 |
| គ្រូពេទ្យស្ម័គ្រចិត្តមកពីសហរដ្ឋអាមេរិក និងប្រទេសកាណាដា ពិនិត្យ និងព្យាបាលជំងឺកុមារនៅស្រុកអូរយ៉ាដាវ ខេត្តរតនគិរី នៅថ្ងៃទី២៥ ខែមករា ឆ្នាំ២០១៧។ RFA/Ratha Visal |
គ្រូពេទ្យស្ម័គ្រចិត្តមួយក្រុមមកពីសហរដ្ឋអាមេរិក និងប្រទេសកាណាដា បានបើកយុទ្ធនាការអន្តរជាតិ ពិនិត្យ និងព្យាបាលសុខភាពមាត់ធ្មេញ និងជំងឺទូទៅជូនពលរដ្ឋនៅតំបន់ជនបទ ក្នុងស្រុកអូរយ៉ាដាវ ខេត្តរតនគិរី ដោយមិនយកកម្រៃ។
ប្រជាពលរដ្ឋជិត ២០០នាក់នៅស្រុកអូរយ៉ាដាវ ខេត្តរតនគិរី បានទទួលការពិនិត្យ និងព្យាបាលសុខភាពមាត់ធ្មេញ និងជំងឺទូទៅពីសំណាក់គ្រូពេទ្យស្ម័គ្រចិត្តមកពីសហរដ្ឋអាមេរិក និងកាណាដា នៅថ្ងៃទី២៥ ខែមករា ដោយមិនយកកម្រៃ។
ប្រជាពលរដ្ឋមកពីតំបន់ជនបទភាគច្រើនជនជាតិដើមភាគតិច រស់នៅឃុំចំនួន៦ ក្នុងស្រុកអូរយ៉ាដាវ ត្រូវបានអាជ្ញាធរមូលដ្ឋានផ្សព្វផ្សាយឲ្យមកទទួលសេវាពិនិត្យសុខភាពមិនយកកម្រៃនេះ សម្រាប់រយៈពេល ៤ថ្ងៃ ឬលើសពីនេះ ប្រសិនបើប្រជាពលរដ្ឋនៅតែមកទទួលសេវានេះ។
ប្រជាពលរដ្ឋមកពីភូមិគងយុ លោក ពូយ កេះ បញ្ជាក់ថា នេះជាតម្រូវការសេវាសុខភាពរបស់ពលរដ្ឋនៅតំបន់ជនបទដែលខ្វះខាតប្រាក់ និងមធ្យោបាយទៅពិនិត្យជំងឺនៅមន្ទីរពេទ្យឯកជន និងមន្ទីរពេទ្យរដ្ឋដែលមាននៅក្នុងស្រុក។ លោកថា យុទ្ធនាការរបស់ក្រុមគ្រូពេទ្យស្ម័គ្រចិត្តនេះ បានរួមចំណែកកាត់បន្ថយការលំបាកទៅលើការចំណាយសេវាព្យាបាលជំងឺរបស់ប្រជាពលរដ្ឋ៖ «ធ្មេញបាក់អស់ហើយខ្ញុំ ចង់មើលធ្មេញ។ សប្បាយដែរគាត់ជួយបានមានលុយ បើអត់លុយចប់ហើយ»។
យុទ្ធនាការផ្នែកសុខភាពនេះ ធ្វើឡើងដោយក្រុមគ្រួសារវេជ្ជបណ្ឌិតមកពីសហរដ្ឋអាមេរិក រួមមានប្រពន្ធ កូន និងមិត្តភ័ក្ដិជាគ្រូពេទ្យមកពីប្រទេសកាណាដា ក្រោមការគាំទ្រ និងឧបត្ថម្ភដោយក្រុមហ៊ុន អង្គរហ្គោល (Angkor Gold) ដែលកំពុងវិនិយោគស្រាវជ្រាវរ៉ែលោហៈនៅខេត្តរតនគិរី។
 |
| គ្រូពេទ្យស្ម័គ្រចិត្តមកពីសហរដ្ឋអាមេរិក និងប្រទេសកាណាដា ពិនិត្យ និងព្យាបាលជំងឺមាត់ធ្មេញជូនពលរដ្ឋស្រុកអូរយ៉ាដាវ ខេត្តរតនគិរី នៅថ្ងៃទី២៥ ខែមករា ឆ្នាំ២០១៧។ RFA/Ratha Visal |
