សាច់ញាតិរបស់ស្ត្រីអ្នករកស៊ីផ្លូវភេទម្នាក់ ដែលស្លាប់ដោយលង់ទឹកក្រោយពីធ្លាក់ចូលទន្លេសាប អំពាវនាវរកយុត្តិធម៌ ដ្បិតពួកគេបានដឹងថា ស្ត្រីរូបនោះស្លាប់ដោយសាររត់គេចពីការតាមចាប់របស់ក្រុមសន្តិសុខសាលាខណ្ឌដូនពេញ។
ស្ត្រីរកស៊ីផ្លូវភេទ ឈ្មោះ ប៉ែន សុគន្ធា ហៅស្រីម៉ៅ ត្រូវគេរកឃើញថាបានស្លាប់ដោយលង់ទឹកនៅពេលសាកសពរបស់នាងអណ្ដែតនៅចម្ងាយរាប់គីឡូម៉ែត្រដី ពីកន្លែងនាងតែងទៅអង្គុយចាំភ្ញៀវ នៅសួនច្បារតាមមាត់ទន្លេសាបក្បែរវត្តភ្នំ។
សាច់ញាតិ និងមិត្តភក្តិរបស់នាង ប៉ែន សុគន្ធា ស្នើសុំភាគីពាក់ព័ន្ធជួយរកយុត្តិធម៌អោយសព និងជំនួយសម្រាប់ចិញ្ចឹមកូនប្រុសរបស់នាងដែលពិការ។
បងស្រីរបស់សុគន្ធា គឺលោកស្រី ប៉ែន ម៉េងគី លើកឡើងថា ជារឿងអយុត្តិធម៌ណាស់ចំពោះប្អូនស្រីដែលត្រូវស្លាប់ដោយសារតែរត់គេចខ្លួនពីក្រុមសន្តិសុខ។ លោកស្រីបន្តថា ការរក្សាសណ្ដាប់ធ្នាប់ជារឿងល្អហើយ ប៉ុន្តែមិនគួរដេញរហូតគ្នាធ្លាក់ទឹកទន្លេដល់បាត់បង់ជីវិតបែបនេះឡើយ៖ «បើខ្ញុំដាក់ពាក្យប្ដឹង ចុះអនាគតទៅបើគេកោះហៅខ្ញុំឡើងចុះៗ តើខ្ញុំមានលុយឯណា? បើសិនជាអង្គការថា ជួយដោះស្រាយអោយខ្ញុំ គឺខ្ញុំចង់ប្ដឹងដែរ ដើម្បីរកយុត្តិធម៌អោយប្អូន។ អីក៏ធ្វើបាបប្អូនខ្ញុំយ៉ាងនោះ តើគាត់មានគិតឃើញអ៊ីចឹងទេ គាត់ដេញគេទីណាត់ទីណែងពេញហ្នឹង បានអីជួយគ្នាទៅ បើគ្នាធ្លាក់ទឹកហើយជួយស្រង់គ្នាឡើងមកលើគោកមក។ គាត់ថា អត់អោយជួយទេ ថាទុកអោយស្លាប់ទៅ ស្រែកអ៊ីចឹងទៀត។ អ្នកទូកហ្នឹង អ្នកនៅខាងលើគោកប្រុសៗហ្នឹង ក៏គេចង់ជួយដែរ មិនអោយគ្នាជួយ។ ខ្ញុំហ្នឹងដឹងថា គាត់ចង់បោសសំអាតខាងហ្នឹងអោយស្អាតបាតដែរ ប៉ុន្តែគាត់គួរតែសួរគេសួរឯងដែរថា តើស្ត្រីម្នាក់ហ្នឹងធ្វើការដើម្បីយកលុយទៅចិញ្ចឹមអ្នកណា? គ្នារកលុយដើម្បីទៅចិញ្ចឹមកូនគ្នាហ្នឹង»។
ចំណែកបងស្រីមួយរូបទៀតរបស់ សុគន្ធា គឺលោកស្រី ប៉ែន ម៉ាលីន លើកឡើងថា កូនប្រុសរបស់ សុគន្ធា ដែលមានអាយុ ៦ឆ្នាំ គឺជាក្មេងពិការដែលត្រូវការការថែទាំ និងថវិកាដើម្បីចិញ្ចឹមជីវិតតទៅមុខទៀតនៅក្រោយពេលដែលម្ដាយស្លាប់ទៅ៖ «ខ្ញុំគ្រាន់តែចង់អោយជួយក្មេង ទាំងរាជរដ្ឋាភិបាល ទាំងអង្គការអី សូមសំណូមពរអោយជួយក្មេង ទៅអនាគតនេះដឹងតែកំព្រាឪពុកម្ដាយ ហើយក៏គ្នាដើរមិនរួច»។
