 |
| សហគមន៍ជម្លោះដីធ្លី តវ៉ានៅមុខការិយាល័យឧត្ដមស្នងការអង្គការសហប្រជាជាតិ ទទួលបន្ទុកសិទ្ធិមនុស្សប្រចាំនៅកម្ពុជា កាលពីថ្ងៃទី១៤ ខែតុលា ឆ្នាំ២០១៦។ RFA/Phan Yasy |
រដ្ឋាភិបាលកម្ពុជា សម្រេចអនុញ្ញាតឲ្យការិយាល័យអង្គការសហប្រជាជាតិ ទទួលបន្ទុកសិទ្ធិមនុស្ស បន្តវត្តមាននៅក្នុងប្រទេសកម្ពុជា ក្រោយពីមានភាពចម្រូងចម្រាសអំពីជោគវាសនានៃការិយាល័យសិទ្ធិមនុស្សមួយនេះ។ កន្លងទៅ រដ្ឋាភិបាលកម្ពុជា បានព្រមានថា បើអង្គការសហប្រជាជាតិ មិនបញ្ឈប់ការជ្រៀតជ្រែកការងារផ្ទៃក្នុងរបស់កម្ពុជា នោះទេ កម្ពុជា មិនអនុញ្ញាតឲ្យបន្តវត្តមានការិយាល័យសិទ្ធិមនុស្សអង្គការសហប្រជាជាតិ នោះទេ។
សេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ផ្សព្វផ្សាយនៅថ្ងៃទី២០ ធ្នូ ឲ្យដឹងថា រដ្ឋាភិបាលកម្ពុជា និងការិយាល័យឧត្តមស្នងការសិទ្ធិមនុស្សអង្គការសហប្រជាជាតិ កាលពីថ្ងៃទី១៩ ធ្នូ បានចុះអនុស្សរណៈនៃការយោគយល់ថ្មីមួយ ដែលជាកិច្ចព្រមព្រៀងទ្វេភាគីសម្រាប់កិច្ចសហប្រតិបត្តិការស្របច្បាប់របស់ការិយាល័យឧត្តមស្នងការសិទ្ធិមនុស្សអង្គការសហប្រជាជាតិនៅកម្ពុជា សម្រាប់រយៈពេល ២ឆ្នាំទៀត។
ក្រសួងការបរទេសអះអាងថា គោលបំណងនៃអនុស្សរណៈថ្មីនេះ គឺជាការប្រកាសពីបំណងរបស់ភាគីទាំងពីរ គឺកម្ពុជា និងអង្គការសហប្រជាជាតិ ក្នុងកិច្ចសហប្រតិបត្តិការអនុវត្តកម្មវិធីសហប្រតិបត្តិការបច្ចេកទេសលើវិស័យសិទ្ធិមនុស្ស និងដើម្បីបង្កើតក្របខ័ណ្ឌសហប្រតិបត្តិការដោយឈរលើមូលដ្ឋាននៃគោលបំណង និងគោលការណ៍ដែលមានចែងក្នុងធម្មនុញ្ញ នៃអង្គការសហប្រជាជាតិ មាត្រា២ កថាខណ្ឌទី៧ ដែលគូសបញ្ជាក់ថា ពុំមានបទបញ្ញត្តិណាមួយនៅក្នុងធម្មនុញ្ញអង្គការសហប្រជាជាតិ អនុញ្ញាតឲ្យអង្គការសហប្រជាជាតិ ចូលជ្រៀតជ្រែកកិច្ចការដែលឋិតក្រោមយុត្តាធិការរបស់ប្រទេសសមាជិកនីមួយៗឡើយ។
ក្រសួងការបរទេសសង្កត់ធ្ងន់ថា ការបន្តសុពលភាពអនុស្សរណៈជាថ្មីនេះ បានបញ្ជាក់ពីការប្ដេជ្ញាចិត្តយ៉ាងច្បាស់លាស់របស់រដ្ឋាភិបាលកម្ពុជា ក្នុងការលើកកម្ពស់ និងជំរុញគោលការណ៍នៃការគោរពសេរីភាពជាមូលដ្ឋាន និងលទ្ធិប្រជាធិបតេយ្យដូចមានចែងក្នុងរដ្ឋធម្មនុញ្ញកម្ពុជា។
បន្ថែមពីលើនេះ រដ្ឋាភិបាលកម្ពុជា នឹងប្ដេជ្ញាក្នុងភាពជាដៃគូជាមួយអង្គការសហប្រជាជាតិ ដើម្បីពង្រឹងការអនុវត្តអនុស្សរណៈនេះឲ្យមានប្រសិទ្ធភាព និងពេញលេញ ដោយផ្អែកលើការគោរពគ្នាទៅវិញទៅមក និងពុំជ្រៀតជ្រែកកិច្ចការផ្ទៃក្នុង សំដៅពង្រឹងបន្ថែមនូវនីតិរដ្ឋ និងការលើកកម្ពស់ការការពារ និងគោរពសិទ្ធិមនុស្សនៅកម្ពុជា។
ទោះជាយ៉ាងណាក៏ដោយ មុននឹងឈានដល់ការចុះអនុស្សរណៈអនុញ្ញាតឲ្យអង្គការសហប្រជាជាតិ អាចបន្តដាក់ការិយាល័យសិទ្ធិមនុស្សនៅកម្ពុជា ជាថ្មីនេះ រដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន កាលពីថ្ងៃទី២២ វិច្ឆិកា បានផ្ញើលិខិតទៅកាន់ឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្សនៅទីក្រុងហ្សឺណែវ (Geneva) ព្រមានបញ្ឈប់ការប្រតិបត្តិការរបស់ការិយាល័យសិទ្ធិមនុស្សអង្គការសហប្រជាជាតិនៅកម្ពុជា