ប្រជាពលរដ្ឋនៅឃុំប្រមេរុ ស្រុកត្បែងមានជ័យ នៃខេត្តព្រះវិហារ ឲ្យដឹងថា បច្ចុប្បន្នមានជនចំណាកស្រុកជាង ២០០គ្រួសារ បានចូលទៅកាប់រានតំបន់អភិរក្សព្រៃព្រះរកាជាបន្តបន្ទាប់ ដើម្បីយកដីធ្វើចម្ការ បណ្ដាលឲ្យដើមឈើធំៗជាច្រើនត្រូវគេកាប់លក់ ចំណែកដើមច្បោះជ័ររបស់ជនជាតិដើមភាគតិចជាច្រើនទៀត ក៏បាត់បង់ដែរ។កន្លែងដែលកំពុងទទួលរងការកាប់រានយកដីនោះ គឺនៅតំបន់ប្រខាវ ក្បាលបែកចាន ក្បាលអូរក្រូច ក្បាលអូរពោធិ៍ អន្លង់ចារ និងអូរសោម ជាដើម។
មន្ត្រីអង្គការពន្លកខ្មែរ ដែលធ្វើការងារជួយដល់សហគមន៍ការពារព្រៃឈើនៅខេត្តព្រះវិហារ អំពាវនាវឲ្យអាជ្ញាធរ និងសមត្ថកិច្ចពាក់ព័ន្ធនៅក្នុងខេត្តនេះ ចាត់វិធានការតឹងរ៉ឹងដើម្បីការពារតំបន់ព្រៃព្រះរកា ដែលកំពុងទទួលរងការកាប់រានយកដីធ្វើចម្ការជាបន្តបន្ទាប់។
ការអំពាវនាវនេះ ធ្វើឡើងនៅស្របពេលដែលជនចំណាកស្រុកជាច្រើនមកពីខេត្តកំពង់ធំ កំពត និងអ្នកនៅក្នុងស្រុកផង នាំគ្នាចូលកាប់រានព្រៃនោះអស់ជាច្រើនហិកតារទៅហើយ។
មន្ត្រីផ្នែកតស៊ូមតិរបស់អង្គការពន្លកខ្មែរ គឺលោក ប៉ិក សោភ័ណ។ លោកមានប្រសាសន៍នៅរសៀលថ្ងៃច័ន្ទ ទី២ ខែមករា ថា បច្ចុប្បន្ន ព្រៃព្រះរកាជាច្រើនកន្លែងដូចជាតំបន់ប្រខាវ ក្បាលបែកចាន ក្បាលអូរក្រូច ក្បាលអូរពោធិ៍ អន្លង់ចារ និងអូរសោម ជាដើម កំពុងរងការកាប់បំផ្លាញពីក្រុមជនចំណាកស្រុកយ៉ាងធ្ងន់ធ្ងរ។ លោក ប៉ិក សោភ័ណ បញ្ជាក់ថា សកម្មភាពកាប់រានដីព្រៃធ្វើចម្ការនេះ មិនត្រឹមតែកាប់ឈើធំៗយកទៅធ្វើអាជីវកម្មខុសច្បាប់ទេ គឺវាថែមទាំងបំផ្លាញដើមច្បោះជ័ររបស់ប្រជាពលរដ្ឋ ដែលតែងប្រកបរបរចិញ្ចឹមជីវិតប្រចាំថ្ងៃផង៖ «ខ្ញុំចង់ឲ្យអាជ្ញាធរ ហើយនិងមន្ត្រីដែលមានសមត្ថកិច្ច គឺយកចិត្តទុកដាក់បង្កើនការប្រុងប្រយ័ត្នចំពោះសកម្មភាពទន្ទ្រានដីព្រៃ ហើយតំបន់ដែលគេរុករាននោះ គឺនៅក្នុងតំបន់ការពារព្រៃព្រះរកា»។
មន្ត្រីបរិស្ថានខេត្តព្រះវិហារ ដែលទទួលខុសត្រូវលើកិច្ចការពារតំបន់ព្រៃអភិរក្សនោះ និយាយថា គេពុំទាន់បានដឹងអំពីសកម្មភាពកាប់បំផ្លាញព្រៃព្រះរកា នៅតំបន់ណានៅឡើយទេ។
ប្រធានមន្ទីរបរិស្ថាន ខេត្តព្រះវិហារ លោក អ៊ា សុខា មានប្រសាសន៍ថា ការកាប់រានព្រៃដើម្បីយកដី គឺជាអំពើខុសច្បាប់ ក៏ប៉ុន្តែរហូតមកដល់ពេលនេះ លោកនៅមិនទាន់បានទទួលរបាយការណ៍ពីនាយកគ្រប់គ្រងតំបន់ព្រៃព្រះរកា ស្ដីពីសកម្មភាពកាប់ព្រៃ ដើម្បីរុករានយកដីនោះនៅឡើយ៖ «យើងអត់ទាន់បានទទួលព័ត៌មានពីខាងហ្នឹងផង ពីព្រោះគេមាននាយក គឺមន្ត្រីដែលអនុវត្តត្រូវធ្វើរបាយការណ៍មកមន្ទីរ ប៉ុន្តែមិនដែលឃើញរាយការណ៍ទេ»។
ទោះជាយ៉ាងណា សមាជិកសហគមន៍ការពារព្រៃព្រះរកា អ្នកស្រី រឿង ខាន់ អះអាងថា រហូតមកដល់ពេលនេះ ជនចំណាកស្រុកដែលចូលទៅកាប់រានយកដីព្រៃព្រះរកា បានកើនឡើងដល់ទៅជាង ២០០គ្រួសារហើយ។ អ្នកស្រី រឿង ខាន់ បញ្ជាក់ថា សហគមន៍លែងហ៊ានចូលទៅទប់ស្កាត់ការកាប់រានយកដីព្រៃនោះទៀតហើយ ពីព្រោះជនចំណាកស្រុកខ្លះដែលមកពីខេត្តកំពត មានទាំងប្រើកាំភ្លើងឆ្នុកបាញ់គំរាមសហគមន៍ទៀតផង៖ «ខ្ញុំជាសហគមន៍មិនជាធ្វើយ៉ាងណា? បើជនចំណាកស្រុកមកពីកំពត សុទ្ធតែប្រើកាំភ្លើងឆ្នុក»។
ព្រៃព្រះរកា ដែលមានទំហំជាង ៩.៦០០ហិកតារនៅចន្លោះព្រំប្រទល់ស្រុកចំនួន៣ គឺស្រុកត្បែងមានជ័យ ស្រុកជាំក្សាន្ត និងស្រុកឆែប របស់ខេត្តព្រះវិហារ។
អង្គការពន្លកខ្មែរ ឲ្យដឹងថា សកម្មភាពកាប់រានព្រៃព្រះរកា ដើម្បីយកដី បានកើតមានតាំងតែពីអំឡុងឆ្នាំ២០១១ ហើយការកាប់រានយកដីខ្លាំង គឺនៅចុងឆ្នាំ២០១៦៕
No comments:
Post a Comment