ប៉ែន សុគន្ធា មានអាយុ ៣៣ឆ្នាំជាកូនកំព្រា មានបងស្រី ២នាក់។ នាងបានចាកចេញពីទីលំនៅនៅក្នុងខេត្តពោធិ៍សាត់ មកបម្រើការងារជាកម្មករនៅរោងចក្រកាត់ដេរ។ ក្រោយមកដោយសារបំណុលគ្រួសារដែលត្រូវការចំណូលបន្ថែម សុគន្ធា បានទៅធ្វើការនៅហាងលក់ស្រាបារាំង។ នាងធ្លាប់មានប្ដីជាជនបរទេសមានកូនម្នាក់ក្រោយមកក៏បែកបាក់គ្នា ហើយកូនក៏អោយទៅប្ដី។ ក្រោយមកទៀតនាងមានប្ដីម្នាក់ទៀត ប៉ុន្តែប្ដីបានស្លាប់កាលពីបីឆ្នាំមុន ដោយបន្សល់ទុកកូនប្រុសពិការអោយនាងចិញ្ចឹម។
 |
| រូបថតរបស់ស្ត្រីរកស៊ីផ្លូវភេទឈ្មោះ ប៉ែន សុគន្ធា ហៅស្រីម៉ៅ កាលពី៣ឆ្នាំមុន។ Photo Provided |
ដោយពុំមានមុខរបរអ្វី សុគន្ធា បានក្លាយជាស្ត្រីរកស៊ីផ្លូវភេទដើម្បីចិញ្ចឹមកូន និងដោះបំណុលនៅក្រោយប្ដីស្លាប់ដោយជំងឺរបេង។ កូនប្រុសរបស់ សុគន្ធា មានអាយុ ៦ឆ្នាំ ប៉ុន្តែពុំដឹងសេចក្ដីអ្វីទាំងអស់ ចំណែកការហូបចុកត្រូវមានអ្នកបញ្ចុក និងមើលថែទាំងស្រុងមិនខុសពីកូនង៉ែតឡើយ ចំណែកជើងទាំង២ ទន់មិនអាចដើរបានឡើយ។ ទាំង ២នាក់ម្ដាយ និងកូននេះស្នាក់នៅក្នុងបន្ទប់ជួលតូចមួយនៅក្នុងភូមិចម្ការចេក ក្នុងសង្កាត់ទួលសង្កែ ខណ្ឌឫស្សីកែវ។ នាង សុគន្ធា បានចំណាយលុយជាច្រើននៅរៀងរាល់ខែដើម្បីចាក់ថ្នាំដែលគេអះអាងថា អាចអោយជើងកូនប្រុសរបស់នាងរឹងមាំ ឬអាចដើរបាននៅថ្ងៃមុខ។
មិត្តរួមអាជីពរបស់ សុគន្ធា គឺលោកស្រី ភិន មុំ ថ្លែងថា សុគន្ធា តែងចំណាយមិនតិចជាង ៧០ដុល្លារទេក្នុងមួយខែ ដើម្បីព្យាបាលកូនប្រុសពិការរបស់នាង។ ភិន មុំ បន្តថា យុត្តិធម៌គួរតែត្រូវផ្ដល់អោយមិត្តរបស់នាង៖ «និយាយទៅយើង (ក្រុមសន្តិសុខ) រៀបចំសណ្ដាប់ធ្នាប់។ ពាក្យសណ្ដាប់ធ្នាប់តែពីរមុខទេ យើង (ក្រុមសន្តិសុខ) ដេញគេ (ស្ត្រីរកស៊ីផ្លូវភេទ) ដល់ណាទៀត? យើងតាមដេញគេរហូតដល់គេអស់ជីវិតអ៊ីចឹងទៅ? គេចុះទៅដល់ក្រោមហើយ គេរត់ពួនហើយហ្នឹង យើងគ្រាន់តែបង្អើលៗគេទៅ»។
កាលពីយប់ថ្ងៃអាទិត្យ ទី១ ខែធ្នូ មានសាក្សីនៅហ្នឹងកន្លែងមួយចំនួនលើកឡើងថា ក្រុមសន្តិសុខរបស់សាលាខណ្ឌដូនពេញ ជាច្រើននាក់បានដេញចាប់ក្រុមស្ត្រីរកស៊ីផ្លូវភេទ ដោយចាប់ផ្ដើមពីសួនច្បារនៅរមណីយដ្ឋានវត្តភ្នំ ឆ្ពោះទៅមាត់ទន្លេខាងក្រោយក្រុមប្រឹក្សាអភិវឌ្ឍន៍ ឬសួនច្បារត្រង់ចំណតទូកទេសចរណ៍។
