ប្រជាពលរដ្ឋរស់នៅភូមិស្រែគរ ស្រុកសេសាន ខេត្តស្ទឹងត្រែង ត្អូញត្អែរពីសកម្មភាពនគរបាលសេដ្ឋកិច្ច សមត្ថកិច្ចតាមដងផ្លូវ និងមន្ត្រីរដ្ឋបាលព្រៃឈើ បានបើកកុងត្រូលជជុះចាំស្ទាក់ជំរិតទារប្រាក់ពីពួកគាត់ ក្រោមហេតុផលដឹកជញ្ជូនឈើខុសច្បាប់ត្រូវបង់ប្រាក់ដើម្បីជាថ្នូរ។ ការជំរិតទារប្រាក់បែបនេះ ខណៈប្រជាពលរដ្ឋមកពីខេត្តស្ទឹងត្រែង កំពង់ចាម កំពត និងតាកែវ ជាដើម បានមកទិញឈើផ្ទះចាស់ៗ ដែលអ្នកភូមិស្រែគរ រុះរើទៅតាំងទីលំនៅកន្លែងថ្មី។
ប្រជាពលរដ្ឋអំពាវនាវនៅថ្ងៃទី២៣ ខែវិច្ឆិកា សុំឲ្យអាជ្ញាធរខេត្តក្រចេះ ស៊ើបអង្កេត និងអន្តរាគមន៍លើមន្ត្រីរដ្ឋបាលព្រៃឈើ សមត្ថកិច្ចតាមដងផ្លូវ នគរបាលសេដ្ឋកិច្ច ដែលបង្កើតកុងត្រូលជជុះគាបសង្កត់ពលរដ្ឋដឹកឈើគ្រឿងផ្ទះដែលប្រមូលទិញពីពលរដ្ឋនៅឃុំស្រែគរ ដែលរុះរើចេញពីលំនៅឋានចាស់ ទៅតាំងទីលំនៅភូមិថ្មីក្រោយពីមានការសាងសង់ទំនប់វារីអគ្គិសនីសេសានក្រោមពីរ។
ពលរដ្ឋដែលមកទិញឈើគ្រឿងផ្ទះរស់នៅខេត្តកំពត លោក លីវ ឈុន ចោទប្រកាន់ថា សមត្ថកិច្ចតាមដងផ្លូវបានបើកកុងត្រូលជជុះជំរិតទារប្រាក់ពីពួកគាត់នៅផ្លូវជាតិលេខ៧ ពីខេត្តស្ទឹងត្រែង មកខេត្តក្រចេះ ឋិតនៅស្រុកសំបូរ និងស្រុកចិត្របូរី។ លោកថា កាលពីថ្ងៃទី២២ ខែវិច្ឆិកា មន្ត្រីទាំងនោះបានគំរាមពួកគាត់ដែលដឹកជញ្ជូនឈើធ្វើគ្រឿងផ្ទះ ដោយតម្រូវឲ្យបង់ប្រាក់ឲ្យពួកគេចំនួន ២ម៉ឺនរៀលដល់ ២០ម៉ឺនរៀលក្នុងមួយស្ថាប័ន ហើយកន្លែងខ្លះមានសមត្ថកិច្ចបើករថយន្តស្ទាក់ ដោយគំរាមទារប្រាក់ ២០ម៉ឺនរៀល បើទោះបីជាលោកបានបង្ហាញលិខិតអនុញ្ញាតដែលបញ្ជាក់ពីអាជ្ញាធរមូលដ្ឋានក្ដី។
លោកត្អូញថា លោកត្រូវចំណាយប្រាក់អស់ជាង ៨០ម៉ឺនរៀល ទើបរថយន្តរបស់លោកដល់គោលដៅ។ លោកថា ក្រុមពលរដ្ឋបានស្ដីបន្ទោសចំពោះការជំរិតទារប្រាក់ពីសមត្ថកិច្ចទាំងនោះថា យកតួនាទីគំរាមបង្ខំឲ្យពលរដ្ឋបង់ប្រាក់ បង្កការប៉ះពាល់ដល់ជីវភាពពួកគាត់៖ «គេថាខ្លះមេព្រៃទៅ ប៉ូលិសសេដ្ឋកិច្ចក៏មាន មិនដឹងនរណាខ្លះ? អត់ឃើញពាក់អាវផង សុទ្ធតែស៊ីវិលទាំងអស់។ បើយើងមិនព្រមវានៅកាក់ឡាននៅមុខហ្នឹងរហូត»។
