 |
| ពលរដ្ឋមានជម្លោះដីធ្លីជាមួយក្រុមហ៊ុនមកពីខេត្តកោះកុង តវ៉ានៅខាងមុខរដ្ឋសភា នៅរសៀលថ្ងៃទី២០ ខែធ្នូ ឆ្នាំ២០១៦។ RFA/So Chivy |
ពលរដ្ឋជាង ១០០នាក់មានជម្លោះដីធ្លីជាមួយភាគីក្រុមហ៊ុនលោកឧកញ៉ា ហ៊ុយ ហេង ក្រុមហ៊ុនស្ករអំពៅឈ្មោះ កោះកុង ស៊ូហ្គើ (Kohkong Sugar) និងក្រុមហ៊ុន កោះកុង ផ្លេនថេសិន (Kohkong Plantation) មកពីខេត្តកោះកុង នាំគ្នាទៅតវ៉ានៅខាងមុខរដ្ឋសភា នៅរសៀលថ្ងៃទី២០ ខែធ្នូ ទាមទារដំណោះស្រាយ។
ពួកគេបានដាក់ញត្តិទៅសភាកាលពីខែកក្កដា កន្លងទៅ ទាមទារឲ្យរដ្ឋសភា និងស្ថាប័នពាក់ព័ន្ធមួយចំនួនទៀត ជួយអន្តរាគមន៍ធ្វើយ៉ាងណាឲ្យពួកគេទទួលបានដីធ្លីមកអាស្រ័យផលឡើងវិញ នៅក្រោយពេលដែលក្រុមហ៊ុនបានឈូសឆាយរំលោភយក។
ក្រុមអ្នកភូមិលើកឡើងពីភាពអស់សង្ឃឹម នៅពេលដែលជម្លោះដីធ្លីចេះតែអូសបន្លាយរកទីបញ្ចប់មិនទាន់ឃើញ និងបានព្រមានទុកមុនថា នឹងប្រើប្រាស់សន្លឹកឆ្នោតទៅតាមលទ្ធផលដែលពួកគាត់នឹងទទួលបានពីជម្លោះដីធ្លីនេះ។
តំណាងអ្នកភូមិ គឺលោកស្រី ផាវ ញ៉ើង មានប្រសាសន៍ថា អ្នកភូមិដែលពុំមានសិទ្ធិអំណាចអ្វី មានតែទទូចឲ្យស្ថាប័នពាក់ព័ន្ធ ជាពិសេសរដ្ឋសភា យកចិត្តទុកដាក់ជួយដោះស្រាយបញ្ហាដីធ្លីឲ្យពួកគាត់៖ «សូមមេត្តាឲ្យរដ្ឋាភិបាល លោកនាយករដ្ឋមន្ត្រី ហ៊ុន សែន លោកមានឥទ្ធិពលដឹកនាំប្រទេសដ៏យូរអង្វែងនោះ សូមមេត្តាឲ្យលោកពិនិត្យ និងជំរុញឲ្យបានលឿនបំផុតដោះស្រាយបញ្ហាដីធ្លីឲ្យពួកយើង។ បើពុំនោះទេ យើងលែងជឿទៀតហើយ។ នៅរៀងរាល់អាណត្តិ យើងនៅតែជឿលើជំហរសម្ដេចថា សម្ដេចនៅតែជួយប្រជាពលរដ្ឋ ប៉ុន្តែអាណត្តិនេះបើសិនជាសម្ដេចមិនយកចិត្តទុកដាក់ចំពោះបញ្ហាពួកខ្ញុំ ចឹងពួកខ្ញុំលែងជឿទៀតហើយ»។
ពលរដ្ឋចំនួនជាង ១០០នាក់នេះតំណាងឲ្យពលរដ្ឋសរុបចំនួន ១៤៧គ្រួសារមកពីភូមិចំនួន៧ នៅក្នុងស្រុកចំនួន២ គឺស្រុកបុទុមសាគរ និងស្រុកស្រែអំបិល ខេត្តកោះកុង។ ពួកគេអះអាងថា ដីធ្លីពួកគេមានទាំងដីលំនៅឋាន និងដីចម្ការ ត្រូវក្រុមហ៊ុនឈូសឆាយរំលោភយកជាហូរហែចាប់តាំងពីឆ្នាំ២០០៦។ ពួកគេបានទាមទារ និងដាក់បណ្ដឹងទៅស្ថាប័នពាក់ព័ន្ធជាញឹកញយហើយ ក៏នៅមិនទាន់មានដំណោះស្រាយ។
នៅពេលរសៀលនៅក្រោមកម្ដៅថ្ងៃក្ដៅខ្លាំង អ្នកភូមិបាននាំគ្នាស្រែកពីក្រៅរបងរដ្ឋសភា ឲ្យអ្នកតំណាងរាស្ត្រដែលពួកគេធ្លាប់បោះឆ្នោតឲ្យ ធ្វើយ៉ាងណាជួយពួកគាត់ឲ្យបានដីដែលកំពុងមានជម្លោះនោះត្រឡប់មកវិញ។
បន្ទាប់ពីស្រែកតវ៉ាទាមទារបានរយៈពេលខ្លី មន្ត្រីរដ្ឋសភា បានអនុញ្ញាតឲ្យតំណាងអ្នកភូមិចំនួន ៧នាក់ចូលជួប។ ពួកគេបានចេញមកវិញដោយនាំយកនូវចំណារមួយរបស់ប្រធានរដ្ឋសភា លោក ហេង សំរិន ដែលថា បានបញ្ជូនសំណុំរឿងនេះទៅឲ្យរដ្ឋមន្ត្រីក្រសួងបរិស្ថាន ពិនិត្យកាលពីខែវិច្ឆិកា។
