ពលរដ្ឋរស់នៅក្រុងស្ទឹងត្រែង រិះគន់ការអន្តរាគមន៍សង្គ្រោះអគ្គីភ័យរបស់ស្នងការដ្ឋាននគរបាលខែត្រ និងអាជ្ញាធរខែត្រស្ទឹងត្រែង ថាមានលក្ខណៈយឺតយ៉ាវ និងមានបញ្ហាផ្នែករថយន្ត ជាពិសេសបច្ចេកទេសពន្លត់ក៏ហាក់នៅមានកម្រិតដែរ។ ការរិះគន់នេះ ធ្វើឡើងក្រោយពីអគ្គីភ័យបានឆេះផ្ទះពលរដ្ឋនៅក្រុងស្ទឹងត្រែង ចំនួន ១ខ្នងជាថ្មីទៀតកាលពីយប់ថ្ងៃទី២ មករា។តើមន្ត្រីរដ្ឋាភិបាលបានឆ្លើយតបយ៉ាងណាចំពោះការរិះគន់នេះ?
ពលរដ្ឋរស់នៅក្រុងស្ទឹងត្រែង ខែត្រស្ទឹងត្រែង អំពាវនាវសុំឲ្យរាជរដ្ឋាភិបាលរកមធ្យោបាយគ្រប់គ្រងគ្រោះអគ្គីភ័យ និងបង្កើនផែនការគ្រប់គ្រងថវិកាសង្គ្រោះអគ្គីភ័យឲ្យមានប្រសិទ្ធភាព ដែលធានាថាការផ្តល់សេវាពន្លត់អគ្គីភ័យរបស់មន្ត្រីរដ្ឋាភិបាល អាចជឿទុកចិត្តបាន។
ការអំពាវនាវនេះ ធ្វើឡើងនៅថ្ងៃទី៣ មករា ខណៈការអន្តរាគមន៍ពន្លត់អគ្គីភ័យរបស់អាជ្ញាធរនៅខែត្រស្ទឹងត្រែង នៅតែមានភាពយឺតយ៉ាវដដែលៗ មិនអាចពន្លត់អគ្គីភ័យឆេះផ្ទះពលរដ្ឋមួយខ្នងទាន់ពេល។
ពលរដ្ឋរស់នៅក្រុងស្ទឹងត្រែង លោក ខន ខេមរា មើលឃើញថា ការអន្តរាគមន៍ពន្លត់អគ្គីភ័យរបស់អាជ្ញាធររដ្ឋាភិបាលនៅខែត្រស្ទឹងត្រែង ហាក់ពុំមានប្រសិទ្ធភាពទេ ការអន្តរាគមន៍ពន្លត់នៅមានភាពចន្លោះប្រហោងច្រើន ដូចជាខ្វះការត្រៀមលក្ខណៈពន្លត់ ទុយោទឹកមានបញ្ហា និងយឺតយ៉ាវ។ លោកថា កាលពីយប់ថ្ងៃទី២ មករា ភ្លើងបានឆេះផ្ទះពលរដ្ឋមួយខ្នងនៅក្រុងស្ទឹងត្រែង ប្រហែលជិតកន្លះម៉ោង ទើបរថយន្តពន្លត់អគ្គីភ័យរបស់ស្នងការខែត្រមកពន្លត់ ហើយសកម្មភាពពន្លត់នោះ ក៏មានបញ្ហាទុយោបាញ់ទឹកស្ទះមួយសន្ទុះធំ បង្កឲ្យភ្លើងកាន់តែរីកធំឡើងលំបាកពន្លត់៖ «សេវាកម្មពន្លត់ភ្លើងអីហ្នឹងដូចមិនរហ័សរហួនតែម្តងនិយាយរួមទៅ។ ម្យ៉ាងទៀតរដូវខ្យល់ចឹងគួរតែត្រៀមលក្ខណៈប្រចាំការជាប់រហូតចឹង។ ឆេះចឹងកន្លះម៉ោងបានមកដល់។ ឆេះចង់អស់ហើយបានមក»។
