់បានមកចូលរួមក្នុងកម្មវីធីនេះនៅវិមានឯករាជ្យហើយនៅម៉ោងប្រហែល ៨ ព្រឹកព្រះមហាក្សត្រកម្ពុជាព្រះបាទ នរោត្តម សីហមុនី បានយាងដល់កន្លែងប្រារព្ធពិធី។ ក្រោយពីរៀបចំពិធីផ្សេងៗសម្រាប់បុណ្យឯករាជជាតិនេះព្រះមហាក្សត្រទ្រង់ពុំបានថ្លែងសារណាមួយដល់អ្នកចូលរួមនោះទេ ប៉ុន្តែព្រះអង្គបានយាងជួបសិស្សានុសិស្ស និងអ្នកចូលរួមផ្សេងទៀតមុននឹងយាងត្រឡប់ទៅព្រះបរមរាជវាំងវិញ។
លោកនាយករដ្ឋមន្ត្រី ហ៊ុន សែន ដែលបានចូលរួមក្នុងពិធីបុណ្យឯករាជជាតិនេះដែរនោះក៏មិនបានថ្លែងសារអ្វីដែរប៉ុន្តែលោកបានសរសេរលើទំព័រហ្វេសប៊ុករបស់លោកថាបើសិនជាគ្មានការតស៊ូរបស់ព្រះមហាវីរក្សត្រនរោត្តម សីហនុ ទេនោះកម្ពុជាក៏មិនអាចទទួលឯករាជ្យពីបារាំងបាននោះដែរ។
លោកថា៖ «ប្រជារាស្រ្តទូទាំងប្រទេសសូមចងចាំ និងដឹងគុណជានិច្ចនូវព្រះរាជបូជនីយកិច្ចជាប្រវត្តិសាស្រ្តដែលព្រះមហាក្សត្រកម្ពុជាបានលះបង់ដើម្បីប្រទេសយើងទាំងមូល»។
ដោយឡែកប្រធានស្តីទីគណបក្សសង្គ្រោះជាតិលោក កឹម សុខា បានសរសើរតាមបណ្តាញសង្គមហ្វេសប៊ុករបស់លោកពីវីរភាពរបស់បុព្វបុរសខ្មែរដែលបានតស៊ូទាមទារឯករាជ្យពីបារាំង។ លោកបញ្ចេញទស្សនៈថាឯករាជ្យជាតិគឺជា «គុណតម្លៃដ៏ឧត្តុង្គឧត្តមសម្រាប់ជាតិសាសន៍មួយ» ប៉ុន្តែកន្លងមកតាមប្រវត្តិសាស្រ្តអ្នកនយោបាយខ្មែរជំនាន់ខ្លះដើម្បីអំណាចខ្លួន និងបក្ខពួកសុខចិត្តបោះបង់ឯករាជភាពរបស់ខ្លួនទៅជ្រកក្រោមអំណាច ឬអាណានិគមបរទេស។
លោកបានបញ្ជាក់ថា៖ «ដើម្បីឈ្នះខ្មែរគ្នាឯង ដើម្បីអំណាចផ្ទាល់ខ្លួន ឬក្រុមបក្សខ្លួន សុខចិត្តទទួលយក ឬជ្រកក្រោមអំណាចត្រួតត្រា ឬអាណានិគមបរទេស បើទោះបីជាមានគ្រោះថ្នាក់ដល់ប្រទេសជាតិ និងប្រជាពលរដ្ឋខ្លួនក៏ដោយ...ពេលខ្លះគេគ្រាន់តែរើបម្រះចេញពីនឹមត្រួតត្រារបស់ប្រទេសមួយហើយទៅជ្រកកោនក្រោមអំណាចនយោបាយអំណាចសេដ្ឋកិច្ចនៃប្រទេសមួយទៀតឲ្យតែគេអាចរក្សាអំណាចបានដោយភ្លេចអំពីតម្លៃនៃឯករាជជាតិពិតប្រាកដ»។
លោក កឹម សុខា បានបន្ថែមថាឯករាជជាតិពិតប្រាកដអាចស្ថិតស្ថេរបានលុះត្រាតែមានឯកភាពជាតិដោយថា «ឯកភាពជាតិគឺជាមូលដ្ឋានគ្រឹះនៃឯករាជជាតិ»។ លោកបញ្ជាក់ថា៖ «ឯកភាពជាតិបានមកដោយការផ្សះផ្សាជាតិ ការបង្រួបបង្រួមជាតិដោយឈរលើស្មារតីយោគយល់គ្នាតម្កល់ផលប្រយោជន៍ជាតិ និងប្រជាពលរដ្ឋធំជាងផលប្រយោជន៍ខ្លួន ឬបក្ខពួកខ្លួនស្រមតាមមាគ៌ាលទ្ធិប្រជាធិបតេយ្យ»។