ស្ត្រីរកស៊ីផ្លូវភេទម្នាក់ដែលរត់គេចជាមួយ សុគន្ធា ដែរនិយាយថា ក្រុមសន្តិសុខសាលាខណ្ឌដូនពេញ បានដេញចាប់ក្រុមស្ត្រីពីលើសួនច្បាររហូតដល់មាត់ទឹក ជាទីដែលទូកទេសចរណ៍ជាច្រើនកំពុងចតជាប់ៗគ្នារដឹក៖ «ខ្ញុំហ្នឹងរត់ចូលទូកបាត់ហើយ ឯគាត់ធ្លាក់ទៅត្រូវអីៗខ្ញុំអត់ដឹងទេ ឮសូរថាគាត់ធ្លាក់ទឹក ព្រោះខ្ញុំរត់យកប្រាស់អាយុរៀងខ្លួន។ បើអាចគេចរួចក៏គេចទៅ (សំណួរ៖ អ្នកណាដេញ?) ពួកសន្តិសុខ»។
ស្ត្រីដដែលបញ្ជាក់ថា មានសន្តិសុខចំនួន ៣នាក់ បានដេញតាមពួកគេរហូតដល់លើទូក។
អ្នកដែលឃើញហេតុការណ៍មួយចំនួនទៀតនិយាយថា គេបានដឹងថា ពេលដែលសន្តិសុខដេញទៅដល់ទូក សុគន្ធា ហៅស្រីម៉ៅ បានទាក់ជើងនឹងខ្សែបោកនឹងទូក ហើយក៏ធ្លាក់ចូលទៅក្នុងទឹក។ នាងបានហូរតាមទឹកទៅដល់ទូកផ្សេងទៀតនៅក្រោមខ្សែទឹក។
ម្ចាស់ទូកទេសចរណ៍ម្នាក់ លោក ណូ វ៉ារី មានប្រសាសន៍ថា លោកបានដឹងថា ស្រីម៉ៅ បានធ្លាក់ចូលក្នុងទឹកនៅខាងមុខទូករបស់លោក ហើយពួកសន្តិសុខបានដេញមកដល់ និងបានឡើងលើទូករបស់លោកថែមទៀត៖ «ពេលពួកគាត់ចុះមក ខ្ញុំក៏សួរថា បងឯករកអីបានឡើងលើទូកខ្ញុំ? (សំណួរ៖ ពេលដែលយើងមើលពីលើទៅ តើស្រីម៉ៅ គាត់យ៉ាងម៉េច? គាត់រត់ទៅ ហើយដួលរបៀបម៉េច? បានឃើញទេ?) ខ្ញុំមិនបានឃើញទេ តែឮថាគាត់ធ្លាក់ទឹក»។
ស្ត្រីម្នាក់ទៀតជាម្ចាស់ទូកទេសចរណ៍ម្នាក់ដែរ បាននិយាយដោយមិនបង្ហាញឈ្មោះថា នៅពេលកើតហេតុនោះគឺវេលាជិតពាក់កណ្ដាលអធ្រាត្រ។ លោកស្រីបានឃើញស្រីម៉ៅ នៅក្នុងទឹក ប៉ុន្តែក្រុមសន្តិសុខបានហាមប្រាមមិនអោយនរណាម្នាក់ជួយនាងឡើយ៖ «ម្នាក់ហ្នឹងរាងស្គមនិយាយ ខ្ញុំថា អូនអធ្យាស្រ័យអោយគ្នាទៅ បើគ្នាធ្លាក់ទឹកប៉ុណ្ណឹងហើយទុកអោយគេជួយ គេថា មីងឯងកុំចេះ ទុកអោយវាងាប់ទៅ។ ពេលដែលធ្លាក់ទឹកហ្នឹង ពួកហ្នឹង (សន្តិសុខ) បានបញ្ចាំងពិលទៅខាងក្រោយទៅឃើញនាងហ្នុង ហើយហៅអោយឡើង នាងស្រីហ្នឹងនិយាយបានប៉ុន្មានម៉ាត់ថា ខ្ញុំឡើងឥឡូវហើយ។ ខ្ញុំថា សំឡេងខ្សោយអ៊ីចឹងដឹងតែទៅហើយ។ ខ្ញុំថាទៀត អាអូន បើគេស្លាប់អាអូនឯងក៏អត់រួចខ្លួនដែរ គេថា ទុកអោយស្លាប់ទៅ»។
