ភ្នំពេញៈ កម្ពុជាបាននាំចេញខ្សាច់ជាង ១០៨ ០០០ តោនទៅប្រទេសឥណ្ឌាជាមួយការដឹកចេញចំនួន ៣៦ លើកផ្សេងគ្នាក្នុងចន្លោះឆ្នាំ ២០១៣ ដល់ឆ្នាំ ២០១៥។ នេះបើតាមទិន្នន័យគយឥណ្ឌាដែលកាសែតទទួលបានពីថ្ងៃអាទិត្យជាទិន្នន័យមានលក្ខណៈផ្ទុយនឹងទិន្នន័យគយកម្ពុជាដែលមិនមានបង្ហាញអ្វីទាល់តែសោះពីការនាំចេញខ្សាច់ទៅឥណ្ឌានោះ។ភាពខុសគ្នាខ្លាំងនៃទិន្នន័យចុងក្រោយបានកើតមានឡើងហើយក្រសួងរ៉ែបានព្យាយាមពន្យល់មូលហេតុដែលប្រទេសសិង្ហបុរីបានកត់ត្រាការនាំចូលខ្សាច់ជិត ៧០ លានតោនពីប្រទេសកម្ពុជាចន្លោះពីឆ្នាំ ២០០៧ ដល់ឆ្នាំ ២០១៥ ខណៈកម្ពុជាមិនមានការកត់ត្រាស៊ីចង្វាក់គ្នា។
ទិន្នន័យខុសគ្នាយ៉ាងខ្លាំងនេះបានធ្វើឲ្យមានក្តីបារម្ភពីក្រុមអ្នកការពារបរិស្ថានដែលថាមនុស្សមួយចំនួនកំពុងមានទ្រព្យសម្បត្តិកាន់តែច្រើនដោយការនាំខ្សាច់ខុសច្បាប់ពីកម្ពុជាខណៈវាកំពុងប៉ះពាល់ជម្រកសត្វក្នុងទឹក និងបង្កឲ្យមានការសឹកដីកាន់តែខ្លាំងឡើងនាំឲ្យមានការបាក់ផ្ទះចូលទៅក្នុងទន្លេដែលទើបកើតមាននាពេលថ្មីៗកន្លងទៅនេះ។
ទិន្នន័យគយរបស់ប្រទេសឥណ្ឌាទទួលបានដោយអង្គការមាតាធម្មជាតិដែលជាអង្គការបរិស្ថានបានកត់ត្រាការនាំចេញខ្សាច់ចំនួន ៣៦ ដងចេញពីប្រទេសកម្ពុជាពីឆ្នាំ ២០១៣ ដល់ឆ្នាំ ២០១៥ ដែលសរុបទៅមានចំនួន ១០៨៦៥៨ តោន និងតម្លៃ ២,៦ លានដុល្លារ។
ផ្ទុយទៅវិញទិន្នន័យគយពីប្រទេសកម្ពុជាបានកត់ត្រាតែការនាំចេញខ្សាច់ទៅប្រទេសសិង្ហបុរី ថៃ ត៉ៃវ៉ាន់ វៀតណាម និងកូរ៉េខាងត្បូងប៉ុណ្ណោះដែលសរុបទៅមាន ៤៥៥០០០ តោន និងតម្លៃ ២,៤៧ លានដុល្លារ។
អ្នកនាំពាក្យក្រសួងពាណិជ្ជកម្មលោកស្រី សឹង សុផារី បានថ្លែងថាក្រសួងគ្រាន់តែចងក្រងទិន្នន័យដែលផ្តល់ឲ្យដោយមន្រ្តីគយអំពីការនាំចូល និងនាំចេញ និងមិនអាចធ្វើអត្ថាធិប្បាយអំពីថា តើមូលហេតុអ្វីបានជាមានភាពខុសគ្នាជាមួយទិន្នន័យគយឥណ្ឌាទេ។
