 |
| ទិដ្ឋភាពភូមិស្រែគរ ឃុំស្រែគរ ស្រុកសេសាន ខេត្តស្ទឹងត្រែង កាលពីថ្ងៃទី២៦ ខែមីនា ឆ្នាំ២០១៦។ RFA/Chuop Sereyroth |
ពលរដ្ឋរស់នៅឃុំស្រែគរ ស្រុកសេសា ខេត្តស្ទឹងត្រែង ត្អូញត្អែរសមត្ថកិច្ចចម្រុះដាក់កុងត្រូលចាំស្ទាក់ទារប្រាក់ពីពលរដ្ឋដឹកជញ្ជូនឈើ ក្រោមហេតុផលការប្រមូលអនុផលព្រៃឈើខុសច្បាប់ត្រូវបង់ប្រាក់សូកប៉ាន់ដើម្បីជាថ្នូរដោះលែង។ មន្ត្រីឃ្លាំមើលសិទ្ធិមនុស្សចាត់ទុកការដឹកជញ្ជូនឈើជាករណីខុសច្បាប់ ក៏ប៉ុន្តែបើសមត្ថកិច្ចជំរិតទារប្រាក់ពីរពលរដ្ឋរឹតតែល្មើសច្បាប់មួយករណីទៀត។
ពលរដ្ឋសម្តែងការមិនសប្បាយចិត្តនៅគ្រាដែលពួកគេបានបង្ខំចិត្តបង់ប្រាក់ឲ្យសមត្ថកិច្ចតាមដងផ្លូវអស់ជិត ១លានរៀល ទម្រាំរថយន្តដឹកជញ្ជូនឈើរបស់ពួកគាត់ដល់គោលដៅ។ លើសពីនេះ សមត្ថកិច្ចទាំងនោះមាននគរបាល មន្ត្រីអាវុធហត្ថ អង្គការការពារបរិស្ថាន និងមន្ត្រីរដ្ឋបាលព្រៃឈើ បានដាក់កុងត្រូលពីចំណុចផ្លូវចូលឃុំតាឡាត ស្រុកសេសាន រហូតដល់ខេត្តរតនគិរី ចំនួន ១០ទីតាំង។
ពលរដ្ឋរស់នៅឃុំស្រែគរ ស្រុកសេសាន ខេត្តស្ទឹងត្រែង ថ្លែងសុំមិនបញ្ចេញឈ្មោះ រៀបរាប់ថា ពួកគាត់បានប្រមូលទិញឈើពីអ្នកភូមិស្រែគរ ប្រមូលបានពីតំបន់បាតអាងនៃទំនប់វារីអគ្គិសនីសេសានក្រោមពីរ ឬឈើដែលនៅសេសសល់ដែលគេកាប់ក្នុងព្រៃជាយូរមកហើយ ដោយដឹកជញ្ជូនទៅលក់នៅខេត្តរតនគិរី។ ពួកគាត់ត្រូវចំណាយប្រាក់បង់ឲ្យសមត្ថកិច្ចទាំងនោះមួយកន្លែង ៤ម៉ឺនរៀល ឡើងដល់ជិត ២០ម៉ឺនរៀលក្នុងមួយស្ថាប័ន ទើបរថយន្តរបស់លោកដឹកដល់គោលដៅ។
លោកថា ប្រសិនបើលោកពុំបង់ប្រាក់ឲ្យសមត្ថកិច្ចទាំងនោះទេ គេនឹងឃាត់រថយន្តរបស់លោកទុក ហើយប្រាប់ថា គេនឹងអនុវត្តតាមច្បាប់។ លោកបន្តថា ក្រុមពលរដ្ឋមិនសប្បាយចិត្តចំពោះការជំរិតទារប្រាក់ពីសមត្ថកិច្ចទាំងនោះថា យកតួនាទីគំរាមបង្ខំឱ្យពលរដ្ឋបង់ប្រាក់បង្កការប៉ះពាល់ជីវភាពប្រចាំថ្ងៃ៖ «បើយើងអត់បង់លុយក៏ទៅអត់កើតដែរ បើឲ្យលុយតិចក៏គេមិនឲ្យយើងចេញដែរ។ អស់មួយលានដែរ ឡានអាហើមតូចតាចយើងដល់គោលដៅ»។
