 |
| ជនជាតិដើមភាគតិចក្នុងខេត្តមណ្ឌលគិរីនៅក្នុងពិធីមួយកាលពីពេលកន្លងមក។ រូបថត សហការី |
មណ្ឌលគិរីៈ ក្រុមអង្គការសិទ្ធិមនុស្សបានជំរុញឲ្យមានការប្រុងប្រយ័ត្ន បន្ទាប់ពីមានការបង្ហាញថាម្ចាស់នៃគម្រោងរុករករ៉ែបុកស៊ីតក្នុងខេត្តមណ្ឌលគិរីមានប្រវត្តិរំលោភបំពានសិទ្ធិនៅកន្លែងអភិវឌ្ឍន៍ និងកន្លែងដទៃៗទៀតអស់រយៈកាលជាងមួយទសវត្សរ៍មកហើយ។
ក្រសួងបរិស្ថានបានប្រកាសកាលពីថ្ងៃសុក្រថាខ្លួនបច្ចុប្បន្ននេះកំពុងពិនិត្យការវាយតម្លៃផលប៉ះពាល់បរិស្ថាន (EIA) សម្រាប់គម្រោងរុករករ៉ែចំនួន ២៦០០០ ហិកតាដែលលាតសន្ធឹងពីស្រុកអូររំាងរហូតដល់ក្រុងសែនមនោរម្យនៅភាគខាងត្បូងខេត្តមណ្ឌលគិរី។
មន្រ្តីម្នាក់ពីនាយកដ្ឋានវាយតម្លៃផលប៉ះពាល់បរិស្ថាន (EIA) បានប្រាប់ភ្នំពេញប៉ុស្តិ៍កាលពីសប្តាហ៍មុនថាក្រុមហ៊ុននៅពីក្រោយគម្រោងអណ្តូងរ៉ែនេះគឺក្រុមហ៊ុន Alex Corporation បានផ្តល់ពាក្យសម្តីថាខ្លួននឹងមិនបង្កឲ្យមានជម្លោះជាមួយសហគមន៍ដែលរងគ្រោះហើយក៏មិនបណ្តេញប្រជាពលរដ្ឋណាដែលមិនទទួលយកសំណងចេញពីដីធ្លីដែរ។
ទោះយ៉ាងណាក្តីម្ចាស់ក្រុមហ៊ុន Alex Corporation មានប្រវត្តិនៃការរំលោភបំពានសិទ្ធិដីធ្លីមិនត្រឹមតែនៅភាគខាងត្បូងខេត្តមណ្ឌលគិរីទេប៉ុន្តែទូទាំងប្រទេសកម្ពុជា។
សមាជិកព្រឹទ្ធសភារបស់គណបក្សប្រជាជនលោក ឡាវ ម៉េងឃីន និងភរិយារបស់លោកគឺលោកស្រី ជឹង សុភាព ត្រូវបានរៀបរាប់នៅក្នុងឯកសារសម្ងាត់របស់ស្ថានទូតអាមេរិកនៅឆ្នាំ ២០០៧ ថាជា «ប្តីប្រពន្ធមានអំណាច» ក្នុងប្រទេសកម្ពុជា។ របាយការណ៍ឆ្នាំ ២០០៩ របស់អង្គការ Global Witness បានរកឃើញថាពួកគេកាន់កាប់សិទ្ធិយ៉ាងហោចណាស់ ៧% នៃដីទាំងអស់ក្នុងប្រទេសកម្ពុជាជាចម្បងតាមរយៈក្រុមហ៊ុន Pheapimex Group ដែលលោកស្រី សុភាព ជាប្រធាន។
កាលពីឆ្នាំ ២០០៤ ក្រុមហ៊ុន Pheapimex បានចុះហត្ថលេខារកស៊ីរួមគ្នាជាមួយក្រុមហ៊ុនចម្ការចិនមួយឈ្មោះ Wuzhishan។ នៅក្នុងឆ្នាំនោះអ្នកតវ៉ាមួយចំនួនបានរងរបួសដោយសារគ្រាប់បែកដៃខណៈកំពុងធ្វើបាតុកម្មតវ៉ានឹងសម្បទានដីសេដ្ឋកិច្ចក្នុងខេត្តពោធិ៍សាត់ក្នុងគម្រោងវិនិយោគរកស៊ីរួមគ្នានេះ។
