 |
| ទិដ្ឋភាពពលរដ្ឋរស់នៅលើដីមាត់ទន្លេផ្សារក្រោម ក្នុងភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង ខេត្តកំពង់ឆ្នាំង ថ្ងៃទី២៩ ខែធ្នូ ឆ្នាំ២០១៦។ RFA/Chin Chetha |
អ្នកភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង ដែលមានផ្ទះជាប់មាត់ទន្លេ កំពុងខ្វល់ចិត្តរឿងអាជ្ញាធរតម្រូវឲ្យពួកគេរុះរើផ្ទះសម្បែង ទៅតាំងទីលំនៅកន្លែងថ្មី ដើម្បីយកដីទៅអភិវឌ្ឍច្រាំងទន្លេ និងសួនច្បារ។ អាជ្ញាធរបញ្ជាក់ថា ការរុះរើផ្ទះទៅកន្លែងថ្មី គឺធ្វើឡើងដោយស្ម័គ្រចិត្ត គ្មានការបង្ខិតបង្ខំ និងចង់ឲ្យពលរដ្ឋរស់នៅមានសណ្ដាប់ធ្នាប់ និងជីវភាពគ្រាន់បើជាងនេះ។
ពលរដ្ឋមួយចំនួនក្នុងចំណោមអ្នកភូមិចុងកោះ ប្រមាណ ២១០គ្រួសារ ដែលត្រូវរុះរើផ្ទះចេញពីលើដីចំណីមាត់ទន្លេ ឲ្យដឹងនៅថ្ងៃទី២៩ ខែធ្នូ ថា បើអាជ្ញាធរបង្ខំឲ្យពួកគេរុះរើផ្ទះ ហើយតម្រូវឲ្យទិញដីសង់ផ្ទះកន្លែងថ្មីក្នុងតម្លៃ ៣.៤០០ដុល្លារក្នុងមួយប្លង់នោះ គឺពួកគេភាគច្រើនពុំមានលទ្ធភាពឡើយ។ ក្រុមពលរដ្ឋបារម្ភពីបញ្ហានេះកាន់តែខ្លាំង បន្ទាប់ពីទទួលដំណឹងថា គេតម្រូវឲ្យរុះរើក្នុងខែមករា ឆ្នាំ២០១៧។
ពលរដ្ឋម្នាក់ លោក ម៉ៅ ណេន មានប្រសាសន៍ថា អ្នកភូមិដែលរងផលប៉ះពាល់ បាននិយាយតៗគ្នាពីពេលវេលារុះរើផ្ទះចេញ ដោយអ្នកខ្លះថាត្រូវរុះឲ្យអស់នៅដំណាច់ខែធ្នូ ឆ្នាំ២០១៦ និងខ្លះទៀតថា នឹងចាប់ផ្ដើមឲ្យរុះរើចាប់ពីថ្ងៃទី១៥ ខែមករា ឆ្នាំ២០១៧។ ប៉ុន្តែពេលវេលាជាក់លាក់ពុំទាន់មានអ្នកភូមិណាម្នាក់បានដឹងច្បាស់នៅឡើយ ដោយគ្រាន់តែបានដេកព្រួយខ្លាចអត់កន្លែងរស់នៅប៉ុណ្ណោះ៖ «ប្រជាពលរដ្ឋនៅចុងកោះ ដូចខ្ញុំអីនេះ អត់មានលុយ! អ្ហឺស! រកលុយបានមួយម៉ឺនចង់ប្រឹងផងរាល់ថ្ងៃនោះ មុខរបរនេសាទ សែងត្រីនៅផែបន្តិចបន្តួច ណាមួយកូនរៀនផង ណាមួយជំពាក់គេផង មិនធម្មតាណា។ ជួនកាលបានល្ងាចខ្វះព្រឹក។ ខ្ញុំនៅនេះជិត ២០ឆ្នាំហើយ បង្ខំក៏ខ្ញុំមិនទាន់ទៅដែរ ណោះរកដីឲ្យខ្ញុំអត់ទាន់បានផងហ្នឹង»។
