 |
| សាលាដំបូងខេត្តកំពត ស្ថិតក្រុងទីក្រុងកំពត។ រូបថតថ្ងៃទី២៥ មករា ឆ្នាំ២០១៦ RFA/Yang Chandara |
ជនសង្ស័យឈ្មោះ អ៊ុំ រស្មី ដែលបានវាយសម្លាប់ប្រពន្ធ និងកូនតូចរបស់ខ្លួនអាយុ ២ឆ្នាំ ត្រូវបានសមត្ថកិច្ចបញ្ជូនទៅកាន់សាលាដំបូងខេត្តកំពត ហើយនៅរសៀលថ្ងៃទី២០ ខែធ្នូ ដើម្បីចាត់ការបន្តតាមផ្លូវច្បាប់។ ការបញ្ជូនជនសង្ស័យជាឃាតកសម្លាប់ភរិយារបស់ខ្លួនរូបនេះទៅតុលាការ ក្រោយពេលសមត្ថកិច្ចបានតាមចាប់ខ្លួនបានកាលពីថ្ងៃទី១៩ ធ្នូ នៅក្រុងព្រះសីហនុ។
ព្រះរាជអាជ្ញារង និងជាអ្នកនាំពាក្យសាលាដំបូងខេត្តកំពត លោក ខាន់ សុផល ឲ្យអាស៊ីសេរីដឹងនៅរសៀលថ្ងៃទី២០ ខែធ្នូ ថា តំណាងអយ្យការបានសម្រេចចោទប្រកាន់ឈ្មោះ អ៊ុំ រស្មី ពីបទឃាតកម្មគិតទុកជាមុន តាមមាត្រា២០០ នៃក្រមព្រហ្មទណ្ឌ។ ជនជាប់ចោទ ត្រូវបានឃុំខ្លួនជាបណ្ដោះអាសន្ននៅពន្ធនាគារខេត្តកំពត។
កាលពីម៉ោង ២ទៀបភ្លឺថ្ងៃទី១៩ ខែធ្នូ មានករណីឃាតកម្មមួយបានកើតឡើងនៅភូមិទ្វីខាងជើង សង្កាត់អណ្តូងខ្មែរ ក្រុងកំពត បង្កឡើងដោយបុរសម្នាក់ឈ្មោះ អ៊ុំ រស្មី ដែលជាស្មៀនឃុំកោះតូច ស្រុកទឹកឈូ ខេត្តកំពត ដោយបុរសរូបនេះបានវាយប្រពន្ធឈ្មោះ ម៉ក់ សារ៉ាយ អាយុ ២៤ឆ្នាំ និងកូនប្រុសអាយុ ២ឆ្នាំម្នាក់ឈ្មោះ ថា រដ្ឋពិសិដ្ឋ នឹងចបកាប់បណ្ដាលឲ្យស្លាប់ភ្លាមៗនៅនឹងកន្លែង។
ប្រធានការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តកំពត លោក គង់ សុខន បញ្ជាក់ថា ជនសង្ស័យបានសារភាពប្រាប់សមត្ថកិច្ចថា ខ្លួនពិតជាបានវាយសម្លាប់ប្រពន្ធ និងកូនរបស់ខ្លួនមែន ដោយសារតែខឹងប្រពន្ធមិនយកថ្នាំឲ្យលេប។ លោក គង់ សុខន បញ្ជាក់ទៀតថា ជនសង្ស័យ គឺជាមនុស្សដែលធ្លាប់ប្រើប្រាស់គ្រឿងញៀន និងមានជំងឺសរសៃប្រសាទ៖ «ក្នុងចន្លោះម៉ោង ៧ ឬ ៨យប់ (ថ្ងៃទី១៨) គាត់ (អ៊ុំ រស្មី) ផឹកស្រាបៀជក់បារី ហើយគាត់ហ្នឹងជាមនុស្សដែលមានជំងឺសរសៃប្រសាទ។ អ៊ីចឹងដល់ម៉ោង ២ទៀបភ្លឺ (ថ្ងៃទី១៩) ជំងឺគាត់រើឡើង។ អ៊ីចឹងគាត់បានឲ្យប្រពន្ធទៅយកថ្នាំយកថ្នាំសរសៃប្រសាទ តែប្រពន្ធរបស់គាត់អត់ឡើង (អត់ក្រោក) អ៊ីចឹងគាត់ក៏ខឹង ហើយក៏ឡើងទៅយកចប (ចបកាប់) ហើយក៏ឈានដល់វាយសម្លាប់តែម្តង។ ចុះចំណែកកូនតូចរបស់គាត់វិញ? បើតាមចម្លើយជនសង្ស័យគ្រាន់តែបញ្ជាក់ថា យំ។ អាចថាម្តាយពរត់ទៅជាមួយ ពរត់ទៅជាមួយ! ដល់ពេលហ្នឹងវាយំខ្លាំង ជនសង្ស័យក៏វាយបន្ថែមតែម្តង»។
បុរសម្នាក់ឈ្មោះ លៀង ឌឿន ដែលត្រូវជាសាច់ញាតិជនសង្ស័យ បញ្ជាក់ថា ឈ្មោះ អ៊ុំ រស្មី ជាមនុស្សសេពគ្រឿងស្រវឹង និងគ្រឿងញៀន ព្រមទាំងមានជំងឺសរសៃប្រសាទប្រចាំកាយផង។ លោកថា ឈ្មោះ អ៊ុំ រស្មី ធ្លាប់បានធ្វើអត្តឃាតខ្លួនឯងកាលពីប៉ុន្មានខែមុននេះ តែត្រូវបានក្រុមគ្រួសារជួយសង្គ្រោះទាន់។ ក្រោយពេលជាសះស្បើយ ក្រុមគ្រួសារក៏បានបញ្ជូនជននោះទៅមណ្ឌលកែប្រែ ដើម្បីបន្សាបគ្រឿងញៀនបានរយៈពេលជាង ២ខែ មុនពេលយកបុរសរូបនោះត្រឡប់មកផ្ទះវិញ កាលពីខែវិច្ឆិកា កន្លងទៅ។ លោក លៀង ឌឿន បញ្ជាក់ថា ក្រោយឃាតកម្ម ក្រុមគ្រួសាររបស់លោក បានយកកូនប្រុសម្នាក់ទៀតរបស់ជនសង្ស័យ និងភរិយាដែលបានស្លាប់នោះ យកមកចិញ្ចឹម។ កុមារាម្នាក់នោះមានឈ្មោះ ថា រដ្ឋធិបតី អាយុ ៤ឆ្នាំ។
មន្ត្រីសម្របសម្រួលសមាគមអាដហុក (ADHOC) ខេត្តកំពត អ្នកស្រី អ៊ូច បូ ដែលបានចុះអង្កេតរឿងនេះផ្ទាល់ថ្លែងថា ករណីនេះ គឺជាអំពើហិង្សាក្នុងគ្រួសារដ៏ធ្ងន់ធ្ងរ ដែលអាជ្ញាធរត្រូវអនុវត្តតាមច្បាប់ ដោយគ្មានការលើកលែង។ ក្រៅពីនេះ អ្នកស្រីក៏អំពាវនាវដល់អាជ្ញាធរឲ្យចុះអប់រំផ្សព្វផ្សាយអំពីច្បាប់ស្ដីពីការទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះ ឲ្យបានទូលំទូលាយនៅតាមមូលដ្ឋាន ដើម្បីឲ្យពលរដ្ឋទទួលបានចំណេះដឹង និងឈានដល់ការរួមគ្នាលុបបំបាត់រាល់ទម្រង់នៃអំពើហិង្សាក្នុងគ្រួសារ៖ «សុំកុំឲ្យមាននិទ្ទណ្ឌភាពចំពោះអ្នកដែលបានប្រព្រឹត្តក្នុងករណីអំពើហិង្សាក្នុងគ្រួសារ»។
មាត្រា២០០ នៃក្រមព្រហ្មទណ្ឌ ចែងពីឃាតកម្មគិតទុកជាមុន ដែលជាអំពើសម្លាប់មនុស្សដោយគិតទុកជាមុន ឬការពួនស្ទាក់ ហើយជនប្រព្រឹត្តិ ត្រូវផ្ដន្ទាទោសដាក់ពន្ធនាគារអស់មួយជីវិត៕
No comments:
Post a Comment