នៅឆ្នាំបន្ទាប់ការរកស៊ីរួមគ្នានេះត្រូវបានផ្តល់ឲ្យនូវសម្បទានដីសេដ្ឋកិច្ចចំនួន ៣៣៦ គីឡូម៉ែត្រការ៉េនៅភាគខាងត្បូងខេត្តមណ្ឌលគិរី។ ប៉ុន្តែបើតាមរបាយការណ៍របស់ការិយាល័យសិទ្ធិមនុស្សឆ្នាំ ២០០៧ របស់អង្គការសហប្រជាជាតិបានឲ្យដឹងថាមុនពេលក្រុមហ៊ុនទទួលបានសម្បទានសេដ្ឋកិច្ចជាផ្លូវការក្រុមហ៊ុននេះបានចាប់ផ្តើមការងារនៅលើដីដែលជាកម្មសិទ្ធិរបស់ជនជាតិភាគតិចព្នង។ ទ្រង់ទ្រាយនៃសម្បទានដីសេដ្ឋកិច្ចនោះគឺជិតដូចនឹងទ្រង់ទ្រាយនៃតំបន់ដែលក្រុមហ៊ុន Alex Corporation បានស្នើសុំចាប់ផ្តើមរករ៉ែបុកស៊ីតនាឆ្នាំក្រោយ។
មិនមានឯកសារបង្ហាញជាសាធារណៈណាបង្ហាញច្បាស់អំពីការជាប់ពាក់ព័ន្ធនៃប្តីប្រពន្ធមានអំណាចនេះទៅនឹងក្រុមហ៊ុន Alex Corporation ទេ។
ទោះយ៉ាងណាក្តី Lau Zhong Yao ដែលជាប្រធានក្រុមហ៊ុននេះគឺជានាយកក្រុមហ៊ុន Pheapimex Group, ក្រុមហ៊ុន Wuzhishan និងគម្រោងវិនិយោគទីបីរបស់ប្តីប្រពន្ធមានអំណាចគឺ Cambodia International Investment Development Group (CIIDG)។
ការិយាល័យចុះបញ្ជីរបស់ក្រុមហ៊ុន Alex Corporation គឺនៅក្នុងអគារជាមួយគ្នានឹងក្រុមហ៊ុន CIIDG ហើយគណនេយ្យករម្នាក់ដែលមានអ៊ីមែលជាអាសយដ្ឋាន CIIDG សម្រាប់ក្រុមហ៊ុន Alex Corporation បានថ្លែងកាលពីថ្ងៃព្រហស្បតិ៍សប្តាហ៍មុនថាអ្នកនាងបានចុះបញ្ជីក្រុមហ៊ុននេះនៅក្រសួងពាណិជ្ជកម្មហើយថាវាជាកម្មសិទ្ធិរបស់មនុស្សជាមួយគ្នានឹងក្រុមហ៊ុន CIIDG។
តំណាងក្រុមអង្គការសិទ្ធិមនុស្សកាលពីសប្តាហ៍មុនបានថ្លែងថាការជាប់ពាក់ព័ន្ធរបស់ក្រុមហ៊ុន Alex Corporation ទៅនឹងប្តីប្រពន្ធមានអំណាចនេះគឺត្រូវមានការប្រុងប្រយ័ត្ន។
លោក អៀង វុទ្ធី នាយកប្រតិបត្តិអង្គការសមធម៌កម្ពុជាបានធ្វើការអស់រយៈពេលជាច្រើនឆ្នាំនៅលើគម្រោងអភិវឌ្ឍន៍ផ្សេងទៀតរបស់ប្តីប្រពន្ធមានអំណាចនេះ។
