 |
| ប្រជាពលរដ្ឋនៅឃុំគរ ស្រុកត្បូងឃ្មុំ ខេត្តត្បូងឃ្មុំ តវ៉ាទាមទារឲ្យអាជ្ញាធរ និងក្រុមហ៊ុន សុភក្តិ នីកា ប្រគល់ចំណែកដីខ្លះឲ្យពួកគាត់ កាលពីព្រឹកថ្ងៃទី២២ ខែមករា ឆ្នាំ២០១៧។ Photo Provided |
ប្រជាពលរដ្ឋជាច្រើនរយនាក់នៅឃុំគរ ស្រុកត្បូងឃ្មុំ ខេត្តត្បូងឃ្មុំ នាំគ្នាទាមទារឲ្យអាជ្ញាធរ និងក្រុមហ៊ុនចម្ការកៅស៊ូ សុភក្តិ នីកា ប្រគល់ដីឲ្យពលរដ្ឋវិញ។ ប្រជាពលរដ្ឋអះអាងថា ដីនោះជាដីពួកគាត់ធ្លាប់កាន់កាប់ និងបង្កបង្កើនផលតាំងពីទសវត្សរ៍៨០ ប៉ុន្តែត្រូវបានអាជ្ញាធរប្រើល្បិចរំលោភយក ហើយប្រគល់ឲ្យក្រុមហ៊ុន។ យ៉ាងនេះក្តី អភិបាលស្រុកបានចេញលិខិតជូនដំណឹងមួយ ដោយបញ្ជាក់ថា ពលរដ្ឋកំពុងរំលោភលើដីក្រុមហ៊ុនដោយខុសច្បាប់។
ប្រជាពលរដ្ឋ ៧ភូមិនៅឃុំគរ ស្រុកត្បូងឃ្មុំ សម្រេចនាំគ្នាតវ៉ា ដោយបោះជាបង្គោលព្រំដី និងធ្វើរោងស្នាក់នៅកន្លែងដីកំពុងមានជម្លោះ ដើម្បីទាមទារចំណែកដីខ្លះពីក្រុមហ៊ុន សុភក្តិ នីកា។ យុទ្ធនាការនេះ ធ្វើឡើងចំនួន ៤ថ្ងៃមកហើយ ប៉ុន្តែមិនទាន់មានដំណោះស្រាយណាមួយដែលធ្វើឲ្យអ្នកភូមិទាំងនោះទទួលយកបានទេ។
ពលរដ្ឋនៅភូមិក្បាលអូរ លោក រស់ ប៊ុនណាត មានប្រសាសន៍នៅថ្ងៃទី២៤ មករា ថា ក្រោយពេលធ្វើយុទ្ធនាការទាមទារដីពីក្រុមហ៊ុនត្រឡប់មកវិញ គឺមានអាជ្ញាធរ និងភាគីក្រុមហ៊ុនចុះទៅសម្របសម្រួល ប៉ុន្តែមានតែការចោទប្រកាន់ថា ពលរដ្ឋរំលោភយកដីក្រុមហ៊ុនទៅវិញ ដោយពួកគេមិនបានលើកឡើងអំពីដើមកំណើតដីនោះឡើយ។ លោករំឭកអំពីប្រវត្តិដីប្រមាណ ៥០០ហិកតារថា ដើមឡើយ ពលរដ្ឋនៅឃុំគរ នាំគ្នាអាស្រ័យផលលើដីនោះតាំងពីក្រោយរបបកម្ពុជាប្រជាធិបតេយ្យ ឬរបបខ្មែរក្រហមមក។
លុះដល់ឆ្នាំ១៩៩៣ អាជ្ញាធរបានដើរប្រមូលស្នាមមេដៃពីពលរដ្ឋ ក្រោមហេតុផលថា យកដីដែលពួកគាត់ធ្លាប់អាស្រ័យផលប្រគល់ឲ្យរដ្ឋ ប៉ុន្តែក្រោយមក ទើបអ្នកស្រុកដឹងថា អាជ្ញាធរបានប្រគល់ដីឲ្យក្រុមហ៊ុនទៅវិញ៖ «រហូតដល់កៅស៊ូគេដាំហើយ គេប្រមូលផលបានហើយ គេកាប់ចោលទៅវិញ។ អ៊ីចឹងគេយល់ច្រឡំថា ដីនោះជាដីឧកញ៉ាមួយចំនួន។ ដល់អ៊ីចឹង ប្រជាពលរដ្ឋបងប្អូនដឹងថា ដីនោះមិនមែនជាដីជូនរាជរដ្ឋាភិបាលទេ គឺដីហ្នឹងជាឯកជនហើយ បានជាពួកគាត់នាំគ្នាតវ៉ាទៅ»។
