 |
| ក្រុមជាងកំពុងជីកដីបាតប្រាសាទបុរាណ ដើម្បីធ្វើសំណង់ថ្មីជំនួសវិញ នៅក្នុងបរិវេណវត្តប្រាសាទត្រាំនាគ សង្កាត់ស្លក្រាម ក្រុងសៀមរាប ខេត្តសៀមរាប នៅថ្ងៃទី១៨ ខែធ្នូ ឆ្នាំ២០១៦។ RFA/Hang Savyouth |
ប្រាសាទបុរាណមួយដែលស្ថិតក្នុងបរិវេណវត្តប្រាសាទត្រាំនាគ សង្កាត់ស្លក្រាម ក្រុងសៀមរាប កំពុងទទួលរងការជីកកកាយ ដើម្បីសាងសង់សំណង់ថ្មីនៅទីនោះជំនួសវិញ។ ការជីកកកាយដីដើម្បីធ្វើសំណង់ថ្មីនោះ បានធ្វើឲ្យផ្ទាំងថ្មបុរាណជាច្រើនដុំដែលនៅសេសសល់ធ្លាក់រាយប៉ាយ និងខ្លះត្រូវទទួលរងការបាក់បែក ដោយសារតែឧបករណ៍សំណង់ជីកប៉ះ។
ជាងសំណង់មួយក្រុម កំពុងតែនាំគ្នាជីកដី ហើយបណ្ដុះសសរស៊ីម៉ងត៍ដើម្បីចាក់ធ្វើសំណង់ថ្មីនៅលើទីទួលប្រាសាទបុរាណ ក្នុងបរិវេណវត្តប្រាសាទត្រាំនាគ នាសង្កាត់ស្លក្រាម ធ្វើឲ្យថ្មប្រាសាទបុរាណជាច្រើនដុំនៅរាយប៉ាយ ហាក់ដូចជាមិនខ្លាចញញើតចំពោះច្បាប់ការពារសម្បត្តិបេតិកភណ្ឌទេ។
ការជីកកន្លែងប្រាសាទបុរាណ ដើម្បីសាងសង់សំណង់ថ្មីនេះ បានប្រព្រឹត្តទៅរយៈពេលប្រមាណ ១០ថ្ងៃមកហើយ ក៏ប៉ុន្តែទាំងអាជ្ញាធរមូលដ្ឋាន និងមន្ត្រីអាជ្ញាធរអប្សរា សុទ្ធតែមិនបានដឹងអ្វីទាំងអស់។
អ្នកមើលខុសត្រូវការដ្ឋានសំណង់នៅកន្លែងប្រាសាទបុរាណនោះ គឺលោក ម៉េង លី។ លោកមានប្រសាសន៍កាលពីព្រឹកថ្ងៃអាទិត្យ ទី១៨ ខែធ្នូ ថា លោកដឹងថាកន្លែងដែលរូបលោកកំពុងសាងសង់នេះ គឺជាប្រាសាទបុរាណ ប៉ុន្តែលោកមិនដឹងច្បាស់ថា តើការសាងសង់នេះមានច្បាប់ដែរ ឬក៏យ៉ាងណាទេ? ពីព្រោះលោកមិនមែនជាអ្នកម៉ៅការសំណង់ ដោយគ្រាន់តែគេជួលពីទីក្រុងភ្នំពេញ ឲ្យមកគ្រប់គ្រងការដ្ឋានប៉ុណ្ណោះ។
លោក ម៉េង លី បញ្ជាក់ថា ក្រុមជាងរបស់លោកបានចាប់ផ្ដើមដំណើរការសាងសង់សំណង់ថ្មីនៅលើប្រាសាទបុរាណនេះរយៈពេល ១០ថ្ងៃមកហើយ៖ «ខ្ញុំមិនអាចឆ្លើយបានទេ ពីព្រោះខ្ញុំអត់ដឹង។ គេថាធ្វើប្រាសាទថ្មី ប៉ុន្តែគេឲ្យប្លង់មកខ្ញុំធ្វើម្ដងបន្តិចៗទេ គឺជើងក្រោមបន្តិចទៅ ពីព្រោះគេគូរមិនទាន់ហើយ»។