ចាប់ផ្តើមនៅក្នុងឆ្នាំ ២០០៨ មានមនុស្សរាប់ពាន់នាក់ត្រូវបានបណ្តេញចេញពីលំនៅឋានរបស់ពួកគេនៅជុំវិញតំបន់បឹងកក់ក្នុងរាជធានីភ្នំពេញដើម្បីបើកផ្លូវដល់ក្រុមហ៊ុនអចលនទ្រព្យដែលដឹកនាំដោយក្រុមហ៊ុនរបស់លោក ឡាវ ម៉េងឃីន Shukaku Inc។ គម្រោងនេះមិនទាន់លេចចេញជារូបរាងនៅឡើយខណៈអ្នកដែលត្រូវបានបណ្តេញចេញជាច្រើននាក់នៅតែគ្មានផ្ទះសម្បែង និងមិនទាន់ទទួលបានសំណងនៅឡើយ។
លោក វុទ្ធី បានថ្លែងថា៖ «យើងជាប់ទាក់ទងនៅក្នុងករណីនេះជាមួយលោកស្រី [ជឹង សុភាព] និងលោក ឡាវ ម៉េងឃីន ហើយមានបញ្ហារហូត»។ «ដូច្នេះអ្វីដែលខ្ញុំអាចនិយាយបានគឺពួកគេត្រូវបង្ហាញអ្វីៗគ្រប់យ៉ាង និងអនុវត្តទៅតាមច្បាប់ហើយរដ្ឋាភិបាលមានទំនួលខុសត្រូវដើម្បីធ្វើឱ្យប្រាកដថាក្រុមហ៊ុនគោរពច្បាប់ និងសិទ្ធិរបស់ប្រជាពលរដ្ឋក្នុងមូលដ្ឋាន»។
លោក ឌុច ពិសិដ្ឋ នាយកផ្នែកតស៊ូមតិនៅមជ្ឈមណ្ឌលសិទ្ធិមនុស្សកម្ពុជា (CCHR) បានឱ្យដឹងថាមជ្ឈមណ្ឌលសិទ្ធិមនុស្សកម្ពុជាសង្ឃឹមថាទាំងរដ្ឋាភិបាល និងក្រុមហ៊ុន Alex Corporation បាន «រៀនសូត្រអ្វីមួយពីសកម្មភាពមិនល្អរបស់ដៃគូខ្លួន»។
លោក Phil Robertson នាយករងប្រចាំតំបន់អាស៊ីរបស់អង្គការឃ្លាំមើលសិទ្ធិមនុស្សបានផ្តល់មតិយោបល់យ៉ាងច្បាស់តាមរយៈអ៊ីមែលមួយថា៖ «អ្នកភូមិដែលរស់នៅក្នុងខេត្តមណ្ឌលគិរីទាំងនេះគួរទទួលស្គាល់ឥឡូវថាប្រសិនបើក្រុមហ៊ុន Alex Corporation បានទទួលភ្លើងខៀវពីរដ្ឋាភិបាលសម្រាប់គម្រោងរុករករ៉ែដ៏ធំនេះប្រវត្តិរបស់មនុស្សនៅពីក្រោយក្រុមហ៊ុននេះបង្ហាញថាអ្នកភូមិទាំងនេះនឹងក្លាយទៅជាជនរងគ្រោះរបស់គម្រោងនេះដោយត្រូវលះបង់ដីធ្លីរបស់ពួកគេមិនថាពួកគេយល់ស្រប ឬមិនយល់ស្របនោះទេហើយទំនងដូចជាទទួលបានសំណងតិចតួចប៉ុណ្ណោះ»។
ក្រៅពីគណនេយ្យកររបស់ក្រុមហ៊ុន Alex Corporation គឺមានអ្នកតំណាងជាច្រើនទៀតរបស់ក្រុមហ៊ុន Pheapimex, CIIDG និង Alex Corporation ដែល ភ្នំពេញ ប៉ុស្តិ៍ ព្យាយាមទាក់ទងមានអ្នកខ្លះទាក់ទងអត់បាន អ្នកខ្លះទាក់ទងបានប៉ុន្តែពួកគេបដិសេធធ្វើអត្ថាធិប្បាយចំពោះបញ្ហានេះ៕
No comments:
Post a Comment