ប្រជាពលរដ្ឋប្រមាណ ១៥នាក់ តំណាងឲ្យជាង ៥០គ្រួសារ ដែលរងផលប៉ះពាល់ពីគម្រោងអភិវឌ្ឍន៍ផ្លូវរថភ្លើងនៅក្រុងប៉ោយប៉ែត ខេត្តបន្ទាយមានជ័យ នៅព្រឹកថ្ងៃទី៩ មករា បន្តតវ៉ាសាជាថ្មីនៅមុខសាលាក្រុង ដើម្បីជំរុញឲ្យអាជ្ញាធរពាក់ព័ន្ធដោះស្រាយសំណងផលប៉ះពាល់ធ្វើផ្លូវរថភ្លើងជូនពួកគាត់។
ក្រុមប្រជាពលរដ្ឋបាននាំគ្នាតវ៉ាទាមទារសំណងផលប៉ះពាល់នៅមុខសាលាក្រុងប៉ោយប៉ែត ជាលើកទី៣៧ ហើយ ប៉ុន្តែនៅពុំទាន់មានដំណោះស្រាយពីអាជ្ញាធរនៅឡើយ។
តំណាងក្រុមអ្នកតវ៉ាម្នាក់ លោក សែន សុផុន ឲ្យដឹងនៅថ្ងៃទី៩ មករា ថា ពួកគាត់ដែលជាប្រជាពលរដ្ឋក្រីក្រហាក់អស់សង្ឃឹមជាខ្លាំងចំពោះអាជ្ញាធរក្រុងប៉ោយប៉ែត និងមន្ត្រីពាក់ព័ន្ធ ដែលគេចយករួចខ្លួនមិនព្រមចេញមកដោះស្រាយសំណងប៉ះពាល់ពីការអភិវឌ្ឍផ្លូវរថភ្លើងជូនពួកគាត់ចំនួនជាង ៥០គ្រួសារនោះ។
លោកបន្ថែមថា មូលហេតុដែលពួកគាត់តវ៉ា ដោយសារអាជ្ញាធរសង់ផ្លូវរថភ្លើងជិតដល់ទីតាំងដែលពួកគាត់រស់នៅក្នុងសង្កាត់ផ្សារកណ្ដាល ក្រុងប៉ោយប៉ែត ហើយ តែពុំទាន់ទទួលបានសំណងបន្តិចណាពីអាជ្ញាធរនៅឡើយ។ លោកបន្តថា ពួកគាត់កំពុងព្រួយបារម្ភខ្លាចក្រែងនៅពេលអាជ្ញាធរសង់ផ្លូវរថភ្លើងប៉ះចំផ្ទះ និងដី ធ្វើឲ្យមិនអាចរស់នៅបន្តទៀតបាន៖ «ខ្ញុំជាប្រជាពលរដ្ឋខ្មែរម្នាក់ដែលអត់មានដីនៅ ហើយមិនដឹងទៅរស់នៅកន្លែងណា តែអាជ្ញាធរក្រុងគាត់ជាអាណាព្យាបាលរបស់ពួកគាត់ តែបែរជាមិនដោះស្រាយឲ្យពួកខ្ញុំ តើឲ្យខ្ញុំទៅរំពឹងអ្នកណា? ខ្ញុំតូចចិត្តណាស់ ដែលខ្លួនខ្ញុំមិនស្មើនឹងជនអន្តោប្រវេសន៍មករស់នៅលើទឹកដីខ្មែរ គេមានដីស្នាក់នៅ»។
អាស៊ីសេរី ពុំអាចទាក់ទងអភិបាលរងក្រុងប៉ោយប៉ែត ទទួលបន្ទុកដោះស្រាយវិវាទដីធ្លី លោក ម៉ែន សុភ័ណ ដើម្បីសុំអត្ថាធិប្បាយជុំវិញបញ្ហានេះបានទេនៅថ្ងៃទី៩ មករា។ ប៉ុន្តែលោកធ្លាប់មានប្រសាសន៍ថា អាជ្ញាធរក្រុងពុំមានលទ្ធភាពដោះស្រាយសំណងជូនប្រជាពលរដ្ឋទាំងនោះឡើយ។ ម្យ៉ាងទៀតលោកអះអាងថា ក្រុមអ្នកតវ៉ាពុំបានស្ថិតនៅក្នុងគម្រោងប៉ះពាល់ដែលត្រូវដោះស្រាយសំណងជូននោះទេ។
ទោះជាយ៉ាងនេះក្ដី មន្ត្រីសម្របសម្រួលអង្គការលីកាដូ (LICADHO) ប្រចាំខេត្តបន្ទាយមានជ័យ លោក ភុន ឈិន កត់សម្គាល់ថា ក្រុមអ្នកតវ៉ាភាគច្រើនជាប្រជាពលរដ្ឋរស់នៅប៉ះពាល់ពីគម្រោងសាងសង់ផ្លូវរថភ្លើង ដែលរដ្ឋាភិបាលត្រូវដោះស្រាយសំណងជូនពួកគាត់។ លោកបន្ថែមថា ផលប៉ះពាល់សំខាន់របស់ប្រជាពលរដ្ឋ គឺពួកគាត់រស់នៅគ្មានសុវត្ថិភាព នៅពេលដែលផ្លូវរថភ្លើងដំណើរការ ដូចជាការរំខានដោយសំឡេង និងគ្មានច្រកចេញចូលទៅផ្ទះរបស់ពួកគាត់ ជាដើម៖ «កន្លងមកនេះ យើងមើលឃើញថា ប្រហែលជាអាជ្ញាធរគាត់គិតថាប្រជាពលរដ្ឋតវ៉ាដដែលៗច្រើនលើកមកហើយ បានជាគាត់មិនចាប់អារម្មណ៍។ ទោះបីយ៉ាងណាក៏ដោយ នេះជាបញ្ហាដែលយូរ ឬឆាប់ក៏មិនអាចគេចវេះមិនដោះស្រាយជូនប្រជាពលរដ្ឋបានដែរ»។
ប្រជាពលរដ្ឋទាមទារឲ្យអាជ្ញាធរដោះស្រាយសំណងជូនពួកគាត់ទៅតាមតម្លៃដីទីផ្សារ។ ក្រុមអ្នកតវ៉ាបានរំសាយទៅវិញ បន្ទាប់ពីពួកគាត់សម្ដែងមតិនៅមុខសាលាក្រុងប្រមាណ ១ម៉ោងកន្លះ ដោយពុំមានអាជ្ញាធរណាម្នាក់ចេញទៅជួបដោះស្រាយជាមួយពួកគាត់ឡើយ។
នេះជាលើកទី៣៧ ហើយដែលពួកគាត់ទទូចឲ្យអាជ្ញាធរក្រុងប៉ោយប៉ែត ដោះស្រាយ តែពុំទទួលបានលទ្ធផល ហើយពួកគាត់ក៏នាំគ្នាវិលត្រឡប់ទៅផ្ទះវិញ។ ពួកគាត់អះអាងថា ប្រសិនបើអាជ្ញាធរពាក់ព័ន្ធមិនដោះស្រាយសំណងជូនពួកគាត់ដែលអាចទទួលយកបានទេ នោះពួកគាត់នឹងតវ៉ាសាជាថ្មីទៀតក្នុងពេលឆាប់ៗ៕
No comments:
Post a Comment