ទីទួលប្រាសាទបុរាណនៅក្នុងបរិវេណវត្តប្រាសាទត្រាំនាគ នោះ មានទទឹងប្រហែល ២០ម៉ែត្រ និងបណ្ដោយប្រហែល ៣០ម៉ែត្រ ដែលខ្ពស់ជាងដីធម្មតាប្រមាណ ២ម៉ែត្រ។ បច្ចុប្បន្ន ទីនោះនៅសល់ថ្មបុរាណជាច្រើន ខ្លះជាវត្ថុសក្ការបូជាតាមបែបព្រហ្មញ្ញសាសនា និងខ្លះទៀតជាថ្មដែលមានក្បាច់ចម្លាក់ផ្កាភ្ញីនៅរាយប៉ាយជាច្រើនដុំ។ ការជីកដីប្រាសាទ ដើម្បីសាងសង់សំណង់ថ្មីនៅលើនោះ បានធ្វើឲ្យថ្មបុរាណខ្លះបាក់ឆែប ដោយសារតែការជីកចំ និងថ្មបុរាណខ្លះទៀតត្រូវគេគាស់ចេញពីទីតាំងដើមរបស់វា។
ព្រះសង្ឃដែលជាចៅអធិការ និងគណៈកម្មការវត្តប្រាសាទត្រាំនាគ បាននិយាយខុសគ្នាអំពីសំណង់ដែលកំពុងតែធ្វើនៅលើទីប្រាសាទបុរាណនោះ។
ប្រធានគណៈកម្មការវត្តប្រាសាទត្រាំនាគ លោក អោក សំអឿន មានប្រសាសន៍ថា សំណង់នោះ គឺបានសុំច្បាប់អនុញ្ញាតពីមន្ត្រីអាជ្ញាធរអប្សរា ដែលជាអ្នកទទួលបន្ទុកការពារ និងថែរក្សាប្រាសាទបុរាណត្រឹមត្រូវអស់ហើយ។ ប្រធានគណៈកម្មការវត្តដដែលបញ្ជាក់ថា ម្ចាស់កសាងសំណង់នេះគឺជាជំទាវម្នាក់ ដែលមានអំណាចធំនៅក្នុងជួររដ្ឋាភិបាល៖ «ធ្វើជាប្រាសាទវិញ ប៉ុន្តែប្រាសាទថ្មី គឺធ្វើពីស៊ីម៉ងត៍ទេ។ ចំណែកខ្ញុំគ្រាន់តែការពារកាលណាគេគាស់ ឃើញវត្ថុអ្វីគឺយកមករក្សាទុក ខ្ញុំមិនមានសិទ្ធិហាមឃាត់គេមិនឲ្យធ្វើនោះទេ»។
បើតាមគណៈកម្មការវត្តប្រាសាទត្រាំនាគ ឲ្យដឹងថា រយៈពេល ១០ថ្ងៃមកនេះ គឺនៅពេលដែលជាងសំណង់ជីកដីបាតប្រាសាទបុរាណ គេបានប្រទះឃើញរូបចម្លាក់នាគរាជធ្វើពីថ្មភក់ចំនួន ២ដុំ ដែលគណៈកម្មការវត្តបានយកទៅទុកនៅក្នុងកន្លែងព្រះចៅអធិការវត្ត ក៏ប៉ុន្តែចៅអធិការវត្តមិនអនុញ្ញាតឲ្យអ្នកសារព័ត៌មានចូលទៅថតរូប ដើម្បីផ្សព្វផ្សាយឡើយ។
ព្រះគ្រូចៅអធិការវត្តប្រាសាទត្រាំនាគ ភិក្ខុ ស រ៉ា មានព្រះថេរដីកាថា គឺព្រះអង្គជាអ្នកសម្រេចព្រះទ័យផ្ទាល់ឲ្យជាងសាងសង់សំណង់ថ្មីនៅលើកន្លែងប្រាសាទបុរាណ ដែលនៅសេសសល់ស្លាកស្នាមជាច្រើននោះ។ ចៅអធិការវត្តដដែលបញ្ជាក់ថា មានពុទ្ធបរិស័ទជាច្រើនដែលចូលមកវត្តនេះ គឺមានជំនឿទៅលើស្ដេចនាគ ទើបព្រះអង្គសម្រេចថាត្រូវតែកសាងប្រាសាទមួយនៅលើកន្លែងប្រាសាទបុរាណនោះ ថ្វាយស្ដេចនាគ។ ព្រះអង្គមិនចាប់អារម្មណ៍ទៅលើកន្លែងប្រាសាទបុរាណនោះថាជាវត្ថុដ៏មានតម្លៃដែលត្រូវការពារអ្វីឡើយ៖ «ការកសាងប្រាង្គប្រាសាទធ្វើពីស៊ីម៉ងត៍នេះ នៅលើអាត្មាភាពទាំងស្រុងជាអ្នកទទួលខុសត្រូវ។ អាត្មាខ្វះពាក្យស្នើសុំច្បាប់ ហើយកំពុងតែរត់ច្បាប់ទៅអាជ្ញាធរអប្សរា ដើម្បីសាងសង់សំណង់លើកន្លែងប្រាសាទបុរាណនោះ»។
ទោះបីជាយ៉ាងណា អាស៊ីសេរី មិនអាចទាក់ទងអ្នកនាំពាក្យរបស់អាជ្ញាធរអប្សរា អ្នកស្រី ចៅស៊ុន កិរិយា ដើម្បីសុំប្រតិកម្មចំពោះការធ្វើសំណង់ថ្មីនៅលើកន្លែងប្រាសាទបុរាណ ដែលមានអាយុកាលរាប់ពាន់ឆ្នាំនោះ បានថាយ៉ាងណានៅឡើយនៅថ្ងៃទី១៨ ខែធ្នូ។
ចំណែកមន្ត្រីនាយកដ្ឋានផ្សព្វផ្សាយរបស់អាជ្ញាធរអប្សរា លោក ឡុង កុសល បានឆ្លើយតបថា លោកមិនទាន់បានដឹងជុំវិញរឿងសាងសង់សំណង់ថ្មីនៅលើកន្លែងប្រាសាទបុរាណនោះយ៉ាងណាទេ៖ «ខ្ញុំមិនដឹងឆ្លើយថាយ៉ាងម៉េចទេ ពីព្រោះខ្ញុំមិនទាន់ដឹង ហើយខាងជំនាញដែលការពារប្រាសាទនោះ គឺទាក់ទងមិនបាន»។
សមាជិកក្រុមប្រឹក្សាខេត្តសៀមរាប លោក សុខ គឹមសេង ឲ្យដឹងថា លោកទើបតែបានទទួលព័ត៌មានស្ដីពីការជីកដីប្រាសាទបុរាណដើម្បីសាងសង់សំណង់ថ្មី កាលពីព្រឹកថ្ងៃអាទិត្យ ហើយលោកមានគម្រោងនឹងចុះពិនិត្យ ព្រមទាំងសួរដេញដោលអាជ្ញាធរក្រុង និងខេត្តសៀមរាប ឲ្យឆ្លើយបំភ្លឺជុំវិញរឿងនេះ៖ «ក្រុមប្រឹក្សាមានតួនាទីសួរនាំទៅគណៈអភិបាល ដើម្បីឲ្យឆ្លើយបំភ្លឺក៏ដូចជាទាក់ទងទៅអាជ្ញាធរអប្សរា ដើម្បីឲ្យឆ្លើយបំភ្លឺរឿងហ្នឹង»។
មន្ត្រីអាជ្ញាធរអប្សរាឲ្យដឹងថា ព្រះរាជក្រមស្ដីពីកិច្ចការពារបេតិកភណ្ឌ បានចាត់ទុកថ្មរបស់ប្រាសាទបុរាណ ឬក៏ទីតាំងបុរាណដ្ឋាន គឺជាសម្បត្តិបេតិកភណ្ឌរបស់ជាតិ និងពិភពលោក ដែលត្រូវការពារ និងថែរក្សា មិនអាចជនណាប៉ះពាល់ ឬក៏បំផ្លាញបានទេ ក៏ប៉ុន្តែករណីទីទួលប្រាសាទបុរាណក្នុងបរិវេណវត្តប្រាសាទត្រាំនាគ នេះ គឺនៅមានថ្មប្រាសាទបុរាណជាច្រើនសម្រាប់សម្គាល់នៅឡើយ ក៏ប៉ុន្តែវាហាក់ដូចជាត្រូវបានគេបំភ្លេចចោលដោយមិនការពារ ឬក៏ថែរក្សាទុកអ្វីឡើយ៕
No comments:
Post a Comment