អាជ្ញាធរមានសមត្ថកិច្ចខេត្តកំពង់ធំ កំពុងស្ទាក់ចាប់ឈ្មួញ និងអ្នករកស៊ីកាប់ឈើក្នុងតំបន់ព្រៃឡង់ រយៈពេលបីថ្ងៃជាប់ៗគ្នាមកហើយ គិតមកត្រឹមថ្ងៃព្រហស្បតិ៍នេះ។
អភិបាលខេត្តនេះឲ្យដឹងថា ការដាក់កម្លាំងចម្រុះឃ្លាំមើលនេះ ដោយសារតែមានសេចក្ដីរាយការណ៍ថា ក្នុងតំបន់ព្រៃឡង់ កំពុងមានបទល្មើសកាប់ឈើប្រណិតប្រភេទឈើគ្រញូង ហើយពួកគេបម្រុងនាំចេញពីតំបន់នោះដោយលួចលាក់។
សមត្ថកិច្ចចម្រុះខេត្តកំពង់ធំ រួមមានស្ថាប័នតុលាការផង កំពុងតាមដានស្វែងរកជនពាក់ព័ន្ធក្នុងបទល្មើសកាប់ឈើគ្រញូង ក្នុងតំបន់ព្រៃឡង់ នៃស្រុកសណ្ដាន់។
អ្នកនាំពាក្យសាលាខេត្តកំពង់ធំ លោក គង់ វិមាន ឲ្យដឹងកាលពីថ្ងៃពុធ ទី៣០ ខែវិច្ឆិកា ថា បន្ទាប់ពីឃ្លាំមើលរយៈពេល ៣ថ្ងៃជាប់ៗគ្នាមក សមត្ថកិច្ចសម្រេចចាប់ជនសង្ស័យម្នាក់ដោយភ្ជាប់ជាមួយវត្ថុតាងជាច្រើន៖ «អ្នកភូមិរាយការណ៍មក បែកការគាត់រត់គេច គាត់យកគ្រញូងទៅលាក់ ពេលជននោះចេញឡានកម្លាំងយើងបានទៅកាក់ឡាននោះ ហើយឃើញមានទាក់ទងទៅឈ្មួញដោយតថ្លៃគ្នា»។
លោកមិនទាន់អាចបញ្ជាក់ពីអត្តសញ្ញាណជនសង្ស័យនោះទេ ដោយសារកំពុងស្ថិតក្នុងដៃតុលាការ ហើយសមត្ថកិច្ចកំពុងស៊ើបអង្កេតរកអ្នកពាក់ព័ន្ធក្នុងរឿងនេះបន្ថែមទៀត។
ព្រះរាជអាជ្ញាអមសាលាដំបូងខេត្ត លោក អ៊ិត សុធា បានប្រាប់សារព័ត៌មានក្នុងស្រុកកាលពីរសៀលថ្ងៃទី៣០ ខែវិច្ឆិកា ថា ជនសង្ស័យរូបនេះ ត្រូវបានតុលាការសម្រេចចោទប្រកាន់ពីបទ៖ «ប្រមូល និងដឹកជញ្ជូនផលអនុផលព្រៃឈើដោយគ្មានច្បាប់អនុញ្ញាតនៅតំបន់ព្រៃឡង់ ក្នុងភូមិសាស្ត្រស្រុកសណ្ដាន់ ខេត្តកំពង់ធំ និងបានបញ្ជូនទៅដល់ដៃចៅក្រមរួចហើយដើម្បីចាត់ការបន្តទៀត»។
លោក អ៊ិត សុធា បញ្ជាក់ទៀតថា នៅពេលដែលចាប់ខ្លួន សមត្ថកិច្ចចម្រុះ រឹបអូសបានរថយន្តឈើគ្រញូង និងបានឆែកទូរស័ព្ទដៃ ឃើញមានគំរូ ឬហៅថា ប៉ាន់ឈើដែលជននោះផ្ញើទៅអ្នកទិញមានតម្លៃសរុបប្រមាណ ២០ម៉ឺនដុល្លារ។
លោក គង់ វិមាន ឲ្យដឹងថា ឈើគ្រញូងមួយដើមដែលជនល្មើសលួចកាប់នោះ មានមុខកាត់ជាងកន្លះម៉ែត្រ ប្រវែងជិត ២០ម៉ែត្រ ដែលអ្នកភូមិថែរក្សាទុកជាច្រើនឆ្នាំមកហើយ។
ស្ថាបនិកបណ្ដាញព្រះសង្ឃឯករាជ្យ ព្រះភិក្ខុ ប៊ុត ប៊ុនតិញ មានថេរដីកាថា ឈើប្រភេទមានតម្លៃ និងកម្រ ដូចជាគ្រញូងនេះនៅមានសល់ខ្លះ ដែលកប់ក្នុងព្រៃជ្រៅ ដែលគេហៅថា ជំរំគ្រញូងនៃតំបន់ព្រៃឡង់ ក្នុងខេត្តកំពង់ធំ។
ព្រះអង្គបន្តថា បើអាជ្ញាធរមិនមានឆន្ទៈពិតប្រាកដក្នុងការទប់ស្កាត់បទល្មើសព្រៃឈើ ឬក៏ទប់ស្កាត់របៀបធ្វើឲ្យតែល្អមើលនោះ ឈើប្រណិតដូចជាគ្រញូង ឬឈើដទៃទៀត ដែលនៅសេសសល់តិចតួចចុងក្រោយនេះ នឹងផុតពូជ ពេលនោះរដ្ឋាភិបាលក៏នឹងទទួលហានិភ័យខ្ពស់ដូចឈើប្រណិតនេះដែរនៅពេលខាងមុខ៖ «ព្រៃឡង់ប៉ែកកំពង់ធំហ្នឹង ជាសម្បុកគ្រញូងហើយ ហើយគ្រញូងទាំងនោះនៅឈរទៀត។ បើសម្បុកគ្រញូងទាំងនោះមិនត្រូវបានការពារ អំណាចរដ្ឋាភិបាលរាល់ថ្ងៃនេះនឹងងាប់ឈរដូចគ្រញូងអ៊ីចឹង បើនិយាយតែមាត់»។
កាលពីថ្ងៃទី៥ ខែវិច្ឆិកា កន្លងទៅ ឈើគ្រញូង ១ដើម មានមុខកាត់ ៩តឹក និងកម្ពស់ ១៥ម៉ែត្រ ដែលអាយុជាង ២០០ឆ្នាំនៅក្នុងឧទ្យានអង្គរធំ ខេត្តសៀមរាប ក៏ត្រូវបានជនល្មើសលួចកាប់ដែរ។
ជនល្មើសក្នុងរឿងនេះ រួមមានទាំងមន្ត្រីការិយាល័យបរិស្ថាន ទេសភាព វប្បធម៌ នៃនាយកដ្ឋានគ្រប់គ្រងព្រៃឈើរបស់អាជ្ញាធរអប្សរាជាច្រើននាក់ផងដែរ។ ជនទាំងនោះត្រូវបានចាប់ខ្លួន និងផ្ដន្ទាទោសទៅតាមច្បាប់៕
No comments:
Post a Comment