រហូតមកទល់ពេលនេះ អង្គភាពប្រឆាំងអំពើពុករលួយ (ACU) មិនទាន់បើកការស៊ើបអង្កេតលើសារឆ្លើយឆ្លងគ្នាតាមបណ្ដាញសង្គមដែលគេសង្ស័យថា ជាសារសំឡេង និងសារជាអក្សររបស់លោកនាយករដ្ឋមន្ត្រី ហ៊ុន សែន ជាមួយកញ្ញា ធី សុវណ្ណថា និងសាររវាងកូនប្រុសលោកនាយករដ្ឋមន្ត្រី គឺលោក ហ៊ុន មានិត និងកញ្ញា ធី សុវណ្ណថា នៅឡើយទេ។ ចំណែកអ្នកវិភាគយល់ថា សារនេះអាចជាតម្រុយមួយសម្រាប់អង្គភាពប្រឆាំងអំពើពុករលួយ អាចបើកការស៊ើបអង្កេតបាន។
ប្រធានអង្គភាពប្រឆាំងអំពើពុករលួយថា មិនមានសមត្ថកិច្ចស៊ើបអង្កេតសារសន្ទនាដែលបានបែកធ្លាយ ដែលគេសង្ស័យថា ធ្វើឡើងរវាងគ្រួសារលោក ហ៊ុន សែន និងកញ្ញា ធី សុវណ្ណថា នោះទេ។
លោក ឱម យ៉ិនទៀង ប្រធានអង្គភាពនេះ ថ្លែងឆ្លើយតបនឹងសំណួររបស់អាស៊ីសេរីថា អង្គភាពប្រឆាំងអំពើពុករលួយ ពុំមានសមត្ថកិច្ចស៊ើបអង្កេតសារសន្ទនាដែលបានបែកធ្លាយតាមបណ្ដាញសង្គមហ្វេសប៊ុក (Facebook) ដែលគេសង្ស័យថា ជាសារសំឡេង និងសារជាអក្សររបស់លោកនាយករដ្ឋមន្ត្រី ហ៊ុន សែន ជាមួយកញ្ញា ធី សុវណ្ណថា និងសាររវាងកូនប្រុសលោកនាយករដ្ឋមន្ត្រី លោក ហ៊ុន មានិត និងកញ្ញា ធី សុវណ្ណថា នោះឡើយ។លោកបន្តថា ការចាប់សំណុំរឿងរបស់លោក កឹម សុខា និងនាងខុម ចាន់តារាទី កន្លងមកមិនមែនជារឿងសម្ព័ន្ធផ្លូវភេទរបស់បុគ្គលនោះទេ ប៉ុន្តែការចាប់នោះដោយសារមានសារបែកធ្លាយដល់រឿងសូកប៉ាន់សាក្សី៖ «ខ្ញុំអរគុណណាស់! បើអាស៊ីសេរី ឲ្យតម្រុយថាវាពាក់ព័ន្ធមាត្រាប៉ុន្មាននៃច្បាប់យើងខ្ញុំ។ ខ្ញុំឃើញអាស៊ីសេរី មានចេតនានយោបាយច្បាស់លាស់ មួលបង្កាច់។ យើងខ្ញុំចាប់លើកមុននេះ អត់មានចាប់រឿងអាណាទៅរកស្រីញីអី ប្រពន្ធចុងប្រពន្ធដើមទេ អ៊ីចឹងរឿងបែកធ្លាយនេះពាក់ព័ន្ធស្អី រឿងសមត្ថកិច្ចរបស់យើងខ្ញុំ។ សូមប្រាប់ឲ្យត្រង់មកថា ណែ ឱម យ៉ិនទៀង ខ្ញុំឃើញនិយាយអ៊ីចេះបើតាមច្បាប់...? ខ្ញុំសូមឆ្លើយត្រង់អ៊ីចឹង បើសំណួររបៀបនយោបាយ ខ្ញុំសូមឆ្លើយនយោបាយវិញ»។
លោក ឱម យ៉ិនទៀង ថ្លែងបែបនេះនៅពេលជួបអ្នកសារព័ត៌មានបន្ទាប់ពីបញ្ចប់ទិវាប្រឆាំងអំពើពុករលួយ ៩ ធ្នូ ដែលធ្វើឡើងនៅអង្គភាពប្រឆាំងអំពើពុករលួយ។
កាលពីពេលថ្មីៗនេះ មានការបែកធ្លាយសារសន្ទនាមួយ ដែលគេសង្ស័យថា ជារបស់លោកនាយករដ្ឋមន្ត្រី ហ៊ុន សែន និងកូនប្រុសរបស់លោក គឺលោក ហ៊ុន ម៉ានិត ជាប្រធានអង្គភាពចារកម្មនៃក្រសួងការពារជាតិ ដែលបង្ហាញពីការពិភាក្សាគ្នារវាងកញ្ញា ធី សុវណ្ណថា អំពីមធ្យោបាយបង្ខូចឈ្មោះ និងរៀបចំផែនការបំផ្លាញគណបក្សប្រឆាំង។
ទាក់ទងនឹងបញ្ហានេះ នាយកកម្មវិធីនៃអង្គការតម្លាភាពកម្ពុជា លោក ប៉ិច ពិសី ថ្លែងថា ករណីបែកធ្លាយនេះ លោកពុំឃើញមានតម្រុយណាមួយនៃការសូកប៉ាន់ និងប្រព្រឹត្តអំពើពុករលួយទេ ប៉ុន្តែលោកស្នើឲ្យ ACU អនុវត្តច្បាប់ឲ្យមានភាពស្មើគ្នា៖ «»។