ពលរដ្ឋម្នាក់ទៀតរស់នៅក្រុងស្ទឹងត្រែង គឺលោក តែន ថន ដែលត្រូវអគ្គីភ័យឆេះតូបរបស់គាត់ចំនួន ៣តូប កាលពីខែមេសា ឆ្នាំ២០១៦ បានត្អូញត្អែរចំពោះសេវាកម្មពន្លត់អគ្គីភ័យរបស់ស្នងការដ្ឋានខែត្រស្ទឹងត្រែង ថាការពន្លត់ខ្វះបច្ចេកទេស ឡានទឹកអត់មានជណ្ដើរ ពុំមានទុយោបាញ់ទឹកវែង ហើយការបាញ់ទឹកពីចម្ងាយក៏មិនចំគោលដៅ។ លោករំឭកថា ព្រឹត្តិការណ៍ឆេះផ្សារស្ទឹងត្រែង កន្លងទៅ ភ្លើងផ្ដើមមានទំហំតូចទេ តែមន្ត្រីជំនាញហាក់យឺតយ៉ាវក្នុងការពន្លត់ បណ្ដាលឲ្យភ្លើងរីករាលដាលធំឡើងឆេះគ្មានសល់។
លោកថា គ្រាដែលឆេះផ្សារឃើញមានឡានទឹកចំនួនពីរគ្រឿងរបស់ស្នងការដ្ឋានខែត្រស្ទឹងត្រែង ហើយក្នុងចំណោមពីរគ្រឿងនោះមានតែមួយគ្រឿងប៉ុណ្ណោះដែលប្រើការបាន។ បញ្ហានេះលោកយល់ថា ជាការធ្វេសប្រហែសរបស់នគរបាលផ្នែកអគ្គីភ័យ៖ «ថ្ងៃឆេះហ្នឹងខ្ញុំឃើញជាក់ស្តែង គឺឡានទឹកពីរគ្រឿងបានតែមួយគ្រឿងទេ ដែលប្រើការបាន។ បើតាមបច្ចេកទេសឡានអគ្គីភ័យខុសស្តង់ដារហើយ ពីព្រោះថាឡានទី១ អត់មានជណ្ដើរ ទី២ ទុយោវែងក៏អត់មានដែរ។ ការបាញ់ក្បាលម៉ាស៊ីនពីចម្ងាយ គឺមិនល្អទេ មិនចំគោលដៅទេ»។
លោក តែន ថន បន្ថែមថា ចំណុចខ្វះខាតទាំងនេះ គឺជាមូលដ្ឋានសំខាន់ដែលអាជ្ញាធររដ្ឋាភិបាលគួរតែលើកជារបៀបវារៈកែតម្រូវឡើងវិញ ក៏ប៉ុន្តែការអន្តរាគមន៍សង្គ្រោះនៅតែមានការខ្វះចន្លោះដដែលៗ។
មន្ត្រីសម្របសម្រួលសមាគមអាដហុក (ADHOC) ខែត្រស្ទឹងត្រែង លោក ហូ សំអុល មើលឃើញថា អាជ្ញាធររដ្ឋាភិបាលហាក់ដូចជាធ្វេសប្រហែសក្នុងការគ្រប់គ្រងគ្រោះមហន្តរាយជាយថាហេតុ បង្កឡើងដោយអគ្គីភ័យ។ លោកកត់សម្គាល់ថា កន្លងទៅ ពលរដ្ឋដែលជួបបាតុភាពនេះពុំឃើញមានមន្ត្រីជំនាញធ្វើការពន្លត់ទាន់ពេលនោះទេ បានត្រឹមតែបាញ់ទប់មិនឲ្យឆេះរាលដាលប៉ុណ្ណោះ។
លោកថា រដ្ឋាភិបាលគួររកគន្លឹះកែលំអចំណុចខ្វះខាតទាំងនេះ ដើម្បីធានាសុវត្ថិភាព និងទ្រព្យរបស់ពលរដ្ឋ៖ «បច្ចេកទេសជួយសង្គ្រោះរបស់គាត់នៅមានកម្រិត ដូចជាមិនដែលឃើញមានការហាត់សមអីទេ ដូចជាប្រយោលៗទៅ ដល់ពេលកើតឡើងធ្វើឲ្យមានការរាំងស្ទះ ឬមានការយឺតយ៉ាវ»។