អ្នកស្រី ដឿ តឹកឡុង ជាមន្ត្រីរាជការចូលនិវត្តន៍វ័យ ៧៨ ឆ្នាំដែលបានចូលរួមក្នុងពិធីបុណ្យនេះដែរបានរំឭកថាអ្នកស្រីបានចូលរួមចលនានារីក្លាហានតាមការអំពាវនាវរបស់សម្តេច សីហនុ។ អ្នកស្រីថាអ្នកស្រីពេលនោះអាយុប្រហែលជា ១៤ ឆ្នាំដោយថាកងនារីក្លាហាននេះមានក្មេងស្រីចូលរួមជាច្រើននៅទូទាំងប្រទេស។ អ្នកស្រីបន្តថាក្មេងស្រីទាំងនោះកាត់សក់ខ្លីត្រឹមក និងមានឯកសណ្ឋានពណ៌គគី និងមានកាំភ្លើងឈើម្នាក់មួយដើម។ អ្នកស្រីឲ្យដឹងទៀតថាពួកអ្នកស្រីហាត់សមដូចជាទាហានអ៊ីចឹងដែរនៅតាមភូមិ និងថាធ្វើបែបនេះដើម្បីបង្ហាញកម្លាំងដល់បារាំង។
លោកស្រីបន្ថែមថា៖ «ហេតុអ្វីបានជាសម្តេច (សីហនុ) ឲ្យយើងកាន់កាំភ្លើងឈើគ្រប់គ្នាគំនិតសម្តេចគឺចង់សម្លុតបារាំងដែរណា...ចលនាទាមទារឯករាជ្យហ្នឹងមានច្រើនដែរ តែខ្ញុំអត់សូវចាំ...ខ្ញុំថាខ្ញុំមិនទ្រាំទ្រឲ្យវាត្រួតត្រាទៀតទេ...យើងអរពេលបានឯករាជ្យព្រោះយើងអ្នកតស៊ូ»។
លោកស្រីបានរំឭកអនុស្សាវរីយ៍កាលនៅជាសិស្សក្រោយបានឯករាជ្យថាអ្នកស្រីជាសិស្សផង ជាអត្តពលិកផង ដែលអ្នកស្រីថាធ្លាប់បានលេងបាល់បោះជាមួយសម្តេចព្រះ នរោត្តមស៊ីហនុ ទៀតផង។ អ្នកស្រីចាត់ទុកសម្ដេច សីហនុ ជាអ្នកដឹកនាំមិនប្រកាន់ខ្លួន និងបានយកចិត្តទុកដាក់ក្នុងការដឹកនាំប្រទេសជាពិសេសវិស័យកីឡា។
ចំណែកយុវសិស្ស ជា យ៉ាន រៀនថ្នាក់ទី ១១ នៅវិទ្យាល័យផ្សារដើមថ្កូវថ្លែងថាលោកមកចូលរួមពិធីបុណ្យនេះដើម្បីជាការរំឭកដល់ការទាមទារ និងតស៊ូរបស់ព្រះបាទ នរោត្តម សីហនុ ដើម្បីឯករាជភាពរបស់កម្ពុជាពីបារាំង។
ដោយឡែកប្រធានគណបក្សអំណាចខ្មែរលោក សួន សេរីរដ្ឋា មិនទាន់ចាត់ទុកថាកម្ពុជាមានឯករាជ្យនៅឡើយទេដោយលើកឡើងថាកម្ពុជាកំពុងស្ថិតក្រោមអំណាចរបស់ប្រទេសជិតខាងនៅឡើយ។ មួយវិញទៀតលោកថាកម្លាំងប្រដាប់អាវុធត្រូវបានគេប្រើប្រាស់សម្រាប់បង្ក្រាបលើពលរដ្ឋខ្មែរខ្លួនឯងនៅពេលអ្នកទាំងនោះតវ៉ាស្វែងរកយុត្តិធម៌។ លោកបានដាក់ជាសំណួរថាតើនេះ ឬជាឯករាជ្យ? នេះបើតាមអ្វីដែលលោកបានសរសេរលើទំព័រហ្វេសប៊ុករបស់លោកពីម្សិលមិញ៕
No comments:
Post a Comment