យោបល់បន្ថែម រឿងផែនទីនិងខ្សែព្រំដែនខ្មែរ-យួន

សំណេរនេះសំខាន់ ហើយសូមជូនចំពោះសម្តេចនាយករដ្ឋមន្ត្រីខ្មែរផងដែរ។

ចំពោះខ្មែរដែលមានកាតព្វកិច្ច ក្នុងការបំភ្លឺរឿងនេះ គួរចូលមកជួយបំភ្លឺ ដើម្បី(បញ្ចប់)ជម្លោះ ដ៏វែងឆ្ងាយ ដដែលៗនេះ។
អស់លោក លោកស្រី(មិនគួរ) នៅស្ងាត់ស្ងៀមឈឹងដូច្នោះទេ ព្រោះថារឿងនេះ ជារឿង(ងាយស្រួល) នឹងពន្យល់។ខ្មែរគួរ
ចៀសវាង កុំបណ្តាលឱ្យរឿងងាយស្រួល ហើយមិនពិបាកនឹងដោះស្រាយសោះនោះ ឱ្យក្លាយជារឿងពិបាក សាំញ៉ាំទៅ
វិញ។ ម៉េចបានជាថា វាជារឿងងាយស្រួល នឹងដោះស្រាយ? ព្រោះថា អ្នកណាកាន់ការងារហ្នឹងគឺមានចំណេះដឹងច្បាស់
លាស់គ្រប់គ្រាន់ ហើយក្នុងបញ្ហានេះ(គ្មានចំណុចអ្វី)ដែលខ្លួន(មិនអាច)ពន្យល់ដោះស្រាយសោះនោះទេ... មិនថាអ៊ីចឹង?

ដូច្នេះសូមធ្វើតាមវិធីមាន(ពីរ)ជំហាននេះ។ ជំហានទីមួយ៖

អ្នកមុខអ្នកការផ្នែកខាងព្រំដែន មានលោក ស៊ានប៉េងសែនៅបារាំង លោកវ៉ាគឹមហុង លោកសុខអាន,  ជាអ្នកបកស្រាយ
រឿងសន្ធិសញ្ញាបំពេញបន្ថែមរវាងខ្មែរនិងយួន, លោកសុខទូច អ្នកស្រីកុយពិសី ឬខ្មែរដទៃដែលពាក់ព័ន្ធ, បូកទាំងលោក
(អ៊ុំសំអាន) ដែលកំពុងទទួលទោសទណ្ឌដោយសាររឿងនេះនោះ, ហើយបាននិងកំពុងធ្វើការ ក្នុងបញ្ហាបោះបង្គោលខ្សែ
ព្រំដែនខ្មែរ-យួន  គួរខិតខំធ្វើការហ្នឹង ហើយឆ្លៀតឱកាសគិតគូរនិងសរសេរផ្សព្វផ្សាយពន្យល់រឿងនេះ ពីមួយចំណុចទៅ
មួយចំណុច ឱ្យបានច្បាស់លាស់ ថាតើហេតុអ្វីបានជាការប្រើប្រាស់ ផែនទីយូធីអឹមខ្នាត១លើ៥០ពាន់ ជំនួសផែនទីបោន
ខ្នាត១ លើ១០០ពាន់ នឹង(មិន)បណ្តាលឱ្យខូចខាតទឹកដីខ្មែរទៅយួន ដូចដែលខ្មែររាល់គ្នា កំពុងព្រួយបារម្មណ៍នោះទេ។

សូមពន្យល់ឱ្យច្បាស់ថា តើផែនទីបោននិងផែនទីយូធីអឹម គឺដូចគ្នាឬខុសគ្នាយ៉ាងណា ហើយហេតុអ្វីបានជាយើង(ត្រូវតែ)
ជ្រើសរើសយកផែនទីយូធីអឹម ដែលខុសពីរដ្ឋធម្មនុញ្ញខ្មែរ មកប្រើប្រាស់ទៅវិញ?

វាគ្មានអីពិបាកទាល់តែសោះ បើយើងកំពុងធ្វើការមួយហ្នឹង បានសេចក្តីថាយើងដឹងយល់ច្បាស់ក្រឡែត គ្រប់ចំណុច នៃ
កិច្ចការហ្នឹង។ បើអ្នកកាន់ការខាងខ្សែព្រំដែន(មិនដឹងមិនយល់)ច្បាស់លាស់ ប្រាកដទេនោះ សូមសារភាពក្នុងចិត្ត ហើយ
សារភាពជាចំហរភ្លាមទៅថាខ្លួនមិនសូវយល់ច្បាស់ប៉ុន្មានដែរ។  បន្ទាប់មកគឺជំហានទីពីរ ដែលក្នុងការគិតគូរជាដំបូង ខ្ញុំ
យល់ថាវាក៏មិនពិបាកសោះដែរ...

