ភ្នំពេញៈ ខណៈ លោក សម រង្ស៊ី មេដឹកនាំគណបក្សប្រឆាំងមានជំនឿលើការជំរុញនាពេលថ្មីៗរបស់លោកនាយករដ្ឋមន្ត្រី ហ៊ុន សែន ដើម្បីឲ្យមានការគូសផែនទីឡើងវិញនៃព្រំដែន កម្ពុជា‑វៀតណាម មកខ្នាត ១/៥០ ០០០ និងតាមផែនទី UTM ថា នឹងមិនបំពានមាត្រារដ្ឋធម្មនុញ្ញនិងមិនមានការធ្វើវិសោធនកម្មច្បាប់កំពូលនោះ ប៉ុន្តែ មានមន្ត្រីផ្សេងមានការយល់ឃើញខុសពីនោះដោយបារម្ភខ្លាចមានការបាត់ដី។
លោក សម រង្ស៊ី នៅសប្តាហ៍នេះបានថ្លែងថាលោកគាំទ្រការជំរុញរបស់លោកហ៊ុន សែន ឲ្យបារាំងជួយកម្ពុជា និងវៀតណាមផ្ទេរពីផែនទីខ្នាត ១/១០០ ០០០ ដែលបារាំងជាអ្នកគូរឲ្យទៅខ្នាត ១/៥០ ០០០ វិញ ហើយកាលពីយប់ថ្ងៃអង្គារលោកបានថ្លែងនៅក្នុងវិទ្យុអាស៊ីសេរីថា ផែនទីថ្មីនឹងមិនបំពានមាត្រាសំខាន់មួយក្នុងរដ្ឋធម្មនុញ្ញទេ។
លោក សម រង្ស៊ី បានលើកឡើងក្នុងបទសម្ភាសតាមវិទ្យុថា៖«រដ្ឋធម្មនុញ្ញមិនត្រូវការវិសោធនកម្មដើម្បីអនុញ្ញាតឲ្យមានការប្រើប្រាស់ផែនទី UTM ខ្នាត ១/៥០ ០០០ ទេ។ វាគ្រាន់តែជាឧបករណ៍បន្ថែមមួយដើម្បីធ្វើឲ្យផែនទីនោះ មានលក្ខណៈលម្អិតនិងសុក្រឹតជាងមុន។ មិនមានការផ្លាស់ប្តូរខ្លឹមសារនៃផែនទី»។
លោកបានបន្តថា៖ «អនុញ្ញាតឲ្យខ្ញុំបំភ្លឺ៖ យើងសូមឲ្យបារាំងជួយផ្ទេរខ្នាត ប៉ុន្តែមិនមែនប្រព័ន្ធទេ។ យើងចង់ឲ្យខ្នាត ១/១០០ ០០០ ផ្ទេរទៅខ្នាត ១/៥០ ០០០»។
«ផែនទីក្រោយ មានព័ត៌មានលម្អិតជាងមុន ដែលអាចធ្វើឲ្យការងារបោះបង្គោលព្រំដែនងាយស្រួលជាងមុននិងសុក្រឹតជាងមុន»។
មាត្រា២នៃរដ្ឋធម្មនុញ្ញថ្លែងថា៖«បូរណភាពទឹកដីរបស់ព្រះរាជាណាចក្រកម្ពុជា មិនអាចរំលោភបានដាច់ខាត ក្នុងព្រំដែនរបស់ខ្លួន ដែលមានកំណត់ក្នុងផែនទីខ្នាត ១/១០០ ០០០ ធ្វើនៅចន្លោះឆ្នាំ ១៩៣៣‑១៩៥៣ ហើយដែលត្រូវបានទទួលស្គាល់ជាអន្តរជាតិចន្លោះឆ្នាំ១៩៦៣‑១៩៦៩»។
បញ្ហាព្រំដែនគឺជាបញ្ហាចម្រូងចម្រាសជាយូរមកហើយសម្រាប់រដ្ឋាភិបាល ហើយគណបក្សប្រឆាំងរបស់លោក សម រង្ស៊ី កាលពីឆ្នាំ ២០១៥ បានធ្វើយុទ្ធនាការមួយដោយចោទប្រកាន់រដ្ឋាភិបាលថាប្រគល់ដីឲ្យវៀតណាមតាមរយៈការប្រើប្រាស់ផែនទីដែលមិនមែនជាផែនទីខ្នាត ១/១០០ ០០០។
លោក ថាច់ សេដ្ឋា អតីតសមាជិកព្រឹទ្ធសភា និងជាមន្ត្រីប្រឆាំងល្បីឈ្មោះម្នាក់ ដែលជាខ្មែរក្រោម បានថ្លែងថា លោកភ័យខា្លចបាត់បង់ដីពីការផ្លាស់ប្តូរខ្នាតផែនទីពី Bonne ទៅវិធីសាស្ត្រ UTM។
