អ្នកឃ្លាំមើលការចុះឈ្មោះបោះឆ្នោតនៅឃុំស្វាយជ្រះ ស្រុកស្នួល ខេត្តក្រចេះ អះអាងថា កម្មករដែលធ្វើការនៅក្រុមហ៊ុនចម្ការកៅស៊ូ និងក្រុមហ៊ុនថ្មម៉ាបជាង ៦០០នាក់ ប្រឈមអស់សិទ្ធិបោះឆ្នោត ខណៈការចុះឈ្មោះបោះឆ្នោតក្នុងបញ្ជីថ្មីគិតត្រឹមថ្ងៃទី២១ វិច្ឆិកា នៅសល់ ៨ថ្ងៃទៀត។ ពួកគេថា ក្រុមកម្មករទាំងនោះមិនទាន់ទៅចុះឈ្មោះបោះឆ្នោតនៅឡើយទេ ដោយសារតែអាជ្ញាធរពាក់ព័ន្ធមិនទាន់រកមធ្យោបាយដោះស្រាយបញ្ហានេះ។
អ្នកធ្វើការពាក់ព័ន្ធការចុះឈ្មោះបោះឆ្នោតនៅឃុំស្វាយជ្រះ ស្រុកស្នួល ខេត្តក្រចេះ អំពាវនាវនៅថ្ងៃទី២១ វិច្ឆិកា សុំឲ្យ គ.ជ.ប និងអាជ្ញាធរពាក់ព័ន្ធ រកមធ្យោបាយជំរុញឲ្យកម្មករធ្វើការនៅក្រុមហ៊ុនថ្មម៉ាប និងក្រុមហ៊ុនចម្ការកៅស៊ូជាង ៦០០នាក់ មានឱកាសទៅចុះឈ្មោះបោះឆ្នោតនៅមូលដ្ឋានពួកគេរស់នៅ។
ពលរដ្ឋរស់នៅភូមិថ្នល់ ឃុំស្វាយជ្រះ លោក ជុំ សុភី សង្កេតឃើញថា ក្រុមកម្មករទាំងនោះប្រឈមអស់សិទ្ធិបោះឆ្នោត ប្រសិនបើអាជ្ញាធរពាក់ព័ន្ធ និង គ.ជ.ប មិនប្រញាប់រកមធ្យោបាយឲ្យទាន់ពេលទេ។ លោកបញ្ជាក់ថា បញ្ហានេះ លោកពុំដឹងប្រាកដថាមូលហេតុមកពីកម្មករទាំងនោះមិនបានមកចុះឈ្មោះបោះឆ្នោត ឬខាងក្រុមហ៊ុនមិនអនុញ្ញាតឲ្យមកចុះឈ្មោះនោះទេ។ លោកកត់សម្គាល់ថា ពួកគេភាគច្រើនមកពីខេត្តកំពង់ចាម ព្រៃវែង និងខេត្តតាកែវ ជាដើម បានមកធ្វើការនៅតំបន់នេះច្រើនខែមកហើយ។ លោកសន្និដ្ឋានថា ក្រុមកម្មករទាំងនោះអាចមិនទាន់យល់ពីនីតិវិធីចុះឈ្មោះបោះឆ្នោតថ្មី ខណៈការផ្សព្វផ្សាយព័ត៌មានបញ្ហានេះកន្លងមករបស់អាជ្ញាធរមូលដ្ឋាន ហាក់មិនគ្រប់ជ្រុងជ្រោយ៖ «គាត់អត់យល់ច្បាស់មើលទៅ ដូចថានៅក្នុងភូមិគាត់ធ្លាប់នៅបោះនៅភូមិគាត់ ដូចថាឆ្ងាយ។ បើខ្ញុំអត់ទាន់មានសិទ្ធិប្រកាសប្រាប់គាត់ បើខាងឃុំគាត់អត់បានចាត់តាំងអីមក»។
ជំទប់ទី១ នៃឃុំស្វាយជ្រះ មកពីគណបក្ស សម រង្ស៊ី លោក គឹម សាន់ កត់សម្គាល់ថា កន្លងទៅ ក្រុមហ៊ុនមិនបានផ្តល់ព័ត៌មាននេះជូនអាជ្ញាធរឃុំនោះទេ។ លោកសង្កេតឃើញថា ក្រុមកម្មករទាំងនោះបង្ហើបថា ពួកគេពុំទាន់មានការអនុញ្ញាតពីក្រុមហ៊ុន ឲ្យទៅចុះឈ្មោះបោះឆ្នោតដែរ ហើយក៏ពុំទាន់ឮព័ត៌មានពីអាជ្ញាធរមូលដ្ឋានស្ដីពីការចុះឈ្មោះបោះឆ្នោតនៅឡើយទេ៖ «ខ្ញុំធ្លាប់ជូនកម្មករប្រហែលជា ២០នាក់។ យើងសម្ភាសទៅគាត់ថាគ្មានការអនុញ្ញាតពីអាជ្ញាធរ ឬក្រុមហ៊ុនអីទេ ព្រោះអីជាធម្មតាៗអត់មានពីណានិយាយអីផង។ គាត់និយាយចឹង»។
