ភ្នំពេញៈ ក្រោយពីចុះធ្វើការស្រាវជ្រាវរឿងវិវាទដីធ្លី នៅស្រុកស្រែអំបិល និងស្រុកបទុមសាគរ ខេត្ត កោះកុង ដែលមានវិវាទដីធ្លីជាមួយក្រុមហ៊ុនកោះកុងផ្លេនថេសិន និងក្រុមហ៊ុនកោះកុងស៊ូហ្គ័រ អ៊ីនដាស្ទ្រី ក្រសួងដែនដីបានផ្តល់ដំណោះស្រាយមួយដល់អ្នករងគ្រោះដីធ្លី ១៧៥ គ្រួសារ ដោយក្នុងមួយគ្រួសារទទួលបាន ១ ហិកតាកន្លះ ខណៈភាគីរងគ្រោះទាមទារ ២ ហិកតា និងស្នើសុំសំណងជម្ងឺចិត្តចំនួន ៥ ០០០ ដុល្លារ ។ការផ្តល់នូវជំហរដោះស្រាយ បានធ្វើឡើងក្នុងកិច្ចប្រជុំរវាងអនុរដ្ឋលេខាធិការ និងជាប្រធានក្រុមការងារដោះស្រាយវិវាទដីធ្លីទី ៨ នៃក្រសួងរៀបចំដែនដី នគរូបនីយកម្ម និងសំណង់ លោក ទេព ធន ជាមួយតំណាងប្រជាពលរដ្ឋទាំង ១៧៥គ្រួសារ កាលពីម្សិលមិញ នៅទីស្តីការក្រសួងរៀបចំដែនដី ដែលអនុញ្ញាតឱ្យតំណាងពលរដ្ឋ ១៥នាក់ចូលជួប។
ក្រោយកិច្ចប្រជុំភាគីទាំងពីរ បានចេញកំណត់ហេតុមួយ ដោយប្រជាពលរដ្ឋ បដិសេធទទួល យក ១ ហិកតាកន្លះ និងស្នើសុំដី ទំហំ ២ហិកតា ក្នុងមួយគ្រួសារ និងជាដីដែលមិនឆ្ងាយពីភូមិរបស់ប្រជាពលរដ្ឋ និងសុំឱ្យអាជ្ញាធរ និងក្រុមហ៊ុនរៀបចំប្រព័ន្ធផ្លូវ និងជួសជុលផ្លូវប្រវែងប្រមាណ ៩០០ ម៉ែត្រ និងទទឹង ៥ ម៉ែត្រ។
ក្រៅពីនោះពលរដ្ឋ ប្រជាពលរដ្ឋក៏បានទាមទារឲ្យក្រុមហ៊ុន ផ្តល់សំណងជម្ងឺចិត្តចំពោះការខូចខាតផ្សេងៗក្នុងមួយគ្រួសារ ៥ ពាន់ដុល្លារផងដែរ។
ប្រធានក្រុមការងារដោះស្រាយវិវាទដីធ្លីទី ៨ ទេព ធន បានថ្លែងថា ដំបូងឡើងក្រសួងបានសម្រេចផ្តល់ដី ១ហិកតាកន្លះ ដល់ពលរដ្ឋក្នុងមួយគ្រួសារ តែពលរដ្ឋមិនព្រម។
លោកថា «ដោយសារឃើញទម្រង់ ១ហិកតា កន្លះ ល្អចឹងយើងចង់ធ្វើតាមហ្នឹង តែដល់ហើយគាត់ថាមិនព្រមទេ គាត់សុំ ២ហិកតា ប៉ុន្តែយ៉ាងណាក៏ខិតជិតគ្នាបន្តិចដែរ»។
យ៉ាងណាក៏ដោយ លោកនឹងយកសំណើររបស់ប្រជាពលរដ្ឋបញ្ជូនទៅថ្នាក់ដឹកនាំក្រសួងលើដើម្បីពិនិត្យ និងសម្រេច ឬពិភាក្សាជាមួយភាគីក្រុមហ៊ុនបន្ថែមទៀត។