វេជ្ជបណ្ឌិត រីឆាត អ្នកដឹកនាំក្រុម ថ្លែងបញ្ជាក់ថា នេះជាការស្ម័គ្រចិត្តរបស់ក្រុមលោកដែលចង់ឃើញប្រជាពលរដ្ឋកម្ពុជា ទទួលបានសេវាសុខភាពនៅតំបន់ជនបទកាន់តែប្រសើរ ជាពិសេសសុខភាពមាត់ធ្មេញ ប្រសិនប្រជាពលរដ្ឋមិនយកចិត្តទុកដាក់ពិនិត្យព្យាបាលបានត្រឹមត្រូវទេ នឹងបង្កឲ្យកើតមានជំងឺបេះដូងធ្ងន់ធ្ងរ៖ «គាត់មកនេះមិនមែនជាអង្គការទេ គឺគាត់បង្កើតជាក្រុមគ្រួសារគាត់ហើយ និងមិត្តភ័ក្ដិគាត់ ឬអ្នកណាដែលចង់ចូលរួមគាត់អញ្ជើញទាំងអស់។ គាត់មកនេះអត់មានការឧបត្ថម្ភពីរដ្ឋាភិបាលណាទេ គឺជាថវិការបស់គាត់ និងក្រុមគាត់»។
ក្រុមហ៊ុន អង្គរហ្គោល ទទួលបានអាជ្ញាប័ណ្ណសិក្សាស្រាវជ្រាវនៅស្រុកអូរយ៉ាដាវ និងស្រុកជិតខាងទៀតក្នុងខេត្តរតនគិរី រួមជាមួយកិច្ចព្រមព្រៀងជួយអភិវឌ្ឍជូនប្រជាពលរដ្ឋនៅមូលដ្ឋានឲ្យបានរីកចម្រើន។
អនុប្រធានកម្មវិធីអភិវឌ្ឍន៍សង្គមរបស់ក្រុមហ៊ុន អង្គរហ្គោល អ្នកស្រី ឌីលែន វីក្ស កត់សម្គាល់ថា តម្រូវការជាអាទិភាពរបស់សហគមន៍ជនបទ ជាពិសេសជនជាតិដើមភាគតិច គឺវិស័យសុខភាព ហេតុនេះក្រុមហ៊ុនយកចិត្តទុកដាក់គាំទ្រ និងឧបត្ថម្ភចំពោះក្រុមគ្រូពេទ្យស្ម័គ្រចិត្ត ដើម្បីរួមចំណែកដោះស្រាយតម្រូវការរបស់ពលរដ្ឋ។ អ្នកស្រីបន្តថា នេះជាតួនាទីរបស់ក្រុមហ៊ុនដែលត្រូវរៀបចំអភិវឌ្ឍ និងជួយប្រជាពលរដ្ឋក្រីក្រក្នុងតំបន់ប្រតិបត្តិការរបស់ក្រុមហ៊ុន៖ «ក្រុមហ៊ុន អង្គរហ្គោល មានទស្សនវិស័យជួយប្រជាជន ហើយណាមួយគាត់ចង់ជួយប្រជាជនក្នុងតំបន់ប្រតិបត្តិការរបស់ក្រុមហ៊ុន ចង់ជួយប្រជាពលរដ្ឋប្រឈមបញ្ហាសុខភាពឲ្យបានការពារសុខភាពទាំងអស់»។
តាមការគ្រោងទុក ក្រុមគ្រូពេទ្យស្ម័គ្រចិត្តនឹងពិនិត្យ និងព្យាបាលសុខភាពជូនប្រជាពលរដ្ឋស្រុកអូរយ៉ាដាវ ចាប់ពីថ្ងៃទី២៥ ដល់ថ្ងៃទី២៧ ខែមករា ឬអាចបន្តប្រសិនតម្រូវការប្រជាពលរដ្ឋមានចំនួនច្រើន៕
No comments:
Post a Comment