អាស៊ីសេរី មិនអាចរកប្រភពទាក់ទងតំណាងក្រុមហ៊ុនថ្មម៉ាប និងក្រុមហ៊ុនចម្ការកៅស៊ូភូរៀង ដើម្បីសុំការបញ្ជាក់បញ្ហានេះបានទេនៅថ្ងៃទី២១ វិច្ឆិកា។
ឆ្លើយតបការលើកឡើងនេះ មេឃុំស្វាយជ្រះ លោក វ៉ាន់ វេត មានប្រសាសន៍ថា អាជ្ញាធរឃុំអំពាវនាវជាហូរហែ ដោយជំរុញឲ្យពលរដ្ឋនៅមូលដ្ឋាន និងពលរដ្ឋចំណូលថ្មី ប្រញាប់មកចុះឈ្មោះបោះឆ្នោត។ លោកបញ្ជាក់ថា ពលរដ្ឋមកពីខេត្តផ្សេងដែលមកធ្វើការនៅតំបន់នេះ ក៏អាចចុះឈ្មោះបោះឆ្នោតបានដែរ ដោយគ្រាន់តែយកលិខិតបញ្ជាក់អត្តសញ្ញាណ មានអត្តសញ្ញាណប័ណ្ណជាដើម មកការិយាល័យចុះឈ្មោះបោះឆ្នោត ក្រុមប្រឹក្សាឃុំដែលប្រចាំការនៅទីនោះ នឹងចេញលិខិតធានាឲ្យពួកគេចុះឈ្មោះបោះឆ្នោតបាន៖ «ពួកខ្ញុំអំពាវនាវខិតខំដែរឲ្យពលរដ្ឋមកចុះឈ្មោះ។ កន្លែងនេះមានក្រុមប្រឹក្សាឃុំ គេចាំបញ្ជាក់ដែរ ពលរដ្ឋរស់នៅឃុំថាគឺមកជួបនៅកន្លែងចុះឈ្មោះ»។
ច្បាប់បោះឆ្នោតមាត្រា៤៦ថ្មីចែងថា ដើម្បីបោះឆ្នោតបាន ពលរដ្ឋត្រូវមានឈ្មោះក្នុងបញ្ជីបោះឆ្នោត និងមានអត្តសញ្ញាណប័ណ្ណសញ្ជាតិខ្មែរ និងមានអាយុ ១៨ឆ្នាំឡើងទៅ គិតដល់ថ្ងៃបោះឆ្នោត មានទីលំនៅឋាន ឬទីសំណាក់ក្នុងឃុំ-សង្កាត់ដែលសាមីខ្លួនត្រូវបោះឆ្នោត មិនស្ថិតនៅក្នុងស្ថានភាពជាប់ពន្ធនាគារ ឬមិនត្រូវដកសិទ្ធិបោះឆ្នោត ពុំមែនជាជនវិកលចរិត ឬស្ថិតក្រោមអាណាព្យាបាលទូទៅ ដោយមានលិខិតបញ្ជាក់ពីក្រសួងស្ថាប័នមានសមត្ថកិច្ច។
តួលេខរបស់លេខាធិការដ្ឋានរៀបចំការបោះឆ្នោត ឲ្យដឹងថា ពលរដ្ឋនៅស្រុកស្នួល បានចុះឈ្មោះបោះឆ្នោតគិតត្រឹមថ្ងៃទី២១ វិច្ឆិកា បានជាង ៣ម៉ឺន ៤ពាន់នាក់ (៣៤.៤៦១នាក់) ស្មើនឹង ៧២% ក្នុងចំណោមពលរដ្ឋជាង ៤ម៉ឺន ៨ពាន់នាក់ (៤៨.១៧៨នាក់)។ នៅឃុំស្វាយជ្រះ ស្រុកស្នួល ពលរដ្ឋចុះឈ្មោះបោះឆ្នោតបានជាង ៥ពាន់នាក់ ស្មើនឹង ៦៩% ក្នុងចំណោមពលរដ្ឋជាង ៨ពាន់នាក់ដែលគ្រប់អាយុចុះឈ្មោះបោះឆ្នោត។
