 |
| ពលរដ្ឋប្រមាណ ១០០នាក់មកពីឃុំដំរីផុង ស្រុកឆ្លូង ខេត្តក្រចេះ តវ៉ានៅខុទ្ទកាល័យលោកនាយករដ្ឋមន្ត្រី ហ៊ុន សែន សុំអន្តរាគមន៍ឲ្យពួកគាត់បានកាន់កាប់ស្របច្បាប់លើដីដែលពួកគាត់កំពុងអាស្រ័យផល និងស្នើសុំដោះលែងអ្នកភូមិ ៣នាក់ដែលត្រូវតុលាការចាប់ឃុំខ្លួន នៅថ្ងៃទី១៥ ខែមីនា ឆ្នាំ២០១៦។ RFA/Sochivy |
អង្គការសង្គមស៊ីវិលនិយាយថា តួលេខករណីបញ្ហាដីធ្លីរបស់ប្រជាពលរដ្ឋពាក់ព័ន្ធជាមួយក្រុមហ៊ុនទទួលបានដីសម្បទានសេដ្ឋកិច្ច នៅតែមាន គឺមិនទាន់បានដោះស្រាយចប់នៅឡើយ។ មន្ត្រីរដ្ឋាភិបាលថា ការលើកឡើងពីបញ្ហានេះជាការមិនយល់ពីនីតិវិធី។
មន្ត្រីសម្របសម្រួលគម្រោងកំណែទម្រង់ដីធ្លី នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សូផាត មានប្រសាសន៍ថា ករណីជម្លោះដីធ្លីជាមួយក្រុមហ៊ុនសម្បទានសេដ្ឋកិច្ចដែលមានយូរមកហើយនោះ នៅតែអូសបន្លាយរហូតមកដល់ពេលនេះ ជាពិសេសក្នុងចំណោមករណីដីធ្លីចំនួន៤២ ដែលលោកកំពុងធ្វើការ៖ «៤២ករណីនេះ គឺខ្ញុំសំដៅទៅលើករណីដីធ្លី មិនមែនតែសម្បទានសេដ្ឋកិច្ចទេ។ ប៉ុន្តែនៅក្នុងហ្នឹងក៏មានសម្បទានសេដ្ឋកិច្ចមួយចំនួនដែរ ដែលខ្ញុំធ្វើការជាមួយ ជាពិសេសនៅមណ្ឌលគិរី រតនគិរី កោះកុង ហើយនិងកំពង់ស្ពឺ អីហ្នឹង។ យើងឃើញថាមានការដោះស្រាយអីអ៊ីចឹង តែគ្រាន់តែជាការសន្យា ឬក៏ប្រជុំដោះស្រាយ ហើយមួយចំនួនក៏មានការដោះស្រាយអ៊ីចឹងដែរ ប៉ុន្តែបើថាឲ្យបញ្ចប់នោះ គឺថាមិនទាន់បញ្ចប់នៅឡើយទេ គឺនៅតែមានប្រជាពលរដ្ឋរងគ្រោះ ហើយបន្តការតវ៉ានៅឡើយ»។
ប្រសាសន៍របស់លោក វណ្ណ សូផាត ជាការបញ្ជាក់ចំពោះសេចក្ដីថ្លែងរបស់រដ្ឋមន្ត្រីក្រសួងបរិស្ថាន លោក សាយ សំអាល់ ក្នុងសន្និសីទសារព័ត៌មាននៅថ្ងៃទី១៩ មករា។ លោក សាយ សំអាល់ ថ្លែងថា បញ្ហាទំនាស់ដីធ្លីជាមួយក្រុមហ៊ុនសម្បទានសេដ្ឋកិច្ច ត្រូវបានដោះស្រាយបញ្ចប់ហើយ៖ «អ្វីដែលនៅសេសសល់ គឺការចុះបញ្ជីដីធ្លី អាហ្នឹងនៅមែន ព្រោះវាច្រើន។ យើងធ្វើមិនទាន់បានទាំងអស់ទេ។ តែយើងនៅធ្វើជាបណ្ដើរៗ ដែលយើងកំពុងធ្វើបណ្ដើរៗរាល់ថ្ងៃនេះ។ អាហ្នឹងនិយាយមែនទែនទៅ គឺអស់ហើយ ចប់ហើយ។ តែអង្គការសង្គមស៊ីវិលលោកជួនកាល គាត់មិនដែលបានមកជជែកជាមួយយើង។ គាត់មិនដែលបានមកពិគ្រោះជាមួយគ្នា គាត់បែរជាចេញរបាយការណ៍ ចេញទិន្នន័យផ្សេងពីយើងទៅវិញ»។