កាលពីឆ្នាំ២០១០ អគ្គីភ័យបានឆេះផ្ទះពលរដ្ឋនៅខាងត្បូងផ្សារខែត្រស្ទឹងត្រែង អស់ជាង ១០ខ្នង ហើយកាលពីខែមេសា ឆ្នាំ២០១៦ អគ្គីភ័យបានឆេះផ្សារខែត្រស្ទឹងត្រែង ទាំងស្រុងអស់តូបលក់ដូររបស់អាជីវករជាង ១ពាន់តូប និងខូចខាតសម្ភារៈគិតជាប្រាក់រាប់លានដុល្លារ។
អាស៊ីសេរី មិនអាចទាក់ទងអ្នកនាំពាក្យក្រសួងមហាផ្ទៃ លោក ខៀវ សុភ័គ ដើម្បីសុំការបញ្ជាក់បញ្ហានេះបានទេនៅថ្ងៃទី៣ មករា។
ស្នងការខែត្រស្ទឹងត្រែង លោក ម៉ៅ តារា បដិសេធថា រថយន្តពន្លត់អគ្គីភ័យរបស់មន្ត្រីជំនាញពុំមានស្ទះទុយោទឹកនោះទេ ហើយការបាញ់ទឹក មន្ត្រីជំនាញមានបច្ចេកទេសពន្លត់ច្បាស់លាស់។ លោកថាពលរដ្ឋអាចនឹងមិនបានយល់ពីបច្ចេកទេសបាញ់ទឹករបស់មន្ត្រីជំនាញ ហើយការបាញ់ទឹកសំខាន់ គឺបាញ់ដើម្បីការពារកុំឲ្យឆេះរាលដាល។ លោកថា នគរបាលផ្នែកពន្លត់អគ្គីភ័យមានជំនាញត្រឹមត្រូវឆ្លងកាត់ការហ្វឹកហាត់ច្បាស់លាស់។ លោកសម្ដែងសុទិដ្ឋិនិយមថា ប្រតិបត្តិការពន្លត់អគ្គីភ័យរបស់នគរបាលកាលពីយប់ថ្ងៃទី២ មករា ធ្វើឡើងដោយជោគជ័យ និងបានពន្លត់ភ្លើងមិនឲ្យឆេះរាលដាល ខណៈមានផ្ទះពលរដ្ឋច្រើនខ្នងនៅជាប់នឹងផ្ទះដែលឆេះនោះ៖ «យប់មិញយើងបានជោគជ័យក្នុងការពារ ពិនិត្យជាក់ស្តែងផ្ទះជាប់ៗគ្នាប្រហែលជា ១ម៉ែត្រទៅ ២ម៉ែត្រពីផ្ទះឆេះហ្នឹង។ យប់មិញហ្នឹងគឺយើងភ័យមែនទែន។ យើងត្រៀមរថយន្តតាមបណ្ដាស្រុកជិតៗមានស្រុកសេសាន អី យើងត្រៀម តែដោយសារមន្ត្រីជំនាញយើងគាត់មានបទពិសោធន៍ក្នុងការបាញ់ទប់ស្កាត់»។
រថយន្តពន្លត់អគ្គីភ័យរបស់ស្នងការដ្ឋានខែត្រស្ទឹងត្រែង មាន ៦គ្រឿង ក្នុងនោះនគរបាលបានត្រៀមសង្គ្រោះនៅក្រុងស្ទឹងត្រែង មាន ៣គ្រឿង ហើយ ៣គ្រឿងទៀតនៅស្រុកសៀមបូក ស្រុកសេសាន និងស្រុកសៀមប៉ាង។