លោកថា«យើងត្រូវពិភាក្សាជាមួយក្រុមហ៊ុនបន្តទៀត ហើយបើក្រុមហ៊ុនឯកភាព យើងនឹងរៀបចំលើកសំណើរពីឯកឧត្តមទេសរដ្ឋមន្ត្រីដើម្បី ឱ្យឯកឧត្តមមានការលើកសំណើរទៅសម្តេចនាយករដ្ឋមន្ត្រីបន្តទៀត ពីព្រោះដីក្នុងដំបន់នេះជាដីរបស់រដ្ឋដែលធ្វើសម្បទានសេដ្ឋកិច្ចទៅឱ្យឯកជន គ្រាន់តែធ្វើទៅមានផលប៉ះពាល់ការអាស្រ័យផលរបស់ពួកគាត់»។
តំណាងប្រជាពលរដ្ឋ អ្នកស្រី ផាវ ញើង បានឲ្យដឹងក្រោយកិច្ចប្រជុំថា ក្នុងការជជែកពិភាក្សារកដំណោះស្រាយនោះ ក្រុមតំណាងប្រជាពលរដ្ឋមិនអាចយក ១ហិកតាកន្លះទេ ព្រោះអ្នកខ្លះបាត់បង់ដីច្រើនជាងនេះ។
អ្នកស្រីថា «ពីមុនមានអ្នកបាត់បង់ដីច្រើន ហើយមកដល់ពេលនេះយើងបន្ទាបខ្លួនរហូតទទួល ២ហិកតា និងលុយ ៥០០០ ដុល្លារ ដែលពីមុនយើងទាមទារមួយម៉ឺនដុល្លារ»។
អ្នកស្រីបញ្ជាក់ថា ការស្នើសុំប្រាក់សំណងជម្ងឺចិត្តនេះ ដើម្បីទៅផ្គត់ផ្គង់គ្រួសារ និងសងបំណុលធនាគារតាំងពីបាត់ដីពេលនោះមក។
បើតាមអ្នកស្រី ផាវ ញើង បើក្រសួងមិនផ្តល់ដំណោះស្រាយទៅតាមសំណើរនោះទេ ពួកគេនឹងនៅតវ៉ារហូតមិនត្រឡប់ទៅស្រុកកំណើតវិញទេនិងព្រមានហែរញត្តិទៅខុទ្ទកាល័យនាយករដ្ឋមន្ត្រី ហ៊ុន សែន នៅថ្ងៃចន្ទសប្តាហ៍ក្រោយនេះ។
កិច្ចប្រជុំនេះបានធ្វើឡើងបន្ទាប់ពីទីប្រឹក្សារាជរដ្ឋាភិបាល និងជាប្រធានគណៈកម្មការចម្រុះនៃទីស្តីការគណៈរដ្ឋមន្ត្រី លោក ប៉ាល់ ចន្ទតារា កាលពីដើមខែ មករា បានផ្ញើលិខិតមួយច្បាប់ជូនរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា ស្នើឱ្យជួយពិនិត្យ និងដោះស្រាយករណីដីធ្លីរបស់ប្រជាពលរដ្ឋមកពីខេត្តកោះកុង ក្រោយពីបានទទួលញត្តិសុំអន្តរាគមន៍របស់ប្រជាពលរដ្ឋ។
សូមរំឭកថា ប្រជាពលរដ្ឋចំនួន ១១៥ នាក់តំណាងឲ្យ ១៧៥ គ្រួសារ បានឡើងមករាជធានីភ្នំពេញជាច្រើនសារមកហើយ ហើយចុងក្រោយនេះ ពួកគាត់បានមកស្នាក់នៅវត្តសាមគ្គីរង្ស៊ី រាជធានីភ្នំពេញ កាលពីថ្ងៃទី ២០ ធ្នូ ឆ្នាំ ២០១៦ ដោយបានដាក់ញត្តិទៅកាន់រដ្ឋសភា ក្រសួងរៀបចំដែនដី និងស្ថាប័នពាក់ព័ន្ធមួយចំនួនទៀត ដើម្បីសុំអន្តរាគមន៍ពន្លឿនការដោះស្រាយបញ្ហាវិវាទ ដែលបានអូសបន្លាយអស់ ១០ឆ្នាំមកនេះ៕
No comments:
Post a Comment