លោកស្រីបានថ្លែងថា៖«យើងយកទិន្នន័យពីគយ និងសិក្សាលើទំនិញអ្វីដែលនាំចេញ និងនាំចូលទៅក្នុងប្រទេស»។ លោកស្រីបានបង្វែរសំណួរនេះទៅគយដែលស្ថិតនៅក្រោមក្រសួងសេដ្ឋកិច្ច និងហិរញ្ញវត្ថុ។
លោកស្រីបានបន្តថា៖ «គយជាអ្នកទទួលបន្ទុកលើការនាំចូល និងនាំចេញទំនិញ...ចំពោះករណីខ្សាច់ អ្នកដែលចេញអាជ្ញាប័ណ្ណឲ្យលក់ក្នុងស្រុក និងនាំចេញទៅប្រទេសដទៃៗគឺក្រសួងរ៉ែ និងថាមពល»។
លោក ប៊ូ ប៊ុនណារី ប្រធានទំនាក់ទំនងសាធារណៈរបស់គយបានបដិសេធធ្វើអត្ថាធិប្បាយកាលពីថ្ងៃអាទិត្យ។
អ្នកនាំពាក្យរបស់ក្រសួងរ៉ែលោក ឌិត ទីណា ដែលបានការពារក្រសួងរបស់លោកប្រឆាំងនឹងការអះអាងថាធ្វើឲ្យមានការរត់ពន្ធខ្សាច់បានថ្លែងថាលោកជឿថាខ្សាច់មួយចំនួនដែលនាំចេញទៅប្រទេសសិង្ហបុរីអាចនឹងក្រោយមកបង្វែរទៅប្រទេសដទៃៗវិញដូចជាប្រទេសឥណ្ឌា។
លោក ទីណា បានបន្តថា៖ «ប្រសិនបើពួកគេនាំចេញទៅប្រទេសសិង្ហបុរី ឬប្រទេសដទៃៗនេះគឺជាផ្នែកមួយនៃរឿងរបស់ពួកគេ។ សូមសួរខ្លួនឯងថាប្រសិនបើពួកគេនាំចេញខ្សាច់ទៅប្រទេសសិង្ហបុរីហើយបន្ទាប់មកពួកគេនាំខ្សាច់នោះទៅកន្លែងផ្សេង តើនេះជាកំហុសរបស់យើងឬអត់?»។
ទោះយ៉ាងណាក្តីលោកបានថ្លែងថាក្រសួងរបស់លោកមិនទទួលបន្ទុកក្នុងការធានាថាមិនមានការរត់ពន្ធខ្សាច់ទេ។
លោកបានថ្លែងថា៖ «យើងសូមបំភ្លឺថាក្រសួងរ៉ែ និងថាមពលរបស់យើងទទួលបន្ទុកកត់ត្រាការនាំចេញខ្សាច់ និងពន្ធ។ អ្នកដែលអនុញ្ញាតឲ្យនាំចេញគឺគយ និងស្ថាប័នដទៃៗទៀត»។
ការបូមខ្សាច់ត្រូវបានហាមឃាត់ក្នុងរដ្ឋជាច្រើននៅឥណ្ឌាដោយសារផលប៉ះពាល់របស់វាទៅលើផ្លូវទឹក និងសក្តានុពលនៃការបង្កឲ្យមានការសឹករេចរឹល។ សូម្បីក្នុងរដ្ឋមួយចំនួននៅប្រទេសឥណ្ឌាដែលការបូមខ្សាច់មានលក្ខណៈស្របច្បាប់ក៏ដោយ ក៏តម្រូវការលើសការផ្គត់ផ្គង់ហេតុដូច្នេះត្រូវការការនាំចូល។ នេះបើតាមរបាយការណ៍ព័ត៌មានរបស់ប្រព័ន្ធផ្សព្វផ្សាយឥណ្ឌា។
ឧទាហរណ៍ក្នុងអត្ថបទមួយកាលពីខែវិច្ឆិកាឆ្នាំ ២០១២ ចុះនៅក្នុងកាសែត The Hindu បានកត់សម្គាល់ពីតម្រូវការខ្សាច់កើនឡើងខ្លាំងដើម្បីប្រើក្នុងវិស័យសំណង់នៅទីក្រុងកំពង់ផែខាងកើតនៃរដ្ឋ Chennai បានបង្ខំឲ្យក្រុមហ៊ុនសំណង់នាំចូលខ្សាច់ពីទន្លេមេគង្គកម្ពុជា។