ប្រសិនបើមន្ត្រីនៃការិយាល័យនេះ បន្តធ្វើសកម្មភាពរបស់ខ្លួនដែលរដ្ឋាភិបាលកម្ពុជា ចាត់ទុកថាជាការជ្រៀតជ្រែកចូលកិច្ចការផ្ទៃក្នុងរបស់កម្ពុជា នោះ។ ក្រសួងការបរទេស ក៏ទាមទារឲ្យអង្គការសហប្រជាជាតិ បញ្ជាក់ការទទួលយកនូវអនុស្សរណៈថ្មីមួយដោយផ្អែកលើមូលដ្ឋាននៃគោលការណ៍គោរពអធិបតេយ្យភាព និងមិនជ្រៀតជ្រែកកិច្ចការផ្ទៃក្នុងរបស់កម្ពុជា បើមិនដូច្នោះទេ រដ្ឋាភិបាលកម្ពុជា មិនសម្រេចឲ្យបន្តមានវត្តមានការិយាល័យអង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា ឡើយ។
ការព្រមានធ្ងន់ៗរបស់លោក ប្រាក់ សុខុន ទៅលើអង្គការសហប្រជាជាតិដូចនេះ គឺជាការសម្ដែងការខឹងសម្បារបស់រដ្ឋាភិបាលកម្ពុជា ក្រោយពីតំណាងការិយាល័យអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា អ្នកស្រី វ៉ាន់ហ៊ី លី (Wan-Hea Lee) បានសម្ដែងមតិតាមបណ្ដាញសារព័ត៌មាន ឲ្យរដ្ឋាភិបាលកម្ពុជា ពន្យល់ពីការមិនអនុញ្ញាតឲ្យលោក សម រង្ស៊ី ប្រធានបក្សប្រឆាំងវិលចូលស្រុកវិញ ក្រោយពីលោក ហ៊ុន សែន បញ្ជាឲ្យសមត្ថកិច្ចខ្មែរត្រួតពិនិត្យ និងព្រមានមិនឲ្យមានយន្តហោះដឹកលោក សម រង្ស៊ី ចូលប្រទេសកម្ពុជា។ រដ្ឋាភិបាលកម្ពុជា ចាត់ទុកការសម្ដែងមតិដូចនេះរបស់អ្នកស្រី វ៉ាន់ហ៊ី លី គឺជាការជ្រៀតជ្រែកចូលកិច្ចការផ្ទៃក្នុងរបស់កម្ពុជា។ ទោះជាយ៉ាងណា សង្គមស៊ីវិលថាការបញ្ចេញទស្សនៈបែបនេះ មិនមែនជាការជ្រៀតជ្រែកការងារផ្ទៃក្នុងរបស់កម្ពុជា នោះទេ។
ជុំវិញការចុះអនុស្សរណៈថ្មីនៅពេលនេះ អ្នកនាំពាក្យឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្សនៅទីក្រុងហ្សឺណែវ អ្នកស្រី អាលីហ្សាប៊ែត ស្រូសែល្យ (Alizabeth Throssell) បញ្ជាក់ប្រាប់អាស៊ីសេរីតាមសារអេឡិចត្រូនិកថា យើងបានមកដល់ចំណុចព្រមព្រៀងគ្នាអាចទទួលយកបានទាំងសងខាង ហើយដែលភាគីទាំងសងខាងមានជំហររក្សានូវសុចរិតភាពនៃអនុស្សរណៈ។ អ្នកស្រីបញ្ជាក់បន្ថែមថា អង្គការសហប្រជាជាតិស្វាគមន៍ដែលភាគីទាំងពីរ សម្រេចបាននូវកិច្ចព្រមព្រៀងនៅពេលនេះ ហើយអង្គការសហប្រជាជាតិ ប្ដេជ្ញាបន្តផ្តល់នូវកិច្ចសហប្រតិបត្តិការជាមួយរដ្ឋាភិបាលកម្ពុជា ដើម្បីជំរុញការលើកកម្ពស់ និងការការពារសិទ្ធិមនុស្សនៅកម្ពុជា។
ការិយាល័យអង្គការសហប្រជាជាតិ ទទួលបន្ទុកសិទ្ធិមនុស្ស មានវត្តមាននៅកម្ពុជា តាំងពីឆ្នាំ១៩៩៣ ក្រោយពីកម្ពុជា មានកិច្ចព្រមព្រៀងសន្តិភាពទីក្រុងប៉ារីស ក្នុងការបញ្ចប់ជម្លោះនយោបាយផ្ទៃក្នុងកាលពីឆ្នាំ១៩៩១។
ទោះជាយ៉ាងណា អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា អ្នកស្រី រ៉ូណា ស្មីត (Rhona Smith) បានវាយតម្លៃស្ថានការណ៍សិទ្ធិមនុស្សក្រោយការបំពេញទស្សនកិច្ចនៅកម្ពុជា កាលពីចុងខែតុលា ថា ការគោរពសិទ្ធិមនុស្ស និងការអនុវត្តច្បាប់នៅកម្ពុជា នៅមានការរើសអើង និងមាននិន្នាការនយោបាយ។ លើសពីនេះ សេរីភាពក្នុងការជួបប្រជុំ សេរីភាពក្នុងការសម្ដែងមតិ និងសេរីភាពក្នុងការបង្កើតសមាគមក៏នៅតែត្រូវបានរដ្ឋាភិបាលរឹតត្បិតនៅឡើយ៕
No comments:
Post a Comment