គឺថា បារាំង, ឬជនជាតិផ្សេង, ដែលជាអ្នកគូរវាសផែនទីបោន និងផែនទីយូធីអឹម ពិតជាមានការដឹងយល់រឿងនេះ ច្បាស់
ដូចថ្ងៃ។ ខ្មែរនឹងសួរនាំរៀនសូត្រពីមនុស្សដែលគូរវាសផែនទីទាំងនេះ។ គេនឹងពន្យល់គ្រប់ចំណុចដែលយើងចង់ដឹងចង់
យល់។ សួរគេពីទម្រង់ដែលខុសគ្នារវាងផែនទីបោនខ្នាត១លើ១០០ពាន់និងផែនទីយូធីអឹមខ្នាត១លើ៥០ពាន់។ សួរគេ
ដោយចំ នូវចំណុចសំខាន់ដែលថា តើការប្រើផែនទីយូធីអឹមហ្នឹង នឹងមានផល(អវិជ្ជមាន)ក្នុងបោះខ្សែព្រំដែនដែរឬទេ? គេ
នឹងឆ្លើយបានភ្លាមៗចំពោះសំនួរទាំងនេះ ព្រោះគេជាអ្នកគូរវាសផែនទីទាំងពីរ ហើយគេដឹងយល់កិច្ចការទាំងហ្នឹង។

លោកសមរង្ស៊ីដែលកំពុងស្ថិតនៅក្នុងប្រទេសបារាំង ជាមួយលោកស៊ានប៉េងសែ ផងដែរនោះ គួរឆ្លៀតពេលជួបប្រជុំនិង
សន្ទនាជាមួយគ្នា សុំយោបល់ច្បាស់លាស់ពីលោកស៊ានប៉េងសែ ថាតើវាមានការខុសត្រូវយ៉ាងណា រវាងផែនទីបោននិង
ផែនទីយូធីអឹម។ ក៏សុំឱ្យលោកពន្យល់ដោយ(ក្បោះក្បាយ)ផងដែរថា តើការប្រើផែនទីយូធីអឹម (នឹង)បណ្តាលឱ្យខ្មែរត្រូវ
បាត់ទឹកដីទៅយួនឬទេ ហើយដោយព្រោះហេតុអ្វី? សូមចៀសវាងកុំនិយាយព្រាវៗស្មានៗ មិនប្រាកដប្រជាច្បាស់លាស់
ព្រោះវានឹងគ្មានតម្លៃអ្វីទាំងអស់ ចំពោះភាគីទាំងសងខាង។ សូមប្រកាន់យកភាពជំនាញការទើបគេអាចទទួលបាន។

ខ្មែរណាដែលមិនទាំងចេះសួរនាំ រៀនសូត្ររឿងនេះផងនោះ សូមឱ្យមានចិត្តក្លាហាន ដកឃ្លាខ្លួនចេញឱ្យឆ្ងាយពីកិច្ចការ
នេះ ទុកកន្លែងឱ្យអ្នកដែលមានលទ្ធភាពខ្ពស់ជាងខ្លួន ចូលធ្វើការនេះ។ នេះជាកិច្ចការសំខាន់ធំដុំ ដែលខ្មែរ(ចាំបាច់ត្រូវតែ
ចៀសវាង "កុំ"ធ្វើការនេះដោយឆិនឆៃជាដាច់ខាត) ដើម្បីកុំឱ្យខាតបង់ទឹកដី ដែលនឹងធ្វើឱ្យរាស្ត្រក្តៅក្រហាយ ហើយគូរ
វិវាទ គេមើលឃើញថាខ្មែរមានបញ្ញាអន់ ដែលនឹងជួយកម្លាឱ្យគេមានទឹកចិត្តលោភលន់ រិះរកវិធីប្រវ័ញ្ចជាបន្តបន្ទាប់។

លោកនិងលោកស្រី ដែលកាន់កាតព្វកិច្ច ខាងការដោះស្រាយ បញ្ហាព្រំដែន បានត្រូវពលរដ្ឋខ្មែរ ទូទាំងប្រទេស និងក្រៅ
ស្រុក មានជំនឿនិងទំនុកចិត្ត ថាអស់លោកពិតជាមានចំណេះ និងការដឹងយល់ជាក់លាក់ ក្នុងការប្រើផែនទីដើម្បីកំណត់
ខ្សែព្រំដែនខ្មែរ និងប្រទេស ក្បែរខាង។ ហាមផ្តាច់ កុំធ្វើការក្នុងរឿងនេះដោយ(ឆិនឆៃ)ដោយខុសឆ្គង។ គឺថា បើលោកអ្នក
យល់ដែរ (តែ)យល់មិនសូវច្បាស់ ក្នុងការមើលផែនទី ដើម្បីឈានទៅដល់ការបោះបង្គោលខ្សែព្រំដែនទេនោះ សូមហាម
ផ្តាច់(កុំ)នៅលាក់ពុត ធ្វើជាអ្នកចេះ ចំពោះកិច្ចការដែលខ្លួន ចេះយល់តិចតួចមិនប្រាកដប្រជា មួយរយភាគរយ។ សូមឱ្យ
មានចិត្តសឿងក្លាហាន កុំខ្លាចនឹងសារភាព ចំពោះសម្បជញ្ញៈខ្លួនឯង ហើយលាចេញពីកិច្ចការដ៏សំខាន់នេះ។

រឿងកំណត់ខ្សែព្រំដែនជារឿងធំ ដែលគេ(មិនអាច)ទទួលយកបាន នូវលទ្ធផលនៃកិច្ចការដែលគេធ្វើដោយឆ្កុយៗ ដោយ
ចរិតឆិនឆៃសោះឡើយ។ ព្រោះវាជាកិច្ចការដែលសាំញ៉ាំហើយពិបាក គេនឹងមានពេលធ្វើតែមួយដងដើម្បីសម្រេចកិច្ចការ
នេះ ដោយល្អ អាចទទួលបានពីសំណាក់ភាគីទាំងសងខាង គឺខ្មែរនិងយួន។ យើងមិនចង់បានទ្រព្យសម្បត្តិគេ ហើយគេក៏
មិនត្រូវចង់បានទ្រព្យសម្បត្តិយើងសោះដែរ ព្រោះយើងរាល់គ្នាចង់បានសេចក្តីសុខ ក្នុងចិត្តក្នុងអារម្មណ៍ដូចគ្នា៕៚