ក្រុមគ្រូបង្រៀននៅវិទ្យាល័យសិរីសោភ័ណ ខេត្តបន្ទាយមានជ័យ រិះគន់ប្រធានមន្ត្រីអប់រំយុវជន និងកីឡាខេត្តថា យឺតយ៉ាវក្នុងការចាត់វិធានការដកនាយិកាវិទ្យាល័យនេះចេញពីតំណែង។ នាយិកាវិទ្យាល័យសិរីសោភ័ណ ត្រូវបានក្រុមគ្រូបង្រៀនផ្ដិតមេដៃដកពីតំណែងពីបទប្រព្រឹត្តអំពើពុករលួយ និងប្រើពាក្យអសុរោះទៅលើពួកគាត់។ ប៉ុន្តែប្រធានមន្ទីរអប់រំ ខេត្តបន្ទាយមានជ័យ បញ្ជាក់ថា អាជ្ញាធរខេត្តកំពុងដំណើរការស៊ើបអង្កេតលើការងារនេះ។
ក្រុមគ្រូបង្រៀននៅវិទ្យាល័យសិរីសោភ័ណ បន្តជំរុញឲ្យប្រធានមន្ទីរអប់រំយុវជន និងកីឡា ខេត្តបន្ទាយមានជ័យ ចាត់វិធានការតាមសំណើរបស់ពួកគាត់ឲ្យបានឆាប់រហ័ស។
លោកគ្រូ អ្នកគ្រូ មួយចំនួននៅវិទ្យាល័យសិរីសោភ័ណ ឲ្យដឹងនៅថ្ងៃទី១៥ ខែធ្នូ ថា ពួកគាត់ផ្ដិតស្នាមមេដៃបានចំនួន ៤៥នាក់ដាក់ទៅប្រធានមន្ទីរអប់រំយុវជន និងកីឡាខេត្តបន្ទាយមានជ័យ ស្នើដកនាយិកាវិទ្យាល័យសិរីសោភ័ណ គឺអ្នកស្រី ណាត ស៊ីឡាយ ចេញពីតំណែង ជិតមួយខែ តែពុំទាន់មានដំណោះស្រាយនៅឡើយ។ ក្រុមគ្រូបង្រៀនអះអាងថា ពួកគាត់គ្មានកម្លាំងចិត្តបង្រៀនសិស្សនោះទេ ប្រសិនបើក្រសួងអប់រំ មិនដកនាយិការូបនេះចេញពីតំណែងនោះ៖ «បើទុកគាត់នៅ ឬពន្យារពេលនៃការដោះស្រាយគឺការបង្រៀនមិនបានល្អទេ ព្រោះយើងនៅតែគិត និងខ្វល់ខ្វាយចំពោះគាត់ដដែល។ ខ្ញុំអន់ចិត្តខ្លាំងណាស់ដែលរំពឹងលើមន្ទីរ និងក្រសួងអប់រំជួយពន្លឿនការងារនេះទុកឲ្យអូសបន្លាយពេលយូរ។ ខ្ញុំឲ្យដកចេញតែម្ដង គឺយើងអត់អាចធ្វើការជាមួយគាត់បានទេ ព្រោះខ្ញុំជួបការលំបាកជាង ១០ឆ្នាំហើយ គឺគាត់អត់មានកែប្រែអីសោះ»។
ឆ្លើយតបនឹងបញ្ហានេះ ប្រធានមន្ទីរអប់រំយុវជន និងកីឡា ខេត្តបន្ទាយមានជ័យ លោក ស្ដើង តុងហឹង មានប្រសាសន៍ថា ខាងមន្ទីរបានបញ្ជូនសំណុំរឿងទៅសាលាខេត្តបន្ទាយមានជ័យ ដើម្បីស៊ើបអង្កេតលើបញ្ហានេះរួចមកហើយ៖ «សាលាខេត្តគេកំពុងតែធ្វើរបាយការណ៍ជូនទៅថ្នាក់លើហើយ។ គេមិនមែនទុករឿងចោលមិនធ្វើនោះទេ ព្រោះយឺតយ៉ាវដោយសារការងារគេមានច្រើនត្រូវដោះស្រាយ»។
