 |
| កម្លាំងអាជ្ញាធរក្រុងភ្នំពេញ ចាប់ខ្លួនបេក្ខជនតំណាងរាស្ត្រគណបក្សសង្គ្រោះជាតិ អ្នកស្រី មូរ សុខហួរ និងលោក កែវ ភីរម្យ យកចូលទៅក្នុងទីលានប្រជាធិបតេយ្យ នៅព្រឹកថ្ងៃទី១៥ កក្កដា ឆ្នាំ២០១៤។ RFA/Uon Chhin |
សាលារាជធានីភ្នំពេញ កំពុងរៀបចំគម្រោងកែលម្អទីតាំងទីលានប្រជាធិបតេយ្យថ្មី មុននឹងបើកសម្ពោធឲ្យប្រើប្រាស់ បន្ទាប់ពីទទួលបានគោលការណ៍សម្រេចពីក្រសួងមហាផ្ទៃ កាលពីដើមខែមករា។ ពលរដ្ឋមួយចំនួន មិនជំទាស់នឹងគម្រោងផ្លាស់ប្ដូរទីតាំងទីលានប្រជាធិបតេយ្យនោះទេ។ ក៏ប៉ុន្តែ ពលរដ្ឋខ្លះ យល់ថា ទីតាំងថ្មីនេះ មិនសក្ដិសមសម្រាប់ធ្វើទីលានប្រជាធិបតេយ្យនោះទេ។ សម្រាប់តំណាងរាស្ត្របក្សប្រឆាំងវិញ ទីលានប្រជាធិបតេយ្យចាស់នៅក្បែរវត្តភ្នំ ជានិមិត្តរូបនៃសេរីភាព និងការតស៊ូរបស់ប្រជាពលរដ្ឋកម្ពុជា ដែលក្រោកឡើងទាមទារស្វែងរកយុត្តិធម៌ និងសមភាព សម្រាប់ការរស់នៅ ដែលគួររក្សាទុកជាអនុស្សាវរីយ៍។
មានផ្ទៃ២ម៉ឺនម៉ែត្រការ៉េ សួនច្បារគីឡូម៉ែត្រលេខ៦ ជាកន្លែងហាត់ប្រាណ កន្លែងសម្រាកកម្សាន្ត និងកន្លែងលក់អាហារ ភេសជ្ជៈ របស់ពលរដ្ឋនៅតំបន់នេះ។ វាស្ថិតនៅមុខស្ថានីយស្តុកប្រេងឥន្ធនៈសូគីម៉ិច (Sokimex) អមផ្លូវជាតិលេខ៥ ស្ថិតក្នុងខណ្ឌឫស្សីកែវ រាជធានីភ្នំពេញ។ ក៏ប៉ុន្តែ នៅក្នុងពេលដ៏ខ្លីខាងមុខទិដ្ឋភាពនៃសួននេះ នឹងប្រែប្រួល។
កាលពីដើមខែធ្នូ ២០១៦ លោកនាយករដ្ឋមន្ត្រី ប្រកាសផ្លាស់ប្ដូរទីតាំងទីលានប្រជាធិបតេយ្យ នៅក្បែររមណីយដ្ឋានវត្តភ្នំ ទៅជាយក្រុងភ្នំពេញវិញ ដើម្បីរៀបចំកន្លែងពាណិជ្ជកម្ម និងសួនច្បារសាធារណៈ។
ទីលានប្រជាធិបតេយ្យ ជាកន្លែងសម្រាប់ជួបជុំ បញ្ចេញមតិ តវ៉ាអហិង្សា។ វាមាន ទំហំទទឹង ៥៥ម៉ែត្រ និងបណ្ដោយ ១៩៨ម៉ែត្រ។ ទីលាននេះត្រូវបានប្រកាសឲ្យប្រើប្រាស់ កាលពីឆ្នាំ២០១០ ដោយអតីតអភិបាលក្រុង លោក កែប ជុតិមា។
