 |
| ជនជាតិដើមភាគតិចកួយ លោក អ៊ុក ម៉ៅ ចង្អុលបង្ហាញតំបន់ព្រៃសហគមន៍ភ្នំជម្រកសត្វ ឋិតនៅភូមិឆ្វាំង ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង ដែលត្រូវបានគេកាប់ទន្ទ្រានយកដីកាលពីខែមេសា ឆ្នាំ២០១៦។ RFA/Men Sothyr |
ជនជាតិដើមភាគតិចកួយ រស់នៅឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង ដែលធ្លាប់ផ្តល់ព័ត៌មានពីការកាប់បំផ្លាញព្រៃឈើ និងភាពអសកម្មរបស់អាជ្ញាធរមូលដ្ឋានទៅប្រព័ន្ធផ្សព្វផ្សាយ ត្រូវមេប៉ុស្តិ៍រដ្ឋបាលឃុំសំអាង កោះហៅមកសួរនាំ និងបង្គាប់ឲ្យផ្តិចមេដៃ កាលពីថ្ងៃទី៨ ខែមករា។ មន្ត្រីឃ្លាំមើលសិទ្ធិមនុស្ស ចាត់ទុកករណីនេះជាការបំបាក់ស្មារតីដល់អ្នកគាំពារសម្បត្តិធម្មជាតិ និងគំរាមកំហែងសិទ្ធិជនជាតិដើមភាគតិច។
ជនជាតិដើមភាគតិចកួយ សម្តែងការមិនសប្បាយចិត្តចំពោះមេប៉ុស្តិ៍ឃុំសំអាង ថាបានកោះហៅលោកឲ្យស្រាយបំភ្លឺរឿងផ្តល់ព័ត៌មានដល់ប្រព័ន្ធផ្សព្វផ្សាយ ទាក់ទិនការទន្ទ្រានដីព្រៃសហគមន៍ភ្នំជម្រកសត្វ និងព្រៃត្រៀមបម្រុងរដ្ឋបាលឃុំសំអាង អស់ជិត ៣ពាន់ហិកតារ។ ពួកគេថា សមត្ថកិច្ចទាំងនោះមិនបានបំពេញកាពត្វកិច្ចជានគរបាលយុត្តិធម៌ បង្ក្រាបបទល្មើសឧក្រិដ្ឋកាប់បំផ្លាញព្រៃឈើស្របតាមច្បាប់ឡើយ បែរជាធ្វើទុក្ខមុកម្នេញដល់ពលរដ្ឋជាអ្នកការពារព្រៃឈើទៅវិញ។
ជនជាតិដើមភាគតិចកួយ រស់នៅភូមិឆ្វាំង ឃុំសំអាង ស្រុកថាឡាបរិវ៉ាត់ លោក អ៊ុក ម៉ៅ រៀបរាប់នៅថ្ងៃទី១១ ខែមករា ថា មេប៉ុស្តិ៍ឃុំសំអាង លោក គង់ ស៊ីណា បានកោះហៅលោកឲ្យចូលស្រាយបំភ្លឺរឿងលោកផ្តល់ព័ត៌មានទៅប្រព័ន្ធផ្សព្វផ្សាយថា ព្រៃឈើជិត ៣ពាន់ហិកតារត្រូវគេកាប់រានយកដីនៅរយៈពេល ៤ឆ្នាំចុងក្រោយ និងបង្គាប់ឲ្យលោកផ្តិចមេដៃទទួលស្គាល់ថា ព្រៃជិត ៣ពាន់ហិកតារពិតជារងការកាប់បំផ្លាញ។
លោកបន្តថា ក្រោយពីសាកសួររួច មាននគរបាលម្នាក់ទៀតបានបង្ហើបថា ប្រសិនបើរកឃើញថា ដីព្រៃសហគមន៍ និងព្រៃត្រៀមបម្រុងរបស់រដ្ឋបាលឃុំសំអាង ត្រូវបានគេកាប់ខ្វះតែ ១ហិកតារទើបគ្រប់ ៣ពាន់ហិកតារ គេនឹងប្តឹងលោកដាក់គុក៖ «ខ្ញុំថា សំណាងហើយមេប៉ុស្តិ៍ហៅខ្ញុំគ្រាន់តែសួរប៉ុណ្ណឹង ប្រសិនបើតុលាការហៅខ្ញុំអស់លោកជាប់គុកទាំងអស់នោះឯង ព្រោះអីលោកឯងអ្នកបំផ្លាញព្រៃឈើ ហើយខ្ញុំនិយាយ គឺនិយាយការពិត»។
លោក អ៊ុក ម៉ៅ បន្ថែមថា មេឃុំសំអាង លោក ញៀន ផន ក៏ធ្លាប់គំរាមលោកដូចគ្នាដែរថា បើមន្ត្រីជំនាញរកឃើញថា ដីព្រៃនៅតំបន់នោះត្រូវបានគេកាប់បំផ្លាញមិនគ្រប់ ៣ពាន់ហិកតារ នឹងប្តឹងលោកដាក់គុកពីបទបរិហារកេរ្តិ៍៖ «ថ្ងៃដែលគេហៅខ្ញុំទៅហ្នឹង ខាងមេព្រៃ ខាងសុរិយោដី និងខាងបរិស្ថានគេចុះទៅ តែរកអត់ឃើញទេអ្នកកាប់ព្រៃ។ ខ្ញុំថា អស់លោកឯងធ្វើហ្នឹងវាត្រឹមត្រូវហើយ គេកាប់នៅខាងជើង លោកឯងទៅរកខាងលិច រកម៉េចឃើញ?»។