លោក សេដ្ឋា ថ្លែងថា៖ «រដ្ឋធម្មនុញ្ញកម្ពុជាកំណត់យកខ្នាត ១/១០០ ០០០។ ប្រសិនបើយើងចង់ឲ្យត្រូវយើងត្រូវតែគូរវាទៅតាមខ្នាតនេះ»។ លោកពន្យល់ថា ការប្ដូរផែនទីពី Bonne projection ទៅ UTM នឹងផ្លាស់ប្តូរខ្លឹមសារនៃផែនទី។
ដោយគាំទ្រទស្សនៈលោក សេដ្ឋា អតីតឧបនាយករដ្ឋមន្ត្រី លឺ ឡាយស្រេង ដែលបានបម្រើគណបក្សរាជានិយមហ្វ៊ុនស៊ិនប៉ិចបានថ្លែងថា ការប្រើប្រាស់ផែនទីខ្នាត ១/៥០ ០០០ គឺខុសពីផែនទី Bonne ហើយនឹងផ្ទុយពីរដ្ឋធម្មនុញ្ញ។
លោក ឡាយស្រេង បានលើកពីមាត្រា២ថា៖«យើងត្រូវតែធ្វើវិសោធនកម្មរដ្ឋធម្មនុញ្ញជាមុនសិន»។«កុំអនុញ្ញាតឲ្យលោកនាយករដ្ឋមន្ត្រីធ្វើផ្ទុយពីរដ្ឋធម្មនុញ្ញ»។
លោក មុត ចន្ថា ទីប្រឹក្សារបស់លោក កឹម សុខា អនុប្រធានគណបក្សសង្គ្រោះជាតិ នៅក្នុងហ្វេសប៊ុកលោកកាលពីថ្ងៃអាទិត្យក៏ទំនងជាចោទសួរអំពីចំណេះ ដឹងនយោបាយចំពោះការគាំទ្រផែនទីផ្សេងគ្នា ដោយលោកថ្លែងថាសត្រូវមួយទៀតរបស់ ហ៊ុន សែន បានដួលតាមរយៈការយល់ព្រមតាមគោលនយោបាយព្រំដែនរបស់គណបក្សប្រជាជនកម្ពុជា។
លោក ចន្ថា ដែលធ្លាប់ជាទីប្រឹក្សាជាន់ខ្ពស់របស់ ព្រះអង្គម្ចាស់ នរោត្តម រណឫទ្ធិ នៅចុងទសវត្សរ៍ឆ្នាំ២០០០បានបញ្ជាក់ថា៖ «ព្រះអង្គម្ចាស់ នរោត្តម រណឫទ្ធិ ត្រូវបានរិះគន់យ៉ាងខ្លាំងថាជាអ្នកដែលបានផ្តល់នូវជីវិតវិញដល់សន្ធិសញ្ញាព្រំដែនឆ្នាំ១៩៨៥ ដោយសារហ្វ៊ុនស៊ិឋនប៉ិចបានលើកដៃបោះឆ្នោតគាំទ្រសន្ធិសញ្ញាព្រំដែនបំពេញបន្ថែម ឆ្នាំ២០០៥»។«ខ្ញុំមិនយល់បញ្ហាផែនទីព្រំដែន ប៉ុន្តែខ្ញុំស្រឡាញ់ប្រទេសរបស់ខ្ញុំ ហើយខ្ញុំនៅតែមានឆន្ទៈការពារបូរណភាពទឹកដីរបស់កម្ពុជាទៅតាមផែនទីខ្នាត ១/១០០ ០០០»។
លោក ចន្ថា មិនអាចទាក់ទងសុំអត្ថាធិប្បាយបានកាលពីម្សិលមិញ។
កញ្ញា កឹម មនោវិទ្យា ដែលជាកូនស្រីបងបង្អស់របស់លោក កឹម សុខា និងជាអនុប្រធានកិច្ចការសាធារណៈបានបដិសេធមិនធ្វើអត្ថាធិប្បាយលើបញ្ហានេះ និងបានបង្វែរឲ្យអ្នកកាសែតទៅរកអត្ថាធិប្បាយរបស់លោក សេដ្ឋា និងព្រះអង្គម្ចាស់ ធម្មិកោ។
លោក សម រង្ស៊ី មិនបានឆ្លើយតបនឹងសំណើសុំអត្ថាធិប្បាយកាលពីម្សិលមិញទេ៕ PS
No comments:
Post a Comment