សាលាក្រុងភ្នំពេញត្រៀមប្ដូរទីលានប្រជាធិបតេយ្យទៅទីតាំងថ្មីនៅពេលឆាប់ៗ ខាងមុខនេះ បន្ទាប់ពីទទួលបានគោលការណ៍សម្រេចពីក្រសួងមហាផ្ទៃ កាលពីដើមខែមករា។
អ្នកនាំពាក្យសាលារាជធានីភ្នំពេញ លោក ម៉េត មាសភក្ដី ឲ្យអាស៊ីសេរីដឹងនៅថ្ងៃទី១៧ មករា ថា មកដល់ពេលនេះសាលាក្រុងកំពុងសិក្សា និងរៀបចំលើដីទីតាំងថ្មីស្ថិតនៅសង្កាត់ឫស្សីកែវ ខណ្ឌឫស្សីកែវ ត្រង់ចំណុចសួនច្បារគីឡូម៉ែត្រលេខ៦ ឲ្យបានរួចរាល់ មុននឹងប្រកាសផ្លាស់ប្ដូរពីទីតាំងចាស់ជាផ្លូវការ។
លោក ម៉េត មាសភក្ដី បញ្ជាក់ថា ចំពោះទីតាំងថ្មីនេះ មានទំហំធំជាងទីតាំងចាស់រហូតដល់ពីរដង ដែលមានផ្ទៃដីជាង ២ម៉ឺនម៉ែត្រការ៉េ។
ចំពោះគម្រោងប្ដូរទីលានប្រជាធិបតេយ្យពីទីតាំងនៅក្បែរវត្តភ្នំ ដែលដាក់ឲ្យប្រើប្រាស់កាលពីឆ្នាំ២០១០នោះ ត្រូវបានសង្គមស៊ីវិលធ្វើការផ្នែកសិទ្ធិមនុស្ស យល់ថា រដ្ឋាភិបាលខ្លាចបាតុកម្ម។
កាលពីខែធ្នូ កន្លងទៅ លោកនាយករដ្ឋមន្ត្រី ហ៊ុន សែន បានប្រកាសថានឹងប្ដូរទីតាំងទីលានប្រជាធិបតេយ្យ ទៅដាក់នៅជាយក្រុងវិញ រួមនឹងឌឺដងថាគួរយកដាក់នៅមុខស្ថានទូតសហរដ្ឋអាមេរិកប្រចាំកម្ពុជា ដើម្បីយកទីតាំងចាស់សព្វថ្ងៃធ្វើជាកន្លែងពាណិជ្ជកម្ម និងសួនច្បារសាធារណៈ។
បច្ចុប្បន្នទីតាំងទីលានប្រជាធិបតេយ្យ ហ៊ុំព័ន្ធទៅដោយអគារខ្ពស់ធំៗ រួមនឹងការដាក់តាំងលក់រថយន្តមួយចំនួន ហើយកន្លងទៅថ្មីៗនេះ អាជ្ញាធររដ្ឋាភិបាល ហាក់រឹតត្បិតចំពោះសង្គមស៊ីវិលដែលស្នើសុំទីតាំងនេះ ធ្វើជាកន្លែងជួបប្រជុំបញ្ចេញមតិ។
ដោយឡែកកាលពីដើមឆ្នាំ២០១៤ ក្រោយមហាបាតុកម្មអហិង្សារបស់គណបក្សសង្គ្រោះជាតិ ត្រូវបានបង្ក្រាប រដ្ឋាភិបាលបានបិទទីតាំងនេះ ជាបណ្ដោះអាសន្ន រហូតដល់មានកិច្ចចរចាបញ្ចប់ជម្លោះនយោបាយ ២២ កក្កដា រវាងបក្សជាប់ឆ្នោតទាំងពីរ ទើបបើកទីតាំងនេះឲ្យប្រើប្រាស់ឡើងវិញ៕
No comments:
Post a Comment