ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា គឺលោក ឌិន ពុទ្ធី ដែលជាប់ចោទថា បើកឡានបុកប៉ូលិសនៅប៉ោយប៉ែត ខេត្តបន្ទាយមានជ័យ នោះ ត្រូវបានសាលាឧទ្ធរណ៍សម្រេចដោះលែងឲ្យនៅក្រៅឃុំបណ្ដោះអាសន្ន។ មន្ត្រីសហជីពថា តុលាការគួរទម្លាក់ចោទបទទាំងស្រុង។សេចក្ដីសម្រេចឲ្យដោះលែងលោក ឌិន ពុទ្ធី ឲ្យនៅពន្ធនាគារជាបណ្ដោះអាសន្ន គឺធ្វើឡើងដោយសភាស៊ើបសួរសាលាឧទ្ធរណ៍ ក្នុងសវនាការបិទទ្វារជាមួយមេធាវីការពារក្ដីឲ្យចុងចោទនៅព្រឹកថ្ងៃទី១៣ ខែមករា។
មេធាវីការពារក្ដីឲ្យលោក ឌិន ពុទ្ធី គឺលោក គីម សុជាតិ ថ្លែងនៅក្រោយសវនាការនោះថា ការដោះលែងនេះ ជាការដោះលែងនៅក្រៅឃុំបណ្ដោះអាសន្នប៉ុណ្ណោះ ហើយលោក ឌិន ពុទ្ធី ត្រូវបានតុលាការដាក់ឲ្យនៅក្រោមលក្ខខណ្ឌមួយចំនួន៖ «គឺមិនឲ្យផ្លាស់ប្ដូរអាសយដ្ឋានដោយគ្មានការសម្រេចពីតុលាការ ហើយឲ្យឆ្លើយតបទៅនឹងការកោះហៅគ្រប់ដីកាកោះរបស់ចៅក្រមស៊ើបសួរ មានន័យថា ត្រូវបង្ហាញខ្លួន។ ក្នុងសេចក្ដីសម្រេចចៅក្រមអម្បាញ់មិញ គឺឲ្យដោះលែងភ្លាម។ អ៊ីចឹងបើដីកាសម្រេចធ្វើបានថ្ងៃហ្នឹង គឺដោះលែងថ្ងៃហ្នឹង»។
ការដោះលែងលោក ឌិន ពុទ្ធី ត្រូវបានស្វាគមន៍ដោយលោក អាត់ ធន់ ប្រធានសហភាពការងារកម្ពុជា ប៉ុន្តែលោកចង់បានការទម្លាក់ចោលបទចោទប្រឆាំងលោក ឌិន ពុទ្ធី និងដោះលែងទាំងស្រុងតែម្ដង៖ «នៅពេលនេះយើងសប្បាយចិត្តនៅពេលដែលខាងសាលាឧទ្ធរណ៍បានដោះលែងឲ្យគាត់មានសេរីភាព។ ប៉ុន្តែយ៉ាងណាគាត់ស្ថិតនៅក្រោមការត្រួតពិនិត្យរបស់តុលាការ។ បានន័យថា សិទ្ធិរបស់គាត់ត្រូវបានដកមួយចំនួនហើយ។ ដល់ពេលអ៊ីចឹង យើងចង់ឲ្យតុលាការហ្នឹងស្វែងរកភស្តុតាងឲ្យបានច្បាស់លាស់ ហើយបន្ទាប់មក គឺថា ដោះលែង ហើយបន្ទាប់មកទម្លាក់ការចោទប្រកាន់ទាំងស្រុងតែម្ដង ព្រោះកុំឲ្យបាត់បង់សិទ្ធិនៅក្នុងការធ្វើសកម្មភាពសមាគម ក៏ដូចជាសកម្មភាពផ្សេងៗ ក្នុងនាមជាពលរដ្ឋរបស់គាត់»។