ប៉ុន្តែលោក អ៊ូ វីរៈ ប្រធានអង្គការវេទិកាអនាគត មានទស្សនៈថា វាជាករណីមួយមានថវិកាច្រើន និងពាក់ព័ន្ធជាមួយបុគ្គលសាធារណៈផង ដែលជារឿងមួយគួរឲ្យយកចិត្តទុកដាក់ ប៉ុន្តែបើសិនជាក្នុងការបន្តឃ្លាំមើលក្រែងលោមានតម្រុយ។ ជាងនេះទៅទៀត ACU អាចផ្ញើលិខិតទៅសាកសួរបានទៀតផង។ លោកថា ការស៊ើបអង្កេតលើរឿងបែបនេះក៏អាចជារឿងមួយភ្ញាក់ផ្អើលដែរ ប៉ុន្តែប្រហែលជាពិបាក ពីព្រោះ ACU មិនទាន់ឯករាជ្យពីនាយករដ្ឋមន្ត្រីនោះទេ។
ជាមួយគ្នានោះ លោក ឱម យ៉ិនទៀង ក៏បានឆ្លើយតបទៅការអំពាវនាវរបស់សង្គមស៊ីវិលកាលពីពេលថ្មីៗនេះ ដែលទាមទារឲ្យបង្ហាញតម្លាភាពនៃថវិកាមូលនិធិរបស់កញ្ញា ធី សុវណ្ណថា ពោលគឺត្រូវមានតម្លាភាពពីប្រភពដែលកញ្ញា ធី សុវណ្ណថា បានទទួលប្រាក់។
លោក ឱម យ៉ិនទៀង បានធ្វើឆ្លើយតបដូច្នេះ៖ «ឥឡូវមានចលនាមួយ NGO ទារឲ្យ ធី សុវណ្ណថា តម្លាភាពមូលនិធិ។ ខ្ញុំអរដែរ វាមិនចូល តែវានៅក្នុងកិច្ចការបង្ការធ្វើទាំងអស់គ្នា អិន.ជី.អូ ៤ពាន់ ស្រុកខ្មែរធ្វើទាំងអស់គ្នាមក កុំចាប់បង្ខំតែមួយធ្វើអា ៣ពាន់ទៀតមិនធ្វើ មិនបានទេ។ អ្នកឯងទទួលលុយពីបរទេសប៉ុន្មាននិយាយគ្នាដូចគ្នា កុំឲ្យ អិន.ជី.អូ ស្រុកខ្មែរ គ្នារហាម គ្នាអត់អី ទីបំផុតគ្នាដួលងាប់ម្ដងមួយៗ ឯ អិន.ជី.អូ តែ ៤ ៥ ទេ លុយគរភ្នំ ហើយអត់មាននរណាត្រួតពិនិត្យបានទៀត»។
កាលពីថ្ងៃអាទិត្យ សប្ដាហ៍មុន អ្នកប្រើប្រាស់បណ្ដាញសង្គមហ្វេសប៊ុក ល្បីឈ្មោះ កញ្ញា ធី សុវណ្ណថា បានប្រកាសថា ខ្លួនបានទទួលថវិកា ៣លានដុល្លារពីបណ្តាញមូលនិធិអន្តរជាតិ ដើម្បីឧបត្ថម្ភលើការផ្តល់អាហារូបករណ៍សិក្សាជាបន្តបន្ទាប់នៅឧត្តមសិក្សា បានជំរុញឲ្យមានការអំពាវនាវពីសំណាក់ក្រុមថ្នាក់ដឹកនាំអង្គការសង្គមស៊ីវិល ឲ្យបង្ហាញពីតម្លាភាពនៃប្រភពថវិកានេះ មួយសប្ដាហ៍បន្ទាប់ពីការបែកធ្លាយដែលគេសង្ស័យថា ជាសារសន្ទនាដែលបង្ហាញពីការសន្យាផ្ដល់ប្រាក់ចំនួន ១លានដុល្លាររបស់លោកនាយករដ្ឋមន្ត្រី ហ៊ុន សែន ទៅឲ្យរូបនាង។
កន្លងទៅនៅពេលមានការបញ្ចេញខ្សែអាត់សំឡេងឆ្លើយឆ្លងដែលគេសង្ស័យថា ជារបស់លោក កឹម សុខា និងអ្នកនាង ខុម ចាន់តារាទី ហៅស្រីមុំ ករណីនេះ ត្រូវបានអង្គភាពប្រឆាំងអំពើពុករលួយ ចាត់វិធានការស៊ើបអង្កេតក្រោយពីមានពាក្យបណ្ដឹងមួយចំនួនប្រឆាំងនឹងលោក កឹម សុខា។ បណ្ដឹងទាំងនេះ បានធ្វើឲ្យលោក កឹម សុខា ត្រូវបានតុលាការកាត់ទោសជាប់ពន្ធនាគារចំនួន ៥ខែ និងមេឃុំបក្សប្រឆាំងមួយរូបជាប់ពន្ធនាគារ ៥ឆ្នាំផងដែរ។ ក្រៅពីនោះនៅមានមន្ត្រីសិទ្ធិមនុស្ស និងមន្ត្រី គ.ជ.ប ចំនួន ៥នាក់ កំពុងជាប់ពន្ធនាគារនៅឡើយ៕
No comments:
Post a Comment