យុវតីម្នាក់ដែលនៅលើទូកក្បែរនោះដែរ បានរៀបរាប់ថា ស្រីម៉ៅ ក៏បានបោកនឹងទូកមុនពេលធ្លាក់ដល់ទឹក បើទោះជាយ៉ាងណាយុវតីដដែលលើកឡើងដែរថា មានអ្នកបោះខ្សែអោយស្រីម៉ៅ តោងដែរ តែនាងមិនដឹងថា មានមូលហេតុអ្វីដែលធ្វើអោយស្រីម៉ៅ មិនអាចឡើងមកវិញបានរហូតនាងត្រូវហូរតាមទឹកទៅបាត់៖ «គាត់រត់ពីទូកមួយឆ្លងទៅទូកមួយ ស្រីៗហ្នឹងបងមួយនោះគាត់ទៅមុន ហើយគាត់ (ស្រីម៉ៅ) គាត់ទៅតាមក្រោយ រួចគាត់ទាក់ខ្សែនេះ ដល់ពេលហ្នឹងប្រហែលគាត់បុកទ្រូងនឹងគែមទូកក៏មិនដឹង ឃើញគាត់ឡើងអត់រួចអីអត់រួច (សំណួរ៖ ពេលអណ្ដែតទៅក្រោយហ្នឹងមានគេមកជួយគាត់ដែរ ឬអត់?) នៅខាងនោះ អ្នកផែ គេក៏ឃើញដែរ ហើយគាត់បានបោះខ្សែអោយដែរ ហើយគាត់អត់តោង»។
ខ្លាចត្រូវអាជ្ញាធរចាប់ខ្លួនអាចជាមូលហេតុមួយក្នុងចំណោមមូលហេតុដទៃទៀតសម្រាប់ស្រីម៉ៅ។ មិត្តភក្តិជាប់បន្ទប់របស់ស្រីម៉ៅ គឺលោកស្រី ភិន មុំ និយាយថា ប្រសិនបើពួកគេត្រូវចាប់ខ្លួន អាចនឹងត្រូវជំរិតទារប្រាក់ជាថ្នូរនឹងការដោះលែងវិញ ឬត្រូវបញ្ជូនទៅមជ្ឈមណ្ឌលសំចតសង្គមកិច្ច ដែលគេស្គាល់ថា មណ្ឌលព្រៃស្ពឺ។ ស្រ្តីដដែលបន្តថា កូនៗពួកគេត្រូវជួបការលំបាកនៅពេលម្ដាយត្រូវជាប់ក្នុងមណ្ឌល ហើយដើម្បីចេញពីមណ្ឌលបាន គឺត្រូវបង់ប្រាក់ដែរ។
នៅ ២ថ្ងៃបន្ទាប់ពីហេតុការណ៍ធ្លាក់ក្នុងទឹកទន្លេនោះ សពរបស់ស្រីម៉ៅ ត្រូវគេរកឃើញនៅមិនឆ្ងាយប៉ុន្មានពីស្ពានច្បារអំពៅ ក្នុងសង្កាត់ច្បារអំពៅ។ ប៉ូលិសបានពិនិត្យសាកសព និងបានសរសេរកំណត់ហេតុភ្លាមៗក្រោយពេលសពត្រូវរកឃើញ។ របាយការណ៍ដែលធ្វើដោយប៉ូលិស ឈ្មោះ ហ៊ុន សុផល អោយដឹងថា គេបានប្រគល់សពទៅអោយក្រុមគ្រួសារសពនៅម៉ោង ៨កន្លះយប់ថ្ងៃទី៣ ខែមករា ឆ្នាំ២០១៧។ ក្នុងនោះបានសន្និដ្ឋានយ៉ាងខ្លីថា នាង ប៉ែន សុគន្ធា បានស្លាប់ដោយលង់ទឹក។ បងស្រីរបស់ សុគន្ធា និយាយថា នៅលើថ្ងាសរបស់សពមានស្នាមជាំ ប៉ុន្តែលោកស្រីក៏មិនច្បាស់ថា ជាស្នាមអ្វីដែរ៖ «តែខ្ញុំមិនសន្និដ្ឋានថា វាត្រូវនឹងអីទេ ឬមួយក៏សក់បាំងក៏មិនដឹង ព្រោះខ្ញុំមើលមិនច្បាស់ ប៉ុន្តែឃើញថាជាំត្រង់ហ្នឹង (ថ្នាស)»។