អ្នកនាំពាក្យសាលាខែត្រស្ទឹងត្រែង លោក ម៉ែន គុង បញ្ជាក់យ៉ាងខ្លីថា ក្តីបារម្ភរបស់ពលរដ្ឋជុំវិញបាតុភាពនេះ អាជ្ញាធរខែត្រស្វាគមន៍ទទួលយកដើម្បីជាមូលដ្ឋានពង្រឹងការពារបន្ថែមទៀត។ លោកថា អាជ្ញាធរខែត្រនឹងអនុវត្តគោលការណ៍ដែលបានកំណត់ ទាក់ទិនវិធានការគ្រប់គ្រងគ្រោះអគ្គីភ័យផ្អែកតាមការណែនាំរបស់ក្រសួងមហាផ្ទៃ ឬរដ្ឋាភិបាល៖ «អាជ្ញាធរខែត្រនឹងអនុវត្តតាមគោលការណ៍ដែលបានកំណត់រួចហើយ ទាក់ទិនទៅនឹងការងារគ្រប់គ្រងគ្រោះអគ្គីភ័យទាំងអស់នេះ ដោយមានការណែនាំពីក្រសួងមហាផ្ទៃ ក៏ដូចជារដ្ឋាភិបាល»។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ មើលឃើញថា បេសកកម្មជួយអន្តរាគមន៍ពន្លត់អគ្គីភ័យរបស់រដ្ឋាភិបាលហាក់នៅមិនទាន់មានលក្ខណៈគ្រប់គ្រាន់នៅឡើយ ខណៈស្ថានភាពគ្រោះអគ្គីភ័យកើតឡើងដដែល ក៏ប៉ុន្តែដំណោះស្រាយក៏ហាក់នៅដដែលដែរ មានន័យថា ពុំមានការរីកចម្រើននោះទេ។ លោកថា ដើម្បីអន្តរាគមន៍ជួយពលរដ្ឋរងគ្រោះជាយថាហេតុនោះ អាជ្ញាធរត្រូវតែមានវិធានការបង្កើនរថយន្តពន្លត់អគ្គីភ័យនៅតាមបណ្ដាខែត្រនានា ជាពិសេសខែត្រនៅតំបន់ដាច់ស្រយាល ហើយទីតាំងផ្គត់ផ្គង់ទឹកក្នុងការពន្លត់អគ្គីភ័យត្រូវតែដំណើរការរហូត៖ «រថយន្តពន្លត់អគ្គីភ័យចាំបាច់ត្រូវតែមានរថយន្តពន្លត់ សម្ភារ មធ្យោបាយគ្រប់គ្រាន់ទាំងធនធានមនុស្សបច្ចេកទេស និងការប្រើប្រាស់ទឹក ជាដើម។ វាគួរតែមានចំនួនប្រើការបាន ព្រោះកន្លងមកយើងឃើញតែខ្វះខាត ហើយបេសកកម្មជួយពលរដ្ឋមើលទៅហាក់ដូចជាមិនមានលក្ខណៈគ្រប់គ្រាន់»។
លោក សន ជ័យ យល់ថា រដ្ឋាភិបាលអនុវត្តច្បាប់ស្ដីពីការបង្ការ និងពន្លត់អគ្គីភ័យគួរតែមានផែនការដឹកនាំ និងរចនាសម្ព័ន្ធត្រឹមត្រូវ ជាពិសេសត្រូវមានកញ្ចប់ថវិកាទ្រទ្រង់បេសកកម្មគួរឲ្យទុកចិត្ត ដែលធានាថាការអនុវត្តច្បាប់នេះមានប្រសិទ្ធភាព។ បាតុភាពអគ្គីភ័យនៅខែត្រស្ទឹងត្រែង កាលពីឆ្នាំ២០១៦ កើតមាន ២ករណី ក្នុងនោះឆេះផ្សារថ្មខែត្រស្ទឹងត្រែង អស់ជាង ១ពាន់តូប និងឆេះផ្ទះពលរដ្ឋមួយខ្នងកាលពីយប់ថ្ងៃទី២ មករា៕
No comments:
Post a Comment