ក្រុមគ្រូពេទ្យស្ម័គ្រចិត្តនៃមន្ទីរពេទ្យបង្អែកខេត្តរតនគិរី បានព្យាបាលជំងឺដោយឥតគិតថ្លៃជូនពលរដ្ឋជនជាតិដើមភាគតិចនៅឃុំប៉ាតេ ស្រុកអូរយ៉ាដាវ ខេត្តរតនគិរី ដើម្បីលើកកម្ពស់សេវាសុខភាពប្រជាពលរដ្ឋនៅតំបន់ជនបទ។ សហគមន៍ជនជាតិដើមភាគតិចចាត់ទុកការផ្ដល់សេវាសុខភាពជូនប្រជាពលរដ្ឋដល់មូលដ្ឋានថា ជាការជួយកាត់បន្ថយភាពក្រីក្ររបស់ពលរដ្ឋ។
ជនជាតិដើមភាគតិចជាង ៣០០នាក់ នៅភូមិចំនួន៣ ក្នុងឃុំប៉ាតេ ស្រុកអូរយ៉ាដាវ ខេត្តរតនគិរី ទទួលសេវាពិនិត្យជំងឺដោយឥតគិតថ្លៃនៅថ្ងៃទី១៤ ខែមករា។
គ្រូពេទ្យ និងវេជ្ជបណ្ឌិតនៃមន្ទីរពេទ្យបង្អែកខេត្តរតនគិរី ប្រមាណ ២០នាក់ បានពិនិត្យសុខភាពជូនប្រជាពលរដ្ឋមកពីភូមិគងធំ ភូមិប្លង់ និងភូមិគងយុ ផ្ដល់ថ្នាំព្យាបាលជំងឺ និងថ្នាំបំប៉នជីវជាតិ។
អនុប្រធានមន្ទីរសុខាភិបាលខេត្តរតនគិរី លោក ជា សានិត កត់សំគាល់ថា ទិន្នន័យដែលក្រុមគ្រូពេទ្យពិនិត្យទៅលើប្រជាពលរដ្ឋដែលមកទទួលសេវាសុខភាពភាគច្រើនអ្នកភូមិមានជំងឺក្រពះ ឈឺសន្លាក់ដៃជើង រលាកផ្លូវដង្ហើម និងកង្វះអាហារូបត្ថម្ភសម្រាប់កុមារ។ លោកបន្តថា យុទ្ធនាការផ្ដល់សេវាសុខភាពជូនពលរដ្ឋនៅតំបន់ជនបទនេះ បានជួយឲ្យប្រជាពលរដ្ឋក្រីក្រនៅតំបន់ជនបទមានលទ្ធភាពថែទាំសុខភាពបានងាយស្រួលមិនចំណាយប្រាក់៖ «បងប្អូនយើងពាក់ព័ន្ធបញ្ហាសុខភាពគាត់មានការឈឺថ្កាត់ច្រើន បើមានបញ្ហាសុខភាពខ្លាំង ដូចជាជំងឺរាករូស សុំឲ្យអាជ្ញាធរភូមិឃុំទូរស័ព្ទទៅមន្ទីរពេទ្យស្រុក ឬមន្ទីរពេទ្យខេត្តយើងមានរថយន្តសង្គ្រោះ»។
 |
| ក្រុមគ្រូពេទ្យស្ម័គ្រចិត្តខេត្តរតនគិរី ចុះពិនិត្យព្យាបាលជំងឺឥតយកថ្លៃជូនជនជាតិដើមភាគតិច ៣ភូមិ ក្នុងឃុំប៉ាតេ ស្រុកអូរយ៉ាដាវ នៅថ្ងៃទី១៤ ខែមករា ឆ្នាំ២០១៧។ RFA/Ratha Visal |
ការព្យាបាលជំងឺជូនពលរដ្ឋដោយឥតគិតថ្លៃនេះ ធ្វើឡើងតាមរយៈក្រុមគ្រូពេទ្យស្ម័គ្រចិត្តនៃអាជ្ញាធរខេត្តរតនគិរី ដែលប្រើប្រាស់ថ្ងៃឈប់សម្រាករបស់ខ្លួនក្នុងកម្មវិធីលើកកម្ពស់ និងផ្ដល់សេវាសុខភាពទូទៅជូនពលរដ្ឋ។
មេឃុំប៉ាតេ លោក រម៉ាម យុត មានប្រសាសន៍បញ្ជាក់ថា ប្រជាពលរដ្ឋជនជាតិដើមភាគតិចកន្លងទៅនេះមិនបានយកចិត្តទុកដាក់លើការថែទាំសុខភាពបានល្អនោះទេ ដោយសារកង្វះខាតចំណេះដឹង និងប្រាក់ចំណូលគ្រួសារមានកម្រិតទាប។ លោកថា កម្មវិធីលើកកម្ពស់សុខភាព និងសេវាព្យាបាលជំងឺពលរដ្ឋឥតគិតថ្លៃនេះ មានសារសំខាន់ណាស់សម្រាប់សហគមន៍ជនជាតិដើមភាគតិចនៅពេលបច្ចុប្បន្ន៖ «យើងខ្វះខាតអនាម័យគឺយើងឈឺថ្កាត់យើងខ្វះខាតយើងទៅពេទ្យ ឥឡូវពេទ្យមកខ្ញុំអរណាស់ ពេទ្យគេមកពិនិត្យដល់ភូមិ»។
ឃុំប៉ាតេ គឺជាឃុំទីមួយ ដែលកម្មវិធីលើកកម្ពស់ និងផ្ដល់សេវាសុខភាពឥតគិតថ្លៃចូលមកពិនិត្យសុខភាពជូនពលរដ្ឋក្នុងឆ្នាំ២០១៧។
ប្រជាពលរដ្ឋភូមិគងយុ លោក រម៉ាម ប្រេញ បញ្ជាក់ថា នៅក្នុងភូមិមិនមានប៉ុស្តិ៍សុខភាពទេហេតុនេះ អ្នកភូមិក្រីក្រជួបបញ្ហាលំបាកកាលណាមានជំងឺត្រូវធ្វើដំណើរទៅមណ្ឌលសុខភាពស្រុកនៅឆ្ងាយពីភូមិ។ លោកថា អ្នកភូមិចង់ឲ្យរាជរដ្ឋាភិបាលបង្កើតប៉ុស្តិ៍សុខភាព ឬផ្ដល់សេវាពិនិត្យជំងឺដល់ពលរដ្ឋផ្ទាល់នៅមូលដ្ឋាន ដោយសារអ្នកភូមិភាគច្រើនជាអ្នកក្រីក្រគ្មានប្រាក់សម្រាប់សេវាកម្មព្យាបាលជំងឺតាមមន្ទីរពេទ្យឯកជននោះទេ៖ «ពិបាកមែនទែនពិបាកឈឺអត់លុយ អ៊ីចឹងឥឡូវមានពេទ្យស្រុកពេទ្យភូមិអត់មានទេ សំណូមពរចង់ជាជំងឺ»។
កាលពីឆ្នាំ២០១៦ កម្មវិធីលើកកម្ពស់ និងផ្ដល់សេវាសុខភាពជូនពលរដ្ឋឥតគិតថ្លៃនេះ ធ្វើឡើងនៅភូមិចំនួន៩ ក្នុងស្រុកចំនួន៦ ក្នុងខេត្តរតនគិរី និងមានពលរដ្ឋជាង ៤.៥០០នាក់ មកទទួលសេវាពិនិត្យជំងឺឥតគិតថ្លៃនេះ៕
No comments:
Post a Comment