លោក សាយ សំអាល់ មិនបានបញ្ជាក់ពីចំនួនទំនាស់ដែលខាងលោកដោះស្រាយទេ ប៉ុន្តែលោក វណ្ណ សូផាត ឲ្យដឹងថា តួលេខករណីដីធ្លីដែលមជ្ឈមណ្ឌលសិទ្ធិមនុស្សកម្ពុជា បានកត់ត្រាទុកចាប់តាំងពីឆ្នាំ២០០៧ រហូតមកដល់បច្ចុប្បន្ននេះ មានចំនួនជាង ៣០០ករណី។ លោកថា ករណីដោះស្រាយបានខ្លះ គឺករណីតូចៗ៖ «យើងឃើញថាក្នុងចំណោម ៤២ករណីនេះ មានតែ ៥ ទៅ ៦ករណី ត្រូវបានដោះស្រាយ។ ប៉ុន្តែអាហ្នឹងជាករណីដែលដីទំហំតូច ហើយមិនមែនជាដីសម្បទានសេដ្ឋកិច្ចទេ។ អ៊ីចឹងយើងឃើញថា ដីដែលអាចដោះបានហ្នឹង គឺជាដីដែលមិនពាក់ព័ន្ធនឹងដីសម្បទានសេដ្ឋកិច្ច ហើយជាដីមានទំហំតូចៗត្រឹម ១០០ហិកតារចុះ។ តែយើងអត់ឃើញមានដីសម្បទានសេដ្ឋកិច្ចកាត់មកប្រជាពលរដ្ឋវិញ ជាការបញ្ចប់ជម្លោះដីធ្លីតែម្ដងនោះ គឺយើងអត់ឃើញមានទេ»។
ទន្ទឹមគ្នានេះ ប្រធានគ្រប់គ្រងផ្នែកអង្កេតនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត មានប្រសាសន៍បញ្ជាក់បន្ថែមថា បញ្ហាទំនាស់ដីធ្លីជាមួយក្រុមហ៊ុនសម្បទានសេដ្ឋកិច្ច នៅតែមានប្រជាពលរដ្ឋច្រើនស្វែងរកដំណោះស្រាយនៅឡើយ មានជាអាទិ៍ ដូចជានៅខេត្តព្រះវិហារ ជាដើម។ លោកថា បញ្ហានេះ ជួនកាលស្ថិតនៅក្រោមការគ្រប់គ្រងរបស់ក្រសួងបរិស្ថាន ក្រសួងកសិកម្ម ឬក៏ខេត្ត៖ «ជម្លោះដីជាមួយអ្នកមានអំណាចអីនោះ គឺវានៅតែមាន កំពុងគគ្រឹកគគ្រេងណាស់។ យើងមិនបាច់មើលអីច្រើនទេថា តើបច្ចុប្បន្ននេះ ប្រជាពលរដ្ឋហ្នឹងគាត់តវ៉ារឿងដីធ្លីហើយឬនៅ? ជាពិសេសនៅទីក្រុងភ្នំពេញ គាត់នៅតវ៉ា បើសិនជាអស់ អាហ្នឹងបញ្ហាដីធ្លីចប់ហើយ ហើយចំពោះបញ្ហាដីសម្បទានសេដ្ឋកិច្ចក៏អ៊ីចឹងថា បើសិនជាមិនមានជម្លោះជាមួយក្រុមហ៊ុនដីសម្បទានដីសេដ្ឋកិច្ចទៀតទេ អាហ្នឹងបានយើងសន្មតថា វាត្រូវបានដោះស្រាយបញ្ចប់»។
ទាក់ទងនឹងករណីជម្លោះដីធ្លីនេះ កាលពីព្រឹកថ្ងៃទី១៨ មករា ក្រុមពលរដ្ឋមានទំនាស់ដីធ្លីជាមួយក្រុមហ៊ុនស្ករអំពៅនៅខេត្តកោះកុង ប្រមាណ ១០០នាក់ ដែលតំណាងឲ្យពលរដ្ឋ ១៧០គ្រួសារបាននាំគ្នាទៅក្រសួងរៀបចំដែនដី នគរូបនីយកម្ម និងសំណង់ ដើម្បីរកដំណោះស្រាយសម្រាប់ពួកគាត់ ដែលត្រូវក្រុមហ៊ុនទាំងពីរឈូសឆាយផ្ទះសម្បែង។ សម្រាប់ករណីដីសម្បទានសេដ្ឋកិច្ចមួយនេះ ក្រុមពលរដ្ឋនឹងរង់ចាំមើលលទ្ធផលដោះស្រាយក្រោយការជួបចរចាគ្នានៅថ្ងៃទី២០ មករា ខាងមុខនេះ៕
No comments:
Post a Comment