ពលរដ្ឋសម្រេចទាមទារដីត្រឡប់មកវិញនៅពេលនេះ ដោយស្នើឲ្យអាជ្ញាធរ និងក្រុមហ៊ុនប្រគល់ដីជូនពួកគាត់ក្នុងមួយគ្រួសារទទឹងប្រវែង ២៥ម៉ែត្រ និងបណ្តោយ ៥០ម៉ែត្រ សម្រាប់សាងសង់លំនៅឋាន និងដាំដំណាំខ្លះ ហើយពលរដ្ឋដែលទាមទារ គឺមានប្រហែល ៣០០គ្រួសារ។
ស្រដៀងគ្នានេះ ពលរដ្ឋមួយរូបទៀតមានវ័យជាង ៦០ឆ្នាំ លោក នាង សុផាន ឲ្យដឹងថា ការតវ៉ាប៉ុន្មានថ្ងៃមកនេះ ឃើញមានអាជ្ញាធរចុះទៅជួបពលរដ្ឋដែរ ប៉ុន្តែមិនទាន់មានដំណោះស្រាយសមស្របតាមការទាមទាររបស់ពួកគាត់ឡើយ។ លោកបញ្ជាក់ជំហរថា ពលរដ្ឋនឹងបន្តទាមទារដដែលរហូតដល់ខាងក្រុមហ៊ុន និងអាជ្ញាធរព្រមប្រគល់ចំណែកដីខ្លះជូនពួកគាត់ បើទោះបីជាត្រូវប្រឈមមុខយ៉ាងណាក៏ដោយ៖ «ប្រជាពលរដ្ឋនៅតែធ្វើ នៅតែទៅ នៅតែនាំគ្នាទៅបោះជំរំដាំដើមចេកដាំអី នៅតែទៅបោះជំរំហ្នឹង»។
អាស៊ីសេរី នៅមិនអាចទាក់ទងតំណាងក្រុមហ៊ុន សុភក្តិ នីកា ដើម្បីសួរអំពីបញ្ហានេះបានទេនៅថ្ងៃទី២៤ មករា។
អភិបាលស្រុកត្បូងឃ្មុំ លោក កេង ប៊ុនណា បានចេញលិខិតជូនដំណឹងមួយច្បាប់កាលពីថ្ងៃទី២២ មករា បញ្ជាក់ថា ចាប់តាំងពីថ្ងៃទី២០ មករា គឺមានពលរដ្ឋប្រមាណ ៣០០គ្រួសារមកពីភូមិចំនួន៧ នាំគ្នាមកទន្ទ្រានកាន់កាប់ចំណែកដីអវិនិយោគរបស់ក្រុមហ៊ុន សុភក្តិ នីកា មានទំហំប្រមាណ ៥០០ហិកតារ ដែលបានសិទ្ធិវិនិយោគដាំកៅស៊ូ និងដំណាំផ្សេងទៀតពីរាជរដ្ឋាភិបាល។ ក្នុងលិខិតអះអាងទៀតថា សកម្មភាពចូលកាន់កាប់ដីដោយខុសច្បាប់នេះ មានដូចជា វាស់វែងបែងចែកក្បាលដី បោះបង្គោលកំណត់ព្រំដី និងសកម្មភាពសាងសង់ជម្រកស្នាក់នៅបណ្ដោះអាសន្នជាដើម។ សកម្មភាពទាំងនេះ ធ្វើឲ្យប៉ះពាល់ និងរាំងស្ទះដល់ដំណើរការរៀបចំដីសម្រាប់ដាំដុះជាថ្មី និងការកាន់កាប់ស្របច្បាប់របស់ក្រុមហ៊ុន។