អនុប្រធានប្រតិបត្តិគណបក្សសង្គ្រោះជាតិ និងជាសមាជិកក្រុមប្រឹក្សាខេត្តក្រចេះ លោក អឿ គឹមហ៊ាន វាយតម្លៃថា ពលរដ្ឋរស់នៅខេត្តក្រចេះ ជាង ៧ម៉ឺននាក់ នឹងប្រឈមអស់សិទ្ធិបោះឆ្នោត។ លោកថា មកទល់ពេលនេះ ពលរដ្ឋជាង ៧ម៉ឺននាក់ក្នុងចំណោមពលរដ្ឋជាង ២៣ម៉ឺននាក់ មិនទាន់បានមកចុះឈ្មោះបោះឆ្នោតនៅឡើយ។ លោកបារម្ភថា ចំនួនអ្នកចុះឈ្មោះបោះឆ្នោតបានថយចុះខ្លាំង និងមិនគ្រប់ចំនួនកំណត់ក្នុងទិន្នន័យរបស់ គ.ជ.ប៖ «ខាងក្រចេះ យើងមាន ៥០ក្រុមហ៊ុនជាង។ ដល់ចឹង កម្មករមួយចំនួនធំគាត់អត់បានមកចុះទេ»។
លេខាធិការដ្ឋានរៀបចំការបោះឆ្នោតខេត្តក្រចេះ លោក អ៊ុង ស៊ីយឿន មានប្រសាសន៍ថា គ.ជ.ប បានដាក់ផែនការប្រជុំតាមរយៈអាជ្ញាធរខេត្ត ដោយតម្រូវឲ្យអាជ្ញាធរមូលដ្ឋានខិតខំរកមធ្យោបាយ ជំរុញឲ្យពលរដ្ឋមកចុះឈ្មោះបោះឆ្នោតឲ្យបានគ្រប់គ្នា។ លោកថា កម្មករធ្វើការក្នុងក្រុមហ៊ុនក៏អាចមានសិទ្ធិចុះឈ្មោះបោះឆ្នោតនៅមូលដ្ឋានពួកគេរស់នៅដែរ។ លោកបញ្ជាក់ថា ប្រសិនបើ គ.ជ.ប ធ្វើការទាក់ទងទៅក្រុមហ៊ុនទាំងនោះ ហើយជជែកពីបញ្ហានេះ តំណាងក្រុមហ៊ុនអាចនឹងសម្របសម្រួលករណីនេះ៖ «ខ្ញុំបានពិភាក្សាជាមួយអាជ្ញាធរខេត្ត ដើម្បីឲ្យលោកជួយតាមរយៈពេលចុងក្រោយនេះ ដើម្បីជំរុញប្រជាពលរដ្ឋ ហើយអាជ្ញាធរខេត្តលោកព្រមសហការជាមួយយើងដោយលោកចាត់វិធានការប្រើមធ្យោបាយសរុប។ ខាងអាជ្ញាធរខេត្ត លោកមានវិធានការគឺឲ្យចុះទៅដល់ភូមិស្ទើរតែគ្រប់ភូមិនៃខេត្តទាំងមូល។ ទី១ ជំនឿនប្រជាជនឡើងវិញថា តើនៅសល់ប៉ុន្មាននាក់ដែលមិនទាន់ចុះឈ្មោះ ដើម្បីយកមធ្យោបាយឲ្យគាត់អញ្ជើញមកចុះឈ្មោះ»។
តួលេខរបស់លេខាធិការដ្ឋានរៀបចំការបោះឆ្នោតខេត្តក្រចេះ ឲ្យដឹងថា ប្រជាពលរដ្ឋដែលបានចុះឈ្មោះបោះឆ្នោតគិតត្រឹមថ្ងៃទី២០ វិច្ឆិកា បានជិត ១៦ម៉ឺននាក់ (១៥៨.០០៧នាក់) ស្មើនឹង ៦៧% ក្នុងចំណោមពលរដ្ឋជិត ២៤ម៉ឺននាក់ (២៣៧.៣៧៥នាក់) ដែលគ្រប់អាយុចុះឈ្មោះបោះឆ្នោត។ ការចុះឈ្មោះបោះឆ្នោតក្នុងបញ្ជីថ្មីសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ឆ្នាំ២០១៧ មានរយៈពេល ៣ខែ គឺចាប់ពីថ្ងៃទី១ ខែកញ្ញា រហូតដល់ថ្ងៃទី២៩ ខែវិច្ឆិកា៕
No comments:
Post a Comment