ទោះជាយ៉ាងនេះក្ដី ក្រុមគ្រូបង្រៀនលើកឡើងថា ខាងមន្ទីរ និងអាជ្ញាធរខេត្ត មានវិធានការយឺតយ៉ាវដោយសារនាយិការូបនេះមានសែក្រាស គឺបងប្រុសឈ្មោះ ណាត ប៊ុនរឿន ធ្វើជារដ្ឋលេខាធិការក្រសួងអប់រំយុវជន និងកីឡា។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា បើទោះមានសែធំយ៉ាងនេះក៏ដោយ ប្រសិនបើរកឃើញថា នាយិការូបនេះមានកំហុសប្រាកដមែន គឺខាងក្រសួងអប់រំ និងអាជ្ញាធរខេត្តបន្ទាយមានជ័យ ត្រូវពន្លឿនដោះស្រាយបញ្ហានេះជូនគ្រូបង្រៀនឲ្យបានឆាប់រហ័ស៖ «ព្រោះថាមានការលេចឡើងនូវបទល្មើសនៅក្នុងហើយ ដើម្បីស៊ើបអង្កេតដាក់បន្ទុក និងដាក់ទោសទៅលើជនដែនប្រព្រឹត្ត។ បើសិនតែការប្ដឹងទៅមិនមានការដោះស្រាយ អ៊ីចឹងហាក់ដូចជាប្រទេសលែងមានច្បាប់ទម្លាប់ហើយ»។
នាយិកាវិទ្យាល័យសិរីសោភ័ណ អ្នកស្រី ណាត ស៊ីឡាយ ត្រូវបានក្រុមគ្រូបង្រៀនចោទប្រកាន់ថា កិបកេងប្រាក់ ភី.ប៊ី (P.B) ដែលជាថវិការបស់ក្រសួងអប់រំ ប្រគល់ទៅឲ្យសាលាសម្រាប់អភិវឌ្ឍន៍ប្រចាំឆ្នាំ និងថវិកាសម្រាប់អភិវឌ្ឍន៍របស់សាលាមួយចំនួនទៀត។ ក្រៅពីនេះ គ្រូបង្រៀនអះអាងថា នាយិការូបនេះ និយាយគំរោះគំរើយ និងជេរដាក់បណ្ដាសាដល់ពួកគាត់ជាប្រចាំ ដែលមិនសមជាអ្នកគ្រប់គ្រងក្នុងវិស័យអប់រំឡើយ។ ប៉ុន្តែអ្នកស្រី ណាក ស៊ីឡាយ បដិសេធចំពោះការចោទប្រកាន់នេះថា ជាការមួលបង្កាច់គ្មានការពិតរបស់ក្រុមគ្រូបង្រៀនមួយក្ដាប់តូច ដើម្បីរកលេសចង់ទម្លាក់អ្នកស្រីចេញពីតំណែង។
វិទ្យាល័យមួយនេះមានសិស្សកំពុងសិក្សាជាង ១ពាន់នាក់ និងមានគ្រូបង្រៀនចំនួន ៦៧នាក់។ ក្នុងចំណោមនោះមានគ្រូបង្រៀនចំនួន ៤៥នាក់ បានផ្ដិតស្នាមមេដៃស្នើដកនាយិកាចេញពីតំណែង។ក្រុមគ្រូបង្រៀនសង្កត់ធ្ងន់ថា ប្រសិនបើក្រសួងអប់រំ មិនដកនាយិកាពីចេញតំណែងទេ គឺពួកគាត់នឹងធ្វើកូដកម្មមិនចូលបង្រៀនសិស្សនៅក្នុងពេលឆាប់ៗ៕
No comments:
Post a Comment