អាស៊ីសេរី មិនអាចទាក់ទងអ្នកនាំពាក្យសាលាខេត្តក្រចេះ លោក ប៊ន សុភី ដើម្បីសុំការបញ្ជាក់បញ្ហានេះបានទេ នៅថ្ងៃទី២៣ ខែវិច្ឆិកា ព្រោះទូរស័ព្ទចូលច្រើនដងពុំមានអ្នកទទួល។ ចំណែកនាយខណ្ឌរដ្ឋបាលព្រៃឈើខេត្តក្រចេះ លោក ទ្រី សុភ័ក្រ ក៏មិនអាចទាក់ទងបានដែរ។
មេឃុំស្រែគរ លោក សៀក មេគង្គ ថ្លែងបញ្ជាក់ថា អ្នកភូមិស្រែគរ ដែលយល់ព្រមទទួលសំណងផលប៉ះពាល់ទំនប់វារីអគ្គិសនីសេសានក្រោមពីរ សម្រេចទៅតាំងទីលំនៅថ្មីបានលក់ផ្ទះចាស់ៗតម្លៃសមរម្យឲ្យពលរដ្ឋមកពីខេត្តកំពត និងកំពង់ចាម ជាដើម។
លោកបញ្ជាក់ថា អាជ្ញាធរឃុំ និងភូមិបានចេញលិខិតបញ្ជាក់ស្ដីពីកិច្ចសន្យាវាងអ្នកទិញ និងអ្នកលក់ឲ្យពលរដ្ឋដឹកឈើទាំងនោះដើម្បីបង្ហាញថា ឈើទាំនេះជារបស់កម្មសិទ្ធិបុគ្គល ពុំមែនជាទ្រព្យសាធារណៈរបស់រដ្ឋនោះទេ។
លោកចាត់ទុកការជំរិតទារប្រាក់បែបនេះថា ជាករណីខុសច្បាប់៖ «គ្នាមានលុយអី បើកោសរូសអ៊ីចឹងទៅ ជះឥទ្ធិពលដ៏អាក្រក់។ ទី១ ខ្ញុំគិតថា ជះឥទ្ធិពលដល់រដ្ឋាភិបាល និងទី២ កាត់បន្ថយភាពក្រីក្រនៅត្រង់ណា? ហើយទី៣ កាត់បន្ថយអំពើពុករលួយ។ អាហ្នឹងជះឥទ្ធិពលត្រង់ហ្នឹង»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តស្ទឹងត្រែង លោក ហូ សំអុល ចាត់ទុកការដាក់កុងត្រូលជជុះរបស់សមត្ថកិច្ច គឺផ្ទុយពីបទបញ្ជាប្រមុខរដ្ឋាភិបាលដែលហាមមិនឲ្យមានកុងត្រូលតាមផ្លូវស្ទាក់ឃាត់រថយន្តពលរដ្ឋទារលុយ ដែលប៉ះពាល់មុខរបរចិញ្ចឹមជីវិតពលរដ្ឋ។
លោកបញ្ជាក់ថា ផ្ទះចាស់ៗដែលអ្នកភូមិស្រែគរ លក់ឲ្យពលរដ្ឋនៅខែត្រផ្សេងៗ វាជាកម្មសិទ្ធិបុគ្គលពុំមែនជាទ្រព្យសាធារណៈរបស់រដ្ឋនោះទេ ដូច្នេះការដឹកជញ្ជូនបែបនេះពុំមែនជាករណីខុសច្បាប់ឡើយ៖ «វាមានការបញ្ជាក់ពីអាជ្ញាធរមូលដ្ឋានហើយ វាអស់អីហើយ វាមិនមែនជាឈើចេញពីសិប្បកម្ម ឬមួយឈើចេញពីព្រៃទេ។ នេះជាឈើផ្ទះដែលគាត់រើដើម្បីយកទៅធ្វើថ្មីម្ដងទៀត។ អ៊ីចឹងវាមិនមានអីលក្ខណៈឲ្យពួកគាត់ខុសទេ។ បើសិនជាមានការទារប្រាក់គឺសមត្ថកិច្ចគឺគាត់ខុសវិញ»។
កន្លងទៅ លោកនាយករដ្ឋមន្ត្រី ហ៊ុន សែន បានណែនាំដោយហាមមិនឲ្យមានកុងត្រូលជជុះខុសច្បាប់តាមផ្លូវស្ទាក់ឃាត់រថយន្តពលរដ្ឋទារលុយដែលប៉ះពាល់ដល់ជីវភាពពលរដ្ឋនោះឡើយ៕
No comments:
Post a Comment