ចំណែកស្ត្រីវ័យ ៦៤ឆ្នាំ កំពុងឈរជជែកជាមួយពលរដ្ឋប្រមាណ ១០នាក់ផ្សេងទៀតនៅក្បែរកាំជណ្ដើរផ្ទះរបស់ខ្លួន គឺលោកស្រី អ៊ុន ញ៉ ត្អូញថា រយៈពេលជាង ២០ឆ្នាំដែលលោកស្រីរស់នៅមាត់ទន្លេនេះ គឺវាលំបាកណាស់ទៅហើយ តែបើឲ្យគាត់ទៅនៅកន្លែងថ្មីដោយទិញដីរស់នៅខ្លួនឯងនោះ ប្រហែលពីរជីវិតគាត់ទៀត ក៏មិនអាចរកលុយបានជាង ៣ពាន់ដុល្លារ ដើម្បីទិញដីនោះរស់នៅដែរ៖ «មានលុយណាទិញដីចៅហើយ! សុំតែដីនៅមួយផ្ទះមក! មួយបន្លោះផ្ទះក៏យកដែរ ឲ្យយាយទិញដី យាយគ្មានលុយទិញទេ។ ដើរតែបោកខោអាវតិចតួច កោសខ្យល់អីហ្នឹង។ មើលផ្ទះបាក់កន្ទោកអស់ហើយ អត់កូន ហើយចិញ្ចឹមចៅទៀតនេះ ប្អូនឆ្កួតណោះដើរបាត់ហើយ»។
ឆ្លើយតបនឹងក្ដីបារម្ភនេះ អភិបាលរងខេត្តកំពង់ឆ្នាំង និងជាប្រធានក្រុមការងារចុះរៀបចំសណ្ដាប់ធ្នាប់ និងអភិវឌ្ឍន៍ច្រាំងទន្លេផ្សារក្រោម លោក ស៊ុន សុវណ្ណារិទ្ធិ បញ្ជាក់ថា ជំហានទី១ មានម្ចាស់ផ្ទះចំនួន ៣៤ខ្នង បានព្រមព្រៀងរុះរើផ្ទះទៅកន្លែងថ្មីឲ្យបានមុនថ្ងៃទី១៦ ខែមករា។ រីឯជាង ១០០ខ្នងទៀត នឹងត្រូវរុះរើចេញដែរនៅក្នុងខែមករា ឆ្នាំ២០១៧ តែគេត្រូវរង់ចាំប្រព័ន្ធទឹក និងភ្លើងរៀបចំរួច៖ «យើងមិនចេះតែយកគាត់ទៅទេ។ យើងរៀបចំឲ្យស្អាតទាំងអស់ ហើយបានយើងឲ្យគាត់ចេញទៅ។ ក្នុងករណីអ្នកដែលអត់មានលទ្ធភាព ដូចថាក្រីក្រ យើងអាចឲ្យគាត់ធ្វើការជាមួយក្រុមហ៊ុនហ្នឹងទៅ ហើយយើងឲ្យគាត់ជួយគាត់បង់រំលស់។ អ៊ីចឹងប្រាក់ពីមុនថាបង់នេះហ្នឹង ឥឡូវសល់តែបន្តិចហ្នឹង មានន័យថា ដូចយើងជួយចេញចាក់ដីខ្លួនឯងអ៊ីចឹងទៅណា ព្រោះចាក់ជម្រៅ ៥ម៉ែត្រណោះហ្នឹង»។
លោកបន្ថែមថា ចំពោះពលរដ្ឋដែលមិនទទួលយកសំណង ហើយចង់បានដីដោះដូរនៅកន្លែងថ្មីទំហំទទឹង ៥ម៉ែត្រ និងបណ្ដោយ ២០ម៉ែត្រ ត្រូវចំណាយប្រាក់ក្នុងមួយខ្នងផ្ទះ ១ពាន់ដុល្លារ ដើម្បីចំណាយលើការចាក់ដី។ លោកថា ការបង់ផ្ដាច់ ឬបង់រំលស់នេះ គឺទាបជាងមុនឆ្ងាយ ដោយពីមុន ក្រុមហ៊ុនតម្រូវឲ្យបង់ជាង ៣ពាន់ដុល្លារ ប៉ុន្តែដោយឃើញពលរដ្ឋខ្វះខាត ទើបអាជ្ញាធរសម្រួលលើបញ្ហានេះ។
អាជ្ញាធរខេត្តកំពង់ឆ្នាំង កំពុងរៀបចំសណ្ដាប់ធ្នាប់ និងអភិវឌ្ឍច្រាំងទន្លេផ្សារក្រោមប្រវែងជិត ៣គីឡូម៉ែត្រចេញពីមុខវត្តយាយទេព រហូតដល់អាងទឹកអានកូ ឋិតនៅសង្កាត់ខ្សាម ក្រុងកំពង់ឆ្នាំង។ អាជ្ញាធរចាប់ដៃជាមួយក្រុមហ៊ុនឯកជនមួយ ដើម្បីបង្កើតផ្សារ និងផ្ទះថ្មីនៅក្នុងសង្កាត់ខ្សាម ដើម្បីឲ្យពលរដ្ឋរងផលប៉ះពាល់ចំនួន ២១០ខ្នងផ្ទះ និងម្ចាស់តូបលក់ដូរ ២០៣តូប បានរស់នៅ និងលក់ដូរកន្លែងថ្មី៕
No comments:
Post a Comment