មន្ត្រីជាន់ខ្ពស់ក្រសួងរៀបចំដែនដី នគរូបនីយកម្ម និងសំណង់ បានសាទរចំពោះគម្រោងអភិវឌ្ឍន៍មួយរបស់ក្រុមហ៊ុន វើលដ៍ប្រ៊ិឡែន (Worldbridge Land Cambodia) ដែលអភិវឌ្ឍសង់លំនៅឋានលក់ជូនពលរដ្ឋក្នុងតម្លៃសមរម្យ។នៅថ្ងៃទី៧ មករា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានបើកការដ្ឋានសាងសង់លំនៅឋានសាធារណៈមានតម្លៃសមរម្យសម្រាប់គ្រួសារមន្ត្រីរាជការ កងកម្លាំងប្រដាប់អាវុធ មន្ត្រីចូលនិវត្តន៍ និងជនពិការ ដែលថាគម្រោងនេះជាគម្រោងកាត់បន្ថយភាពក្រីក្រដល់ពលរដ្ឋកម្ពុជា។
សង្គមស៊ីវិលធ្វើការក្នុងវិស័យលើកកម្ពស់សិទ្ធិលំនៅឋាន បានអបអរសាទរចំពោះការខិតខំប្រឹងប្រែងរបស់រដ្ឋាភិបាល ដែលសហការជាមួយក្រុមហ៊ុនសង់លំនៅឋានលក់ក្នុងតម្លៃសមរម្យដល់មន្ត្រីរាជការដែលមានបៀវត្សទាប។
នាយកប្រតិបត្តិនៃអង្គការក្រុមការងារពិសេសសិទ្ធលំនៅឋាន លោក សៀ ភារម្យ មានប្រសាសន៍ថា គម្រោងអភិវឌ្ឍន៍របស់ក្រុមហ៊ុន វើលដ៍ប្រ៊ិឡែន (Worldbridge Land Cambodia) ដែលអភិវឌ្ឍសង់លំនៅឋានសម្រាប់លក់ជូនគ្រួសារមន្ត្រីរាជការ កងកម្លាំងប្រដាប់អាវុធ មន្ត្រីចូលនិវត្តន៍ និងជនពិការ គឺជាគម្រោងមួយលើកទឹកចិត្តដល់មន្ត្រីរាជការដែលមានប្រាក់ខែតិច ដែលអាចឲ្យមន្ត្រីរាជការផ្ដល់សេវាកម្មបានល្អជូនពលរដ្ឋ។
លោកសង្ឃឹមថា គម្រោងដូចគ្នានេះ អាចនឹងផ្ដល់ឲ្យពលរដ្ឋក្រីក្រដទៃទៀតទទួលបានដូចគ្នាដែរ៖ «សង្ឃឹមថាគម្រោងនេះជោគជ័យ។ សង្ឃឹមថាគាត់នឹងទាក់ទាញអ្នកវិនិយោគផ្សេងៗទៀត គិតគូរសង់លំនៅឋានសម្រាប់អ្នកដែលក្រីក្រ ស្របទៅតាមគោលនយោបាយជាតិស្ដីពីលំនៅឋាន ដែលរដ្ឋាភិបាលបានអនុម័តកាលពីឆ្នាំ២០១៥ ដើម្បីឲ្យអ្នកក្រីក្រទទួលបានលំនៅឋានសមរម្យដូចអ្នកផ្សេងៗទៀតដែរ»។
ក្នុងពិធីបើកការដ្ឋានសាងសង់លំនៅឋានសាធារណៈមានតម្លៃសមរម្យសម្រាប់គ្រួសារមន្ត្រីរាជការ កងកម្លាំងប្រដាប់អាវុធ មន្ត្រីចូលនិវត្តន៍ និងជនពិការ ថ្ងៃទី៧ មករា នៅភូមិកោះគ ឃុំរកាខ្ពស់ ស្រុកស្អាង ខេត្តកណ្ដាល រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា ថ្លែងថា គម្រោងសាងសង់ផ្ទះដែលធ្វើឡើងនេះ នឹងជួយឲ្យដល់ជីវភាពប្រជាពលរដ្ឋក្រីក្រ។
គម្រោងអភិវឌ្ឍន៍សង់ផ្ទះល្វែងរបស់ក្រុមហ៊ុន វើលដ៍ប្រ៊ិឡែន (Worldbridge Land Cambodia) នេះ ស្ថិតនៅតាមបណ្ដោយផ្លូវលេខ២១ ភូមិកោះគ ឃុំរកាខ្ពស់ ស្រុកស្អាង ខេត្តកណ្ដាល ចំនួន ២.២៩៧ល្វែង ដែលតម្លៃផ្ទះចន្លោះពី ២ម៉ឺនដុល្លារទៅ ២ម៉ឺន ៥ពាន់ដុល្លារ ហើយអាចបង់រំលស់បាន ដោយក្រុមហ៊ុននេះសហការជាមួយធនាគារយកការប្រាក់ទាប។
គម្រោងអភិវឌ្ឍន៍នេះ ក៏មានសាលារៀន ផ្សារ និងមន្ទីរពេទ្យផង។ ព័ត៌មានពីក្រុមហ៊ុននេះ ឲ្យដឹងថា អ្នកចង់ទិញផ្ទះនេះមានលក្ខខណ្ឌមួយចំនួន ហើយក្រុមហ៊ុននឹងបើកលក់ ហើយទទួលពាក្យស្នើសុំទិញនៅដើមខែកុម្ភៈ ឆ្នាំ២០១៧៕
No comments:
Post a Comment