ទោះយ៉ាងណាក្តីក្នុងចំណោមខ្សាច់ជាច្រើនដែលបាននាំចេញពីប្រទេសកម្ពុជាក៏ត្រូវបានបូមពីខេត្តកោះកុងផងដែរហើយកាលពីខែមេសា ឆ្នាំ ២០១៣ ខ្សាច់ចំនួន ១,៥ លានតោនត្រូវបាននាំចេញទៅរដ្ឋ Cochin ភាគខាងត្បូងអស់រយៈពេល ៦ ខែ។
លោកនាយករដ្ឋមន្រ្តី ហ៊ុន សែន បានហាមប្រាមការបូមខ្សាច់ទន្លេនាំចេញកាលពីខែឧសភា ឆ្នាំ ២០០៩ លើកលែងតែកន្លែងណាដែលបាំងផ្លូវទឹកប៉ុន្តែស្ថានភាពនៃការហាមប្រាមនោះចាប់តាំងពីពេលនោះមកគឺមានលក្ខណៈមិនច្បាស់ខណៈក្រុមហ៊ុន ៦ បច្ចុប្បន្នកាន់អាជ្ញាប័ណ្ណបូមខ្សាច់ដើម្បីនាំចេញ។
ក្រសួងរ៉ែបានកត់ត្រាផងដែរនូវក្រុមហ៊ុនចំនួន ១៤ ដែលមានឈ្មោះដូចជាក្រុមហ៊ុន International Rainbow Co. Ltd. និងក្រុមហ៊ុន Diamond Sun Co. Ltd. ជាអ្នកនាំចេញខ្សាច់សមុទ្រចន្លោះពីឆ្នាំ ២០០៧ រហូតដល់ឆ្នាំ ២០១៥ និងក្រុមហ៊ុនចំនួន ១៤ ជាអ្នកនាំចេញខ្សាច់ទន្លេនៅក្នុងអំឡុងរយៈពេលនោះបើទោះបីជាមានការហាមប្រាមក្តី។
លោក Alex Gonzalez-Davidson ស្ថាបនិកនៃអង្គការមាតាធម្មជាតិដែលត្រូវបាននិរទេសចេញពីប្រទេសកម្ពុជានៅក្នុងឆ្នាំ ២០១៥ ដោយសារភាពសកម្មរបស់លោកបានថ្លែងកាលពីថ្ងៃអាទិត្យថាលោកជឿថាភាពខុសគ្នានៃទិន្នន័យសិង្ហបុរី និងឥណ្ឌាបង្ហាញរឿងតែមួយប៉ុណ្ណោះ។
លោកបានបន្តថា៖ «ចំពោះខ្ញុំតួលេខទាំងនេះបង្ហាញអំពីការពិតគួរឲ្យរន្ធត់មនុស្សដែលមានអំណាចនៅក្នុងរដ្ឋាភិបាលបានចូលរួមនៅក្នុងការរត់ពន្ធខ្សាច់កម្ពុជាទៅប្រទេសដូចជាប្រទេសឥណ្ឌាអស់រយៈពេលជាច្រើនឆ្នាំតាមរយៈការក្លែងឯកសារ អំពើពុករលួយ និងការបំពានអំណាច»។ «ពួកគេអាចមានអំណាច និងឥទ្ធិពល និងមន្តអាគមក្នុងការធ្វើឲ្យខ្សាច់បាត់ចេញពីទិន្នន័យផ្លូវការរបស់កម្ពុជាប៉ុន្តែមិនអាចបាត់ពីការកត់ត្រារបស់ប្រទេសដែលនាំចូលខ្សាច់ពីកម្ពុជាបានទេ»៕
No comments:
Post a Comment