 |
| ប្រធានាធិបតីប្រទេសសិង្ហបុរី លោក តូនី តាន់ កេងយាំ (Tony Tan Keng Yam) (ឆ្វេង) ជួបពិភាក្សាទ្វេភាគីជាមួយលោកនាយករដ្ឋមន្ត្រី ហ៊ុន សែន នៅវិមានសន្តិភាព រាជធានីភ្នំពេញ ថ្ងៃទី៩ ខែមករា ឆ្នាំ២០១៧។ Photo courtesy of PM Hun Sen Facebook's Page |
នៅថ្ងៃទី៩ មករា ប្រធានាធិបតីសិង្ហបុរី លោក តូនី តាន់ កេងយាំ (Tony Tan Keng Yam) បានចូលបង្គំគាល់ព្រះមហាក្សត្រកម្ពុជា សម្ដេចព្រះបរមនាថ នរោត្តម សីហមុនី និងសម្ដេចព្រះមហាក្សត្រី បន្ទាប់មកជួបពិភាក្សាទ្វេភាគីជាមួយលោកនាយករដ្ឋមន្ត្រី ហ៊ុន សែន។ ក្នុងដំណើរទស្សនកិច្ចរយៈពេល ៤ថ្ងៃនៅកម្ពុជា ពីថ្ងៃទី៨ ដល់ទី១១ មករា លោក តូនី តាន់ កេងយាំ និងលោក ហ៊ុន សែន ធ្វើអធិបតីក្នុងពិធីចុះហត្ថលេខាលើឯកសារមួយចំនួនទាក់ទងនឹងវិស័យអប់រំ និងសុខាភិបាល។
តើទំនាក់ទំនងកម្ពុជា-សិង្ហបុរី វិវឌ្ឍន៍យ៉ាងណាខ្លះ?
ដំណើរទស្សនកិច្ចរបស់លោក តូនី តាន់ កេងយាំ លើកទីមួយនៅកម្ពុជា ក្រោយពីកាន់តំណែងជាប្រធានាធិបតីសិង្ហបុរី នៅពេលនេះ កើតឡើងខណៈក្រុមសង្គមស៊ីវិលកម្ពុជា គ្រោងប្ដឹងរដ្ឋាភិបាលសិង្ហបុរី ពីបទនាំចូលខ្សាច់កម្ពុជា ដែលបំផ្លាញប្រព័ន្ធជីវចម្រុះ និងការរស់នៅរបស់ប្រជាពលរដ្ឋ។
មុនទស្សនកិច្ចរបស់ប្រធានាធិបតីសិង្ហបុរី មកកម្ពុជា នេះ រដ្ឋមន្ត្រីក្រសួងការពារជាតិកម្ពុជា លោក ទៀ បាញ់ ធ្លាប់ទៅទស្សនកិច្ចនៅសិង្ហបុរី កាលពីខែមិថុនា ឆ្នាំមុន គឺចូលរួមព្រឹត្តិការណ៍ «កិច្ចពិភាក្សាសាហ្គ្រីឡា (Shangri-La Dialogue) លើកទី១៥» ដែលជាជំនួបកំពូលផ្នែកសន្តិសុខសំខាន់មួយនៅតំបន់អាស៊ី។
ហើយកាលពីដើមឆ្នាំ២០១៦ រដ្ឋមន្ត្រីក្រសួងបរិស្ថានកម្ពុជា លោក សាយ សំអាល់ ក៏បានទស្សនកិច្ចនៅសិង្ហបុរី ក្នុងកម្មវិធី «ផ្លាស់ប្ដូរបទពិសោធន៍ លី ក្វាន់ យូ»។
បន្ថែមពីនេះ កាលពីឆ្នាំ២០១៥ លោកនាយករដ្ឋមន្ត្រី ហ៊ុន សែន បានទៅទស្សនកិច្ចប្រទេសសិង្ហបុរី ពីរដង។ នៅខែមីនា លោកបានអញ្ជើញទៅចូលរួមពិធីបុណ្យសពស្ថាបនិកប្រទេសសិង្ហបុរី លោក លី ក្វាន់ យូ ហើយនៅកន្លះឆ្នាំក្រោយមក គឺនៅខែសីហា លោកបានអញ្ជើញទៅសិង្ហបុរី ម្តងទៀតដើម្បីចូលរួមបុណ្យជាតិខួបទី៥០ នៃការបង្កើតប្រទេសសិង្ហបុរី។