ប្រជាពលរដ្ឋដែលតែងទៅអង្គុយជ្រកម្លប់ រត់ហាត់ប្រាណ និងលក់ភេសជ្ជៈ នៅសួនច្បារគីឡូម៉ែត្រលេខ៦ មួយចំនួន ដែលអាស៊ីសេរីបានជួបសម្ភាស ថ្លែងថា ពួកគេមិនបានដឹងពីគម្រោងប្រែក្លាយសួនច្បារនេះ ជាទីតាំងទីលានប្រជាធិបតេយ្យនោះឡើយ។
ក្រោយពីដឹងពីគម្រោងនេះហើយ អ្នកខ្លះ មិនជំទាស់នឹងគម្រោងនេះទេ។ «»
ទោះយ៉ាងណា អ្នកខ្លះទៀត យល់ថា ទីតាំងសួនច្បារនេះ មិនសក្ដិសមសម្រាប់ធ្វើទីលានប្រជាធិបតេយ្យទេ។«»
អ្នកនាំពាក្យសាលារាជធានីភ្នំពេញ លោក ម៉េត មាសភក្ដី ប្រាប់អាស៊ីសេរីតាមទូរស័ព្ទថា បច្ចុប្បន្ន សាលារាជធានីភ្នំពេញ កំពុងសិក្សាគម្រោងប្រែក្លាយទីតាំងសួនច្បារនេះ ទៅទីតាំងទីលានប្រជាធិបតេយ្យ។«»
លោកបន្ថែមទៀតថា បើទោះជាសួននេះ ត្រូវរៀបចំហើយសម្រាប់ការប្រមូលផ្ដុំតវ៉ា ប្រជាពលរដ្ឋ នៅអាចមកកម្សាន្ត និងហាត់កីឡា បានធម្មតា។
ប្រសិនបើពលរដ្ឋ ចង់ស្នើសុំទីតាំងទីលានប្រជាធិបតេយ្យ ដើម្បីតវ៉ា លោក ភក្តី ឲ្យដឹងថា ពលរដ្ឋអាចប្រើទីតាំងចាស់បាន នៅពេលសួនច្បារមិនទាន់រៀបចំហើយ។
ត្រឹមថ្ងៃទី១៩ មករា នៅទីតាំងសួនច្បារគីឡូម៉ែត្រលេខ៦ អាស៊ីសេរីមិនឃើញមានសកម្មភាពរៀបចំ ឬកែលំអ ដើម្បីប្រែក្លាយសួនច្បារទៅជាទីលានប្រជាធិបតេយ្យនៅឡើយ។
សាលារាជធានីភ្នំពេញ មិនបានបញ្ជាក់កាលបរិច្ឆេទពិតប្រាកដ ថាពេលណា ការរៀបចំនេះ នឹងត្រូវបញ្ចប់នោះទេ តែនឹងព្យាយាមធ្វើឲ្យកាន់តែឆាប់ចប់។
តំណាងគណបក្សសង្គ្រោះជាតិ ប្រចាំមណ្ឌលបាត់ដំបង អ្នកស្រី មូរ សុខហួរ នៅថ្ងៃទី១៨ មករា ២០១៧ បានឈរជាមួយអាស៊ីសេរី នៅលើទីលានប្រជាធិបតេយ្យ និយាយរំលឹកពីពេលដែលអ្នកស្រីរៀបចំបាតុកម្មកាលពីឆ្នាំ២០១៤ កន្លងទៅ។
ទីលានប្រជាធិបតេយ្យ ធ្លាប់ត្រូវក្រុមសហជីព អង្គការសង្គមស៊ីវិល និងបក្សប្រឆាំង យកជាកន្លែងប្រមូលផ្ដុំគ្នា ស្រែកតវ៉ា។ ក្នុងពេលភាពជាប់គាំងនយោបាយ ក្រោយការបោះឆ្នោតឆ្នាំ២០១៣ គណបក្សសង្គ្រោះជាតិ ក៏បានបោះតង់ ធ្វើឆាក ដើម្បីតវ៉ាទាក់ទងនឹងលទ្ធផលបោះឆ្នោត និងស្នើសុំឲ្យលោកនាយករដ្ឋមន្ត្រី ចុះចេញពីតំណែង។
