 |
| ពលរដ្ឋមានទំនាស់ដីធ្លីជាមួយក្រុមហ៊ុនស្ករអំពៅរបស់ឧកញ៉ា ហេង ហ៊ុយ និងក្រុមហ៊ុនស្ករអំពៅ របស់ឧកញ៉ា លី យ៉ុងផាត់ ធ្វើពិធីបន់ស្រន់នៅព្រះអង្គដងកើ រាជធានីភ្នំពេញ កាលពីថ្ងៃទី៩ ខែមករា ឆ្នាំ២០១៧។ RFA/Sorn Chanratha |
ពលរដ្ឋប្រមាណ ១០០នាក់ ដែលមានទំនាស់ដីធ្លីជាមួយក្រុមហ៊ុនស្ករអំពៅរបស់ឧកញ៉ា ហេង ហ៊ុយ ឈ្មោះកោះកុង ផ្លេនថេសិន (Koh Kong Plantation) និងក្រុមហ៊ុនស្ករអំពៅ របស់ឧកញ៉ា លី យ៉ុងផាត់ ឈ្មោះកោះកុង ស៊ូហ្គើរ (Koh Kong Sugar) កាលពីរសៀលថ្ងៃទី៩ ខែមករា បានប្រមូលគ្នាបន់ស្រន់ព្រះអង្គដងកើ ជំរុញមន្ត្រីរាជការមានសមត្ថកិច្ចដោះស្រាយបញ្ហាដីធ្លី គោរពពាក្យសម្បថដែលបានស្បថសច្ចាមុនចូលកាន់តំណែង។
ការងាកមកទាមទារតាមបែបព្រះពុទ្ធសាសនានេះ ខណៈក្រុមពលរដ្ឋនៅមិនទាន់ទទួលបានដំណឹងវិជ្ជមានណាមួយអំពីការទូទាត់សំណងលើដីធ្លី និងផ្ទះសម្បែងរបស់ពួកគេដែលត្រូវបានក្រុមហ៊ុនស្ករអំពៅ ឈូសឆាយបំផ្លាញ តាំងពីឆ្នាំ២០០៦។
ពលរដ្ឋជាង ១០០នាក់ តំណាងឲ្យពលរដ្ឋសរុបចំនួន ១៦២គ្រួសារ មកពីភូមិចំនួន៧ នៅក្នុងស្រុកចំនួនពីរ គឺស្រុកបុទុមសាគរ និងស្រុកស្រែអំបិល ខេត្តកោះកុង។
តំណាងពលរដ្ឋមានទំនាស់ដីធ្លីថ្លែងថា ញត្តិសុំអន្តរាគមន៍របស់ពួកគេដែលដាក់ទៅកាន់ស្ថាប័នផ្សេងៗ ត្រូវបានបង្វែរទៅកាន់ស្ថាប័នផ្សេង ឬបដិសេធតែម្ដងដែលជាហេតុនាំឱ្យក្រុមពលរដ្ឋមានការព្រួយបារម្ភថា បញ្ហារបស់ពួកគេនឹងមិនមានដំណោះស្រាយ។ លោកស្រីអះអាងថា ក្រុមពលរដ្ឋតវ៉ាគឺដើម្បីទាមទារដីធ្លី និងផ្ទះសម្បែងដែលបានខូចខាតតែប៉ុណ្ណោះ គឺមិនមែនធ្វើដើម្បីប្រឆាំងនឹងរាជរដ្ឋាភិបាលនោះទេ៖ «ដើម្បីបង្ហាញនូវឆន្ទៈដើម្បីបង្ហាញនូវការពិត ព្រះអង្គដងកើ។ ទីនេះគឺជាកន្លែងគោរពសក្ការៈបូជា ជាពិសេសគឺជាកន្លែងដែលរដ្ឋមន្ត្រី អនុរដ្ឋមន្ត្រី ជាពិសេសមេឃុំ មេប៉ូលិស ប៉េអឹមផ្សេងៗដែលលោកបានតំណែងហ្នឹង គឺគាត់បានមកស្បថនៅទីនេះថា លោកនឹងគោរពទៅតាមស្ថាប័នដែលបានអោយអនុវត្ត អ៊ីចឹងប្រសិនបើគាត់អត់បានអនុវត្ត គាត់ប្រហែលជាចាញ់សម្បថនេះ ពីព្រោះអីពួកខ្ញុំមិនមែនជាក្រុមប្រឆាំងទេ ពួកខ្ញុំសូមច្រានចោលរាល់ទង្វើ ឬសកម្មភាពណាដែលអោយតែប្រជាពលរដ្ឋរងគ្រោះចោទថា ប្រកាន់បក្សនេះបក្សនោះ គឺពួកយើងអត់ទទួលយកទេ»។
