 |
| រូបភាព៖ កងកម្លាំងអាជ្ញាធរចុះបង្ក្រាប ក្រុមបាតុករនៅសួនឧស្សាហកម្មកាណាឌីណា ផ្លូវវេងស្រេង នៅថ្ងៃទីសុក្រ ទី ៣មករាឆ្នាំ ២០១៤។ RFI/ siv channa |
ជនរងគ្រោះពីការបង្ក្រាបនៅក្នុងបាតុកម្មនៅមុខរោងចក្រយាកជីននិងនៅតាមបណ្តោយផ្លូវវេងស្រេងបានជួបជុំគ្នានៅថ្ងៃនេះដើម្បីប្រារព្ធខួប ៣ឆ្នាំនៃការបង្ក្រាប។ នៅថ្ងៃនេះ អតីតអ្នកចូលរួមធ្វើបាតុកម្ម និងសាច់ញាតិរបស់ជនរងគ្រោះកាលពីឆ្នាំ២០១៤ បានរៀបរាប់ពីការឈឺចាប់ និងបន្តអំពាវនាវស្វែងរកយុត្តិធម៌សម្រាប់ពួកគេ។
មុនពេលចាប់ផ្តើមពិធីកាលពីព្រឹកមិញ អ្នកចូលរួមទាំងអស់ ដែលជាជនរងគ្រោះ និងក្រុមគ្រួសាររបស់ពូកគេ បានដើរមើលរូបថតជាច្រើនសន្លឹក ដែលត្រូវបានគេបិទភ្ជាប់ទៅនឹងជញ្ជាំងរបងផ្ទះ ដែលបានពិពណ៌នាពីទិដ្ឋភាពនៃការបង្ក្រាបប្រកបដោយឈាមក្រហមច្រាលនៅលើផ្ទៃមុខ និងសំលៀកបំពាក់របស់បាតុករកាលពី៣ឆ្នាំមុន។ ក្រៅពីនេះ អ្នកចូលរួមក៏បានទស្សនាខ្សែវីដេអូ ដែលបានរៀបរាបបន្ថែមទៀត ពីព្រឹត្តិការណ៍នៃការបង្ក្រាបរយៈពេលពីរថ្ងៃ នៅមុខរោងចក្រយាកជីនក្នុងតំបន់សេដ្ឋកិច្ចពិសេសភ្នំពេញដោយកងទ័ពឆ័ត្រយោង ៩១១ និងការបង្ក្រាបកាលពីថ្ងៃទី៣មករានៅផ្លូវវេងស្រេង ដោយកងកម្លាំងប្រដាប់អាវុធរបស់រដ្ឋាភិបាលកម្ពុជា។
ដោយឡែក សាច់ញាតិរបស់ជនរងគ្រោះ និងជនរងគ្រោះផ្ទាល់នៅក្នុងព្រឹត្តិការណ៍កាលពី ៣ឆ្នាំមុននោះ បានឡើងរៀបរាប់ម្តងម្នាក់ៗ ពីព្រឹត្តិការណ៍ដែលកាលណោះ បានបណ្តាលឲ្យមនុស្ស ៤នាក់ស្លាប់ ម្នាក់បាត់ខ្លួន របួសធ្ងន់ ៣៩នាក់ និងមនុស្ស ២៣នាក់ត្រូវបានចោទប្រកាន់តាមផ្លូវតុលាការ។ កាលណោះ គឺជាមហាបាតុកម្មដែលផ្តើមផ្ទុះនៅតាមរោងចក្រនានានៅក្នុងទីក្រុងភ្នំពេញ ក្នុងបុព្វហេតុដើម្បីទាមទារការតំឡើងប្រាក់ខែគោលអប្បបរមា ១៦០ដុល្លារ ជូនដល់កម្មករ-កម្មការិនីកម្ពុជា។ ជាបាតុកម្មដែលធ្វើឡើងចំពេលមានភាពរំជើបរំជួលខាងផ្នែកនយោបាយ ក្រោយពីការបោះឆ្នោតជាតិនៅឆ្នាំ ២០១៣ ហើយដែលគណបក្សប្រឆាំងកាលណោះ មិនព្រមចូលប្រជុំសភា និងបានដឹកនាំចលនាបាតុកម្មប្រចាំខែនៅលើទីលានប្រជាធិបតេយ្យ។
លោក វន ពៅ ប្រធានសមាគមសេដ្ឋកិច្ចក្រៅប្រព័ន្ធហៅកាត់ថា (IDEA) ដែលរងការវាយដុំ និងត្រូវបានតុលាការកាត់ទោសឲ្យជាប់ពន្ធនាគាររយៈពេល ៤ឆ្នាំ និងពិន័យជាប្រាក់ ៨លានរៀលនោះ បានរៀបរាប់ពីការឈឺចាប់ក្នុងកំឡុងពេលបង្ក្រាប ការចាប់ខ្លួន និងការឃុំខ្លួននៅឯពន្ធនាគារត្រពាំងថ្លុង ក្នុងខេត្តកំពង់ចាម ដោយអះអាងថា លោកស្ទើរតែគ្មានជីវិតរស់នៅផង។
សូមបញ្ជាក់ថា តាមគម្រោង ក្រុមជនរងគ្រោះពីព្រឹត្តិការណ៍បង្ក្រាបបាតុកម្មនៅតាមបណ្តោយផ្លូវវេងស្រេងក្នុងសង្កាត់ស្ទឹងមានជ័យ និងបាតុកម្មនៅមុខរោងចក្រយាកជីនក្នុងតំបន់សេដ្ឋកិច្ចពិសេសក្រុងភ្នំពេញ កាលពីឆ្នាំ ២០១៤នោះ គ្រោងជួបជុំគ្នានៅលើកំណាត់ផ្លូវវេងស្រេង។ ប៉ុន្តែបានបង្វែរមកប្រារព្ធពិធីនៅក្នុងទីស្នាក់ការសមាគមសេដ្ឋកិច្ចក្រៅប្រព័ន្ធ (IDEA) របស់លោក វន ពៅ ដែលមានទីតាំងស្ថិតនៅសង្កាត់ទឹកល្អក់១ រាជធានីភ្នំពេញទៅវិញ។ មូលហេតុ គឺអាជ្ញាធរក្រុងភ្នំពេញ មិនអនុញ្ញាតិ។ អ្វីដែលជាការកត់សំគាល់ដែរ ការប្រារព្ធខួប៣ឆ្នាំនៃការបង្ក្រាបបាតុកម្មកាលពីឆ្នាំ២០១៤នៅថ្ងៃនេះ មិនមានការចូលរួមពីតំណាងសហជីពធំៗនៅកម្ពុជា ពិសេសតំណាងពីគណបក្សប្រឆាំងនោះទេ។
គួរជម្រាបជូនដែរថា ការប្រារព្ធខួបនៅថ្ងៃនេះ ក្រៅតែពីការរំលឹកពីការឈឺចាប់ ជនរងគ្រោះក៏បានអំពាវនាវឲ្យតុលាការកម្ពុជា ទម្លាក់ចោលការចោទប្រកាន់តាមផ្លូវតុលាការ និងបានអំពាវនាវឲ្យអាជ្ញាធរ និងអ្នកពាក់ព័ន្ធស្វែងរកយុត្តិធម៌ជូនដល់ពួកគេផងដែរ៕
No comments:
Post a Comment