មេធាវីការពារក្ដី គឺលោក គីម សុជាតិ ថ្លែងថា ប្រធានក្រុមប្រឹក្សាជំនុំជម្រះលោក ងួន រតនា បានចេញសេចក្ដីសម្រេចដោះលែងលោក ឌិន ពុទ្ធី ក្រោយពេលដែលលោកលើកសម្អាងហេតុ ៦ចំណុច៖ «ទីមួយ ពាក់ព័ន្ធទៅនឹងការយល់ឃើញរបស់ចៅក្រមសាលាដំបូង ដែលគេលើកឡើងថា រឿងហ្នឹងអត់ទាន់ជឿនលឿន ហើយបើសិនជាត្រូវដោះលែងអាចមានការត្រូវរ៉ូវជាមួយសាក្សី។ ប៉ុន្តែរឿងនេះ គឺអត់ទេ។ បានន័យថា រហូតមកដល់ពេលនេះ តុលាការបានបំពេញកិច្ចអស់ហើយ សាក្សីបានចូលឆ្លើយដូចយើងបានដឹងហើយ។ ទីពីរ ខ្ញុំបានលើកពីសេរីភាពរបស់ជនត្រូវចោទ ហើយចំណុចមួយទៀត យើងបានពីលើកព្យសនកម្ម ព្រោះអី តាមអ្វីដែលយើងបានដឹង ដើមបណ្ដឹងរដ្ឋប្បវេណីបានឆ្លើយហ្នឹង គឺគាត់អត់មានអីប៉ះពាល់អីធ្ងន់ធ្ងរទេ ហើយគាត់មិនបានប្ដឹងទាមទារសំណងទេ។ មួយទៀត យើងលើកអំពីស្ថានភាពជីវភាពគ្រួសាររបស់គាត់។ គាត់មានកូនក្នុងបន្ទុកជាដើម។ ចំណុចសំខាន់មួយទៀត យើងលើកឡើងអំពីមជ្ឈដ្ឋានទូទៅ ដែលគេយល់ថា រឿងហ្នឹង វាមិនមែនជារឿងដែលត្រូវឃុំខ្លួនអ៊ីចឹងទេ។ អាហ្នឹងសម្អាងហេតុទាំងអស់ខ្ញុំបានលើកឡើងជូនអង្គសវនាការ»។
ទាក់ទងនឹងវីដេអូឃ្លិប ដែលបង្ហាញពីហេតុការណ៍ លោក ឌិន ពុទ្ធី បើកឡាន នៅថ្ងៃទី២២ ខែធ្នូ នោះ លោកមេធាវីមិនបានលើកមកទេ ព្រោះលោកថា បានដាក់បង្ហាញនៅសាលាដំបូងខេត្តបន្ទាយមានជ័យ រួចហើយ។
លោក ឌិន ពុទ្ធី ត្រូវបានសាលាដំបូងខេត្តបន្ទាយមានជ័យ ចោទប្រកាន់ពីបទបង្កហិង្សាដោយចេតនាមានស្ថានទម្ងន់ទោស ហើយបញ្ជូនទៅឃុំឃាំងនៅពន្ធនាគារខេត្តកាលពីថ្ងៃទី២៤ ខែធ្នូ ឆ្នាំ២០១៦។
លោក អាត់ ធន់ មានប្រសាសន៍ថា លោក ឌិន ពុទ្ធី ជាសកម្មជនមានឥទ្ធិពលមួយរូបដែលបានតស៊ូមតិជាមួយប៉ូលិសខ្មែរ និងថៃ ដើម្បីជួយពលករ និងអ្នកអូសរទេះនៅច្រកទ្វារប៉ោយប៉ែត។ រហូតមកដល់ល្ងាចថ្ងៃទី១៣ ខែមករា លោក ឌិន ពុទ្ធី នៅតែមិនទាន់បានចេញពីពន្ធនាគារខេត្តបន្ទាយមានជ័យ នៅឡើយទេ ព្រោះដីកាសម្រេចមិនទាន់ទៅដល់៕
No comments:
Post a Comment