ប្រជាពលរដ្ឋរស់នៅតាមមាត់ទន្លេតូច ក្នុងឃុំល្វេ ស្រុកកោះសូទិន ខេត្តកំពង់ចាម មិនពេញចិត្តចំពោះបរិស្ថានក្បែរទីប្រជុំជនផ្សារព្រែកសណ្តែក។ ពលរដ្ឋមិនពេញចិត្តដោយសារនៅតាមមាត់ទន្លេតូចក្បែរផ្សារនេះ ម្ខាងនៃស្រុកស៊ីធរកណ្តាល ខេត្តព្រៃវែង មានសំរាមជាច្រើនត្រូវបានគេយកមកបោះចោល ហើយហូរចូលទឹកទន្លេថែមទៀតផង។ អភិបាលស្រុកស៊ីធរកណ្តាល បញ្ជាក់ថា អាជ្ញាធរធ្លាប់ចាត់វិធានការលើករណីនេះជាច្រើនដងមកហើយ ប៉ុន្តែលោកថា នឹងរៀបចំតំបន់នោះឱ្យប្រសើរក្នុងពេលឆាប់ៗនេះ។
បើទោះបីជាមានស្លាកសញ្ញាដែលសរសេថា ហាមចោលសំរាមក៏ដោយ ប៉ុន្តែសំរាម ពិសេសពពួកថង់ប្លាស្ទិច គឺព័ទ្ធជុំវិញស្លាកសញ្ញានោះតែម្តង។ សំរាមមិនត្រឹមតែព័ទ្ធបង្គោលស្លាកសញ្ញានោះប៉ុណ្ណោះទេ ប៉ុន្តែហូរហែតាំងពីមាត់ច្រាំង រហូតដល់មាត់ទឹកទន្លេតែម្តង។ ពលរដ្ឋមួយចំនួនដែលរស់នៅត្រើយម្ខាងនៃទន្លេតូច គឺនៅខាងឃុំល្វេ ស្រុកកោះសូទិន មិនពេញចិត្តចំពោះបញ្ហានេះ ត្បិតមានពលរដ្ឋមួយចំនួនប្រើប្រាស់ទឹកទន្លេនោះដែរ ពិសេសសម្រាប់សត្វពាហនៈរបស់ពួកគាត់។ សំរាមទាំងនោះមានច្រើន គឺស្ថិតនៅត្រើយម្ខាងក្នុងឃុំព្រែកចង្ក្រាន ស្រុកស៊ីធរកណ្តាល ខេត្តព្រៃវែង ព្រោះជាទីប្រជុំជនផ្សារព្រែកសណ្តែក។
ពលរដ្ឋនៅឃុំល្វេ មួយរូប លោក បូ រី មានប្រសាសន៍ថា សំរាមទាំងនោះភាគច្រើនពលរដ្ឋអ្នកលក់ដូរនៅផ្សារសណ្តែក ជាអ្នកយកមកចោល។ លោកយល់ថា ត្បិតតែពលរដ្ឋខ្លះមានប្រព័ន្ធទឹកស្អាតប្រើប្រាស់ក៏ដោយ ប៉ុន្តែការបោះចោលសំរាមចូលទន្លេបែបនេះ គឺជារឿងមិនល្អទេ ព្រោះវាធ្វើឱ្យប៉ះពាល់ដល់បរិស្ថាន ឬសុខភាព មនុស្ស សត្វ ជាដើម៖ «យកមកបោះចោលអ៊ីចឹងវាគោកទន្លេ គោកអីអស់ហើយ។ អាហ្នឹងមកពីផ្សារហ្នឹងគេមិនដោះស្រាយ»។
សំរាមជាច្រើនបានរសាត់ចូលទៅក្នុងទឹកទន្លេតូចធ្វើឱ្យទឹកកខ្វក់ ហើយនៅពេលធ្វើដំណើរឡើងចុះស្ពានសមាគមន៍ ឬស្ពានបណ្តោះអាសន្ន ដែលភ្ជាប់ពីឃុំល្វេ ស្រុកកោះសូទិន មកកាន់ឃុំព្រែកចង្ក្រាន ស្រុកស៊ីធរកណ្តាល នោះ ក្លិនស្អុយបានភាយចេញពីសំរាម។ យូរៗម្តង ពលរដ្ឋនៅឃុំល្វេ បានយកសត្វគោក្របីមកលាងទឹកទន្លេតូចថែមទៀត។
ពលរដ្ឋមួយរូបទៀត លោក ឡុង វណ្ណដា បញ្ជាក់ថា បញ្ហាសំរាមនេះកើតឡើងជាច្រើនឆ្នាំមកហើយ ប៉ុន្តែគ្មានវិធានការដោះស្រាយឡើយ។ លោកថា ប្រសិនរាជរដ្ឋាភិបាល ឬអង្គការជាដៃគូជួយដោះស្រាយ ទើបអាចមានប្រសិទ្ធភាពជាង។