អាស៊ីសេរីមិនអាចទាក់ទងមេប៉ុស្តិ៍សំអាង លោក គង់ ស៊ីណា ដើម្បីសុំការបំភ្លឺបញ្ហានេះបានទេ នៅថ្ងៃទី១១ ខែមករា។
ចំណែកមេឃុំសំអាង លោក ញៀន ផន បានបដិសេធថា លោកពុំបានគំរាមកំហែងពលរដ្ឋដូចការចោទប្រកាន់នោះទេ។ លោកទទួលស្គាល់ថា ព្រៃឈើនៅតំបន់នោះពិតជារងការកាប់ទន្ទ្រាន ក៏ប៉ុន្តែលោកពុំប្រាកដថា មានទំហំប៉ុណ្ណាដែរ។ លើសពីនេះ លោកធ្លាប់បានផ្តល់ដំណឹងបញ្ហានេះ ទៅមន្ត្រីរដ្ឋបាលព្រៃឈើ និងសហគមន៍ឲ្យទប់ស្កាត់៖ «ខ្ញុំមានវិធានការ។ ខ្ញុំនឹងប្រើកម្លាំងចម្រុះ ហើយប៉ុន្មានថ្ងៃមុននេះ ក្រោយពីអាស៊ីសេរី ផ្សាយហើយក៏ខ្ញុំបានឲ្យកម្លាំងមេព្រៃ និងសុរិយោដីចុះទៅដែរ។ ចុះបើគាត់មករាយការណ៍មកវិញថាមិនមាន តើខ្ញុំត្រូវធ្វើម៉េច»។
មន្ត្រីជាន់ខ្ពស់ផ្នែកដីធ្លី និងធនធានធម្មជាតិនៃសមាគមអាដហុក (ADHOC) លោក ប៉ែន ប៊ុណ្ណារ៍ ពន្យល់ថា ពលរដ្ឋមានសិទ្ធិពេញលេញដើម្បីផ្តល់ព័ត៌មានទៅប្រព័ន្ធផ្សព្វផ្សាយ និងរាយការណ៍ទៅអាជ្ញាធរមូលដ្ឋានពីការបំបំផ្លាញធនធានធម្មជាតិ ក៏ប៉ុន្តែបើពួកគាត់រងការគំរាមគំហែងពីអាជ្ញាធរ និងនគរបាល ដោយសារតែការពារព្រៃឈើ គឺជាទង្វើរំលោភច្បាប់ផង និងរំលោភសិទ្ធិមនុស្សផង។
លោកបញ្ជាក់ថា ពលរដ្ឋគ្រប់រូបមានកាតព្វកិច្ចការពារធនធានធម្មជាតិ ដែលជាសម្បត្តិរបស់រដ្ឋ ហើយត្រូវបានគេដកសិទ្ធិ គឺជាការរំលោភសិទ្ធិពលរដ្ឋ និងរំលោភលើរដ្ឋធម្មនុញ្ញ។ លោកសង្កត់ធ្ងន់ថា ប្រសិនបើពលរដ្ឋរាយកាណ៍បទល្មើសឧក្រិដ្ឋ ហើយត្រូវគេគំរាមកំហែង ផ្អែកតាមច្បាប់អ្នកដែលគំរាមកំហែងនោះ ត្រូវជាប់ទោសព្រហ្មទណ្ឌ៖ «គេហៅលោក អ៊ុក ម៉ៅ ដើម្បីផ្តិចមេដៃ គាត់ថា បើមិនគ្រប់ ៣ពាន់ហិកតារ លោក អ៊ុក ម៉ៅ ត្រូវតែទទួលខុសត្រូវ គឺជារឿងមួយដែលច្បាប់ព្រៃឈើមិនបានចែងថា ទាល់តែកាប់ ៣ពាន់ ឬ ៤រយហិកតារត្រូវមានទោសទេ គឺកាប់តែ ១ហិកតារក៏មានទោសដែរ។ ក្នុងនាមគាត់ជាអាជ្ញាធរដែនដី គាត់ត្រូវទទួលខុសត្រូវចំពោះមុខច្បាប់»។
ច្បាប់ព្រហ្មទណ្ឌមាត្រា ៥២៩ ចែងថា រាល់បុគ្គលណាបានដឹងពីបទល្មើសឧក្រិដ្ឋ ហើយមិនបានប្តឹងទៅតុលាការ ឬអាជ្ញាធរមានសមត្ថកិច្ច ត្រូវផ្តន្ទាទោសពី ១ខែ ទៅ ១ឆ្នាំ និងពិន័យជាប្រាក់ពី ១សែនរៀល ទៅ ២សែនរៀល។
រដ្ឋធម្មនុញ្ញមាត្រា ៣៥ ចែងថា ពលរដ្ឋខ្មែរទាំងពីរភេទមានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ។ សេចក្តីស្នើទាំងឡាយរបស់ពលរដ្ឋត្រូវបានទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋ៕
No comments:
Post a Comment