កញ្ញា ធី សុវណ្ណថា អ្នកលេងហ្វេសប៊ុក (facebook) ដ៏លេចធ្លោម្នាក់ បានប្ដឹងលោក សម រង្ស៊ី ទៅសាលាដំបូងរាជធានីភ្នំពេញ ពីបទបរិហារកេរ្តិ៍ជាសាធារណៈ ពាក់ព័ន្ធនឹងការនិយាយចោទប្រកាន់ថា លោក ហ៊ុន សែន សូកលុយ ១លានដុល្លារដល់កញ្ញា។នៅថ្ងៃទី១៧ ខែមករា កញ្ញា ធី សុវណ្ណថា បានប្ដឹងទារសំណងជំងឺចិត្តពីលោក សម រង្ស៊ី ប្រធានគណបក្សសង្គ្រោះជាតិ ចំនួន ២៥ម៉ឺនដុល្លារ ដែលកាលពីថ្ងៃទី១៤ ខែមករា ឆ្នាំ២០១៧ កន្លងទៅ លោក សម រង្ស៊ី ដែលកំពុងនៅប្រទេសបារាំង បាននិយាយនៅពេលប្រជុំ និងជួបសំណេះសំណាលជាមួយសកម្មជនគណបក្សសង្គ្រោះជាតិ និងជាមួយលោក កឹម សុខា ថាលោក ហ៊ុន សែន បានសូកប៉ាន់លុយ ១លានដុល្លារដល់កញ្ញា ធី សុវណ្ណថា ដើម្បីឲ្យនាងធ្វើបាតុកម្មប្រឆាំងនឹងគណបក្សសង្គ្រោះជាតិ។
នៅក្នុងពាក្យបណ្ដឹងរបស់កញ្ញា ធី សុវណ្ណថា ដែលផ្សព្វផ្សាយដោយសារព័ត៌មានហ្រ្វេសញូវ (FreshNews) បានរៀបរាប់ថា ការលើកឡើងនេះគ្មានមូលដ្ឋានច្បាស់លាស់ ជាការចោទប្រកាន់មួលបង្កាច់ធ្វើឲ្យប៉ះពាល់ធ្ងន់ធ្ងរដល់កិត្តិយស និងសេចក្ដីថ្លៃថ្នូរលើរូបនាង ហើយនាងនឹងយកប្រាក់សំណងនេះជូនទៅអង្គការដើម្បីធ្វើកិច្ចការមនុស្សធម៌៕
No comments:
Post a Comment