ភ្លាមៗនោះ អ្នកភូមិក៏បានបន្តដំណើរទៅក្រសួងបរិស្ថាន ទៅតាមអ្វីដែលប្រធានរដ្ឋសភា បានចារបញ្ជូនទៅ។ ពួកគេខ្លះទូល ខ្លះស្ពាយសម្ពៀតដាក់សម្លៀកបំពាក់ អង្ករ ម្ហូបអាហារ ឆ្នាំង ចាន និងធ្យូង សម្រាប់ចម្អិនអាហារផង។
នៅក្រសួងបរិស្ថាន តំណាង ៧នាក់ទៀតត្រូវអនុញ្ញាតឲ្យចូលទៅក្នុងអគារ ដើម្បីជួបជាមួយមន្ត្រីបរិស្ថាន។
បន្ទាប់ពីជួបពិភាក្សាប្រហែលមួយម៉ោង អ្នកតំណាងដែលចេញមកវិញបាននិយាយទាំងទឹកភ្នែកថា ពួកគេត្រូវមន្ត្រីក្រសួងនេះព្រមានប្រើប្រាស់កម្លាំងសន្តិសុខបណ្ដេញចេញ បើសិនពួកគេមិនត្រឡប់ទៅវិញ៖ «យ៉ាងម៉េចរដ្ឋាភិបាលជាម៉ែឪពួកខ្ញុំ ម៉េចបានធ្វើចឹងដាក់ពួកខ្ញុំ? ដេញពីនេះដេញពីនោះ ពួកខ្ញុំនិយាយល្អទេថា សុំជួយអន្តរាគមន៍រកដំណោះស្រាយផង»។
មិនយូរប៉ុន្មាន រដ្ឋលេខាធិការ និងជាអ្នកនាំពាក្យក្រសួងបរិស្ថាន លោក អ៊ាង សុផល្លែត បានចេញមកជួបអ្នកភូមិ និងបានជួយសម្រួលស្ថានការណ៍។ លោកបានបង្ហាញលិខិតមួយច្បាប់ និងថ្លែងបញ្ជាក់ថា ក្រសួងបានឆ្លើយតបទៅរដ្ឋសភាវិញហើយថា បញ្ហាដីធ្លីនេះមិនឋិតក្រោមសមត្ថកិច្ចរបស់ក្រសួងបរិស្ថាន ឡើយ គឺរាល់ដីសម្បទានសេដ្ឋកិច្ចជាសមត្ថកិច្ចរបស់ក្រសួងកសិកម្ម៖ «ក្រសួងបរិស្ថាន បានផ្ទេរទៅឲ្យក្រសួងកសិកម្ម រួចហើយ កាលពីថ្ងៃទី២២ ខែសីហា ឆ្នាំ២០១៦។ ខ្ញុំសូមជម្រាបថា ក្រសួងបានឆ្លើយតបទៅសភាហើយកាលពីថ្ងៃទី៩ ខែធ្នូ ឆ្នាំ២០១៦»។
បន្ទាប់ពីបានចម្លើយនេះ ក្រុមអ្នកភូមិបានសម្រេចចាកចេញពីក្រសួងបរិស្ថាន ប៉ុន្តែពួកគេពុំមានគោលដៅថានឹងទៅទីណាពិតប្រាកដឡើយ។ អាជ្ញាធរក៏បានសម្របសម្រួលដឹកជញ្ជូនពួកគេឲ្យទៅស្នាក់នៅបណ្ដោះអាសន្ននៅក្នុងវត្តសាមគ្គីរង្សី។
អ្នកភូមិម្នាក់ដែលមានវ័យចំណាស់ លោកស្រី សួង រីន នៅក្នុងស្រុកស្រែអំបិល ដែលដីបាត់បង់ទៅឲ្យក្រុមហ៊ុន អំពាវនាវឲ្យមន្ត្រីពាក់ព័ន្ធ ជួយដោះស្រាយបញ្ចប់ជម្លោះដែលពួកគាត់ជួបប្រទះ ដើម្បីបញ្ចប់ទុក្ខលំបាករបស់ពួកគាត់ដែរ។
កាលពីខែសីហា កន្លងទៅ មន្ត្រីក្រសួងរៀបចំដែនដី នគរូបនីយកម្ម និងសំណង់ លោក ទេព ធន បានចុះទៅជួបប្រជាពលរដ្ឋជាង ១០០គ្រួសារដែលកំពុងមានជម្លោះដីធ្លីក្នុងស្រុកស្រែអំបិល ប៉ុន្តែរហូតមកដល់ពេលនេះ នៅមិនទាន់មានចំណាត់ការអ្វីនៅឡើយ។ មន្ត្រីអង្គការមិនមែនរដ្ឋាភិបាលក្នុងមូលដ្ឋាន បានលើកឡើងថា ជំនួបរវាងមន្ត្រី និងពលរដ្ឋនោះ ហាក់មិនអាចរកដំណោះស្រាយនៅឡើយ ព្រោះជាដំណាក់កាលប្រមូលឯកសារពាក់ព័ន្ធ។
ក្រុមអ្នកភូមិដែលបានមកដល់រាជធានីភ្នំពេញនេះបញ្ជាក់ថា ពួកគេនឹងបន្តការតវ៉ាទៅតាមស្ថាប័នពាក់ព័ន្ធមួយចំនួនទៀត ដែលគាត់ធ្លាប់បានដាក់ញត្តិរួចម្ដងហើយកាលពីខែកក្កដា ដែលរួមមាន ក្រសួងរៀបចំដែនដី នគរូបនីយកម្ម និងសំណង់ និងការិយាល័យសហភាពអឺរ៉ុប ប្រចាំនៅកម្ពុជា ជាដើម៕
No comments:
Post a Comment