ពលរដ្ឋ និងអាជីវករលក់ដូរនៅផ្សារព្រែកសណ្តែកខ្លះ បានបដិសេធថា ពួកគេមិនបានចោលសំរាមទីនោះទេ ហើយបានទំលាក់ការទទួលខុសត្រូវនេះទៅលើអ្នកលក់ដូរតូចតាច ឬអ្នកលក់ដូរបន្លែផ្លែឈើទៅវិញ។
អភិបាលស្រុកស៊ីធរកណ្តាល លោក មុនី បណ្ឌិត មានប្រសាសន៍នៅថ្ងៃទី២ កុម្ភៈ ថា កន្លងមកអាជ្ញាធរតែងចាត់វិធានការលើករណីនេះជាច្រើនលើកច្រើនសា ដោយមានទាំងនាំសិស្សសាលាវិទ្យាល័យមកសំអាតទៀតផង។ បន្ថែមពីនេះ អាជ្ញាធរក៏បានអប់រំណែនាំពលរដ្ឋ និងអាជីវករនៅផ្សារព្រែកសណ្តែក មិនឱ្យបោះចោលសំរាមទៅមាត់ទន្លេតូចនោះឡើយ ប៉ុន្តែអាចដោយសារទម្លាប់របស់ពលរដ្ឋ ទើបបញ្ហានេះនៅតែកើតឡើង។
យ៉ាងនេះក្តី អភិបាលស្រុករូបនេះ បញ្ជាក់ថា អាជ្ញាធរបានរៀបចំគម្រោងច្បាស់លាស់ហើយ គឺកែប្រែ និងរៀបចំផ្សារព្រែកសណ្តែក ឱ្យបានប្រសើរឡើង ព្រមទាំងចាត់វិធានការលើបញ្ហាសំរាម និងការបង្ហូរទឹកស្អុយចូលទន្លេ៖ «ព្រោះរឿងនេះមិនមែនជារឿងតែអាជ្ញាធរមួយទេ គឺជារឿងទាំងអស់គ្នា។ រឿងសំរាមនេះ គឺផ្តើមចេញទាំងអស់គ្នា បើផ្តើមចេញតែពីអាជ្ញាធរមួយក៏ធ្វើការងារហ្នឹងមិនបានល្អទេ គឺត្រូវតែមានការចូលរួមពីគ្រប់សមាសភាគី ពិសេសប្រជាពលរដ្ឋដែលនៅជិតហ្នុងតែម្តង»។
ករណីបោះចោលសំរាម និងបង្ហូរទឹកស្អុយចូលទន្លេ គឺរងការរិះគន់ពីពលរដ្ឋនៅឃុំល្វេ ភាគច្រើន ហើយពួកគាត់ក៏ធ្លាប់បានស្នើទៅអាជ្ញាធរមូលដ្ឋានដើម្បីឱ្យជួយដោះស្រាយថែមទៀត។ ជំទប់ទី១ ឃុំល្វេ មកពីគណបក្សសិទ្ធិមនុស្ស លោក ឈន់ ឈឿន មានប្រសាសន៍ថា កន្លងមកពលរដ្ឋពិតជាធ្លាប់ស្នើឱ្យចាត់វិធានការលើករណីនេះ ប៉ុន្តែមិនមានប្រសិទ្ធិភាពទេ។ លោកបន្តថា ត្បិតតែពលរដ្ឋមិនបានប្រើប្រាស់ទឹកទន្លេដោយផ្ទាល់ក៏ដោយ ប៉ុន្តែទឹកស្អាតដែលពួកគាត់កំពុងប្រើប្រាស់ គឺគេបូមទឹកពីទន្លេដើម្បីយកទៅចម្រុះដូចគ្នាដែរ៖ «សំណូមប្រជាពលរដ្ឋក្រុមប្រឹក្សាឃុំយើងក៏បានលើកដែរ ស្តីពីបរិស្ថាន ពីព្រោះទីមួយទឹកអី វាត្រូវការប្រើទឹកហ្នឹងដែរ»។
ជំទប់ឃុំរូបនេះយល់ថា ការចោលសំរាម និងបង្ហូរទឹកស្អុយចូលទន្លេតូច គឺមិនត្រឹមតែប៉ះពាល់ដល់បរិស្ថាន និងសុខភាពមនុស្សសត្វប៉ុណ្ណោះទេ ប៉ុន្តែវាប៉ះពាល់ដល់ការរស់នៅរបស់មច្ឆាជាតិក្នុងទឹកទៀតផង៕
No comments:
Post a Comment