អ្នកស្រី ផាវ ញ៉ើង បន្ថែមទៀតថា ថ្មីៗនេះអនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ លោក ទេព ធន បានយល់ព្រមទទួលយកសំណើពលរដ្ឋដែលស្នើសុំដីទំហំ ២ហិកតារ ក្នុងមួយគ្រួសារ ផ្លូវក្នុងភូមិប្រវែង ៩០០ម៉ែត្រ ដោយឡែកតែសំណើសុំសំណងជាថវិកាចំនួន ៥ពាន់ដុល្លារក្នុងមួយគ្រួសារ នៅមិនទាន់ទទួលបានការឆ្លើយតបយ៉ាងណានៅឡើយ។
ពលរដ្ឋមានទំនាស់ដីធ្លីជាមួយក្រុមហ៊ុនស្ករអំពៅ របស់ឧកញ៉ា ហេង ហ៊ុយ អំពាវនាវដល់ព្រះមហាក្សត្រ ព្រមទាំងលោកនាយករដ្ឋមន្ត្រី ហ៊ុន សែន ឱ្យជួយអន្តរាគមន៍ក្នុងជម្លោះដីធ្លីដ៏រ៉ាំរ៉ៃមួយនេះ៖ «គេឈូសដំណាំមួយកំណាត់ក្រោយរបស់ខ្ញុំ ឡើងអស់រលីងតែម្ដង រួចអស់ដីមួយកំណាត់ក្រោយហើយ គេដុតផ្ទះខ្ញុំចោល ដល់ពេលអត់មានដំណោះស្រាយ អ៊ីចឹងហើយពួកខ្ញុំដើរតវ៉ា ដើរទាមទារដើម្បីជីវភាពក្រីក្រ។ រាល់ថ្ងៃខ្ញុំធ្លាក់ខ្លួនឈឺ ខ្ញុំអត់មានលុយមើល ខ្ញុំមកនេះខ្ញុំចងការលុយគេ ហើយសូមសំណូមពរដល់សម្ដេចនាយករដ្ឋមន្ត្រី ហ៊ុន សែន ជួយមេត្តាមើលកូនចៅក្រីក្រនៅតាមជនបទផង។ អ្នកមានអំណាច មានលុយហ្នឹងធ្វើបាបប្រជាជនក្រីក្រណាស់ ហើយចំពោះខ្ញុំ បើខ្ញុំអត់បាត់បង់ដីធ្លី អត់បាត់បង់ផ្ទះសម្បែងអីទាំងអស់ ខ្ញុំអត់ចាំបាច់មកដើរនៅភ្នំពេញទេ។ ខ្ញុំនៅផ្ទះខ្ញុំ ខ្ញុំស៊ីបាយ ស៊ីអំបិលប្រហុកក៏ខ្ញុំសប្បាយចិត្តខ្ញុំដែរ មិនមែនចង់មកដើរយំ ដើរស្រែកអ៊ីចេះទេ។ សូមមេត្តាសម្ដេច ហ៊ុន សែន ជួយមើលកូនចៅមែនទែន»។
អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ លោក ទេព ធន បញ្ជាក់ថា លោកនឹងយកសំណើរបស់ក្រុមពលរដ្ឋទៅដាក់ជូនទៅស្ថាប័នមានសមត្ថកិច្ចដើម្បីដោះស្រាយ។ ដោយឡែកប្រាក់ ៥ពាន់ដុល្លារ លោកថា ហាក់មិនសូវមានសង្ឃឹមថា ក្រុមហ៊ុននឹងចេញសងនោះឡើយ ដោយសារដីដែលប៉ះពាល់គឺជាដីរបស់រដ្ឋ ដែលបានជួលទៅអោយក្រុមហ៊ុនឯកជនទៅហើយ៖ «យើងរដ្ឋាភិបាលមានលុយឯណាទូទាត់ មានតែក្រុមហ៊ុនហ្នឹងហើយ។ ក្រុមហ៊ុនម៉េចទូទាត់ បើដីហ្នឹងជាដីរបស់រដ្ឋ។ ដល់អ៊ីចឹងទៅ ដល់យើងទៅឱ្យក្រុមហ៊ុនជួយចេញសងជំនួសគេម៉េចព្រម»។
ទោះយ៉ាងណា អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ លោក ទេព ធន រូបនេះ មើលឃើញថា បញ្ហាដីធ្លីដ៏រ៉ាំរ៉ៃមួយនេះ កំពុងខិតមកជិតដល់ផ្លូវដំណោះស្រាយហើយ។
ក្រុមពលរដ្ឋមានទំនាស់ដីធ្លីអះអាងថា ពួកគេសង្ឃឹមថា ប្រមុខដឹកនាំនឹងដោះស្រាយបញ្ហាជូនពួកគេ៕
No comments:
Post a Comment