 |
| ជនសង្ស័យឈ្មោះ ជា សុខជាន (អាវកីឡា) ក្នុងអំពើអារកសម្លាប់បុរស ២នាក់ និងធ្វើឲ្យស្ត្រីម្នាក់រងរបួសធ្ងន់នៅខេត្តសៀមរាប ត្រូវប៉ូលិសចាប់ឲ្យទៅបង្ហាញវត្ថុតាងឃាតកម្មនៅស្ទឹងព្រៃប្រស់ ខេត្តកំពង់ធំ ថ្ងៃទី៥ ខែមករា ឆ្នាំ២០១៧។ Photo Provided |
កម្លាំងប៉ូលិសព្រហ្មទណ្ឌនៃស្នងការដ្ឋាននគរបាលខេត្តសៀមរាប ចាប់ខ្លួនយុវជនម្នាក់ដែលគេសង្ស័យថាជាជនដៃដល់ក្នុងអំពើអារកសម្លាប់បុរស ២នាក់ និងស្ត្រីម្នាក់ទៀតរងរបួសធ្ងន់នោះបានហើយ។ ការចាប់ខ្លួននេះ បន្ទាប់ពីកម្លាំងរបស់ប៉ូលិសព្រហ្មទណ្ឌជាច្រើននាក់ បានតាមប្រមាញ់ជននោះអស់រយៈពេល ៤ថ្ងៃ ដោយឆ្លងកាត់ខេត្តជាច្រើនជុំវិញប្រទេសកម្ពុជា មក។
ស្នងការរងនគរបាលខេត្តសៀមរាប គឺលោក ភឹង ចិន្ដារ៉េត។ លោកមានប្រសាសន៍នៅព្រឹកថ្ងៃព្រហស្បតិ៍ ទី៥ ខែមករា ថា សមត្ថកិច្ចបានចាប់ខ្លួនជនសង្ស័យក្នុងអំពើឃាតកម្មឈ្មោះ ជា សុខជាន អាយុ ២៤ឆ្នាំកាលពីល្ងាចថ្ងៃទី៤ ខែមករា។
លោកស្នងការរងបញ្ជាក់ថា ជនសង្ស័យ និងអ្នករងគ្រោះពីរនាក់ប្ដីប្រពន្ធក្នុងអំពើអារកសម្លាប់នោះ គឺស្គាល់គ្នាតាមរយៈបណ្ដាញសង្គមហ្វេសប៊ុក (Facebook)។ លោកបញ្ជាក់ថា តាមការសួរចម្លើយ ជនសង្ស័យបានសារភាពថា គេពិតជាបានអារកសម្លាប់បុរស ២នាក់ និងស្ត្រីម្នាក់រងរបួសធ្ងន់នោះមែន ដោយសារតែរឿងគំនុំ៖ «ជនរងគ្រោះធ្វើការខាងលក់អាហារបំប៉ន។ អ៊ីចឹងជនសង្ស័យបានធ្វើដំណើរពីស្រុកកំណើតមកជួបជនរងគ្រោះជាញឹកញាប់ ដោយសារតែជនរងគ្រោះហៅឲ្យមកធ្វើការ ប៉ុន្តែពេលនោះគេមិនដឹងថាចូលធ្វើការត្រូវបង់លុយទេ។ លុះឮជនរងគ្រោះ ២នាក់ប្ដីប្រពន្ធថាចូលធ្វើការត្រូវតែបង់លុយចំនួន ១.៣០០ដុល្លារ ជនសង្ស័យក៏មានគំនុំតែម្ដង»។
កាលពីទៀបភ្លឺថ្ងៃទី១ ខែមករា នៅពេលដែលពលរដ្ឋនៅទូទាំងខេត្តសៀមរាប នាំគ្នាប្រារព្ធពិធីឆ្លងឆ្នាំថ្មីឆ្នាំសកល ស្រាប់តែមានអំពើឃាតកម្មដោយអារកសម្លាប់បុរស ២នាក់ និងស្ត្រីម្នាក់រងរបួសធ្ងន់នៅភូមិសាលាកន្សែង សង្កាត់ស្វាយដង្គំ កណ្ដាលទីក្រុងសៀមរាប។ ប៉ុន្តែសំណាងល្អ ដោយសារស្ត្រីម្នាក់ក្នុងចំណោមជនរងគ្រោះក្នុងអំពើអារកនោះមិនស្លាប់ ជាហេតុធ្វើឲ្យប៉ូលិសមានភស្តុតាងតាមប្រមាញ់រកមុខជនដៃដល់ ហើយប្រើរយៈពេល ៤ថ្ងៃទម្រាំចាប់ខ្លួនបាន៕
No comments:
Post a Comment