ក្រោយទទួលបានសពសាច់ញាតិបានសម្រេចបូជាសពនាងសុគន្ធា នៅក្នុងវត្តទួលសន្តិវ័ន ហៅវត្តទួល អស់លោក នៅក្នុងខណ្ឌឫស្សីកែវ នៅជិតពាក់កណ្ដាលយប់ថ្ងៃទី៣ ខែមករា។ ទាក់ទងនឹងរឿងនេះ អាស៊ីសេរី មិនអាចសុំការឆ្លើយតបពីអភិបាល និងប្រធានសន្តិសុខខណ្ឌដូនពេញ បានទេ នៅថ្ងៃទី៤ ខែមករា។
ប្រធានសន្តិសុខខណ្ឌដូនពេញ លោក គឹម វុត្ថា បានប្រាប់កាសែត ឌឹ ខេមបូឌា ដេលី (The Cambodia Daily) កាលពីថ្ងៃទី២ ខែមករា ថា ពិតជាមានការឆ្មក់ចាប់ស្ត្រីរកស៊ីផ្លូវភេទនៅយប់ថ្ងៃទី១ ខែមករា មែន ប៉ុន្តែបដិសេធចំពោះការអះអាងថា ក្រុមសន្តិសុខបានដេញតាមស្រ្តីទាំងនោះ។ លោកថា ដោយសន្តិសុខរបស់លោកមានគ្នាតិចពេក មិនអាចដេញតាមក្រុមស្ត្រីរកស៊ីផ្លូវភេទដែលរត់សំដៅទូកទេសចរណ៍បានឡើយ។
លោក គឹម វុត្ថា និយាយទៀតថា ពេលនោះយប់ងងឹតណាស់ បើមានសន្តិសុខពី២០ ទៅ ៣០នាក់នោះ ពួកគេនឹងដេញតាម។ ក្នុងយប់នោះ គេចាប់ស្ត្រីរកស៊ីផ្លូវភេទបាន ៤នាក់។
មន្ត្រីផ្នែកអប់រំសុខភាពនៃបណ្ដាញការងារស្ត្រីរួបរួមគ្នា ដែលធ្វើការងារជាមួយស្ត្រីរកស៊ីផ្លូវភេទ អ្នកស្រី កែវ ថា មានប្រសាសន៍ថា ករណីនេះជាអំពើរំលោភសិទ្ធិមនុស្ស។ ក្រុមការងារអ្នកស្រីនឹងពិភាក្សាជាមួយអ្នកច្បាប់ពីការដាក់ពាក្យបណ្ដឹងដើម្បីរកយុត្តិធម៌ដល់នារីរងគ្រោះ៖ «ព្រឹកមិញហ្នឹងខាងខ្ញុំនឹងបានរៃអង្គាសលុយជួយគាត់ (គ្រួសារសព) បាន ៤០ម៉ឺនរៀលដែរ ហើយខាងអាជ្ញាធរមូលដ្ឋាន ប៉ូលិសដែលចុះចាប់គាត់ហ្នឹង ក៏បានយកលុយទៅជួយដល់គ្រួសារគាត់ដែរ គឺគេជួយបាន ១លានដែរ។ ពួកខ្ញុំនឹងនិយាយរឿងហ្នឹង ប្រជុំជាមួយរដ្ឋាភិបាល ដើម្បីសហការគ្នាយ៉ាងម៉េចអោយល្អជាមួយអាជ្ញាធរមូលដ្ឋានហ្នឹង ដើម្បីកុំអោយមានរឿងរ៉ាវកើតឡើងទៀត ធ្វើម៉េចកុំអោយ ធ្វើបាបគាត់ ធ្វើយ៉ាងម៉េច។ ខាងខ្ញុំក៏មានមេធាវីដែរ អ៊ីចឹងហ្នឹងពិភាក្សាធ្វើយ៉ាងម៉េចបន្តទៀតដើម្បីត្រូវជួយគាត់»។
អ្នកស្រី កែវ ថា អោយដឹងដែរថា កន្លងទៅបញ្ហាដែលកើតឡើងចំពោះស្ត្រីរកស៊ីផ្លូវភេទ ដោយរាប់ទាំងការធ្វើបាបពីភ្ញៀវ និងពីអាជ្ញាធរផង ផ្ដើមចេញពីការរើសអើងពួកនាងដែលប្រកបមុខរបរដែលសង្គមមិនផ្ដល់តម្លៃបើទោះជាពួកគេបំពេញការងារនេះដោយបង្ខំចិត្ត និងដើម្បីតែគ្រួសារពួកគេប៉ុណ្ណោះ៕
No comments:
Post a Comment