កាលពីខែឧសភា ឆ្នាំ២០១៥ សមាជិកសភាសិង្ហបុរី លោក ហាលីម៉ះ យ៉ាក់កុប (Halimah Yacob) ធ្លាប់មកទស្សនកិច្ចនៅកម្ពុជា ៥ថ្ងៃ។
ក្រសួងការបរទេសសិង្ហបុរី អះអាងថា ទំនាក់ទំនងរវាងកម្ពុជា និងសិង្ហបុរី ដើរដោយរលូត ទាំងកម្រិតទ្វេភាគី តំបន់ និងពហុភាគី។
កាលពី ៥២ឆ្នាំមុន ពោលនៅឆ្នាំ១៩៦៥ សិង្ហបុរី បានប្រកាសឯករាជ្យពីម៉ាឡេស៊ី ហើយកម្ពុជា ជាប្រទេសមួយក្នុងចំណោមប្រទេសដទៃ ដែលប្រកាសទទួលស្គាល់ឯករាជ្យសិង្ហបុរី ដំបូងគេ។
ឯកអគ្គរដ្ឋទូតសិង្ហបុរី ប្រចាំកម្ពុជា កាលពីខែសីហា ឆ្នាំ២០១៦ បានហៅទំនាក់ទំនងទ្វេភាគីនេះថាល្អឥតខ្ចោះ។
សារព័ត៌មាន ឆេនណល ញូវ អេស៊ា (Channel News Asia) រាយការណ៍ថា ប្រធានាធិបតីសិង្ហបុរី លោក តូនី តាន់ កេងយាំ (Tony Tan Keng Yam) កាលពីថ្ងៃទី៨ មករា ក្នុងពេលជួបជាមួយប្រជាជនសិង្ហបុរី ដែលកំពុងរស់នៅកម្ពុជា បានថ្លែងថា សិង្ហបុរី ប្ដេជ្ញាពង្រឹងចំណងទាក់ទងជាមួយកម្ពុជា បន្ថែមទៀត។ លោកបន្តថា ចំណងទាក់ទងផ្នែកពាណិជ្ជកម្ម និងវិនិយោគរវាងប្រទេសទាំងពីរ មានសុខភាពល្អ ខណៈសិង្ហបុរី ជាដៃគូពាណិជ្ជកម្មធំលំដាប់ទី៨ របស់កម្ពុជា និងជាអ្នកបណ្ដាក់ទុនលំដាប់ទី៣ កាលពីឆ្នាំ២០១៦។
ទិន្នន័យរបស់ស្ថានទូតសិង្ហបុរី ប្រចាំកម្ពុជា បង្ហាញថា កាលពីឆ្នាំ២០១៥ ការផ្ដោះប្ដូរពាណិជ្ជកម្មរវាងប្រទេសទាំងពីរមានតម្លៃជាង ១.១០០លានដុល្លារសហរដ្ឋអាមេរិក ហើយគម្រោងវិនិយោគរបស់វិនិយោគិនសិង្ហបុរី តម្លៃសរុប ១០០លានដុល្លារ ត្រូវបានអនុម័តឲ្យរកស៊ីនៅកម្ពុជា។
ការបណ្ដាក់ទុនរបស់សិង្ហបុរី នៅកម្ពុជា មានច្រើនវិស័យ រាប់ចាប់ពីអចលនទ្រព្យ ហិរញ្ញវត្ថុ ថាមពល កសិកម្ម ការដឹកជញ្ជូន និងទំនិញប្រើប្រាស់ប្រចាំថ្ងៃ។ ហើយទំនាក់ទំនងពាណិជ្ជកម្មមួយទៀតដែលសាធារណជនកំពុងចាប់អារម្មណ៍ គឺការជួញដូរខ្សាច់។
ទិន្នន័យពាណិជ្ជកម្មរបស់អង្គការសហប្រជាជាតិ បានបង្ហាញថា សិង្ហបុរី បាននាំចូលខ្សាច់ពីកម្ពុជា ជាង ៧៣លានតោនក្នុងរយៈពេល ៨ឆ្នាំ ពីឆ្នាំ២០០៧ ដល់ឆ្នាំ២០១៥ តែតួលេខរបស់ក្រសួងរ៉ែ និងថាមពលកម្ពុជា វិញ ថាមានតែជាង ១៦លានតោនប៉ុណ្ណោះ។ តួលេខនេះ បើគិតជាទឹកប្រាក់ ខុសគ្នាជាង ៧០០លានដុល្លារអាមេរិក៕
No comments:
Post a Comment