ក៏ប៉ុន្តែ ការតវ៉ាត្រូវបានអាជ្ញាធរបំបែក។ សព្វថ្ងៃ មន្ត្រី និងសកម្មជនគណបក្សសង្គ្រោះជាតិ ជាង១០នាក់ ត្រូវតុលាការ កាត់ទោសដាក់ពន្ធនាគារ ទាក់ទងនឹងការរឿងធ្វើបាតុកម្មនៅទីលានប្រជាធិបតេយ្យ។
ចង្អុលទៅទីចំណុចមួយនៅខាងលិចទីលានប្រជាធិបតេយ្យ អ្នកស្រី មូរ សុខហួរ បញ្ជាក់ថា ទីលានប្រជាធិបតេយ្យ ជានិមិត្តរូបនៃការតស៊ូព្យាយាម នៃការបញ្ចេញមតិរបស់ពលរដ្ឋ ដើម្បីស្វែងរកយុត្តិធម៌ និងការរស់នៅប្រសើរឡើង។«»
អ្នកស្រី មូរ សុខហួរ មិនចង់ឃើញការបំបាត់ទីតាំងទីលានប្រជាធិបតេយ្យនោះទេ បើទោះជានឹងមានកន្លែងថ្មី សម្រាប់ការប្រមូលផ្តុំក៏ដោយ។«»
ប្រជាពលរដ្ឋមួយចំនួន ដែលលក់ដូរនៅជុំវិញទីលានប្រជាធិបតេយ្យ ដែលហ៊ុមព័ន្ធទៅដោយអាគារពាណិជ្ជកម្មរាប់សិបជាន់ និងការដ្ឋានសំណង់ផ្សេងៗទៀត ថ្លែងថា ការផ្លាស់ប្ដូរទីលានប្រជាធិបតេយ្យ ជាសិទ្ធិសម្រេចរបស់អាជ្ញាធរ។
ក៏ប៉ុន្តែ អ្នកតាមស្ថានការណ៍កម្ពុជា យល់ថា ទីតាំងទីលានប្រជាធិបតេយ្យ ដែលស្ថិតក្នុងសង្កាត់ពាណិជ្ជកម្មបែបនេះ អាចនឹងត្រូវធ្វើទៅធ្វើអាគារពាណិជ្ជកម្ម ខណៈតម្លៃអចលនទ្រព្យនៅរាជធានី កំពុងហក់ឡើងខ្លាំង។
អ្នកឃ្លាំមើលសិទ្ធិមនុស្ស មើលឃើញថា ការផ្លាស់ប្ដូរទីលានប្រជាធិបតេយ្យ ទៅជាយក្រុង នឹងកាត់បន្ថយប្រសិទ្ធិភាពនៃការតវ៉ា ដែលក្រសួង ឬស្ថាប័នរដ្ឋ មិនអើពើ ចំពោះការទាមទារ ហើយនឹងធ្វើឲ្យបញ្ហាកាន់តែស្មុគស្មាញ ដែលនឹងពិបាកដោះស្រាយ។
មាត្រា២៨ នៃច្បាប់ស្ដីពីបាតុកម្មដោយសន្តិវិធី ដែលប្រកាសឲ្យអនុវត្តកាលពីខែធ្នូ ឆ្នាំ២០០៩ បានចែងថា អាជ្ញាធររាជធានី និងខេត្តនីមួយៗ ត្រូវបង្កើតកន្លែងបញ្ចេញមតិជាសាធារណៈ។ រហូតមកដល់ពេលនេះ ក្រៅពីនៅរាជធានីភ្នំពេញ អាជ្ញាធរនៅបណ្ដាខេត្តផ្សេងៗទៀត មិនទាន់ឃើញបង្កើតទីលានប្រជាធិបតេយ្យសម្រាប់ដែនដីខ្លួននៅឡើយទេ៕
No comments:
Post a Comment