 |
| ក្រុមជនល្មើសលាក់ទុកនៅចំណុចអូរទឹកក្រហម ស្រុកភ្នំក្រវ៉ាញ ខេត្តពោធិ៍សាត់ កាលពីថ្ងៃទី២៤ ខែធ្នូ ឆ្នាំ២០១៦។ Photo Provided គំនរឈើដែលក្រុមជនល្មើសលាក់ទុកនៅចំណុចអូរទឹកក្រហម ស្រុកភ្នំក្រវ៉ាញ ខេត្តពោធិ៍សាត់ កាលពីថ្ងៃទី២៤ ខែធ្នូ ឆ្នាំ២០១៦។ Photo Provided |
ព្រៃឈើក្នុងតំបន់ឧទ្យានជាតិជួរភ្នំក្រវ៉ាញកណ្ដាល នៅតែរងការកាប់បំផ្លាញរាល់ថ្ងៃ ហើយអាជ្ញាធរមានសមត្ថកិច្ច ទប់ស្កាត់ពុំមានប្រសិទ្ធភាព ជាពិសេសនៅជួរភ្នំក្រវ៉ាញកណ្ដាលភាគខាងជើង ឋិតនៅក្នុងទឹកដីខេត្តពោធិ៍សាត់ និងខេត្តកំពង់ស្ពឺ។ តំណាងអង្គការក្រៅរដ្ឋាភិបាលមួយដែលធ្វើការលើវិស័យព្រៃឈើ គ្រោងជួបអភិបាលខេត្តពោធិ៍សាត់ និយាយពីបញ្ហានេះ។
ប្រធានអង្គការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ ឲ្យដឹងនៅថ្ងៃទី២៧ ខែធ្នូ បន្ទាប់ពីក្រុមការងាររបស់អង្គការនេះ ចុះល្បាតព្រៃតាមជួរភ្នំក្រវ៉ាញ រយៈពេលបីថ្ងៃ ថា បទល្មើសឈើប្រណីតដោយម៉ាស៊ីនរ៉ៃ និងម៉ាស៊ីនត្រង់តឺន័រ នៅតែបន្តកើតមានដដែល។ ឈើប្រណីតជាច្រើនគំនរដែលអារបួនជ្រុងចន្លោះពី ៣ ទៅ ៥ម៉ែត្រគូប ត្រូវជនល្មើសលាក់ទុកក្នុងព្រៃ។
ប្រធានអង្គការការពារព្រៃឈើ លោក ជា ហ៊ាន បញ្ជាក់ថា ឈើប្រណីតទាំងនេះ ត្រូវជនល្មើសកាប់ និងអារច្រៀកជាស្រេច រួចដឹកតាមរទេះគោទៅស្រុកវាលវែង ខេត្តពោធិ៍សាត់ និងឈើមួយចំនួនទៀត ត្រូវជនល្មើសដឹកទៅស្រុកឱរ៉ាល់ ខេត្តកំពង់ស្ពឺ ដើម្បីដឹកតាមឡានបន្តទៅប្រទេសវៀតណាម តាមច្រកទាន់ហន់ ខេត្តកំពត។ រូបភាពបទល្មើសខ្លះ លោកមិនទាន់អាចបញ្ចេញបាន ប៉ុន្តែលោកនឹងជួបអភិបាលខេត្តពោធិ៍សាត់ និយាយពីបទល្មើសនេះ៖ «នៅសល់តិចតួចបំផុតព្រៃឈើ (តំបន់ជួរភ្នំក្រវ៉ាញកណ្ដាល) បើរាជរដ្ឋាភិបាលគ្មានឆន្ទៈក្នុងការបង្ក្រាបឲ្យមានប្រសិទ្ធភាពទេ រយៈពេលបីឆ្នាំទៀត គឺរលាយហើយ។ ហើយនៅថ្ងៃទី៥ ខែមករា ខាងមុខនេះ ខ្ញុំនឹងជួបជាមួយលោកអភិបាលខេត្តពោធិ៍សាត់ ដើម្បីសុំគាត់សហការបង្ក្រាប ហើយក្នុងករណីមិនបង្ក្រាបទេ ខ្ញុំនឹងធ្វើរបាយការណ៍មួយទៅស្ថាប័នរដ្ឋាភិបាល»។
ឆ្លើយតបបញ្ហានេះ អ្នកនាំពាក្យ និងជាអភិបាលរងខេត្តពោធិ៍សាត់ លោក កើត ឆែ ថាអាជ្ញាធរតែងតែសហការជាមួយសង្គមស៊ីវិលក្នុងការទប់ស្កាត់បទល្មើស ដោយផ្អែកលើច្បាប់។ លោកថា អាជ្ញាធរមានសមត្ថកិច្ច បានពង្រឹងការទប់ស្កាត់ និងបង្ក្រាបបទល្មើសព្រៃឈើ ជាពិសេសក្រោយមានបទបញ្ជាលេខ០៥ របស់ប្រមុខរដ្ឋាភិបាល ទាក់ទងនឹងវិធានការចាំបាច់ក្នុងការគ្រប់គ្រងធនធានធម្មជាតិ៖ «សូម្បីតែរាជរដ្ឋាភិបាលកាលពីថ្ងៃទី២២ នោះ ក៏បានជួបជាមួយបណ្ដាសង្គមស៊ីវិលនៅទីស្ដីការ ក្រោមអធិបតីភាពរបស់សម្ដេចតេជោដែរ។ អ៊ីចឹងឲ្យតែសង្គមស៊ីវិលឃើញមានកន្លែងណា ហើយស្នើសុំកិច្ចសហការ យើងផ្ដល់ជូនភ្លាម»។
រាជរដ្ឋាភិបាលតាមរយៈក្រសួងបរិស្ថាន បានចេញអនុក្រឹត្យចុះថ្ងៃទី៩ ខែឧសភា ឆ្នាំ២០១៦ សម្រេចបង្កើតឧទ្យានជាតិជួរភ្នំក្រវ៉ាញកណ្ដាល ដែលមានផ្ទៃដីទំហំជាង ៤សែនហិកតារ (៤០១.៣១៣ហិកតារ)។ តំបន់អភិរក្សជួរភ្នំក្រវ៉ាញ នេះ ឋិតនៅក្នុងភូមិសាស្ត្រខេត្តកោះកុង ពោធិ៍សាត់ និងខេត្តកំពង់ស្ពឺ៕
No comments:
Post a Comment