លិខិតដដែលស្នើឲ្យពលរដ្ឋបញ្ឈប់សកម្មភាពទាំងនេះជាបន្ទាន់ ហើយរុះរើបង្គោលដែលបានបោះកំណត់ព្រំដី និងរោងស្នាក់នៅឲ្យអស់ត្រឹមថ្ងៃទី២៣ មករា ជាកំហិត។ ប្រសិនបើពលរដ្ឋមិនព្រមធ្វើតាមសេចក្តីជូនដំណឹងនេះ អាជ្ញាធរនឹងអនុវត្តតាមច្បាប់ ហើយមិនទទួលខុសត្រូវរាល់ការខាតបង់ ឬឧបទ្ទវហេតុណាមួយដែលកើតឡើងដោយការអនុវត្តច្បាប់របស់សមត្ថកិច្ចឡើយ។
មេឃុំស្តីទីនៃឃុំគរ លោក លីម គីមហេង មានប្រសាសន៍ថា ការតវ៉ារបស់អ្នកភូមិប៉ុន្មានថ្ងៃមកនេះ គឺដោយសារតែដីទាំងនោះ ពួកគាត់ធ្លាប់កាន់កាប់កន្លងមក។ លោកមើលឃើញថា ក្នុងចំណោមពលរដ្ឋទាមទារដីពីក្រុមហ៊ុន គឺមានមួយចំនួនគ្មានដីសម្រាប់ធ្វើលំនៅឋាន និងមិនមានមុខរបរទៀតផង។ លោកបន្ថែមថា ករណីនេះ អាជ្ញាធរគ្រោងនឹងជួបជាមួយពលរដ្ឋបន្តទៀត ដើម្បីរួមគ្នារកដំណោះស្រាយ៖ «មានការដោះស្រាយគ្នាទៅ។ បើគាត់ចង់បាន យើងត្រូវតែឲ្យក្រុមហ៊ុនហ្នឹងមកដោះស្រាយគ្នាទៅ។ ដូចថាគាត់បានចរចាគ្នាលឿនៗទៅ គឺល្អដែរ»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តត្បូងឃ្មុំ លោក នាង សុវ៉ាត មើលឃើញថា បញ្ហាបែបនេះកើតឡើងពីព្រោះតែអាជ្ញាធរមិនបានចេញមុខបកស្រាយឲ្យបានច្បាស់លាស់ ថាដីដែលពួកគាត់ដកហូតពីពលរដ្ឋកន្លងមក គឺទុកជាកម្មសិទ្ធិរបស់រដ្ឋ ឬឯកជន។ នៅពេលដែលអ្នកភូមិដឹងច្បាស់ថា ដីដែលអាជ្ញាធរដកហូតពីពួកគាត់ យកទៅប្រគល់ឲ្យក្រុមហ៊ុននោះ គឺធ្វើឲ្យពលរដ្ឋមិនពេញចិត្តនោះទេ៖ «ហើយនៅក្នុងសមត្ថកិច្ចរបស់រដ្ឋដែលជាម្ចាស់ដីហ្នឹងចេញមុខមក ទទួលខុសត្រូវនៅមុខប្រជាពលរដ្ឋទៅ ថាដីហ្នឹងគេធ្វើអវិនិយោគ មិនមែនឲ្យទៅឯកជនទេ។ រដ្ឋមានតួនាទីការពារ និងគ្រប់គ្រងដីរដ្ឋហ្នឹងទុកសម្រាប់រដ្ឋ»។
លោក នាង សុវ៉ាត បញ្ជាក់ថា ដីសាធារណៈរបស់រដ្ឋ គឺគ្មានអាជ្ញាយុកាលទេ។ លោកយល់ថា ដើម្បីដោះស្រាយបញ្ហានេះ ពលរដ្ឋត្រូវធ្វើលិខិត ឬសំណើដាក់ទៅស្ថាប័នពាក់ព័ន្ធឲ្យបានត្រឹមត្រូវ។ ចំណែកអាជ្ញាធរ និងភាគីក្រុមហ៊ុនវិញ ត្រូវចេញមុខបកស្រាយ ឬបង្ហាញភស្តុតាងរបស់ខ្លួនដែលមាន ឲ្យពលរដ្ឋបានដឹងច្បាស់ថា ដីនោះនៅតែជាដីរបស់រដ្ឋ ឬជាដីឯកជន ជៀសវាងការបោកប្រាស់ប្រជាពលរដ្ឋ ដែលនាំឲ្យពួកគាត់បាត់បង់ជំនឿទុកចិត្តលើអាជ្ញាធរ៕
No comments:
Post a Comment