ចៅក្រមស៊ើបសួរសាលាដំបូងខេត្តមណ្ឌលគិរី សម្រេចឃុំខ្លួនស្ត្រីពីរនាក់នៅពន្ធនាគារខេត្តបណ្ដោះអាសន្ននៅរសៀលថ្ងៃទី១០ ខែមករា ដើម្បីស៊ើបអង្កេតបទចោទប្រកាន់ធ្វើអាជីវកម្មរ៉ែមាសខុសច្បាប់។ ស្ត្រីទាំងពីរនាក់មានឈ្មោះ សំ យ៉េត អាយុ ៤៤ឆ្នាំ និងឈ្មោះ ស៊ូ ម៉ាយ៉ាន អាយុ ៣៧ឆ្នាំ រស់នៅភូមិពូទុង ឃុំចុងឆ្លាស់ ស្រុកកែវសីមា ខេត្តមណ្ឌលគិរី។ព្រះរាជអាជ្ញារង និងជាអ្នកនាំពាក្យសាលាដំបូងខេត្តមណ្ឌលគិរី លោក សូ សុវិជ្ជា បញ្ជាក់ថា មន្ត្រីអយ្យការចោទប្រកាន់ស្ត្រីទាំងពីរតាមច្បាប់រ៉ែ បន្ទាប់ពីសមត្ថកិច្ចបានចាប់ខ្លួនពួកគេបញ្ជូនមកស្ថាប័នអយ្យការកាលពីថ្ងៃទី៩ ខែមករា។ លោកថា បានបញ្ជូនជនជាប់ចោទទៅចៅក្រមស៊ើបសួរដើម្បីចាត់ការបន្ត៖ «រឿងពាក់ព័ន្ធធ្វើរ៉ែ អត់មានការអនុញ្ញាត ឥឡូវយើងនាំគាត់មកហើយបញ្ជូនទៅចៅក្រមស៊ើបសួរហើយ»។
ចំណែកប្រធានពន្ធនាគារខេត្តមណ្ឌលគិរី លោក អាន គឹមឡុង បញ្ជាក់ដែរថា ជនជាប់ចោទត្រូវបានបញ្ជូនមកឃុំខ្លួននៅពន្ធនាគាររួចហើយតាមដីកាសម្រេចរបស់ចៅក្រមស៊ើបសួរ។
សេចក្ដីរាយការណ៍របស់ប្រជាពលរដ្ឋឃុំចុងឆ្លាស់ ឲ្យដឹងថា ជនជាប់ចោទត្រូវសមត្ថកិច្ចចាប់ខ្លួន បន្ទាប់ពីសមត្ថកិច្ចកងរាជអាវុធហត្ថចុះបង្ក្រាបនៅកន្លែងជីករ៉ែមាស នៅភូមិពូទុង ខណៈនោះដែរមានប្រជាពលរដ្ឋជាច្រើននាក់បានលើកគ្នាមានកាំបិតពូថៅរារាំងក្រុមសមត្ថកិច្ច។
អ្នកនាំពាក្យសាលាដំបូងខេត្តមណ្ឌលគិរី លោក មាស ប្រុស បដិសេធមិនអធិប្បាយពីរឿងនេះទេ នៅថ្ងៃទី១០ ខែមករា ពីព្រោះលោកថា កំពុងឋិតនៅក្រុងភ្នំពេញ៕
No comments:
Post a Comment