អ្នកនាំពាក្យសាលាខេត្តស្ទឹងត្រែង លោក ម៉ែន គុង បដិសេធមិនអធិប្បាយករណីនេះទេ ដោយលោកប្រាប់ថា កំពុងជាប់រវល់។ ចំណែកមេបញ្ជាការកងរាជអាវុធហត្ថខេត្តស្ទឹងត្រែង លោក អៀង វ៉ាន់ឌី បដិសេធថា កម្លាំងអាវុធហត្ថរបស់លោកពុំមានឈរជើងនៅតំបន់នោះទេ។ លោកទទួលស្គាល់ថា ការជំរិតទារប្រាក់ពីពលរដ្ឋ គឺជាករណីខុសច្បាប់ ហើយបើពលរដ្ឋប្រមូលអនុផលព្រៃឈើគ្មានការអនុញ្ញាត ក៏ជាករណីខុសច្បាប់ដែរ៖ «ខ្ញុំមិនអាចសុំការអន្តរាគមន៍រឿងនេះបានទេ ព្រោះវាជាករណីខុសច្បាប់ ព្រោះច្បាប់គឺដឹកជញ្ជូនអនុផលព្រៃឈើ។ តែខ្ញុំបញ្ជាក់ម្ដងទៀតថា កម្លាំងអាវុធហត្ថខ្ញុំគ្មានកម្លាំងណាមួយនៅកន្លែងនោះដែរ»។
មេឃុំស្រែគរ លោក សៀក មេគង្គ កត់សម្គាល់ថា កន្លងទៅអភិបាលខេត្តស្ទឹងត្រែង លោក ម៉ុម សារឿន ធ្លាប់ណែនាំឲ្យសមត្ថកិច្ចពាក់ព័ន្ធយោគយល់ដល់ពលរដ្ឋរស់នៅឃុំស្រែគរ ប្រមូលអនុផលព្រៃឈើបន្តិចបន្តូចលក្ខណៈគ្រួសារ នៅគ្រាដែលភូមិឋានរបស់ពួកគាត់នៅតំបន់នោះនឹងក្លាយជាអាងស្តុកទឹកនៃទំនប់វារីអគ្គិសនីសេសានក្រោមពីរ។
លោកថា ប្រមុខរដ្ឋាភិបាលក៏ធ្លាប់ហាមមិនឲ្យមានកុងត្រូលជជុះខុសច្បាប់តាមផ្លូវចាំស្ទាក់ឃាត់រថយន្តពលរដ្ឋទារលុយដែលនាំឲ្យខាតបង់ប្រយោជន៍ប្រជាពលរដ្ឋទាំងពេលវេលា និងថវិកា៖ «ចង់បំបាត់បទល្មើសគឺមិនមែនធ្វើពីក្រោមឡើងទៅទេ គឺយើងធ្វើពីលើចុះក្រោម គឺយើងគួរតែអ្នកណាដែលទិញឈើ។ យើងរកប្រភពហ្នឹងឲ្យបាន»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តស្ទឹងត្រែង លោក ហូ សំអុល ចាត់ទុកការដាក់កុងត្រូលជជុះជំរិតទារប្រាក់របស់សមត្ថកិច្ចជាករណីខុសច្បាប់ និងផ្ទុយពីបទបញ្ជាប្រមុខរដ្ឋាភិបាលផង។ លោកសុំឲ្យអាជ្ញាធរខេត្តត្រូវមានវិធានការបន្ទាន់ដោះស្រាយបញ្ហានេះផ្អែកតាមច្បាប់ និងគោលការណ៍ណែនាំរបស់អភិបាលខេត្ត លោក ម៉ុម សារឿន។
លោកកត់សម្គាល់ថា ការដាក់កុងត្រូលជជុះជំរិតទារប្រាក់ពីអ្នកដឹកឈើគឺស្ទើរតែកើតមានគ្រប់ស្រុកនៅខេត្តស្ទឹងត្រែង ជាពិសេសនៅស្រុកថាឡាបរិវ៉ាត់៖ «គួរតែអាជ្ញាធរខេត្តគួរតែធ្វើកិច្ចការហ្នឹងឲ្យបានម៉ឺងម៉ាត់ ព្រោះអីខាតប្រយោជន៍ពលរដ្ឋច្រើន ទាំងពេលវេលា និងថវិកា»។
កាលពីចុងឆ្នាំ២០១៦ ពលរដ្ឋរស់នៅស្រុកថាឡាបរិវ៉ាត់ បានលើកឡើងក្នុងវេទិកាសាធារណៈដោយបញ្ជាក់ថា សមត្ថកិច្ច និងមន្ត្រីរដ្ឋបាលព្រៃឈើបានទារប្រាក់ពីពលរដ្ឋដឹកជញ្ជូនឈើច្រើនលើសលប់ ហើយកន្លងទៅលោកនាយករដ្ឋមន្ត្រី ហ៊ុន សែន ធ្លាប់ណែនាំហាមមិនឲ្យមានកុងត្រូលជជុះខុសច្បាប់តាមផ្លូវស្ទាក់ឃាត់រថយន្តពលរដ្ឋទារលុយនាំឲ្យប៉ះពាល់ដល់ជីវភាពពលរដ្ឋ៕
No comments:
Post a Comment